ߢߌ߬ߣߊ߲߫ ߛߊ߲߭ ߢߌ߲߬ ߠߊ߫߸ ߊߓߌߖߊ߲߬ ߠߋ߬ ߝߘߊ߬ߝߌ߲߬ ߞߊ߲ ߠߎ߬ ߡߞߊߘߊ߲ ߞߊ߲߬ߘߏ߬ ߞߊ߲ ߓߎ߬ߦߌ ߘߌ߫، ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߘߏ߲߬ߖߟߎ߬ߡߊ߬ߟߌ߬ߟߊ߸ ߊ߬ ߣߌ߫ ߝߘߏ߬ߓߊ߬ ߞߙߏߝߏ ߛߌ߲߬ߝߏ߲ ߖߌ߬ߣߍ߬ ߞߣߐ߫߸ ߛߟߊߕߌ߯ ߓߊߛߓߊ߬ߕߌ߫ ߛߘߌ߬ߓߋ߫ ߞߊ߬ ߞߟߌߟߌ߫ ߞߙߍߞߙߍߣߍ߲߫ ߠߊߛߋ߫ ߞߵߊ߬ ߓߍ߲߬ ߝߊ߬ߛߏ߬ ߞߊ߲ ߠߎ߬ ߡߐ߬ߟߐ߲߬ߡߊ߬ߦߊ ߡߊ߬߸ ߡߊ߲߬ߕߎ߬ߙߋ߬ߦߊ ߣߌ߫ ߝߘߊ߬ߝߌ߲߬ߠߊ߬ ߜߙߋ ߟߊ߫ ߛߌߣߌ߲߫ ߣߊ߬ߕߐ ߢߍߛߌ߱ ߞߏߛߐ߲߬.
ߝߘߏ߬ߓߊ߬ ߜߙߊ ߣߌ߲߬ ߢߣߊߓߊ߮ ߟߎ߬ ߢߊߞߘߐ߫߸ ߛߟߊߕߌ߯ ߓߊߛߓߊ߬ߕߌ߫ ߛߘߌ߬ߓߋ߫ ߡߍ߲ ߦߋ߫ ߒߞߏ ߕߏ߰ߝߏ ߘߏ߫ ߟߎ߫ ߡߊ߬ߞߟߐ߬ ߛߊ߲ߘߐ ߘߌ߫߸ ߏ߬ ߞߊ߬ ߓߋߟߋ߲ߠߊ߫ ߤߏߞߌ߫ ߞߍ߫ ߞߵߊ߬ ߣߌߘߐߞߏ ߦߌ߬ߘߊ߬߸ ߢߊ ߞߊ߫ ߞߊ߲߫ ߞߊ߬ ߟߐ߬ ߡߍ߲ ߘߐ߫ ߞߊߟߌߦߊ߫ ߓߟߏ ߡߊ߬ ߕߋ߲߬ ߞߊ߬ߣߌ߲߬، <<ߊ߲ ߡߌ߬ߙߌ߲߬ߘߌ ߟߊ߫ ߛߌߣߌ߲߫ ߢߍߛߌ߮ ߦߋ߫ ߕߊ߬ߡߌ߲߬ ߠߊ߫ ߛߌ߲ߡߌ߲߫ ߞߊ߲ ߠߎ߬ ߞߊ߬ߙߊ߲ ߠߋ߬ ߝߍ߬߸ ߊ߬ ߣߴߊ߬ ߓߊߓߋ߭.>> ߊ߬ ߞߵߏ߬ ߟߋ ߝߐ߫ ߛߊ߬ߙߌ ߘߐ߫߸ ߘߎ߰ ߣߊ߬ߣߍ߲ ߠߎ߬ ߟߊ߫ ߓߋߟߋ߲ߠߊ ߕߎ߬ߡߊ ߟߊ߫ ߊߓߌߖߊ߲߬ ߞߣߐ߫.
ߝߘߊ߬ߝߌ߲߬ߠߊ߬ ߟߐ߲ߠߌ߲ߦߊ ߟߎ߬ ߡߞߊߘߊ߲ߓߊ߮ ߢߌ߲߬ ߠߊ߫ ߝߐߟߌ߫ ߘߐ߫߸ ߞߊ߲ ߕߍ߫ ߓߌ߬ߟߊ߬ߢߐ߲߰ߡߊ߬ ߝߋ߲ ߘߐߙߐ߲߫ ߘߌ߫ ߘߋ߬߸ ߊ߬ ߦߋ߫ <<ߟߊ߬ߡߊ߲߬ߘߟߌ߬ ߓߘߐ>> ߟߋ߬ ߘߌ߫߸ ߊߘߡߊߘߋ߲ ߠߎ߬ ߟߊ߫ ߘߎ߬ߡߊ߬ߙߋ߲ ߠߋ߬ ߦߴߊ߬ ߘߌ߫ <<ߊ߬ ߣߴߊ߬ߟߋ ߟߋ߬ ߓߋ߲ߓߊ ߟߎ߬ ߟߊ߫ ߥߘߋ߬ߥߘߋ߬ߟߌ ߟߊߕߊ߲߬ߓߊ߮ ߘߌ߫>>ߏ߬ ߟߋ ߞߏߛߐ߲߬߸ ߊ߬ ߞߊ߬ ߞߎߟߎ߲ߖߋߟߌ ߣߌ߫ ߕߊ߰ߛߌ߬ߓߌߟߊ ߞߍ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߦߋ߫߸ ߏ߬ ߡߍ߲ ߦߋ߫ ߒߞߏ ߛߓߍߛߎ߲ ߛߌ߲ߘߌߓߊ߮ ߘߌ߫߸ ߏ߬ ߡߍ߲ ߞߊ߬ ߡߎ߬ߙߊ߲ ߘߏ߫ ߘߌ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߡߊ߬ ߊ߬ߟߎ߬ ߟߊ߫ ߞߊ߲ ߠߎ߬ ߛߓߍ߫ ߞߊ߲ߡߊ߬ ߞߊ߬ߦߌ߯ ߥߊ߯ߕߌ߫ ߖߊ߲߫.
ߓߊ߬ߙߌ߬ ߒߞߏ ߟߊߓߐ ߣߴߊ߬ ߕߊ߫߸ ߞߏ ߟߎ߬ ߡߊ߫ ߓߊ߲߫ ߢߊߦߋ߫ ߟߊ߫ ߡߎߣߎ߲߬: ߘߐ߰ߘߏ߲߬ ߞߍߣߍ߲߫ ߕߍ߫ ߖߘߍ߬ ߞߊ߲ ߠߎ߬ ߟߊ߫߸ ߘߋ߲ߣߍ߲ ߝߊ߲߬ߓߊ ߓߘߊ߫ ߝߟߌ߬ ߊ߬ߟߎ߬ ߛߎ߮ ߡߊ߬߸ ߟߐ߲ߠߌ߲߫ ߞߘߐ߬ߡߊ߲ ߠߎ߬ ߦߋ߫ ߓߎߙߎ߲ߞߐ ߟߋ߬ ߞߊ߲߬، ߛߟߊߕߌ߯ ߓߊߛߓߊ߬ߕߌ߫ ߛߘߌ߬ߓߋ߫ ߞߵߊ߬ ߦߌ߬ߘߊ߬߸ ߞߏ߫ ߘߋ߲ߣߍ߲ ߡߍ߲ ߠߊߓߏ߲߬ߢߊ߬ߣߍ߲߫ ߝߊ߬ ߓߘߊ ߟߊ߬ߞߟߏ߬ߞߟߏ߬ߟߌ ߞߊ߲ߞߕߐߡߊ߬߸ ߊ߬ ߞߵߊ߬ ߣߊ߫ ߛߌ߲ ߡߌ߲߬ ߞߊ߲ ߡߍ߲ ߠߊ߫߸ ߊ߬ ߡߴߏ߬ ߣߴߊ߬ ߛߓߍߟߌ ߓߊߓߋ߬߸ ߏ߬ ߦߋ߫ ߟߋ߬ ߦߏ߫ <<ߦߙߌ߫ ߖߎ߸ ߣߌ߫ ߟߌߟߌ߲߫ ߕߴߊ߬ ߟߊ߫.>> ߓߊߏ߬߸ ߊ߬ ߦߋ߫ ߞߊ߬ߙߊ߲ ߠߋ߬ ߞߊ߲߬߸ ߊ߬ ߕߍ߫ ߢߊߦߋߟߌ߫ ߞߊ߲߬߸ ߊ߬ ߦߋ߫ ߡߐ߰ ߟߊ߬ߘߍ߲߮ ߠߋ߬ ߞߊ߲߬߸ ߊ߬ ߕߍ߫ ߟߊ߬ߘߊ߲߬ߠߌ߲߬ ߞߍ߫ ߟߊ߫߸ ߊ߬ ߦߋ߫ ߕߊ߬ߡߌ߲߬ ߠߊ߫ ߕߍ߰ ߟߴߊ߬ ߖߘߍ߬ ߘߐ߫ ߟߋ߬ ߕߎ߲߫.
ߓߊߛߓߊ߬ߕߌ߫ ߛߘߌ߬ߓߋ߬ ߞߎߡߊ߫ ߘߊ߫ ߥߊߟߌ߫ ߞߊ߲ ߠߎ߬ ߟߊ߫ ߝߊ߲߬ߞߊ߬ ߛߐߘߐ߲ ߞߊ߲߬߸ ߞߏ߫ ߡߐ߰ ߕߴߊ߬ ߓߊ߲߬ ߥߊߟߌ߫ ߟߐ߲ߠߌ߲ ߘߐ߫ ߛߊ߫߸ ߓߊ߬ߙߌ߬ ߢߊ߫ ߟߋ߬ ߦߴߊ߬ ߡߊ߬، ߓߊߏ߬ <<ߊ߲ ߘߋ߲ ߠߎ߬ ߕߍ߫ ߞߘߐߓߐ߫ ߟߴߊ߬ߟߎ߬ ߞߎ߲߬ ߘߐ߬ ߟߐ߲ߠߌ߲ ߡߊ߬ ߘߋ߬߸ ߓߊ߬ߙߵߊ߬ߟߎ߬ ߦߋ߫ ߛߋ߫ ߟߊ߫ ߞߊ߲߫ ߛߌ߲ߞߊߣߍ߲ ߞߎߡߊ ߟߎ߬ ߘߊߛߊ߬ߦߌߛߊ߬ߦߌ߬ ߟߊ߫ ߢߊ ߡߍ߲߸ ߊ߬ߟߎ߬ ߦߋ߫ ߞߘߐߓߐ߫ ߟߴߏ߬ ߟߋ ߟߊ߫،>> ߊ߬ ߞߵߏ߬ ߟߋ ߝߐ߫.
ߊ߬ ߞߵߊ߬ ߦߌ߬ߞߊ߬ ߞߏ߫ ߡߊ߲߬ߘߋ߲߬ ߞߊ߲ ߠߎ߬߸ ߥߟߊ߫ ߝߎߟߊ߫ ߞߊ߲ ߞߊ߬ߙߊ߲ ߝߘߊ߬ߝߌ߲߬ߠߊ߬ ߖߊ߯ߓߘߊ ߟߎ߬ ߟߊ߫߸ ߞߊ߬ ߟߐ߲ߞߏ ߞߊ߬ߙߊ߲߫ ߊ߬ߟߎ߬ ߘߐ߫߸ ߏ߬ ߕߍ߫ ߞߎ߲߬ߝߍ߬ߞߏ߫ ߘߌ߫ ߘߋ߬߸ ߏ߬ ߦߋ߫ <<ߡߊ߲߬ߕߎ߬ߙߋ߬ߦߊ>> ߣߌ߫ <<ߤߊߞߟߌ ߟߊ߫ ߘߍߒߖߘߍߟߦߊ>> ߟߋ߬ ߘߌ߫.
ߞߎߡߊ߫ ߟߊߓߊ߲߫ ߘߐ߫߸ ߛߟߊߕߌ߯ ߛߘߌ߬ߓߋ߫ ߞߵߊ߬ ߦߌ߬ߘߊ߬ ߞߏ߫ ߝߏ߫ ߟߊ߬ߞߟߏ߬ߞߟߏ߬ߟߌ ߣߌ߫ ߛߋߒߞߏߟߦߊ ߣߌ߫ ߛߋߒߞߏߟߊߘߐߦߊ ߟߎ߬ ߣߌ߫ ߦߟߌߟߊ߲ߘߌߦߊ߫ ߘߍ߲߰ߦߊ߬ߣߍ߲ ߠߎ߬ ߦߋ߫ ߞߍ߫ ߝߘߊ߬ߝߌ߲߬ ߞߊ߲ ߠߎ߬ ߟߋ߬ ߘߐ߫ ߦߊ߲߬، ߓߊߏ߬ << ߊ߲ ߞߊ߫ ߞߊ߲߫ ߞߊ߬ ߛߋ߫ ߟߐ߲ߞߏ ߟߎ߬ ߘߟߊߡߌ߬ߘߊ߬ ߟߊ߫߸ ߞߵߊ߬ߟߎ߬ ߛߓߍ߫߸ ߞߊ߬ ߟߊ߬ߖߍ߲߬ߛߍ߲߬ߠߌ߲ ߠߎ߬ ߞߍ߫߸ ߞߊ߬ ߛߌ߲ߘߟߌ ߟߎ߫ ߥߓߊ߬ߞߏ߬ߞߍ ߞߍ߫ ߒ߬ ߠߊ߫ ߞߊ߲ ߠߎ߬ ߘߐ߫.>>
ߊ߬ ߞߵߊ߬ ߦߌ߬ߘߊ߬ ߞߏ߫: << ߊ߲ ߠߊ߫ ߞߊ߲ ߠߎ߬ ߞߊ߬ߙߊ߲߬ߓߊߟߌߦߊ߸ ߏ߬ ߦߴߊ߲ ߘߋ߲ ߠߎ߬ ߟߊ߫ ߛߌߣߌ߲ߢߍߛߌ߮ ߛߏ߲߬ߧߊ ߟߋ߬ ߘߌ߫߸ ߞߵߊ߲ ߓߋ߲ߓߊ ߟߎ߬ ߝߣߊ߫ ߖߊ߲߬ߝߊ߬،>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
