ߕߎߟߊߝߌ߲ ߕߋ߬ߟߋ߫ ߂߇ ߡߊ߬߸ ߒߞߏ ߟߊ߫ ߡߊ߲߬ߕߏ߲߬ߕߍ߬ ߜߙߊ ߞߵߊ߬߬ ߝߊ߬ߘߌ߬ ߞߎߘߊ߫ ߦߌ߬ߘߊ߬ ߊߓߌߖߊ߲߬ ߞߣߐ߫، ߛߌ߲߬ߝߏ߲߬ߘߊ ߟߎ߬ ߟߊ߫ ߡߙߌߦߊ߫ ߦߌߘߊ ߣߌ߫ ߞߏߟߊߒߞߘߐߢߐ߲߯ߦߊ ߟߎ߬ ߞߣߐߡߊ߬߸ ߞߊ߬ ߜߟߍ߬ߦߊ߫ ߛߐ߬ߘߐ߲߬ߣߍ߲ ߠߎ߬ ߢߊߝߐ߫߸ ߥߊ߯ߕߌߓߊ ߘߏ߫ ߝߣߊ߫ ߣߊ߬ ߘߊ߫߸ ߞߊ߬ߙߊ߲߬ߝߊ߫ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫ ߞߎߡߊ߫ ߘߊ߫ ߖߊ߬ߡߊ ߝߍ߬ ߥߊ߯ߕߌ ߡߍ߲ ߠߊ߫ ߖߐ߫߸ ߓߍ߯ ߕߍ߬ߘߍ߫ ߏ߬ ߡߍ߲ ߞߎ߲ߝߊ߲ ߘߐ߫ ߞߊ߬ߣߌ߲߬، ߒߞߏ ߟߊߕߟߋ߬ߓߊ߰ߦߊ߬ߟߌ ߗߍ߬ߞߎ߲߸ ߊ߬ ߣߌ߫ ߒ.ߥ.ߛ.ߖ ߞߊ߲ߕߌ߮.
ߖߊ߲߬ߖߏ߲ ߘߊߡߌ߬ߣߊ߬ ߘߊ߫ ߡߊ߲߬ߘߋ߲߫ ߖߋ߬ߟߌ߬ߓߊ ߞߎߦߊߕߍ߫ ߟߊ߫ ߛߎ߬ߞߎ ߟߋ߬ ߟߊ߫߸ ߝߘߊ߬ߝߌ߲߬ߠߊ߫ ߡߐ߰ߓߊ ߟߎ߫ ߞߊ߲߬، ߏ߬ ߟߋ ߟߊߕߎ߲߰ ߘߊ߫ ߘߊߘߐߖߊߥߏ ߟߎ߬ ߟߊ߫߸ ߡߍ߲ ߕߎ߬ߡߊ ߖߊ߲߰ߧߊ߬ ߘߊ߫ ߞߏߛߓߍ߫߸ ߞߊ߬ ߝߘߊ߫ ߣߊ߬ߓߊ߰ߕߐ ߟߎ߬ ߟߊ߫ ߞߊ߬ ߓߐ߫ ߓߙߎߞߌߣߊ߫ ߝߊ߬ߛߏ߫߸ ߡߊ߬ߟߌ߸ ߖߌ߬ߣߍ߬߸ ߟߌߓߋߙߌߦߊ߫߸ ߜߋ߲ߞߐ߰ߖߌ߬ߘߊ ߖߍ߬ߘߍ.
ߞߊ߬ߙߊ߲߬ߝߊ߫ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫ ߣߊ߬ ߘߊ߫ ߛߙߊ߬ߣߎ߲ ߕߊ߬߸ ߊ߬ߟߋ ߡߍ߲ ߦߋ߫ ߖߊ߬ߕߋ߬ ߟߊ߫ ߒߞߏ ߞߏߟߊߕߍ߯ ߛߊ߲ߘߐߕߊ ߘߌ߫ ߓߌ߭ߓߌ߭ ߣߌ߲߬ ߘߐ߫، ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߟߊ߫ ߞߊ߬ߙߊ߲߬ߘߋ߲߸ ߊ߬ ߓߘߊ߫ ߞߝߊ߬ ߛߌߦߊߡߊ߲߫ ߛߓߍ߫ ߒߞߏ ߘߐ߫߸ ߞߊ߬ ߘߍ߬ߡߍ߲߲߬ ߞߍ߫ ߒߞߏ ߛߓߍߘߋ߲ߥߟߊ ߟߊߘߊ߲ ߘߐ߫ ߞߊ߬ߦߌ߯ ߁߉߉߂ ߝߊ߲߬ߝߍ߬ߟߊ ߘߐ߫߸ ߏ߬ ߡߍ߲ ߛߎ߲ߝߘߍ ߥߟߋ߫ ߘߴߊ߬ߟߎ߬ ߓߟߏ߫ ߞߏ߫ ߡߊ߲߬ߘߋ߲߫ ߞߏ߬ߡߊ߬ ߞߎߘߊ.
ߊ߬ ߟߊ߫ ߛߙߊ߬ߣߎ߲ ߓߏ߬ߙߌ߬ ߘߊ߫ ߒߞߏ ߛߎ߲ߞߎ߲ ߠߋ߬ ߞߊ߲߬߸ ߞߊ߬ ߘߐ߬ߞߣߍ߬ߟߌ ߞߍ߫:
<<ߛߓߍߟߌ ߡߍ߲ ߦߴߊߟߎ߫ ߢߊߞߘߐ߫ ߣߌ߲߬߸ ߏ߬ ߟߋ ߕߐ߮ ߒߞߏ ߘߌ߫، ߓߊ߬ߙߌ߬߸ ߊߟߎ߫ ߞߊߣߵߊ߬ ߖߌ߰ ߘߋ߬ ߞߏ߫ ߛߓߍߛߎ߲ ߢߌ߲߬ ߠߋ߬ ߘߐߙߐ߲߫ ߕߐ߯ ߕߋ߲߬، ߊ߲ ߠߊ߫ ߞߊ߲ ߣߌ߲߬ ߖߍ߬ߘߍ ߝߣߊ߫ ߕߐ߯ ߟߋ߬ ߞߏ߫ ߒߞߏ߸ ߓߊߏ߬ ߞߵߊ߬ ߝߐ߫ ߒߞߏ߸ ߏ߱ ߟߋ߬ ߦߏ߫ ߌ ߦߴߊ߬ ߝߐ߫ ߞߏ߫ ߒ ߝߊ߬ ߞߊ߲߫ ߞߏ߫߸ ߒ ߞߏ߫ ߟߋ߬، ߏ߬ ߘߐ߫ ߣߴߌ ߞߵߊ߬ ߝߐ߫ ߞߏ߫ ߒߞߏ ߦߋ߫ ߛߓߍߛߎ߲ ߠߋ߬ ߘߌ߫߸ ߌ ߡߊ߫ ߖߎ߯ߡߊ߲߫ ߝߐ߫߸ ߣߴߌ ߘߏ߲߬ ߞߊ߲߫ ߞߏ߫ ߞߊ߲ ߠߋ߬߸ ߏ߬ ߝߣߊ߫ ߕߍ߫ ߖߎ߯ߡߊ߲߫ ߘߌ߫، ߊߟߎ߫ ߞߊߣߊ߬ ߓߊ߬ߛߊ߲ ߓߌ߬ߟߊ߬ ߞߏ ߟߎ߬ ߘߐ߫.>>
ߊ߬ ߞߊ߬ ߡߐ߱ ߟߎ߬ ߤߊߞߟߌ ߟߊߞߊ߬ ߞߏ߫ ߛߌߦߊߡߊ߲߫ ߡߊ߬߸ ߞߵߊ߬ ߓߍ߲߬ ߞߊ߲ ߠߎ߬ ߕߐ߯ ߞߏ ߡߊ߬، ߓߊߏ߬߸ ߞߏ߫ ߞߊ߲ ߘߏ߫ ߟߎ߫ ߡߊ߫ ߛߋ߫ ߕߐ߯ ߛߐ߬ߘߐ߲߬ ߠߴߊ߬ߟߎ߫ ߖߘߍ߬ ߟߊ߫߸ ߏ߬ ߟߎ߬ ߕߐ߯ߟߊ߫ ߘߴߊ߬ߟߎ߬ ߝߐߓߊ߮ ߟߎ߫ ߟߋ߬ ߟߊ߫، <<ߝߊ߬ߙߊ߲߬ߛߌ߬ ߞߊ߲ ߣߴߊ߬ ߟߊ߫ ߥߙߎߞߌߓߊ߸ ߏ߬ ߕߐ߯ߟߊ߫ ߘߊ߫ ߝߊ߬ߙߊ߲߬ߛߌ߬ ߞߊ߲ ߝߐߓߊ߮ ߟߎ߫ ߟߋ߬ ߟߊ߫، ߊߙߊߓߎ ߡߊ߫ ߛߴߊ߬ ߕߊ߫ ߕߐ߯ ߛߐ߬ߘߐ߲߬ ߠߴߊ߬ ߖߘߍ߬ ߦߋ߫߸ ߝߏ߫ ߊ߬ ߝߐߓߊ߮ ߟߎ߬ ߕߐ߮، ߓߊ߬ߙߌ߬ ߊ߲ߠߎ߬ ߟߊ߫ ߞߊ߲߸ ߊ߬ߟߋ ߛߋ߫ ߘߴߊ߬ ߖߘߍ߬ߞߊ߬ߣߌ߲߬ ߕߐ߯ ߛߐ߬ߘߐ߲߬ ߠߊ߫߸ ߣߊߟߌ߬ߡߎ߲߬ ߒߞߏ ߘߌ߫، ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߣߐ߬ ߒߞߏ ߟߊߓߐ߫ ߟߊ߸ ߊ߬ ߞߵߊ߬ ߟߊ߫ ߞߊ߲ ߏ߬ ߟߋ ߛߎߥߊ߲ߘߌ߫ ߞߵߏ߬ ߟߴߊ߬ ߟߊ߫ ߛߓߍߟߌ߫ ߟߊߓߐߣߍ߲ ߠߊ߫ ߒߕߟߋߡߊ߬.>>
ߥߊ߯ߕߌ߫ ߜߘߍ߫ ߣߊ߬ ߘߊ߫ ߛߋ߫߸ ߛߟߊߕߌ߯ ߓߊߛߓߊ߬ߕߌ߫ ߛߘߌ߬ߓߋ߫ ߞߊ߬ ߛߙߊ߬ߣߎ߲ ߕߊ߬ ߘߊߘߐߖߊߥߏ ߞߣߍ ߣߌ߲߬ ߞߊ߲߬߸ ߊ߬ߟߋ ߡߍ߲ ߦߋ߫ ߒߞߏ ߛߍ߲ߓߊ߫ ߣߌ߫ ߝߘߏ߬ߓߊ߬ ߞߙߏߝߏ ߞߐߦߌߘߊߓߊ߮ ߘߌ߫ ߞߣߍ ߣߌ߲߬ ߞߊ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߡߊ߬ߞߏ ߦߋ߫ ߛߌ߲߬ߝߏ߲߬ߧߊ߬ߟߌ ߟߋ߬ ߟߊ߫ ߒߞߏ ߞߣߐ߫ ߕߋ߲߬ ߓߊߞߍ߭: <<ߒߞߏ ߡߊ߬ߞߏ ߦߋ߫ ߛߌ߲߬ߝߏ߲߬ߧߊ߬ߟߌ ߟߋ߬ ߟߊ߫ ߞߊ߬ ߛߴߊ߬ ߟߊߣߐ߯ ߞߏ ߟߎ߬ ߞߐ ߞߊߘߌ߫ ߟߊ߫، ߊ߲ ߠߊ߫ ߞߟߍ߬ߡߎߙߊ߲ ߦߴߊ߲ ߠߊ߫ ߓߍ߲߭ ߠߋ߬ ߘߌ߫، ߞߟߍ߬ߡߎ߬ߙߊ߲߬ ߜߘߍ߫ ߕߴߊ߲ߠߎ߬ ߓߟߏ߫߸ ߓߊ߬ߙߌ߬ ߣߴߊ߲ ߓߍ߲߬ ߘߊ߫߸ ߊ߲ ߘߴߊ߲ ߠߊ߫ ߖߡߊ߬ߕߌ߰ߦߊ ߡߊߦߋߙߋ߲߫.>>
ߗߋߘߋ߲߫ ߛߌߦߊߡߊ߲߫ ߠߋ߬ ߞߵߊ߬ߟߎ߬ ߟߊ߫ ߛߙߊ߬ߣߎ߲ ߞߍ߫ ߞߎߣߎ߲߬߸ ߊ߲ ߞߵߏ߬ ߡߍ߲ ߘߏ߫ ߟߎ߫ ߢߊߝߐ߫ ߊߟߎ߫ ߦߋ߫ ߝߐ߰ߓߍ߫ ߕߊ߬ߡߌ߲߬ߣߍ߲ ߠߎ߬ ߘߐ߫، ߊ߬ߟߎ߬ ߟߊ߫ ߞߎߡߊ ߟߎ߬ ߓߏ߬ߙߌ߬ ߘߊ߫ ߟߐ߲ߞߏ ߓߊ߯ߙߊ߫ ߞߍߣߍ߲ ߠߎ߬ ߟߋ߬ ߞߊ߲߬ ߒߞߏ ߘߐ߫߸ ߟߊ߬ߞߟߏ߬ߞߟߏ߬ߟߌ ߣߌ߫ ߢߎߡߍߙߋ߲ߦߊߟߌ ߘߊߞߎ߲ ߘߐ߫߸ ߛߊ߫ ߒߞߏ ߘߌ߫ ߟߐ߬ߦߙߐ߬ ߓߟߏߕߍ߰ߓߊߟߌ߫ ߛߐ߬ߘߐ߲߬ ߘߎߢߊ߫ ߟߊ߫ ߥߙߎߞߌ߫ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
