ߛߌ߲߬ߓߏ߲߬ߛߌ ߛߋ߲߭ߝߍ߬ ߣߍߣߍߓߊ ߕߋ߬ߟߋ߫ ߂߃ ߡߊ߬ ߛߌ߯ߙߌ߲߫߸ ߟ.ߞ.ߝ ߣߌ߫ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߞߊ߬ ߥߛߊ߬ߛߙߋ ߕߊ߲߫ ߣߌ߫ ߞߐ߫ ߟߋ߬ ߟߊߕߊ߬ߡߌ߲߫ ߡߐ߰ߓߊ ߟߎ߫ ߡߊ߬߸ ߊ߬ߟߎ߬ ߟߊ߫ ߘߐ߬ߖߊ ߞߏߛߐ߲߬ ߒߞߏ ߟߊߥߙߎߞߌ ߘߊߞߎ߲ ߘߐ߫.
߂߀߂߅ ߣߍߣߍߓߊ ߕߋ߬ߟߋ߫ ߂߃ ߡߊ߬߸ ߏ߬ ߡߍ߲ ߓߍ߲߬ ߘߊ߫ ߞߊ߯ߙߌ ߡߊ߬߸ ߖߊ߲߬ߖߏ߲߬ߓߊ߫ ߟߋ߬ ߞߍ߫ ߘߊ߫ ߛߌ߯ߙߌ߲߫ ߛߊ߲ߕߙߌߘߊ ߟߊ߫߸ ߛߙߋߓߍ߫ ߁߈ ߠߋ߬ ߟߊߕߊ߬ߡߌ߲߬ ߘߊ߫ ߣߌ߲߬ ߟߏ߲، ߖߊ߲߬ߖߏ߲ ߏ߬ ߡߍ߲ ߛߌ߲߬ߝߏ߲߬ߧߊ߬ ߘߊ߫ ߛߌ߯ߙߌ߲߫ ߟ.ߞ.ߝ ߘߍ߬ߞߙߎ ߓߟߏ߫߸ ߊ߬ߟߎ߬ ߣߌ߫ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߟߊ߫ ߞߏߟߊߘߍߢߐ߲߯ߦߊ ߞߣߐߡߊ߬߸ ߞߵߊ߬ ߟߊߥߌ߬ߟߌ߫ ߡߐ߰ߓߊ ߟߌ߬ ߣߌ߫ ߖߡߊ߬ߣߊ ߞߏߓߊ߫ ߞߍߟߊ ߣߴߊ߬ ߛߍ߰ߞߍߟߊ ߘߏ߫ ߟߎ߫ ߟߊ߫ ߛߍ߱ ߟߊߡߊ߲߬ߘߌ ߡߊ߬ ߓߐ߲ߛߐ߲߫ ߣߊ߬ߕߐ ߟߎ߬ ߦߋ߫߸ ߞߵߊ߬ߟߎ߬ ߛߓߍ߫ ߛߊߣߌ߲ ߞߟߏߘߋ߲ ߠߊ߫߸ ߏ߬ ߟߎ߬ ߡߍ߲ ߠߎ߬ ߦߋ߫ ߒߞߏ ߡߊߦߋߙߋ߲ ߞߊ߲߬ ߕߎ߬ߡߊ߬ ߓߍ߯.
ߕߋ߬ߟߋ ߖߎ߭ߞߘߎ߬ ߕߎߡߊ ߟߋ߬ ߟߊ߫߸ ߟߊ߬ߛߣߍ߬ߟߌ߬ ߓߋߟߋ߲ߠߊ ߞߊ߬ߙߊ߲߬ ߘߊ߫ ߓߐ߬ߟߐ߲߬ߞߊ߬ ߛߊߙߊ߲߬ ߘߎ߲ߓߎ߲ߦߊ߫ ߓߟߏ߫߸ ߡߍ߲ ߞߊ߲߬ߕߐ߮ ߦߋ߫ ߡߊ߲߬ߘߋ߲߬ߞߊ߬ ߛߊߘߊ߲߬ ߘߌ߫، ߊ߬ ߟߊ߫ ߓߋߟߋ߲ߠߊ ߏ߬ ߡߍ߲ ߞߍ߫ ߘߴߊ߬ ߓߟߏ߫ ߢߊߖߌ ߣߌ߫ ߛߎ߬ߣߎ߲ ߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫: <<ߒ ߧߋ߫ ߞߎߡߊ ߕߊ߬ ߟߊ߫ ߓߌ߬ ߛߎ߬ߣߎ߲ ߣߌ߫ ߢߊߖߌ ߟߋ߬ ߘߐ߫߸ ߞߵߏ߬ ߛߊߓߎ ߞߍ߫ ߜߟߏ߬ߝߌ߲߬ߠߊ߬ ߝߐ ߘߌ߫ ߊ߬ ߘߋ߲߫ ߡߐ߬ߟߐ߲߬ߡߊ߬ߓߊ ߘߏ߫ ߟߊ߫ ߓߌ߬ ߣߍߣߍߓߊ ߕߋ߬ߟߋ߫ ߂߃ ߣߌ߲߬ ߢߐ߲߰ ߡߊ߬ ߁߉߈߇ ߡߊ߬߸ ߣߊߟߌ߬ߡߎ߲߫ ߒ ߡߊ߫ ߖߊ߰ߞߊ ߞߋߕߊ߬ ߘߋ߲ߞߍ߫ ߝߌߟߊߣߊ߲ ߣߌ߫ ߛߎߡߊ߲ߞߐ߬ߦߌ߬ ߊߡߙߊ߫ ߘߋ߲ߞߍ߫ ߁߂߲ ߘߌ߫، ߒ ߞߊ߲߫ ߦߋ߫ ߟߐ߲ߞߏߕߌ߯ ߢߐ߲߰ߦߋ߬ߓߊߟߌ߫ ߛߟߏ߬ߡߣߊ߬ ߞߊ߲ߕߍ߫ ߟߋ߬ ߡߊ߬، ߏ߬ ߊߟߎ߫ ߦߴߊߟߎ߫ ߥߌ߬ߟߌ߫ ߞߊ߬ ߡߌ߬ߛߍ߲߬ ߞߋߟߋ߲߫ ߖߊ߲߬ߛߊ߬ߟߌ߬ ߞߍ߫ ߝߏߘߋ߫ ߛߟߏ߬ߡߣߊ߫ ߛߟߐߡߌ߲ ߦߋ߫.>>
ߊ߬ ߟߊ߫ ߓߋߟߋ߲ߠߊ ߞߍ߫ ߘߊ߫ ߥߊ߬ߛߊ ߟߋ߬ ߘߌ߫ ߖߊ߬ߡߊ ߓߟߏ߫߸ ߞߵߏ߬ ߞߎ߲߭ ߞߍ߫ ߡߙߌ ߟߎ߫ ߖߊ߲߬ߝߊ ߘߌ߫ ߟߐ߲ߞߏߕߌ߮ ߟߊ߫ ߞߏ ߞߘߐ߫߸ ߊ߬ ߣߌ߫ ߓߍ߯ ߘߐߛߎ ߘߐ߬ߖߊ ߡߊ߬، ߊ߬ ߞߊ߬ ߖߐ߲ߓߐ߲ ߛߎ߯ߦߊ ߟߎ߬ ߞߏߝߐ߫ (ߜߍߢߟߋ، ߛߐ߬ߟߐ، ߓߊߘߎ߲)߸ ߞߊ߬ ߓߊ߲߫ ߞߊ߬ ߛߙߋߓߍ߫ ߟߊߕߊ߬ߡߌ߲߬ߕߊ ߛߎ߯ߦߊ ߟߎ߬ ߝߣߊ߫ ߦߌ߬ߘߊ߬:
–ߝߎߣߎ߲ߛߙߋ߫ ߥߛߊߛߙߋ
-ߞߟߊߓߎ߫ ߥߛߊߛߙߋ
-ߛߟߏ߬ߡߣߊ߬ ߞߊ߲߬ߕߍ߬ ߞߐ߲ߘߐ߲
-ߞߏߢߌߡߊߟߐ߲߫ ߥߛߊߛߙߋ
ߖߊ߲߬ߛߊ߬ߣߍ߲ ߠߎ߬ ߘߐ߫߸ ߛߌ߯ߙߌ߲߫ ߛߏߕߌ߮ ߦߴߊ߬ ߘߐ߫߸ ߟߊ߱ߖߌ߬ ߘߙߊ߬ߡߊߣ ߡߊ߰ߛߎߓߊ߫߸ ߏ߬ ߞߊ߬ ߖߊ߲߬ߛߊ߬ߟߌ߬ ߓߟߋߓߟߋ߫ ߛߐ߬ߘߐ߲߬، ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫߸ ߡߍ߲ ߡߊߡߙߊ߬ߣߍ߲߫ ߓߊߛߓߊ߬ߕߌ߫ ߛߘߌ߬ߓߋ߬ ߓߟߏ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߏߕߌ߮ ߟߋ߬ ߞߍ߫ ߘߊ߫ ߛߏߕߌ߯ ߝߟߐ߫ ߘߌ߫߸ ߡߍ߲ ߞߊ߬ ߘߐ߬ߕߊߡߌ߲ ߞߏߟߊߕߍ߯ߘߊ ߞߊ߲ߕߌ߮ ߘߊ߲߬ߛߊ߫ ߞߙߎ߬ߡߊ߬ ߞߐߞߘߐߘߌߦߊ߫ ߒߞߏ ߛߓߍߟߌ ߡߐ߬ߟߐ߲߬ߡߊ߬ߦߊ ߟߊ߫، ߛߙߋߓߍ ߟߊߕߊ߬ߡߌ߲߬ ߘߊ߫ ߛߏߕߌ߮ ߡߵߊ߬ ߟߊ߫ ߟߎ ߟߋ߬ ߞߣߐ߫߸ ߊ߬ ߞߊ߬ ߕߌ߲ߞߌ߫ ߓߎ߬ߓߎ߰ߣߍ߲ ߞߍ߫ ߦߋ߲߬ ߡߍ߲ ߘߐ߫߸ ߞߊ߬ ߓߊ߲߫ ߞߊ߬ ߒߞߏ ߛߍ߬ߘߏ߲߬ߠߊ ߟߎ߫ ߝߏ߬ ߞߏߛߓߍ߫߸ ߞߊ߬ ߟߊ߬ߤߘߌ߫ ߞߎߘߊ߫ ߕߊ߬ ߒߞߏ ߛߍ߬ߘߏ߲ ߘߐ߫.
ߡߐ߰ߓߊ߬ ߜߘߍ߫ ߝߣߊ߫ ߓߍ߫߸ ߛߌ߯ߙߌ߲߫ ߞߊ߬ߝߏ߬ߙߋ߲߬߸ ߛߎ߬ߟߋ߬ߡߊߣ ߞߏ߬ߦߌ߬ߕߊ߫ ߖߊ߲߬ߛߊ߬ ߘߊ߫ ߛߟߏ߬ߡߣߊ߬ ߞߊ߲߬ߕߍ߬ ߞߐ߲ߘߐ߲ ߠߊ߫، ߊ߬ ߟߋ ߡߍ߲ ߞߐߦߌ߬ߘߊ߬ ߘߴߊ߬ ߛߙߍߞߍ ߓߟߏ߫߸ ߊߓߘߎߟߊߦߌ߬ ߞߏ߬ߦߌ߬ߕߊ߫߸ ߏ߬ ߛߍߥߊߣߍ߲ ߠߋ߬ ߞߊ߬ ߛߙߋߓߍ ߟߊߛߐ߬ߘߐ߲߬، ߒ ߛߍߥߊߣߍ߲߫ ߠߋ߬ ߓߌ߬، ߛߙߋߓߍ ߣߌ߲߬ ߓߘߊ߫ ߞߍ߫ ߛߙߋ߫ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߞߊ߬ߝߏ߬ߙߋ߲ ߦߋ߫ ߘߏ߫ ߞߍ߫ ߟߊ߫ ߒߞߏ ߦߋ߫، ߊ߲ ߧߋ߫ ߒߞߏߡߐ߮ ߟߎ߫ ߛߊ߬ߥߏ߬ ߘߐ߫ ߛߎ ߣߌ߫ ߕߋ߬ߟߋ.>>
ߣߎ߲߰ߝߏߘߋ߫ ߖߘߍ߬ߞߏ߬ߟߊ߲߬ߘߌ߫ ߡߊ߰ߛߎߓߊ߫ ߡߍ߲ ߦߋ߫ ߛߌ߯ߙߌ߲߫ ߟ.ߞ.ߝ ߞߊ߲ߕߌ߯ ߛߙߍߞߍ ߘߌ߫߸ ߏ߬ ߝߣߊ߫ ߖߊ߲߬ߛߊ߬ ߘߊ߫ ߝߎߣߎ߲ߛߙߋ߫ ߥߛߊߛߙߋ ߟߊ߫، ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߊ߬ߓߊ ߞߊ߬ ߞߵߊ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߕߊ߲߬ߘߏ߬ ߞߏߛߓߍ߫، <<ߥߊߘߌ ߘߌߡߊ߲߫ ߓߍ߯ ߦߋ߫، ߓߊ߬ߙߌ߬߸ ߌ ߓߴߌ ߦߴߊ߬ ߓߐ߫ ߟߊ߫ ߞߵߊ߬ ߘߏ߲߬ ߘߊ ߡߍ߲ ߝߍ߬߸ ߏ߬ ߘߌߡߊ߲߫ ߌ ߦߋ߫ ߥߊߘߌ ߖߍ߬ߘߍ ߘߌ߫، ߏ߬ ߟߋ ߘߐ߫߸ ߡߐ߰ ߕߊ߲߬ߘߏ߬ ߟߏ߲ ߡߊ߲߫ ߞߊ߲߫ ߞߊ߬ ߕߏ߫ ߊ߬ ߓߊߘߍ߫ ߟߏ߲ ߠߊ߫.>>
ߘߍ߬ߞߙߎ ߘߏ߫ ߟߎ߫ ߝߣߊ߫ ߓߍ߫߸ ߦߏ߫ ߓߋ߲߬ߓߋ߬ߕߊ߬ ߒ.ߡ.ߡ.ߞ߸ ߊ߬ ߣߌ߫ ߡߊ߲߬ߖߊ߲߬ߠߊ߫ ߒ.ߟ.ߕ߸ ߏ߬ ߟߎ߬ ߝߣߊ߫ ߖߊ߲߬ߛߊ߬ ߘߊ߫ ߒߞߏ ߛߍ߲ߓߊ߫ ߓߟߏ߫߸ ߊ߬ߟߎ߬ ߟߊ߫ ߘߐ߬ߖߊ ߞߏߛߐ߲߬.
ߛߌ߯ߙߌ߲߫ ߡ.ߟ.ߗ ߛߙߍߞߍ ߕߘߍ߬ ߞߣߍ ߞߊ߲߬߸ ߊߡߙߊ߫ ߕߍ߲߬ߞߌ߬ߦߊ߬ߣߏ߬߸ ߊ߬ߟߋ ߡߍ߲ ߞߊ߬ ߡ.ߟ.ߗ ߡߊ߬ߡߊߘߎ߬ ߕߎ߬ߙߋ ߞߐߦߌ߬ߘߊ߫ ߦߋ߲߬߸ ߏ߬ ߞߊ߬ ߕߊ߲߬ߘߏ߬ߟߌ ߞߍ߫ ߞߏߛߓߍ߫: <<ߖߘߍ߬ߟߐ߲ ߘߊߡߌߣߊ ߦߋ߫ ߞߊ߲ ߛߓߍ ߣߴߊ߬ ߞߊ߬ߙߊ߲ ߠߋ߬ ߘߌ߫ ߡߎߣߎ߲߬، ߓߌ߬߸ ߊ߲ ߠߊ߫ ߛߌ߰ߞߊ߲߬ ߞߎߘߊ ߞߏߛߐ߲߬߸ ߝߊ߬ߛߏ߬ ߞߊ߲ ߠߎ߬ ߓߘߊ߫ ߞߍ߫ ߞߎ߲߬ߠߊ߬ߛߌ߰ ߞߊ߲ ߘߌ߫.>>
ߟߏ߲ߓߊ ߣߌ߲߬ ߞߍ߫ ߘߊ߫ ߛߌ߲ߞߐ߲ߡߌߘߊ ߟߏ߲ߓߊ ߟߋ߬ ߘߌ߫ ߛߌ߯ߙߌ߲߫ ߞߣߐ߫߸ ߓߍ߯ ߡߐ߬ߟߐ߲߬ ߣߴߊ߬ ߟߊ߲߬ߓߋ߬ ߘߌ߫ ߘߴߊ߬ ߡߊ߬ ߟ.ߞ.ߝ ߓߟߏ߫߸ ߡߍ߲ ߺ ߍ ߺ ߡߍ߲߫ ߦߋ߫ ߘߏ߫ ߞߍ߫ ߟߊ߫ ߒߞߏ ߦߋ߫ ߞߊ߬ߣߌ߲߬.
ߞߊ߲߬ߞߎߡߊ ߣߌ߲߬ ߘߊߘߐߓߍ߲߬ ߘߊ߫ ߛߌߟߊߓߐߛߐ߯ߣߊ߫ ߗߋߘߋ߲ ߠߎ߬ ߟߋ߬ ߓߟߏ߫ ߛߌ߯ߙߌ߲߫: ߟߏ߲ߞߊߛߌߦߊ߫ ߞߡߊ߬ߙߊ߬߸ ߛߌߕߊ߲߬ ߞߊ߬ߓߊ߸ ߞߙߊ߬ߞߐ߬ߞߊ ߞߊ߬ߟߐ߸ ߊ߬ ߣߌ߫ ߖߐ߲߬ߡߊߛߌߣߌ߲ߟߐ߲߫ ߞߊ߬ߟߐ.
