ߕߎߟߊߝߌ߲ ߕߋ߬ߟߋ߫ ߂߆ ߡߊ߬߸ ߒߞߏ ߟߊ߫ ߡߊ߲߬ߕߏ߲߬ߕߍ߬ ߜߙߊ ߘߟߊߞߊ߬ ߘߊ߫ ߊߓߌߖߊ߲߬ ߞߣߐ߫، ߕߟߋ߬ ߝߟߐ ߓߎ߲ߓߎ߲߫ ߘߊ߫ ߞߏ߫ ߛߌߦߊߡߊ߲߫ ߠߋ߬ ߡߊ߬߸ ߓߋߟߋ߲ߠߊ߫ ߝߊߘߌ߲ ߠߎ߬ ߞߍ߫ ߘߊ߫߸ ߞߊ߬ ߝߘߊ߫ ߗߋߘߋ߲߫ ߠߎ߫ ߟߊ߫߸ ߡߍ߲ ߠߎ߬ ߓߐ߫ ߘߊ߫ ߖߌ߬ߣߍ߬߸ ߡߊ߬ߟߌ߸ ߟߌߓߋߙߌߦߊ߫߸ ߊ߬ ߣߌ߫ ߞߐߞߊ߲߫ ߖߡߊߣߊ߫ ߜߘߍ߫ ߟߎ߫.
ߖߌ߬ߣߍ߬ߞߊ ߟߎ߬ ߟߊ߫ ߝߊ߲߭ ߝߍ߬߸ ߞߏ߲߬ߓߏ ߞߏߕߍߓߊ߲߫ ߞߡߊ߬ߙߊ߬ ߞߎߡߊ߫ ߘߊ߫ ߓߊߛߌߦߊ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߓߍ߯ ߞߊ߫ ߞߊ߲߫ ߞߵߊ߬ ߝߐ߫ ߟߋ߬ ߞߏ߫ <<ߝߘߊ߬ߝߌ߲߬ ߘߊ߲ߘߊߟߌ>>.
<<ߖߐ߬ߡߊ߬ߦߊ ߟߵߊ߬ ߝߐ ߘߌ߫ ߞߏ߫ ߦߋߢߐ߲߯ߦߊ ߘߊ߲ߘߊߟߌ، ߊ߬ ߝߐ߫ ߢߊ߫ ߓߘߍ ߦߋ߫ ߡߍ߲ ߘߌ߫߸ ߏ߬ ߟߋ ߝߘߊ߬ߝߌ߲߬ ߘߊ߲ߘߊߟߌ ߘߌ߫، ߓߊߏ߬߸ ߝߘߊ߬ߝߌ߲߬ߠߊ߬ ߝߣߊ߫ ߕߊ߫ ߟߐ߲ߞߏ ߦߴߊ߬ ߓߟߏ߫ ߖߐ߫.>> ߊ߬ ߞߵߏ߬ ߟߋ ߝߐ߫.
ߊ߬ ߞߎߡߊ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߞߊ߲߬߸ ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌߓߊ߮߸ ߏ߬ ߡߍ߲ ߞߊ߬ ߕߌߙߌ߲ߠߌ߲ ߞߍ߫ ߞߊ߬ ߛߋ߫ ߖߊ߲߬ߞߊߙߏ߫ ߃߁߇ ߓߊߛߌ ߟߊߘߊ߲߫ ߢߊ ߛߓߍ߫ ߟߊ߫:
<<ߤߊ߲߯ ߕߋ߲߬߸ ߊ߲ߠߎ߬ ߡߊ߫ ߛߋ߫ ߝߋ߲߫ ߟߊ߫ ߟߴߏ߬ ߕߊ ߏ߬ ߞߊ߲߬>> ߞߏ߲߬ߓߏ ߞߏߕߍߓߊ߲߫ ߠߋ߬ ߞߊ߲߫ ߏ߬ ߘߌ߫، ߞߣߊ߬ߕߏ߫ ߝߘߊ߬ߝߌ߲߬ ߘߊ߲ߘߊߟߌ ߛߌ߰ ߢߊ߬ ߞߘߐ ߟߎ߬ ߢߊߝߐ߫ ߟߊ߫߸ ߞߵߊ߬ ߦߌ߬ߘߊ߬ ߞߏ߫: <<ߡߍ߲ ߠߎ߬ ߕߘߍ߬ ߓߊߛߌ ߢߌߣߌ߲߫ ߠߊ߫߸ ߏ߬ ߟߎ߫ ߕߎ߲߬ ߕߍ߫ ߘߊ߲ߘߊߟߌ߫ ߞߍ߫ ߟߊ߫.>>
ߤߊߟߌ߬ߛߊ߬ ߖߌ߬ߣߍ߬ ߞߣߐ߫߸ ߟߊ߱ߖߌ߬ ߡߊ߬ߡߊߘߌ߫ ߛߎ߬ߥߊ߬ߙߋ߫ ߡߍ߲ ߦߋ߫ ߒߞߏ ߕߌߙߌ߲ߘߊ ߗߋߕߌ߮ ߘߌ߫ ߞߊ߲ߞߊ߲߫ ߖߊ߫ߓߘߊ߫ ߖ߭ߎ߬ߟߌߛ ߢߙߋߙߋ߫ ߟߊ߫߸ ߏ߬ ߞߊ߬ ߘߏ߫ ߝߐ߫ ߛߟߏ߬ߡߣߊ߬ ߞߊ߲ߕߍ߫ ߞߊ߲߬:
<<ߦߋߟߋ߲ ߓߘߊ߫ ߞߎ߲߬ߓߐ߫߸ ߣߊߟߌ߬ߡߎ߲߫ ߝߊ߬ߞߊ߲߬ ߞߊߙߊ߲ ߘߌ߫، ߛߓߍߛߎ߲߫ ߜߘߍ ߡߍ߲ ߠߎ߬ ߕߍ߬ߘߍ߫ ߦߊ߲߬ ߞߊ߬ ߞߐ߲߰ ߒߞߏ ߢߍ߫߸ ߏ߬ ߟߎ߫ ߕߍ߬ߘߍ߫ ߘߌ߬ߓߌ ߟߋ߬ ߘߌ߫.>>
ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߖߘߍ߬ߟߐ߲ ߕߐ߬ߣߐ ߞߊ߫ ߓߏ߲߬ ߞߏߛߓߍ߫߸ ߖߘߍ߬ߟߐ߲ ߠߋ߬ ߦߋ߫ ߟߐ߲ߠߌ߲ߦߊ ߓߍ߯ ߓߊߖߎ ߘߌ߫، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߡߐ߱߸ ߊ߬ ߣߌ߫ ߓߌߦߊ߲ ߡߍ߲ ߠߎ߬ ߟߊߘߊ߲ߣߍ߲߫ ߊߟߊ߫ ߓߟߏ߫߸ ߘߏ߬ߣߌ߲߬ߓߊ߬ ߣߊ߯ߣߌ߲߫ ߠߋ߬ ߏ߬ ߟߎ߫ ߞߎ߲߬߸ ߡߍ߲ ߠߎ߬ ߦߋ߫ ߘߏ߬ߣߌ߲߬ ߓߊߖߎߟߞߊ ߟߎ߬ ߘߌ߫ ߝߋߎ߫: ߖߊ߲߬ߞߊߙߏ߸ ߞߐ߲ߞߐ߸ ߝߊߘߌߦߊ߸ ߊ߬ ߣߌ߫ ߤߌߟߍ. <<ߕߌߙߌ߲ߠߌ߲ ߓߍ߯ ߟߊߘߍ߬ߣߍ߲ ߦߋ߫ ߞߍ߫ ߟߊ߫ ߘߏ߬ߣߌ߲߬ߓߊ߬ ߣߊ߯ߣߌ߲ ߏ߬ ߟߎ߫ ߟߋ߬ ߟߊߖߌ߰ ߢߊ߬ ߢߌߣߌ߲ ߠߊ߫߸ ߏ߬ ߟߎ߫ ߟߋ߬ ߘߏ߲߬ ߦߋ߫ ߘߎߢߊߘߐߕߍ߮ ߡߌ߬ߘߊ߬ߢߊ ߝߍ߬ߙߍ ߟߎ߬ ߘߌ߫.>>
ߡߊ߬ߟߌ ߗߋߘߋ߲ ߘߏ߫ ߟߊ߫ ߝߐߟߌ߫ ߘߐ߫߸ ߓߐ߬ߟߐ߲߬ߞߊ߬ ߝߊߕߎߡߊߕߊ߬ ߞߏߣߋ߫߸ ߏ߬ ߟߊ߫ ߛߙߊ߬ߣߎ߲ ߓߏ߬ߙߌ߬ ߘߊ߫ ߞߊ߲߫ ߞߏ ߥߎ߬ߦߊ߲߬ߞߌ߬ߟߌ ߟߋ߬ ߞߊ߲߬:
<<ߌ ߘߋ߲ ߕߊ߭ ߞߊ߬ ߥߴߊ߬ ߘߌ߫ ߥߊߟߌ߫ ߞߊ߲߫ ߞߊߙߊ߲ ߠߊ߫߸ ߏ߬ ߦߴߌ ߞߢߊ߬ ߦߙߐ ߦߌ߬ߘߊ ߟߋ߬ ߘߌ߫، ߊ߬ ߥߊ߯ߕߌ ߓߘߊ߫ ߛߋ߫ ߡߎ߬ߕߎ߲߬߸ ߞߵߊ߲ ߘߋ߲ ߠߎ߬ ߘߏ߲߬ ߊ߲ ߠߊ߫ ߞߊ߲ ߠߎ߬ ߞߊ߬ߙߊ߲ ߠߊ߫.>>
ߒߞߏ ߕߐ߲ ߡߍ߲ ߦߋ߫ ߊߡߙߌߞߌ߬߸ ߏ߬ ߞߊ߲ߕߌ߮ ߡߎߛߊ߫ ߞߐ߲ߘߍ߫ ߞߊ߬ ߓߍ߯ ߞߟߊߓߎߘߏ߲߬ ߝߘߊ߬ߝߌ߲߬ ߞߊ߲ ߠߎ߬ ߡߐ߬ߟߐ߲߬ߡߊ߬ߦߊ ߟߋ߬ ߟߊ߫.
ߖߌ߬ߣߍ߬ ߞߣߐ߫ ߤߊߟߌ߬ߛߊ߫߸ ߡߊ߲߱ߖߎ߬ ߞߐ߲ߘߍ߫ ߡߍ߲ ߦߋ߫ ߞߊ߲ߞߊ߲߫ ߒ.ߢ.ߦ.ߘ ߖߋ߬ߕߌ߰ߘߊ ߞߊ߲ߕߌ߮ ߘߌ߫߸ ߏ߬ ߞߵߊ߬ ߖߊ߬ ߟߐ߲ߠߌ߲ߦߊ ߓߏߟߏ߲ ߡߍ߲ ߞߊ߲߬߸ ߏ߬ ߟߋ ߕߐ߯ ߞߏ ߘߌ߫:
<<ߕߐ߮ ߟߋ߬ ߦߋ߫ ߡߐ߱ ߛߎ߮ ߦߌ߬ߘߊ߬ ߟߊ߫، ߖߘߍ߬ߞߊ߬ߣߌ߲߬ ߕߐ߮ ߟߎ߫ ߟߋ߬ ߞߊ߫ ߞߊ߲߫ ߞߊ߬ ߓߌ߬ߟߊ߬ ߥߊߟߌ߫ ߕߐ߮ ߟߎ߫ ߣߐ߭ ߘߐ߫ ߒ߬ ߓߘߊ ߦߊ߲߬.>>
ߡߊ߲߬ߘߋ߲߫ ߖߋ߬ߟߌ ߟߎ߫ ߞߊ߬ ߖߊ߲߬ߖߏ߲ ߣߌ߲߬ ߘߐߘߌߦߊ߫ ߞߏߛߓߍ߫߸ ߡߊ߲߬ߘߋ߲߫ ߖߋ߬ߟߌ߬ߓߊ ߞߎߦߊߕߍ߫߸ ߏ߬ ߡߍ߲ ߦߋ߫ ߓߐ߫ ߟߊ߫ ߖߌ߬ߣߍ߬ ߞߣߐ߫߸ ߊ߬ ߣߌ߫ ߡߊ߬ߡߘߎ ߞߎߦߊߕߍ߫߸ ߞߊ߬ ߓߐ߫ ߡߊ߬ߟߌ ߟߊ߫، ߏ߬ ߟߎ߫ ߞߊ߬ ߖߋ߬ߟߌ ߟߎ߫ ߟߐ߬ߘߎ߮ ߦߌ߬ߘߊ߫ ߘߐ߬ߝߐ ߞߣߐ߫߸ ߞߵߊ߬ߟߎ߬ ߟߊ߫ ߕߍߓߊ߯ߦߊ ߞߍߢߊ ߟߎ߫ ߦߌ߬ߘߊ߬.
ߞߎߡߊ ߟߊߓߊ߲ ߘߐ߫߸ ߛߊߘߊ߲ߝߌ߲߫ ߡߊߡߊߘߌ߫ ߕߊ߲߬ߘߏ߬ߕߊ ߞߋߕߊ߬ ߞߎߡߊ߫ ߘߊ߫ ߟߊߓߙߌߦߊ߫ ߕߐ߯ ߘߐ߫߸ ߞߊ߬ <<ߒߞߏ ߞߎ߬ߙߎ߲߬ߘߎ ߟߎ߫ ߕߐ߬ߣߐ>> ߦߌ߬ߘߊ߬߸ ߊ߬ ߣߴߊ߬ߟߎ߬ ߟߊ߫ ߘߍ߬ߞߙߎ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߒߞߏ ߛߘߊߟߊ ߘߐ߫.
ߏ߬ ߟߋ ߞߍ߫ ߘߊ߫ ߕߟߋ߬ ߝߟߐ ߞߎ߲߭ߘߏ߲߬ߣߍ߲ ߘߌ߫߸ ߓߋߟߋ߲ߠߊ߫ ߝߊߘߌ߲ ߠߎ߬ ߟߊ߫߸ ߞߊ߬ ߒߞߏ ߛߍ߬ߘߏ߲߬ߠߊ ߟߎ߫ ߞߎ߲߬ߕߋߟߋ߲ ߣߴߊ߬ߟߎ߬ ߡߙߌߦߊ ߟߎ߫ ߦߌ߬ߘߊ߬ ߟߐ߲ߞߏ ߟߊߥߙߎߞߌ ߘߐ߫߸ ߟߐ߲ߠߌ߲ߦߊ ߟߊߛߓߊ߬ߕߌ ߘߐ߫߸ ߝߘߊ߬ߝߌ߲ ߛߎ߮ ߟߊߕߊ߲߬ߞߊ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
