ߖߌ߬ߣߍ߬ ߞߊ߲ߕߌ߯ߦߊ ߢߌߣߌ߲ ߞߣߐ ߓߘߊ߫ ߘߐߘߎ߲߬ߧߊ߬ ߞߏߞߎߘߊ߫، ߓߊߏ߬߸ ߗߋߘߋ߲߫ ߓߟߏߡߊߞߊ߬ߣߍ߲߫ ߃߆߈ ߡߍ߲ ߠߎ߬ ߦߋ߫ ߖߌ߬ߣߍ߬ ߞߏ߲ߞߏ߫ ߞߣߐߟߊ ߟߎ߬ ߣߴߊ߬ ߛߏߓߊ߫ ߞߣߐߟߊ ߟߎ߬ ߘߐ߫߸ ߏ߬ ߟߎ߬ ߓߍ߯ ߓߘߊ߫ ߞߐߡߊߓߌ߲ߓߌ߲ߠߌ߲߫ ߛߓߍ߫ ߞߟߊ߬ߣߐ߬ߦߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߐ߯ߟߊ߫߸ ߡߍ߲ ߣߐ߬ ߛߌߟߊ ߘߌ߫ ߟߴߊ߬ ߡߊ߬ ߞߵߊ߬ ߞߍ߫ ߖߘߍ߬ߦߋ߬ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫.
ߖߌ߬ߣߋߣߌߥߖ߭ ߞߍߦߙߐ ߞߊ߲߫ ߞߏ߫ ߊ߬ߟߎ߬ ߟߊ߫ ߓߐߛߎ߲߫ ߛߐ߬ߘߐ߲߬ߣߍ߲ ߠߎ߬ ߦߴߊ߬ ߦߌ߬ߘߊ߬ ߟߊ߫ ߝߛߊߦߌ߫߸ ߞߏ߫ ߞߐߡߊߓߌ߲ߓߌ߲ߠߌ߲߫ ߛߓߍ ߣߌ߲߬ ߓߘߊ߫ ߞߟߊ߬ߣߐ߬ߦߊ߫߸ ߞߊ߬ ߓߊ߲߫ ߞߵߊ߬ ߟߊߕߊ߬ߡߌ߲߬ ߢߣߊߕߊߟߌ ߝߘߏ߬ߓߊ߬ ߗߋߕߌ߯ߘߊ ߡߊ߬ ߞߎߣߎ߲߬ ߞߐ߬ߓߊ߬ߟߏ߲ ߡߊ߬ ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߂߀، ߊ߬ ߘߏ߲߬ ߝߊ߲߸ ߖߘߍ߬ߦߋ߬ ߡߊ߬ߡߌ߬ߘߊ߬ߟߌ߬ߟߊ ߡߍ߲ ߠߎ߬ ߕߐ߮ ߦߋ߫ ߛߙߍߘߍ ߘߐ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߂߁߲ ߠߋ߬ ߘߌ߫ ߦߋ߲߬ ߓߌ߬ ߢߐ߲߰ ߟߏ߲߫، ߖߌ߬ߣߋߣߌߥߖ߭ ߞߵߊ߬ ߖߊ߬ ߦߙߐ ߏ߬ ߞߊ߲߬ ߞߏߛߓߍ߫߸ ߞߵߊ߬ ߓߍ߲߬ ߞߎ߲߬ߠߊ߬ߝߎߟߋ߲߫ ߛߐ߬ߘߐ߲߬ߣߍ߲ ߠߎ߫ ߡߊ߬.
ߛߋ߲߬ߕߊ߬ߓߊ߫ ߟߋ߬ ߓߘߊ߫ ߞߍ߫ ߞߊ߲ߕߌ߮ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߘߐ߫ ߏ߬ ߘߌ߫߸ ߞߵߊ߬ ߓߍ߲߬ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߞߣߐ߫ ߞߎߡߊ ߡߊ߬߸ ߏ߬ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߖߘߍ߬ߦߋ߬ ߡߊ߬ߡߌ߬ߘߊ߬ߟߌ߬ߟߊ ߓߍ߯ ߞߊ߫ ߞߊ߲߫ ߞߊ߬ ߞߐߡߊߓߌ߲ߓߌ߲߫ ߘߎ߰ߘߋ߲߬ ߛߎߥߊ߲ߘߌߣߍ߲ ߘߏ߫ ߟߎ߫ ߟߋ߬ ߓߟߏ߫ ߝߊ߲߬ߓߦߊ߬ ߓߟߏ ߡߊ߬߸ ߞߊ߬ ߞߐ߲߰ ߡߊ߬ߡߌ߬ߘߊ߬ߟߌ ߟߊߘߌ߬ߢߍ ߢߍ߫ ߞߕߌߖߌ߲ ߛߊ߲ߘߐߕߊ ߟߊ߫.
ߞߵߊ߬ ߓߍ߲߬ ߢߣߊߕߊߟߌ ߛߙߊߕߌ ߟߎ߫ ߡߊ߬߸ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߦ߫ߋ ߛߙߍߘߍߦߊ߫ ߟߊ߫ ߛߌ߰ߞߊ߲߬ ߞߕߌߖߌ߲ ߞߕߌߟߊߛߋߘߊ ߟߋ߬ ߟߊ߫ ߞߊ߬ ߕߟߋ߬ ߅߅ ߢߐ߲߰ ߕߏ߫ ߢߣߊߕߊߟߌ߫ ߟߏ߲ ߠߊ߫، ߞߊ߬ ߞߐ߲߰ ߢߣߊߕߊߟߌ߫ ߟߏ߲ ߢߍ߫ ߕߟߋ߬ ߄߅ ߢߐ߲߰ ߠߊ߫߸ ߛߌ߰ߞߊ߲߬ ߞߕߌߖߌ߲ ߘߌ߫ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߟߊ߫ ߛߙߍߘߍߦߊߟߌ ߟߊߟߐ߬߸ ߞߊ߬ ߓߊ߲߫ ߞߊ߬ ߛߙߍߘߍ߫ ߓߊ߲ߝߟߍ߬ߟߍ ߟߊߥߊ߬ߞߊ߲߬.
ߒ߬ߓߊ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߖߍ߬ߘߍ ߡߊ߫ ߝߋ߲߫ ߝߐ߫ ߡߎߣߎ߲߬ ߜߍ ߘߐ߫ ߥߛߊߞߙߊ߫ ߘߋ߬߸ ߞߵߊ߬ ߓߍ߲߬ ߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߡߊ߬، ߊ߬ ߟߊ߫ ߡߊ߬ߞߎ߲ ߏ߬ ߞߏ߬ߣߌ߲ ߓߍ߯ ߣߴߊ߬ ߕߊ߫߸ ߞߐߡߊߓߌ߲ߓߌ߲ߠߌ߲߫ ߛߌߦߊߡߊ߲߫ ߓߘߊ߫ ߞߍ߫ ߞߐߣߊߞߙߌ߫ ߣߌ߫ ߖߡߊ߬ߣߊ ߞߣߐߟߊ ߟߎ߬ ߘߐ߫߸ ߡߐ߰ ߛߌߦߊߡߊ߲߫ ߞߵߊ߬ ߦߌ߬ߘߊ߬ ߞߐߡߊߓߌ߲ߓߌ߲ߠߌ߲ ߏ߬ ߟߎ߬ ߡߍ߲ ߠߎ߬ ߘߐ߫ ߞߏ߫ ߝߏ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߞߍ߫ ߟߋ߬ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߬ ߓߐ߫ ߞߊ߲ߕߌ߯ߦߊ ߞߐ߫ ߝߛߊߦߌ߫، ߒ߬ߓߊ߬߸ ߊ߬ ߖߍ߬ߘߍ ߟߊ߫ ߞߎߡߊ ߟߋ߬ ߞߏ߬ߣߌ߲ ߡߊߞߐ߬ߣߐ߲ ߦߴߌߘߐ߫ ߛߍߣߍ߲߬߸ ߞߊ߬ ߣߊ߬ ߕߡߊ߬ߖߌ ߓߐ߫ ߖߊ߬ߡߊ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬
