ߊ߲ ߧߴߊ߲ ߠߊ߫ ߛߊߙߏ߲߬ ߟߊ߬ߖߍ߲߬ߛߍ߲߬ߠߌ߲ ߠߋ߬ ߘߐߛߊ߬ߦߌ߬ ߟߴߊߟߎ߫ ߦߋ߫…
߁߉߅߈ ߕߎߟߊߝߌ߲ ߕߋ߬ߟߋ߫ ߂߈ ߦߋ߫ ߟߏ߲ߓߊ߫ ߢߌ߬ߣߊ߬ߒ߬ߞߐ߬ߓߊߟߌ ߟߋ߬ ߘߌ߫ ߖߌ߬ߣߍ߫ ߘߐ߬ߝߐ ߞߣߐ߫، ߓߌ߬ ߢߐ߲߰ ߟߏ߲߫ ߠߋ߬ ߡߊ߬߸ ߖߌ߬ߣߍ߬ߞߊ ߟߎ߫ ߞߊ߬ <<ߒ ߕߍ>> ߜߊߘߌߜߊߘߌ ߛߎߥߊ߲ߘߌ߫߸ ߞߵߏ߬ ߞߍ߫ ߝߊ߬ߙߊ߲߬ߛߌ߬ ߟߊ߫ ߥߙߎߣߍߦߊ ߞߎ߲߭ߘߏ߲߬ߣߍ߲ ߘߌ߫߸ ߞߊ߬ ߖߌ߬ߣߍ߬ ߟߊ߫ ߖߘߍ߬ߕߌ߰ߦߊ ߓߐ߫ ߡߙߌߛߌ߬ߓߏ ߘߐ߫߸ ߞߵߊ߬ ߞߍ߫ ߜߍ߫ ߘߐ߫ ߞߏ ߘߌ߫، ߟߏ߲߫ ߘߝߐ߬ߡߊ ߣߌ߲߬ ߘߐ߫ ߏ߬ ߘߐ߫߸ ߊ߲ ߧߋ߫ ߒ߬ ߠߊ߫ ߝߊ߬ߛߏ ߡߐ߰ߓߊ߫ ߛߍ߰ߞߍ߬ߟߊ ߏ߬ ߟߎ߬ ߞߏߢߌߡߊߟߐ߲߫ ߠߊ߫ ߓߌ߬߸ ߗߍ߭ ߣߌ߫ ߡߏ߬ߛߏ߸ ߡߍ߲ ߠߎ߬ ߞߊ߬ ߛߍ߱ ߞߍ߫ ߝߊ߬ߛߏ ߦߋ߫߸ ߞߊ߲ߠߊߓߌߟߊ ߦߋ߫߸ ߞߏ߫ ߛߊ߫ ߖߌ߬ߣߍ߬ ߘߌ߫ ߞߍ߫ ߊ߬ ߖߘߍ߬ ߘߌ߫، ߏ߬ ߡߐ߰ߓߊ ߏ߬ ߘߏ߫ ߟߎ߫ ߟߋ߬ ߞߊ߲ߕߌ߯ ߛߋߞߎ߫ ߕߎ߬ߙߋ߬ ߘߌ߫߸ ߛߊߦߌߝߎߟߊߦߌ߫ ߖߊߟߏ߫ ߘߌ߫߸ ߝߏߘߋߓߊ߫ ߞߋߕߊ߬ ߘߌ߫߸ ߞߎ߬ߡߊ߲߬ߖߊ߲߬ ߞߋߕߊ߬߸ ߊ߬ ߣߌ߫ ߌߛߑߡߊߍߟ ߕߎ߬ߙߋ ߣߌ߫ ߛߌߦߊߡߊ߲߫ ߜߘߍ߫ ߟߎ߫، ߏ߬ ߟߎ߫ ߞߊ߬ ߛߍ߰ߓߊ߫ ߟߋ߬ ߞߍ߫ ߖߌ߬ߣߍ߬ ߟߊ߫ ߖߘߍ߬ߕߌ߰ߦߊ ߛߍ߬ߘߏ߲ ߘߐ߫߸ ߊ߬ ߣߌ߫ ߞߊ߲ߕߌ߯ ߛߋߞߎ߬ ߕߎ߬ߙߋ߬ ߡߙߌߦߊ ߟߎ߬ ߓߐߢߟߊ ߘߐ߫، ߏ߬ ߟߎ߫ ߞߵߊ߬ߟߎ߫ ߖߘߍ߬ ߞߍ߫ ߛߘߊߞߊ ߟߋ߬ ߘߌ߫ ߖߌ߬ߣߍ߬ ߦߋ߫߸ ߖߘߍ߬ߕߌ߰ߦߊ ߦߋ߫.
ߖߘߍ߬ߕߌ߰ߦߊ ߛߍ߬ߘߏ߲ ߡߊ߫ ߞߍ߫ ߦߋ߲߬ ߕߋ߲߬߸ ߝߏ߫ ߛߍ߱ ߣߌ߫ ߕߙߐߦߊ، ߛߋߞߎ߬ ߕߎ߬ߙߋ߫ ߞߍ߫ ߘߊ߫ ߛߌߣߌ߲߫ ߦߋߟߊ ߟߋ߬ ߘߌ߫߸ ߊ߬ ߣߌ߫ ߞߎ߲߬ߕߌ߰ ߓߘߍ߫ ߥߞߊ߬ߟߌ߬ߣߍ߲ ߣߌ߫ ߖߛߎ߬ߟߊ߬ߕߍ߯ ߡߟߍ߬ߞߊ߫ ߟߋ߬ ߘߌ߫، ߊ߬ ߡߊ߫ ߕߎ߲߬ߞߎߙߎ߲߫ ߜߟߏ߬ߜߍ ߢߊߞߘߐ߫ ߟߏ߲߫ ߞߋߟߋ߲߫، ߊ߬ߟߋ ߟߋ߬ ߞߵߊ߬ ߥߊ߬ߞߊߟߌ߫ ߞߵߊ߬ ߝߐ߫ ߜߍ ߘߐ߫ ߥߛߊߞߙߊ߫߸ ߞߏ߫: <<ߊ߲ ߧߋ߫ ߞߊ߲ߠߊߓߌߟߊ ߝߍ߬ ߓߟߏߞߏߟߏ߲ߧߊ ߘߐ߫߸ ߞߊ߬ ߕߊ߬ߡߌ߲߬ ߝߋ߲ߕߌ߯ߦߊ ߞߊ߲߬ ߖߐ߲߬ߧߊ ߘߐ߫.>> ߊ߬ ߟߊ߫ ߒ ߕߍ߫ ߜߊߘߌ ߏ߬ ߟߋ ߞߊ߬ ߖߌ߬ߣߍ߬ ߣߌ߫ ߝߊ߬ߙߊ߲߬ߛߌ߬ ߕߍߟߊ ߖߎ߬ߟߎ ߘߐߓߎ߲ߘߊ߲߫، ߏ߬ ߟߎ߬ ߝߣߊ߫ ߞߵߊ߬ߟߎ߬ ߟߊ߫ ߡߐߣߍߦߊ߫ ߟߊߓߐ߫ ߝߙߍ ߟߎ߬ ߕߍ߰ ߞߵߊ߬ ߟߊ߫ ߖߌ߬ߣߍ߫ ߞߊ߲߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߌߟߊ ߝߍ߬߸ ߞߵߊ߬ߟߎ߫ ߓߊ߲߬ ߖߌ߬ߣߍ߬ ߘߐ߫ ߓߘߍ߬ߓߘߍ߬ߟߌ ߡߊ߬ߘߎ߮ ߘߐ߫߸ ߞߵߊ߬ ߡߊ߲߬ߜߏ߬ߦߊ߫ ߞߵߊ߬ ߛߘߊߒߕߊ߲ߧߊ߫، ߓߊ߬ߙߌ߬ ߞߟߊߦߊ ߏ߬ ߓߍ߯ ߣߴߊ߬ ߕߊ߫߸ ߖߌ߬ߣߍ߬ߞߊ ߞߍ߫ ߘߊ߫ ߥߊߟߢߌߡߊߟ߲ߠߊ߫ ߘߌ߫߸ ߊ߬ ߣߌ߫ ߡߎ߬ߢߎ߲߬ߓߊ߯ ߘߌ߫߸ ߞߵߏ߬ ߞߎ߲߭ ߞߍ߫ ߛߋߞߎ߬ ߕߎ߬ߙߋ߬ ߟߊ߫ ߢߍߓߊ߯ߦߊ߫ ߢߌߡߦߊ ߘߌ߫ ߖߘߍ߬ߕߌ߰ߦߊ ߟߊߛߐ߬ߘߐ߲ ߘߐ߫، ߓߊߏ߬߸ ߘߍߒߖߘߍߟߦߊ ߕߎ߲߬ ߓߘߊ߫ ߞߍ߫ ߢߊ߬ߒ߬ߞߐ߬ߓߊߟߌ ߘߌ߫ ߖߌ߬ߣߍ߬ ߞߣߐ߫.
ߒ߬ߓߊ߬߸ ߁߉߅߈ ߕߎߟߊߝߌ߲ ߕߋ߬ߟߋ߫ ߂߈߸ ߂߀߂߅ ߕߎߟߊߝߌ߲ ߕߋ߬ߟߋ߫ ߂߈߸ ߏ߬ ߛߊ߲߬ ߆߇ ߟߋ߬ ߕߋ߲߬߸ ߖߌ߬ߣߍ߬ߞߊ ߓߍ߯ ߢߊ߯ߟߋ߲ߣߍ߲߫ ߏ߬ ߟߋ ߛߍߥߊ ߞߎ߲߬ߠߊ߫ ߓߌ߬، ߞߎߣߎ߲߬߸ ߁߉߅߈ ߠߊ߫߸ ߖߌ߬ߣߍ߫ ߕߍ߬ߘߍ߫ ߡߌ߬ߙߌ߲߬ߘߌ߬ ߞߋߟߋ߲߫ ߠߋ߬ ߘߌ߫߸ ߤߙߐߦߊ ߤߊߡߌ߲ ߕߘߍ߬ ߡߍ߲ ߠߎ߬ ߟߊ߫߸ ߊ߬ߟߎ߫ ߥߞߊ߬ߟߌ߬ߣߍ߲߫ ߕߘߍ߬ ߕߙߐߦߊ ߟߎ߬ ߟߊ߫߸ ߛߴߊ߬ߟߎ߬ ߘߌ߫ ߞߍ߫ ߊ߬ߟߎ߫ ߖߘߍ߬ ߘߌ߫، ߓߌ߬߸ ߖߌ߬ߣߍ߬ ߓߘߊ߫ ߞߍ߫ ߖߘߍ߬ߕߌ߮ ߘߌ߫߸ ߓߊ߬ߙߌ߬ ߤߊ߲߯ ߕߋ߲߬ ߜߟߍ߬ߦߊ ߣߌ߫ ߛߍ߱ ߏ߬ ߡߊ߫ ߓߊ߲߫، ߡߍ߲ ߠߎ߬ ߞߊ߬ ߖߌ߬ߣߍ߬ߞߊ ߟߎ߬ ߞߍ߫ ߊ߬ߟߎ߫ ߖߘߍ߬ ߘߌ߫߸ ߏ߬ ߟߎ߫ ߞߵߏ߬ ߞߍ߫ ߟߋ߬ ߛߊ߫ ߖߌ߬ߣߍ߬ ߘߌ߫ ߝߊ߲߬ߞߊ߬ ߞߎߘߊ߫ ߛߐ߬ߘߐ߲߬߸ ߞߵߊ߬ ߟߊߘߍ߬ ߞߵߊ߬ ߞߍ߫ ߝߋ߲߫ ߘߌ߫߸ ߞߵߊ߬ߟߎ߬ ߓߍ߯ ߞߍ߫ ߡߙߌߦߊ߫ ߞߋߟߋ߲߫ ߞߊ߲߬، ߛߍ߬ ߛߌߦߊߡߊ߲߫ ߠߋ߬ ߓߘߊ߫ ߘߏ߲߬߸ ߛߊ߫ ߖߌ߬ߣߍ߬ ߟߊ߫ ߢߝߍߕߊ߮ ߘߌ߫ ߞߍ߫߸ߞߊ߬ ߕߋߟߋ߲ ߞߍ߫ ߞߏ ߟߎ߬ ߓߊߖߎ ߘߌ߫، ߓߊ߬ߙߌ߬ ߥߊߦߌߞߊ߫߸ ߏ߬ ߟߎ߫ ߞߢߊ߬ߣߍ߲߬ ߞߍ߫ ߟߊ߫، ߥߙߎߞߌ ߞߎߡߊ ߟߋ߬ ߝߐ ߦߴߌߘߐ߫߸ ߊ߬ ߕߍ߫ ߞߍ߫ ߟߊ߫، ߕߋߟߋ߲ ߞߎߡߊ ߝߐ ߟߵߌߘߐ߫߸ ߊ߬ ߕߍ߫ ߞߍ߫ ߟߊ߫، ߒ߬ߓߊ߬߸ ߖߌ߬ߣߍ߬ ߣߌ߫ ߖߌ߬ߣߍ߬ߞߊ ߟߎ߬ ߞߊ߫ ߞߊ߲߫ ߞߵߊ߬ߟߎ߬ ߡߙߌ߫ ߁߉߅߈ ߕߎߟߊߝߌ߲ ߕߋ߬ߟߋ߫ ߂߈ ߢߌ߲߬ ߡߊ߬߸ ߞߵߊ߬ߟߎ߬ ߕߋߟߋ߲߫߸ ߞߵߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߞߵߊ߬ ߟߐ߲߫ ߛߋߞߎ߬ ߕߎ߬ߙߋ߬ ߣߴߊ߬ ߟߊ߫ ߡߐ߱ ߟߎ߫ ߛߍ߰ ߘߊ߫ ߟߋ߬߸ ߞߊ߬ ߖߌ߬ߣߍ߬ ߟߊ߫ ߤߙߐߦߊ ߘߴߊ߬ ߡߊ߬، ߓߍ߯ ߦߋ߫ ߞߢߊ߫ ߝߊ߬ߛߏ߬ ߞߊߣߌ߲ ߘߐ߫߸ ߝߊ߬ ߟߊ߬ߝߛߊ ߘߐ߫.
ߓߌ߬ ߟߏ߲ߓߊ ߣߌ߲߬ ߘߐ߫߸ ߡߙߌ ߦߋ߫ ߛߋ߫ ߟߊ߫ ߡߐ߰ ߟߎ߫ ߡߊ߬߸ ߡߍ߲ ߠߎ߬ ߣߌ ߕߏ߫ ߘߊ߫ ߖߘߍ߬ߕߌ߰ߦߊ߬ ߢߌߣߌ߲ ߛߍ߬ߘߏ߲ ߘߐ߫߸ ߦߏ߫ ߛߊ߭ߡߏ߬ߙߌ߫ ߕߎ߬ߙߋ߬߸ ߊߟߌߝߊ߫ ߦߊߦߊ߫ ߖߊߟߏ߫߸ ߒߓߊߟߌߦߊ߫ ߞߡߊ߬ߙߊ߬߸ ߞߙߊ߬ߡߏ߬ߞߏ߫ ߊߟߑߝߊ߫ ߟߊߓߋ߬، ߊ߬ ߣߌ߫ ߘߏ߫ ߜߘߍ߫ ߟߎ߫، ߏ߬ ߟߎ߫ ߞߵߊ߬ߟߎ߬ ߣߌ ߘߌ߫ ߟߋ߬߸ ߛߊ߫ ߓߌ߬ ߟߋ߬ ߘߌ߫ ߓߍ߲߬߸ ߞߊ߬ ߖߌ߬ߣߍ߬ ߞߍ߫ ߊ߬ ߖߘߍ߬ ߘߌ߫ ߞߊߦߌߙߊ ߞߣߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
