ߞߵߊ߬ ߕߊ߬ ߂߀߂߁ ߞߊ߬ߝߏ߬ ߖߊߛߏ߲ ߡߊ߬߸ ߞߵߊ߬ ߛߌ߰ ߊ߬ ߟߊ߫ ߛߎߘߊ߲ ߠߊ߫ ߂߀߂߅ ߞߏߟߌ߲ߞߏߟߌ߲ ߢߣߊߕߊߟߌ ߝߍ߬ ߕߊ߬ߞߏ߬ ߞߋߟߋ߲ ߠߊ߫߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߴߊ߬ ߛߎ߮ ߦߌ߬ߘߊ߫ ߖߌ߬ߣߍ߬ ߟߊ߫ ߘߌߦߊߜߏߦߊ ߟߊ߫، ߝߊ߬ߙߊ߲߬ߛߌ߫ ߞߟߍ߬ߘߋ߲߬ ߞߘߐ߸ ߣߊ߲߬ߕߌ߰ߦߊ ߞߟߍ߬ߦߊ߬ߟߊ ߡߍ߲ ߥߊ߬ߟߊ߲߬ߞߌ߬ߣߍ߲߫ ߓߘߍ߬ߓߘߍ߬ߟߌ߫ ߡߊ߲߬ߞߊ߲߬ߡߊ ߘߐ߫، ߒ߬ߓߊ߬߸ ߊߟߎ߫ ߦߋ߫ ߞߏߢߊ߫ ߕߊ߲߫ ߝߟߍ߫ ߊ߬ ߟߊ߫ ߞߏ ߘߐ߫.
߂߀߂߁ ߣߌ߫ ߂߀߂߅ ߕߍߟߊ ߘߐ߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߘߍ߬ ߝߊߙߌ߲ ߠߋ߬ ߘߌ߫߸ ߊ߬ ߓߘߊ߫ ߣߊ߬ ߞߍ߫ ߞߟߍ߬ߕߌ߯ ߟߏ߬ߟߏ߬ ߟߏ߰ߟߎ߬ߕߌ߮ ߘߌ߫߸ ߤߊ߲߯ ߞߊ߬ ߣߊ߬ ߛߎߘߊ߲߫ ߢߣߊߕߊߟߌ ߘߐ߫߸ ߞߊ߬ ߞߍ߫ ߖߡߊ߬ߣߊ ߞߊ߲ߕߌ߮ ߘߌ߫ ߓߍ߯ߦߊ ߞߊ߲ߡߊ߬، ߒ߬ߓߊ߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߣߊ߲߬ߕߌ߰ߦߊ ߏ߬ ߞߣߐ߫߸ ߊ߬ߟߋ ߡߍ߲ ߦߋ߫ ߕߐ߲߬ߞߘߎ߬ߣߍ߲߬ ߥߎ߬ߟߋ߲߬ ߕߌ߮ ߣߌ߫ ߢߟߊ߫ ߝߌ߲߫ ߘߏ߲ߠߊ ߘߌ߫ ߛߐ߲߬߸ ߞߏ߫ ߛߌߦߊߡߊ߲߫ ߦߴߊ߬ ߟߊ߫ ߞߏ ߞߘߐ߫߸ ߡߍ߲ ߟߊ߲ߞߣߍߡߊߣߍ߲ߓߊ߫ ߕߍ߫، ߏ߬ ߘߏ߫ ߟߎ߫ ߟߋ߬ ߡߊߘߊ߲ߕߐ߫ ߊ߲ ߓߟߏ߫ ߦߊ߲߬߸ ߟߊ߬ߤߘߌ߬ߕߊ ߟߎ߬ ߘߐ߫߸ ߛߙߊߕߌ߫ ߞߊ߲߫ ߕߌߢߍ ߟߎ߬ ߘߐ߫߸ ߊ߬ ߣߌ߫ ߖߘߍ߬ߛߐߛߐ ߟߎ߬ ߘߐ߫، ߝߌߘߊ ߓߐߣߍ߲ ߝߟߍ߫ ߥߏ߬ߙߏ ߘߏ߫ ߟߎ߫ ߢߍߡߊ߬ ߣߌ߲߬ ߥߍ߫߸ ߗߍ߭ ߡߍ߲ ߞߍߕߐ߫ ߖߌ߬ߣߍ߫ ߡߙߊ߬ ߟߊ߫ ߡߎ߬ߕߎ߲߫ ߞߊ߬ߣߌ߲߬.
߁߭ ߺ ߊ߬ ߞߊ߬ ߟߊ߬ߞߐ߰ߟߌ߬ ߞߓߊߞߏߡߊ ߟߋ߬ ߞߍ߫ ߞߐߞߊ߲߬
ߦߊ߬ߣߌ߫ ߘߎ߲߬ߓߎߦߊ߬ ߦߋ߫ ߣߊ߬ ߖߡߊ߬ߣߊ ߞߎ߲߬ߠߊ߫߸ ߊ߬ ߞߊ߬ ߛߊ߲߬ ߥߐߙߐ߲ߝߌ߬ߟߊ߫ ߟߋ߬ ߞߍ߫ ߝߊ߬ߙߊ߲߬ߛߌ߫ ߞߟߍ߬ߘߋ߲߬ߧߊ ߘߐ߫߸ ߞߵߊ߬ ߕߊ߬ ߂߀߀߂ ߡߊ߬ ߞߵߊ߬ ߛߌ߰ ߂߀߀߉ ߟߊ߫، ߊ߬ ߞߊ߬ ߟߊ߬ߞߐ߰ߟߌ ߟߎ߬ ߞߍ߫ ߌߛߌ߬ߙߊ߬ߌߟߊ߫߸ ߛߣߍ߬ߜ߭ߊߟߌ߫߸ ߜ߭ߊߓߐ߲߫߸ ߝߊ߬ߙߊ߲߬ߛߌ߫ ߞߟߍ߬ ߞߊߙߊ߲ߕߊ ߟߊ߫، ߊ߬ ߟߊ߫ ߗߋߦߊߟߌ ߞߍ߫ ߘߊ߫ ߕߙߎ߬ ߘߌ߫߸ ߊ߬ ߥߊ߫ ߘߊ߫ ߊߝߎߞߊ߲߫߸ ߜߋ߲ߞߐ߰ߖߌ߬ߘߊ ߟߊ߫߸ ߖߌߓߎߕߌ߫߸ ߊ߬ ߣߌ߫ ߝߘߊ߬ߝߌ߲߬ߠߊ߬ ߕߊ߲ߓߊ߲ ߞߊ߲ߓߍ߲، ߊ߬ ߟߊ߫ ߞߐߞߊ߲߫ ߓߊ߯ߙߊ ߏ߬ ߟߎ߫ ߕߐ߰ߡߊ߬ߛߙߋ ߟߐ߲߫ ߘߊ߫ ߡߍ߲ ߡߊ߬߸ ߏ߬ ߟߋ ߞߍ߫ ߘߴߊ߬ ߟߊ߫ ߝߊ߲߬ߞߊ߬ ߓߟߏߡߊߞߊ߬ߣߍ߲ ߠߎ߬ ߟߊ߫ ߞߊ߬ߝߏ߬ ߖߊߛߏ߲ ߞߍߢߊ ߘߌ߫ ߂߀߂߁ ߕߎߟߊߝߌ߲ ߕߟߋ߬ ߅ ߡߊ߬، ߊ߬ ߟߊ߫ ߓߋߟߋ߲ߠߊ߫ ߞߍߣߍ߲ ߠߎ߬ ߝߣߊ߫ ߞߵߏ߬ ߟߊߒߡߊ߫ ߓߐ߫.
߂߲ ߺ ߊ߬ ߡߐߣߍ߫ ߘߊ߫ ߞߟߍ߬ߡߎߙߊ߲ ߘߌߓߊߟߌߦߊ ߞߏߛߐ߲߬ ߊ߬ ߡߊ߬
߂߀߁߆ ߟߊ߫߸ ߞߵߊ߬ ߛߐ߬ߘߐ߲߬ ߞߟߍ߬ߓߏߟߏ߲ ߘߏ߫ ߞߊ߬ߙߌ߬ߝߊ߬ߣߍ߲߫ ߘߎ߲߬ߓߎߦߊ߬ ߟߊ߫߸ ߊ߬ ߦߋ߫ ߡߍ߲ ߡߊߡߙߊ߬ ߟߊ߫، ߏ߬ ߥߊ߯ߕߌ ߟߋ߬ ߟߊ߫߸ ߊ߬ ߞߵߊ߬ ߟߊߢߌߣߌ߲߫ ߞߏ߫ ߞߊ߬ ߞߟߍ߬ߡߎߙߊ߲ ߘߏ߫ ߟߎ߫ ߘߴߊ߬ ߡߊ߬߸ ߛߴߊ߬ ߘߴߊ߬ ߟߊ߫ ߡߐ߱ ߟߎ߬ ߡߊߞߊ߬ߙߊ߲߬ߧߊ߫ ߡߊ߬ߙߌ߬ߝߊ߬ߕߋ ߟߊ߫، ߓߊ߬ߙߌ߬߸ <<ߒ ߡߊ߫ ߞߟߍ߬ߡߎߙߊ߲ ߛߐ߬ߘߐ߲߬ ߟߏ߲߫ ߞߋߟߋ߲߫߸ ߓߊߏ߬ ߊ߬ߟߎ߫ ߕߘߍ߬ ߛߌߟߊ߲߫ ߠߊ߫ ߞߏ߫ ߒ ߞߊߣߵߏ߬ ߟߎ߬ ߟߊߓߊ߯ߙߊ߫ ߞߊ߬ ߞߊ߬ߝߏ߬ ߖߊߛߏ߲ ߞߍ߫.>> ߊ߬ ߞߵߏ߬ ߝߐ߫ ߊ߬ ߣߌ߫ ߝߊ߬ߙߊ߲߬ߛߌ߫ ߣߊ߲߬ߕߌ߮ ߟߎ߬ ߟߊ߫ ߜߊ߬ߙߊ ߘߏ߫ ߟߋ߬ ߘߐ߫ ߂߀߁߇ ߟߊ߫، ߒ߬ߓߊ߬߸ ߛߊ߲߬ ߟߏ߯ߟߎ߫ ߏ߬ ߞߐߝߍ߬߸ ߛߌߞߊ߫ ߞߍߣߍ߲߫ ߕߘߍ߬ ߞߏ߫ ߊ߬ ߘߌ߫ ߞߏ ߡߍ߲ ߞߍ߫߸ ߊ߬ ߣߐ߬ ߞߟߍ߬ߡߎߙߊ߲ ߠߎ߫ ߛߐ߬ߘߐ߲߬ ߠߊ߸ ߊ߬ ߟߊߓߊ߲߫ ߘߴߏ߬ ߞߍߟߌ ߡߊ߬، ߊ߬ ߖߊ߲߭ ߞߐ ߘߐ߫ ߞߟߍ߬ߡߎߙߊ߲ ߏ߬ ߟߎ߬ ߟߊ߫߸ ߊ߬ ߣߌ߫ ߞߐߞߊ߲߫ ߣߊ߲ߕߌ߮ ߟߎ߬ ߟߊ߫ ߟߊ߬ߟߌ߬ߟߌ ߟߎ߬ ߓߍ߯ ߞߐ ߘߐ߫ ߖߐ߫߸ ߏ߬ ߟߋ ߥߟߏߣߍ߲߫ ߞߊ߬ߝߏ߬ ߖߊߛߏ߲ ߠߊ߫.
߃߲ ߺ ߓߙߊ߬ߒ߬ߘߐ߬ ߞߊ߲ ߘߏ߫ ߟߎ߫ ߕߘߍ߬ ߓߐ߫ ߟߴߊ߬ ߘߊ߫
߂߀߂߁ ߕߎߟߊߝߌ߲ ߕߟߋ߬ ߅ ߡߊ߬߸ ߘߎ߲߬ߓߎߦߊ߬ ߞߵߊ߬ ߟߊߛߋ߫ ߝߊ߬ߛߏ ߖߌ߬ߦߊ߬ߞߊ߲߬ߛߏ ߟߊ߫߸ ߞߏ߫: <<ߊ߲ ߕߍ߫ ߓߘߍ߬ߓߘߍ߬ߟߌ ߕߏ߫ ߟߊ߫ ߡߐ߰ ߞߋߟߋ߲߫ ߞߓߊ߬ ߞߘߐ߫ ߡߎ߬ߕߎ߲߬߸ ߓߊ߬ߙߵߊ߲ ߧߴߊ߬ ߘߌ߫ ߟߊ߫ ߖߡߊ߬ߣߊ߬ߘߋ߲ ߠߎ߬ ߟߋ߬ ߡߊ߬ ߡߎ߬ߕߎ߲߬.>> ߊ߬ ߞߵߊ߬ ߝߐ߫ ߝߣߊ߫߸ ߞߏ߫ <<ߖߌ߬ߣߍ߫ ߖߡߊ߬ߣߊ ߗߋ߲߰߸ ߊ߬ ߓߘߍ߬، ߊ߲ ߡߊ߲߫ ߞߊ߲߫ ߞߊ߬ ߓߋ߬ ߊ߬ ߞߊ߲߬ ߡߎ߬ߕߎ߲߬߸ ߊ߲ ߞߊ߫ ߞߊ߲߫ ߞߵߊ߬ ߟߊߘߌߦߊߢߍ߫ ߟߋ߬.>> ߡߐ߰ ߦߟߌ߫ ߕߍ߫ ߞߏ߫ ߞߎߡߊ߫ ߛߎ߮ ߏ߬ ߟߎ߬ ߘߌ߫ ߓߐ߫ ߣߊ߲߬ߕߌ߮ ߘߊ ߘߐ߫߸ ߏ߬ ߡߍ߲ ߞߍ߫ ߘߊ߫ ߡߐ߰ ߘߊ߬ߞߘߐ߬ߓߐ߬ ߞߎߡߊ ߣߌ߫ ߞߘߐߡߊߕߍ߯ߟߌ߫ ߞߊ߲ ߘߌ߫ ߞߊ߬ߣߌ߲߬، ߞߵߊ߬ ߦߌ߬ߘߊ߬ ߞߏ߫ ߖߡߊ߬ߣߊ ߕߎ߲߬ ߕߍ߫ ߓߟߏ߫ ߢߌߡߊ߫ ߘߐ߫، ߊ߬ ߟߊ߫ ߞߎߡߊ ߣߌ߲߬ ߞߊ߬ ߛߊ߲ߞߊ ߕߊ߬ ߘߍ߬ߞߙߏߝߏ ߟߎ߫ ߞߊ߲߬ ߞߏߛߓߍ߫.
߄߲ ߺ ߊ߬ ߞߊ߬ ߕߊ߯ߡߊ ߟߊߕߐ߲߫ ߞߎ߲߬ߠߊ߬ߛߌ߰ ߞߘߐ ߛߌ߲߬ߝߏ߲ ߠߎ߫ ߡߊ߬ ߞߵߊ߬ߟߎ߬ ߟߊ߫ ߘߎ߰ߞߎߟߎ߲ ߠߎ߬ ߓߐ߫ ߊ߬ߟߎ߬ ߓߟߏ߫
ߞߊ߬ߝߏ߬ ߖߊߛߏ߲ ߘߎ߰ߛߊ߬ߜߍ ߡߊ߬ ߌߞߘߐ߫߸ ߘߎ߲߬ߓߎߦߊ߬ ߞߊ߬ ߞߎ߲߬ߠߊ߬ߛߌ߰ ߞߘߐ ߛߌ߲߬ߝߏ߲ ߠߎ߬ ߡߊߞߟߌ߫، ߞߏ߫ ߊ߬ߟߎ߬ ߝߋ߲߫ ߞߊߣߊ߬ ߓߐ߫ ߖߡߊ߬ߣߊ ߞߐߞߊ߲߬، ߊ߬ ߝߐ߫ ߘߊ߫ ߞߏߕߌ߮ ߓߍ߯ ߦߋ߫߸ ߞߏ߫ ߓߍ߯ ߦߴߊ߬ ߟߊ߫ ߕߊ߬ߡߌ߲߬ߛߓߍ ߟߎ߬ ߘߌ߫߸ ߊ߬ ߣߴߊ߬ߟߎ߬ ߟߊ߫ ߓߊ߯ߙߊ߫ ߞߐ߲ߛߏ ߟߎ߬، ߏ߬ ߞߍ߫ ߘߊ߫ ߞߓߊߞߏ ߘߌ߫ ߏ߬ ߟߏ߲߸ ߡߍ߲ ߞߎ߲߭ ߕߍ߬ߘߍ߫ ߓߏ߬ߙߌ ߡߊߕߊ߲߬ߞߊ ߘߌ߫ ߞߎ߲߬ߠߊ߬ߛߌ߰ ߟߊߥߟߏߣߍ߲ ߛߌ߲߬ߝߏ߲ ߠߎ߬ ߘߐ߫߸ ߊ߬ ߣߌ߫ ߛߊ߫ ߓߐ߬ߘߍ߬ߓߐ߬ ߞߏ߬ ߜߘߍ߫ ߣߌ߫ ߛߋ߲߬ߠߊ߬ߛߘߌ߬ ߞߏ߫ ߜߘߍ߫ ߞߊߣߊ߬ ߓߌ߬ߟߊ߫ ߘߐ߬ߕߊߡߌ߲ ߛߋ߲߬ߘߐ߫.
߅߲ ߺ ߘߊ߬ߡߊ߲߬ ߖߊߕߋߘߐߛߌ߮ ߡߍ߲ ߞߍߕߐ߫ ߖߡߊ߬ߣߊ ߓߐ߫ ߟߊ߫ ߣߐ߯ ߘߐ߫
ߊ߬ ߟߊ߫ ߡߊ߬ߙߊ ߞߣߐ߫߸ ߖߌ߬ߣߍ߬ ߛߋ߫ ߘߴߊ߬ ߟߊ߫ ߘߊ߬ߡߊ߲߬ߘߊ ߟߎ߬ ߥߊ߫ ߢߊ ߡߊߦߟߍ߬ߡߊ߲߬ ߠߊ߫߸ ߞߊ߬ ߣߍ߰ߓߐ߬ ߘߊߡߊ߲ ߠߎ߬ ߘߐ߫ ߓߟߋ߬ߓߟߋ ߛߌ߰ ߛߋ߲߬ߠߊ߫߸ ߞߏ߫ ߛߌߡߊ߲ߘߎ߯، ߘߎߢߊ߫ ߣߍ߰ ߘߊߡߊ߲߫ ߕߣߐ߬ߓߐ߬ߓߊߟߌ ߡߍ߲ ߦߋ߫ ߖߌ߬ߣߍ߬߸ ߏ߬ ߢߐ߲߰ ߕߴߦߋ߲߬ ߝߊߦߌߘߊ߫، ߘߊ߬ߡߊ߲߬ ߖߊߕߋߘߐߛߌ߮ ߏ߬ ߛߌ߰ ߘߊ߫ ߛߋ߲߬ߠߊ߫ ߂߀߂߅ ߣߍߣߍߓߊ ߟߋ߬ ߟߊ߫، ߘߎ߲߬ߓߎߦߊ߬ ߞߊ߬ ߞߐߞߊ߲߫ ߥߊߟߌߘߊ ߛߌߦߊߡߊ߲߫ ߠߋ߬ ߟߊ߫ ߘߌ߬ߢߍ߬ߛߓߍ ߡߌ߬ߘߴߊ߬ߟߎ߬ ߟߊ߫߸ ߛߊ߫ ߖߡߊ߬ߣߊ ߟߊ߫ ߕߐ߬ߣߐ ߘߌ߫ ߥߙߊ߬ ߢߊ ߡߍ߲ ߡߊ߬، ߛߌߡߊ߲ߘߎ߯ ߘߏ߲߬ ߓߍߣߊ߬ ߞߏ߫ ߛߌߦߊߡߊ߲߫ ߢߊ߬ ߖߡߊ߬ߣߊ ߡߊ߬߸ ߞߵߊ߬ ߓߍ߲߬ ߢߍߥߟߊ߫ ߕߋ߬ߣߍ߲ ߠߎ߫ ߡߊ߬.
߆߲ ߺ ߊ߬ ߞߵߊ߬ ߝߐ߫ ߞߏ߫ ߊ߬ ߘߌ߫ ߥߊ߫߸ ߞߣߊ߬ߕߏ߫ ߛߌ߰ߞߊ߲ ߡߊߝߊ߬ߟߋ߲߬ ߠߊ߫߸ ߥߊߟߌ߫ ߞߏ ߡߊ߫ ߓߐ߫
߂߀߂߃ ߞߏ߲ߞߏߜߍ ߟߊ߫߸ ߘߎ߲߬ߓߎߦߊ߬ ߞߵߊ߬ ߞߊ߬ߟߌ߫ ߞߵߊ߬ ߛߍ߲߫߸ ߞߏ߫ ߊ߬ ߘߌ߫ ߘߐ߬ߕߊߡߌ߲ ߛߌ߲߬ߝߏ߲߬ߧߊ߫߸ ߞߊ߬ ߢߣߊߕߊߟߌ ߞߍ߫߸ ߞߊ߬ ߓߊ߲߫ ߞߊ߬ ߥߊ߫، ߊ߬ ߞߵߊ߬ ߝߐ߫ ߞߏ߫: <<ߘߐ߬ߕߊߡߌ߲ ߛߌ߲߬ߝߏ߲߬ߧߊ ߟߵߊ߲ߠߎ߬ ߡߊ߬، ߓߊ߬ߙߌ߬ ߞߊ߬ ߕߏ߫ ߦߋ߲߬ ߘߐ߬ߕߊߡߌ߲ ߞߐߝߍ߬߸ ߏ߬ ߞߎߡߊ߫ ߕߍ߫.>> ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߕߍߣߊ߬ ߛߐ߲߬ ߠߊ߫ ߞߊ߬ ߛߌ߰ߞߊ߲߬ ߠߊߘߊ߲߫߸ ߡߍ߲ ߠߊߥߟߌ߬ߕߐ߫ <<ߡߐ߰ ߞߋߟߋ߲߫ ߞߎ߲߬ߞߊߘߊ߲>> ߡߊ߬߸ ߞߏ߫ ߊ߬ ߞߍߕߐ߫ ߛߌ߰ߞߊ߲߫ ߠߋ߬ ߟߊߘߊ߲߫ ߠߊ߫߸ ߡߍ߲ ߞߍߕߐ߫ ߓߍ߯ ߕߊ ߘߌ߫߸ ߊ߬ ߘߏ߲߬ ߘߌ߫ ߓߍ߲߬ ߓߍ߯ ߡߊ߬، ߒ߬ߓߊ߬߸ ߛߌ߰ߞߊ߲߬ ߞߎߘߊ ߡߍ߲ ߠߊߘߊ߲߫ ߘߊ߫ ߏ߬ ߘߐ߫߸ ߣߴߊ߬ ߟߊߘߌ߬ߢߍ߬ ߘߊ߫ ߂߀߂߅ ߕߎߟߊߝߌ߲ ߕߋ߬ߟߋ߫ ߂߁ ߞߊ߲ߘߟߌ ߝߍ߬߸ ߏ߬ ߞߊ߬ ߛߌߟߊ ߟߊߞߊ߬ ߟߋ߬߸ ߞߊ߬ ߓߊ߬ߟߊ߲ ߠߊߥߟߌ߬، ߊ߬ ߝߐ ߡߍ߲ ߞߍ߫ ߘߴߊ߬ ߓߟߏ߫߸ ߞߏ߫ ߊ߬ߟߋ ߓߊ߬߸ ߊ߬ ߟߊ߫ ߛߌ߲߬ߝߏ߲ ߕߐ߭ ߟߎ߬ ߓߊ߬߸ ߞߏ߫ ߊ߬ߟߎ߬ ߝߏߦߌ߬ ߕߍߣߊ߬ ߞߍ߫ ߟߊ߫ ߡߊ߬ߡߌ߬ߣߊ߬ߟߌ߬ߟߊ߫ ߘߌ߫߸ ߏ߬ ߞߎߡߊ ߞߍ߫ ߘߊ߫ ߥߎߦߊ ߘߌ߫، ߓߊߏ߬߸ ߛߌ߰ߞߊ߲߬ ߞߎߘߊ ߞߵߏ߬ ߞߕߌ ߕߍ߰ ߟߋ߬ ߝߋߎ߫، ߏ߬ ߞߐߝߍ߬ ߞߊߙߏ߫ ߛߓߊ߬߸ ߘߎ߲߬ߓߎߦߊ߬ ߓߘߊ߫ ߛߎߘߊ߲߫ ߢߣߊߕߊߟߌ ߘߐ߫߸ %߈߆،߇߂ ߢߐ߲߰ ߠߊ߫.
߇߲ ߺ ߟߊ߬ߕߊ߲߬ߞߌ߲߬ߠߌ߲ ߣߌ߫ ߟߊ߬ߕߎ߬ߣߎ߲߬ߠߌ߲
ߖߌ߬ߣߍ߫ ߘߐ߬ߕߊߡߌ߲ ߡߍ߲ ߦߋ߫ ߕߋ߲߬߸ ߊ߬ ߘߐߞߍ߫ ߘߊ߫ ߞߏ߫ ߛߌߦߊߡߊ߲߫ ߠߋ߬ ߟߊ߫߸ ߛߌ߰ ߞߍ߫ ߘߊ߫ ߡߐ߱ ߟߎ߬ ߘߊ ߞߊ߲߬߸ ߞߊ߬ ߞߓߊ ߛߌ߰ ߞߎߡߟߊ ߓߍ߯ ߘߊ ߞߊ߲߬߸ ߞߊ߬ ߞߎ߲߬ߠߊ߬ߓߐ߬ߟߊ ߓߍ߯ ߞߎ߲߭ ߓߐ߫ ߦߋ߲߬، ߔߊߞߌߛߦߊ ߟߊߕߐ߲߫ ߘߊ߫ ߟߋ߬ ߂߀߂߂ ߟߊ߫، ߞߙߎߞߊ߫ ߛߌߦߊߡߊ߲߫߸ ߡߍ߲ ߠߎ߬ ߟߊߘߎ߲߫ ߘߊ߫، ߞߌ߬ߓߊ߬ߙߏ߬ߘߊ߬ ߛߌߦߊߡߊ߲߫߸ ߏ߬ ߟߎ߬ ߘߊߕߎ߲߯ ߘߊ߫، ߝߊ߲߬ߞߊߛߌ߬ߣߊ ߟߎ߬ ߕߎߣߎ߲߫ ߞߏ ߝߐ߫ ߘߊ߫߸ ߘߏ߫ ߟߎ߫ ߖߊ߬ߛߏ߲߬ ߘߊ߫: ߂߀߂߄ ߞߊ߬ߙߌ߬ߝߐ ߟߊ߫߸ ߎߡߊߙߎ߫ ߛߌ߬ߟߊ (ߝߏߣߌ߲ߞߋ߫ ߡߍ߲ߖߍ߬) ߣߌ߫ ߡߊߡߊߘߎ߫ ߓߌߟߐ߬ ߓߊ ߖߊ߬ߛߏ߲߬ ߘߊ߫، ߂߀߂߄ ߞߏߟߌ߲ߞߏߟߌ߲ ߠߊ߫߸ ߝߐ߰ߓߍ߬ߦߊ߬ߟߊ߫ ߤߊ߬ߓߌߓ ߡߊߙߎߥߊߣ ߞߡߊ߬ߙߊ߬ ߟߊߕߎߣߎ߲߫ ߘߊ߫، ߂߀߂߅ ߟߊ߫߸ ߡߊ߬ߡߎߘߎ߬ ߓߊߓߌߟߊ߫ ߞߋߕߊ߬ ߡߍ߲ ߦߋ߫ ߢߊߣߌ߲ߡߊߓߏߙߌ ߘߐ߫߸ ߏ߬ ߛߐ߬ߘߐ߲߬ ߝߊ ߟߊߕߎߣߎ߲߫ ߘߊ߫، ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߕߐ߲ߕߌ߯ ߛߊ߲ߘߐߕߊ ߡߍ߲ ߘߐ߱ߘߏ߲߬ߣߍ߲߫ ߡߐ߰ߦߊ ߤߊߞߍ߫ ߞߏ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߓߙߊߡߊߖߊ߲ߓߊ߲ ߡߍ߲ ߞߍߣߍ߲߫߸ ߊ߬ ߞߍߣߍ߲߫ “ߓߘߐ߬ ߘߟߊߛߏ߬ߙߏ߲߬ߜߋ߬ߣߍ߲” ߠߋ߬ ߞߣߐ߫߸ ߡߍ߲ ߞߎߡߊ ߟߎ߬ ߞߍ߫ ߘߊ߫ ߡߊ߬ߛߌ߬ߟߊ߲߬ߠߌ߲߬ ߞߎߡߊ ߟߎ߬ ߘߌ߫.
߈߲ ߺ ߞߊ߬ ߕߏ߫ ߘߏ߫ ߟߴߊ߬ ߖߍ߬ߘߍ߫ ߟߐ߬ߘߎ߮ ߞߊ߲߬ ߛߐ߲߬ ߝߏ߫ ߊ߬ ߓߘߊ߫ ߣߊ߬ ߞߍ߫ ߞߟߍ߬ߕߌ߯ ߟߏ߬ߟߏ߬ ߟߏ߰ߟߎ߬ߕߌ߮ ߘߌ߫
߂߀߂߄ ߓߌ߲ߠߊߥߎߟߋ߲ ߕߋ߬ߟߋ߫ ߂߄ ߡߊ߬߸ ߘߎ߲߬ߓߎߦߊ߬ ߞߍ߫ ߘߊ߫ ߛߊ߬ߝߌߝߌ ߞߟߍ߬ߕߌ߮ ߘߌ߫، ߂߀߂߄ ߣߍߣߍߓߊ ߟߊ߫߸ ߊ߬ ߞߊ߬ ߣߊ߲߬ߕߌ߰ߘߊ ߞߟߍ߬ߕߌ߰ߦߊ ߘߴߊ߬ ߖߍ߬ߘߍ߫ ߡߊ߬߸ ߏ߬ ߡߍ߲ ߦߋ߫ ߟߏ߬ߟߏ߬ ߟߏ߯ߟߎ ߘߌ߫߸ ߏ߬ ߕߍ߫ ߡߐ߰ ߜߘߍ߫ ߛߌ߫ ߓߟߏ߫ ߖߌ߬ߣߍ߫ ߣߊ߲߬ߕߌ߮ ߟߎ߬ ߘߐ߫ ߕߋ߲߬، ߊ߬ ߞߊ߬ ߡߊ߬ߛߘߌ߬ߟߌ ߘߏ߫ ߟߎ߫ ߛߐ߬ߘߐ߲߬: ߖߡߊ߬ߣߊ ߘߏ߲߬ߖߟߎ߬ߡߊ ߓߊߙߊ߲ߕߏ߲߫ ߓߟߋߓߟߋ ߘߌ߫ ߘߴߊ߬ ߡߊ߬ ߂߀߂߁ ߠߊ߫߸ ߡߊ߬ߟߌ ߝߣߊ߫ ߞߊ߬ ߝߊ߬ߛߏ ߘߏ߲߬ߖߟߎ߬ߡߊ ߓߊߙߊ߲ߕߏ߲߫ ߓߟߋߓߟߋ ߘߴߊ߬ ߡߊ߬ ߂߀߂߂ ߟߊ߫߸ ߞߏ߲߬ߓߏ߬ߦߊ ߞߎ߲߬ߢߊ߬ߘߐ ߘߌ߫ ߘߴߊ߬ ߡߊ߬ ߂߀߂߃ ߟߊ߫ ߜ߭ߊ߬ߡߊߟ ߊߓߑߘߍߟ ߣߊߛߍߙ ߖߊ߯ߓߘߊ ߟߊ߫ ߞߐߣߊߞߙߌ߫߸ ߊ߬ ߣߌ߫ ߝߊ߬ߛߏ ߞߍߢߐ߲߯ߝߍ ߓߊߙߊ߲ߕߏ߲߫ ߓߟߋߓߟߋ ߘߌ߫ ߘߴߊ߬ ߡߊ߬ ߂߀߂߄ ߠߊ߫.
߉߲ ߺ ߢߣߊߕߊߟߌ ߓߙߊߡߊߖߊ߲ߓߊ߲ ߞߍ߫ ߘߊ߫ ߌ߬ߦߊ ߟߎ߬ ߟߊ߫ ߓߙߊߡߊߖߊ߲ߓߊ߲ ߠߋ߬ ߘߌ߫
߂߀߂߅ ߞߊ߲ߕߌ߯ ߢߣߊߕߊߟߌ ߘߐ߫߸ ߘߎ߲߬ߓߎߦߊ߬ ߞߎ߲߫ ߘߴߊ߬ ߖߍ߬ߘߍ߫ ߡߊ߬ ߡߏ߬ߤߊ߬ߡߍ߬ߘ ߛߍ߲ߞ ߞߎߓߋ ߞߣߐ߫ ߟߋ߬ ߞߐߣߊߞߙߌ߫، ߊ߬ ߕߎ߲߬ ߦߴߊ߬ ߘߊߘߐߞߊ߲ ߠߎ߬ ߘߏ߲߬ ߠߴߊ߬ ߟߊ߫ ߞߏߕߌ߯ ߝߟߐ ߟߋ߬ ߘߊ߫߸ ߊ߬ ߡߊ߫ ߛߐ߬ߘߐ߲߬ ߢߐ߲߯ߓߍ߲߫ ߝߏߦߌ߬ ߘߐ߫߸ ߝߏ߫ ߓߙߊߡߊߖߊ߲ߓߊ߲ ߞߎ߲߬ߘߏ߲ ߝߍ߬߸ ߊ߬ ߣߴߊ߬ ߟߊ߫ ߓߐ߬ߟߐ߲߬ߞߊ ߦߋ߫ ߘߊ߫߸ ߊ߬ߟߎ߬ ߦߴߊ߬ ߕߎ߬ߙߎ߲ ߞߊ߲߬ ߞߐߣߊߞߙߌ߫߸ ߊ߬ ߘߏ߲߬ ߡߊ߫ ߝߋ߲߫ ߝߐ߫ ߦߋ߲߬ ߝߣߊ߫، ߓߙߊߡߊߖߊ߲ߓߊ߲ ߞߍ߫ ߘߴߊ߬ ߟߊ߫ ߖߌ߬ߦߊ߬ߖߟߎ߬ ߞߎ߲߬ߞߎ߬ߘߎ߲߬ߣߍ߲ ߘߏ߫ ߟߋ߬ ߘߐ߫߸ ߊ߬ ߦߋ߫ ߞߎߡߊ߫ ߟߊ߫ <<ߖߐ ߣߌ߫ ߖߛߎ߬ߛߎߡߊ>> ߞߊ߲߬ ߡߍ߲ ߘߐ߫، ߊ߬ ߟߊ߫ ߞߐߓߊ߯ߦߊ ߏ߬ ߓߍ߯ ߣߴߊ߬ ߕߊ߫ ߓߙߊߡߊߖߊ߲ߓߊ߲ ߘߊߞߎ߲ ߘߐ߫߸ ߊ߬ ߓߊߘ߫ ߣߊ߬ ߘߊ߬ߘߌ߬ߟߌ ߖߍ߬ߘߍߖߍ߬ߘߍ ߞߍ߫ ߢߣߊߕߊߟߌ ߘߐ߫، ߊ߬ ߞߏ߬ߣߌ߲߸ ߡߐ߰ ߛߌ߫ ߕߎ߲߬ ߘߴߊ߬ ߢߊߜߊ߬߸ ߏ߬ ߟߎ߬ ߓߍ߯ ߣߍ߰ߓߐ߫ ߘߊ߫ ߟߋ߬߸ ߏ߬ ߘߏ߫ ߟߎ߫ ߖߍ߬ߘߍ ߕߍ߫ ߖߡߊ߬ߣߊ ߞߣߐ߫.
߁߀߲ ߺ ߊ߬ ߞߊ߲߫ ߞߏ߫ ߊ߬ߟߋ ߞߎ߲߭ ߕߍ߫ ߞߎ߲߫ ߖߡߊ߬ߣߊ߬ ߛߌ߫ ߞߓߊ߬ ߞߘߐ߫߸ ߓߊ߬ߙߌ߬ ߝߊ߬ߙߊ߲߬ߛߌ߫ ߞߟߍ߬ߡߐ߰ ߡߛߏ ߟߋ߬ ߦߴߊ߬ ߞߎ߲߬ ߝߘߎ߫ ߟߊ߫
ߘߎ߲߬ߓߎߦߊ߬ ߛߐ߬ߘߐ߲߬ ߘߊ߫ ߞߊ߲ߞߊ߲߫ ߠߋ߬߸ ߓߊ߬ߣߊ߲߬ߞߘߐ߬ߘߊ ߞߌ߲߬ߘߊ ߟߊ߫߸ ߓߊߕߍ߫ ߞߣߐ߫، ߊ߬ ߡߏ߬ߛߏ ߦߋ߫ ߟߏߙߌߦߊߣ ߘߊߙߑߓߎ߫ ߘߎ߲߬ߓߎ߬ߦߊ߫ ߟߋ߬ ߘߌ߫߸ ߏ߬ ߦߋ߫ ߝߊ߬ߙߊ߲߬ߛߌ߫ ߞߟߍ߬ߡߐ߮ ߘߏ߫ ߟߋ߬ ߘߌ߫، ߊ߬ ߣߴߏ߬ ߞߊ߬ ߢߐ߲߮ ߦߋ߫ ߊ߬ ߟߊ߫ ߟߊ߬ߞߐ߰ߟߌ ߕߎ߬ߡߊ ߟߋ߬ ߟߊ߫ ߝߊ߬ߙߊ߲߬ߛߌ߬، ߘߋ߲߫ ߣߊ߯ߣߌ߲߫ ߦߴߊ߬ߟߎ߬ ߓߟߏ߫، ߘߎ߲߬ߓߎߦߊ߬ ߟߊ߫ ߕߐ߲߬ߞߘߎ߬ߣߍ߲߬ ߥߎߟߋ߲ ߣߴߊ߬ ߟߊ߫ ߢߟߊ߸ ߏ߬ ߟߎ߬ ߦߴߊ߬ ߡߊߛߌߟߊ߲߫ ߠߊ߫ ߛߐ߲߬߸ ߞߵߊ߬ ߟߊ߫ <<ߗߍ߬ߝߊ߬ߘߌ߲߬ߧߊ>> ߟߊߓߐ߫ ߜߍ ߘߐ߫، ߊ߬ ߟߊ߫ ߞߎߡߊ ߡߍ߲ ߞߍ߫ ߘߊ߫ ߡߊ߲߬ߕߏ߲߬ ߠߊߘߍ߬ߣߍ߲ ߠߊ߫߸ ߊ߬ ߞߵߊ߬ ߝߐ߫ ߟߋ߬ ߦߋ߲߬ ߞߏ߫ ߊ߬ߟߋ ߕߍ߫ ߝߊ߬ߙߊ߲߬ߛߌ߬ ߟߊ߫ ߡߐ߰ ߘߌ߫߸ ߊ߬ ߕߍ߫ ߙߎ߬ߛߌ߬ ߟߊ߫ ߡߐ߰ ߘߌ߫߸ ߓߊ߬ߙߵߊ߬ ߦߋ߫ ߝߘߊ߬ߝߌ߲߬ߠߊ߬ ߟߊ߫ ߡߐ߱ ߟߋ߬ ߘߌ߫، ߞߵߊ߬ ߦߌ߬ߘߊ߬ ߞߏ߫ ߊ߬ ߣߌ߫ ߓߍ߯ ߘߌ߫ ߓߊ߯ߙߊ߫߸ ߓߊ߬ߙߵߊ߬ ߕߍ߫ ߞߎ߲߬ ߡߐ߰ ߞߓߊ߬ ߞߘߐ߫.
ߒ߬ߓߊ߬߸ ߞߏߢߊ߫ ߕߊ߲߫ ߠߋ߬ ߝߟߍ߫ ߊߟߎ߫ ߢߊߞߘߐ߫ ߣߌ߲߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߏ ߘߐ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ ߕߍ߫ ߞߊ߬ߝߏ߬ߖߊ߬ߛߏ߲߬ߠߊ߬ ߜߊ߲ߛߊ߲߫ ߘߌ߫، ߞߵߊ߬ ߕߊ߬ ߟߊ߬ߞߐ߰ߟߌ ߟߎ߫ ߡߊ߬ ߞߐߞߊ߲߬߸ ߞߵߊ߬ ߛߌ߰ ߊ߬ ߟߊ߫ ߞߊ߬ߝߏ߬ ߖߊߛߏ߲ ߓߋߟߋ߲ߠߊ ߟߊ߫߸ ߊ߬ ߣߴߊ߬ ߟߊ߫ ߟߊ߬ߤߘߌ߬ ߛߐߛߐ߸ ߞߵߏ߬ ߟߊ߫ ߖߡߊ߬ߣߊ ߛߐ߬ߘߐ߲ ߠߊߛߓߊ߬ߕߌ ߞߊ߲߬߸ ߊ߬ ߣߴߊ߬ ߓߘߊ߫ ߖߘߍ߬ߕߌ߰ߦߊ ߡߍ߲ ߘߌ߫ ߖߡߊ߬ߣߊ ߡߊ߬ ߖߊ߬ߕߋ߬ߘߐ߬ߛߌ߰ ߞߎ߲ߓߊ ߟߎ߬ ߘߐ߫، ߊ߬ ߓߘߊ߫ ߖߊߟߌߞߊ ߡߍ߲ ߟߴߊ߬ ߛߋ߲߬ߞߘߐ߬ߡߊ߬ߕߍ߰ߟߊ ߟߎ߫ ߞߊ߲߬߸ ߊ߬ ߣߌ߫ ߞߓߊ ߡߍ߲ ߦߴߊ߬ ߓߟߏ߫ ߡߐ߰ ߟߎ߬ ߞߊ߲ߡߊ߬߸ ߡߍ߲ ߠߎ߬ ߦߴߊ߬ ߡߊߓߎ߬ߙߎ߲߬ߕߌ߬ ߟߊ߫߸ ߊߟߎ߫ ߓߘߴߏ߬ ߟߎ߬ ߓߍ߯ ߦߋ߫، ߏ߬ ߡߍ߲ ߣߐ߬ ߓߍ߯ ߛߌߟߊ߲߫ ߠߴߊ߬ ߢߍ߫߸ ߞߵߊ߬ ߞߏߘߌߦߊ߫ ߘߏ߫ ߟߎ߫ ߝߣߊ߫ ߦߋ߫ ߊ߬ ߟߊ߫ ߞߍߣߍ߲ ߘߏ߫ ߟߎ߫ ߞߏߛߐ߲߬. ߊ߬ ߛߊ߲߬ ߄߁ ߣߌ߲߬ ߡߊ߬߸ ߊ߬ ߓߍߣߊ߬ ߛߊ߲߬ ߥߐߙߐ߲ߝߌ߬ߟߊ߫ ߟߐ߬ߒ߬ߞߋ߬ߟߊ ߟߋ߬ ߘߊߡߌ߬ߣߊ߬߸ ߞߵߊ߬ ߓߍ߲߬ ߛߌ߰ߞߊ߲߬ ߞߎߘߊ ߞߣߐ߫ ߞߎߡߊ ߟߎ߫ ߡߊ߬߸ ߊ߬ ߣߐ߬ ߏ߬ ߡߍ߲ ߠߊߞߎߘߦߊ߫ ߟߊ߫، ߒ߬ߓߊ߬ ߡߍ߲ ߕߏߣߍ߲߫ ߛߍߣߍ߲߬߸ ߦߊ߯ߟߊ߫߸ ߊ߬ ߘߴߊ߬ ߟߊ߫ ߛߋߓߊ߯ߦߊ ߣߌ߲߬ ߞߍ߫ ߓߍ߯ߦߊ ߟߊߛߓߊ߬ߕߌ ߞߊ߲߬ ߖߌ߬ߣߍ߬ ߞߣߐ߫ ߓߊ߬؟ ߥߟߴߊ߬ ߘߌ߫ ߝߊ߲߬ߞߊ ߟߊߓߊ߯ߙߊ߫ ߞߊ߬ ߞߍ߫ ߖߊߟߌߞߦߊߟߊ ߘߌ߫߸ ߊ߬ ߞߊ߲߫ ߞߏ߫ ߊ߬ ߕߴߏ߬ ߡߍ߲ ߝߍ߬ ߞߊ߬ߣߌ߲߬؟
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
