ߞߊ߯ߙߌ ߣߌ߲߬ ߡߊ߬߸ ߞߊ߲ߞߊ߲߫ ߕߌ߲߬ߞߎߘߎ߲ ߛߊߛߋ߫ ߟߊ߫ ߟߞߊߙߊߠߌ߲ߠߊ߫ ߞߘߐ߫ ߕߊ߬ߓߊߟߌ ߢߌ߲߬ ߠߎ߫ ߞߵߊ߬ߟߎ߬ ߟߊߘߍ߬߸ ߞߏ߫ ߊ߬ߟߎ߬ ߡߊ߫ ߓߍ߲߬ ߞߎ߲߬ߠߊ߬ߛߌ߮ ߣߌ߫ ߕߐ߰ߕߐ߰ߟߌ߬ߘߊ ߟߊ߫ ߓߍ߲߬ߞߊ߲߫ ߞߟߊ߬ߣߐ߬ߦߊ߬ߣߍ߲ ߡߊ߬، ߊ߬ߟߎ߬ ߞߊ߲߫ ߞߏ߫ ߝߏ߫ ߊ߬ߟߎ߬ ߦߋ߫ ߕߊ߬ ߟߋ߬ ߝߘߏ߬ߓߊ߬ ߓߊ߯ߙߊ ߘߐ߫߸ ߣߌ߫ ߛߙߊߕߌ߫ ߛߌ߫ ߕߍ߫.
ߞߊ߯ߙߌ ߣߌ߲߬ ߡߊ߬ ߂߀߂߅ ߞߏߟߌ߲ߞߏߟߌ߲ ߕߟߋ߬ ߇߸ ߞߊ߲ߞߊ߲߫ ߕߌ߲߬ߞߎߘߎ߲ ߛߊߛߋ߫ ߟߊ߫ ߟߞߊߙߊ߲ߠߌ߲ߠߊ߫ ߞߘߐ߫ ߕߊ߬ߓߊߟߌ ߟߎ߬ ߞߵߊ߬ߟߎ߬ ߟߊߘߍ߬ ߞߊ߬ ߟߊ߬ߥߊ߲߬ߞߊ߲߬ߠߌ߲ ߘߏ߫ ߞߍ߫߸ ߞߵߊ߬ߟߎ߬ ߟߊ߫ ߓߊ߲߭ ߦߌ߬ߘߊ߬߸ ߞߏ߫ ߊ߬ߟߎ߬ ߡߊ߫ ߛߐ߲߬ ߞߎ߲߬ߠߊ߬ߛߌ߮ ߣߌ߫ ߖߌ߬ߣߍ߬ ߕߌߙߌ߲ߠߌ߲ߠߊ ߟߎ߬ ߣߴߊ߬ ߟߞߊ߬ߙߊ߲߬ߠߌ߲߬ߠߊ ߟߎ߬ ߟߊ߫ ߕߐ߰ߕߐ߰ߟߌ߬ߘߊ߬ ߟߊߓߌ߬ߟߊ߬ߣߍ߲ (ߖߕߟߕߟ) ߠߊ߫ ߓߍ߲߬ߞߊ߲߫ ߞߟߊ߬ߣߐ߬ߦߊ߬ߣߍ߲ ߡߊ߬ ߢߊ ߛߎ߯ ߺ ߎ ߺ ߛߎ߯ ߟߋ߬ ߡߊ߬، ߏ߬ ߘߐ߫߸ ߞߏ߫ ߊ߬ߟߎ߬ ߦߋ߫ ߕߊ߯ߡߊ߫ ߟߊ߫ ߕߐ߰ߕߐ߰ߟߌ߬ߘߊ߫ ߟߋ߬ ߞߊ߲߫ ߠߊ߫ ߡߎ߬ߕߎ߲߬߸ ߡߍ߲ ߦߋ߫ ߛߊ߬ߙߌ߬ߦߊ߬߬ ߞߣߐ߫.
ߊ߬ ߢߌ߬ߣߌ߲߬ߞߊ߬ߣߍ߲ ߢߐ߲߯ ߠߊߘߍ ߣߌ߲߬ ߞߎ߲߭ ߡߊ߬߸ ߡߎߛߊ߫ ߖߊ߬ߞߌ߬ߕߋ߫ ߞߊ߬ ߖߋ߬ߓߌ߬ߟߌ ߞߍ߫߸ ߊ߬ߟߋ ߡߍ߲ ߦߋ߫ ߢߌ߲߬ߧߊ ߣߌ߲߬ ߘߏ߲߬ߖߟߎ߬ߡߊ߬ߟߌ߬ߟߊ ߘߌ߫ ߞߊ߬ߣߌ߲߬:
<<ߊ߲ ߞߊ߬ ߟߊ߬ߛߋ߬ߟߌ ߣߌ߲߬ ߞߍ߫ ߟߋ߬ ߓߌ߬߸ ߞߵߊ߲ ߡߙߌߦߊ ߦߌ߬ߘߊ߬، ߞߊ߬ߕߎ߲߯߸ ߛߊߛߋ߫ ߟߊ߫ ߟߞߊߙߊ߲ߠߌ߲ߠߊ߫ ߞߘߐ߫ ߕߊ߬ߓߊߟߌ ߟߎ߬ ߟߊ߫ ߛߓߍߘߊ ߡߍ߲ ߦߋ߫ ߞߊ߲ߞߊ߲߫ ߦߊ߲߬߸ ߊ߲ ߣߌ߫ ߡߙߊ߬ߓߊ߰ߘߊ ߟߎ߬ ߟߊ߫ ߢߐ߲߯ߦߋ ߓߍ߯ ߞߐߝߍ߬ ߕߌ߲߬ߞߎߘߎ߲ ߘߐ߫ ߦߊ߲߬߸ ߊ߲ ߡߊ߫ ߓߍ߲߬ ߞߎ߲߬ߠߊ߬ߛߌ߮ ߣߌ߫ ߛߑߟߍߜ߭ ߟߊ߫ ߓߍ߲߬ߞߊ߲߫ ߞߟߊ߬ߣߐ߬ߦߊ߬ߣߍ߲ ߡߊ߬ ߡߎ߰ߡߍ߫.>>
ߊ߬ ߞߵߊ߬ ߞߏ ߥߊ߫ ߢߊ ߦߋ߫ ߞߋ߬ߟߋ߲߬ߠߊ߬ ߞߏ ߟߋ߬ ߘߌ߫߸ ߓߍ߯ ߓߍ߲߬ߞߊ߲߬ߡߊ߬ ߕߍ߫ ߡߍ߲ ߘߌ߫:
<<ߘߐ߬ߛߙߋ ߡߍ߲ ߞߟߊ߬ߣߐ߬ߦߊ߬ߣߍ߲߫ ߣߌ߲߬߸ ߏ߬ ߞߍߣߍ߲߫ ߠߋ߬ ߞߵߊ߬ ߛߐ߬ߘߐ߲߬ ߛߌ߲߬ߝߏ߲߬ߘߊ ߕߐ߬ ߝߌ߬ߟߊ ߡߊ߫ ߛߐ߬ߘߐ߲߫ ߊ߬ ߘߐ߫، ߊ߲ߠߎ߬ ߘߏ߲߬ ߡߊ߬ߞߏ ߦߋ߫ ߡߍ߲ ߠߊ߫߸ ߊ߲ߠߎ߬ ߡߐ߰ ߞߘߐ ߟߎ߬ ߞߊ߬ߣߌ߲߬߸ ߊ߲ߠߎ߬ ߡߍ߲ ߠߎ߬ ߡߊ߫ ߕߊ߬߸ ߊ߬ߟߎ߬ ߡߴߊ߲ߠߎ߬ ߤߍߣߍ߲ߕߊ߫ ߓߌ߬ߟߊ߫ ߘߐ߬ߛߙߋ ߣߌ߲߬ ߘߐ߫، ߊ߲ߠߎ߬ ߘߏ߲߬ ߓߊ߲ߣߍ߲߫ ߠߋ߬ ߞߘߐߓߐ߫ ߟߊ߫߸ ߞߊ߬ ߢߎߡߍߙߋ߲߫ ߔߊߔߘߊ ߟߎ߬ ߕߊ߬߸ ߊ߲ ߠߊ߫ ߕߏ߲ߘߋ߫ ߛߐ߬ߘߐ߲߬ߣߍ߲ ߠߎ߬ ߓߘߊ߫ ߟߊߕߊ߯߸ ߞߊ߬ ߓߊ߲߫ ߞߵߊ߲ ߠߊߕߊ߯ ߝߏ߮ ߟߎ߬ ߞߣߐ߫، ߊ߲ ߠߊ߫ ߞߘߐߓߐߟߌ߫ ߛߓߍ ߟߎ߬ ߦߋ߫ ߡߙߊ߬ߓߊ߰ߘߊ ߟߊ߬ߞߟߏ߬ߞߟߏ߬ߟߌ ߗߋߕߌ߯ߘߊ ߟߎ߬ ߟߊ߫، ߡߎ߲߬ ߠߊ߫ ߏ߬ ߘߐ߫ ߞߏ߫ ߒ߬ ߧߋ߫ ߛߊ߬ߦߌ߲߬ ߞߘߐߓߐߟߌ߫ ߜߘߍ߫ ߡߊ߬؟ ߊ߲ ߓߊ߲ ߞߐ ߛߙߊߕߌ ߟߎ߬ ߘߝߊ߫ ߟߊ߫؟>>
ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫ ߦߋ߲߬߸ ߊ߬ ߞߵߊ߬ߟߎ߬ ߟߊ߫ ߕߙߐߦߊ߫ ߛߐ߬ߘߐ߲߬ߣߍ߲ ߠߎ߬ ߢߊߝߐ߫:
<<ߊ߲ ߕߍ߫ ߛߐ߲߬ ߖߌ߰ߟߊ߬ߝߐ߬ߦߊ߬ ߜߘߍ߫ ߡߊ߬ ߡߎ߬ߕߎ߲߬߸ ߞߎߡߊߕߍ߫ ߛߍ߰ ߜߘߍ߫ ߡߊ߬، ߊ߲ ߘߍ߬ߢߐ߲߮ ߘߏ߫ ߟߎ߫ ߞߵߊ߬ߟߎ߫ ߖߍ߬ߘߍ߫ ߝߊ߰ ߟߋ߬، ߊ߲ ߡߊ߫ ߝߏߦߌ߬ ߛߐ߬ߘߐ߲߬، ߒ߬ߓߊ߬߸ ߒ߬ ߧߋ߫ ߡߍ߲ ߝߍ߬ ߡߎ߬ߕߎ߲߬߸ ߏ߬ ߟߋ ߊ߲ ߠߊ߫ ߝߊ߲ߞߊ߲ ߞߟߊ߬ߣߐ߬ߦߊ ߘߌ߫߸ ߞߵߊ߲ ߠߊߘߏ߲߬ ߝߘߏ߬ߓߊ߬ ߓߊ߯ߙߊ ߘߐ߫ ߖߏߣߊ߫.>>
ߞߵߊ߬ ߓߍ߲߬ ߛߑߟߍߜ߭ ߟߊ߫ ߞߏߢߊ ߡߊ߬߸ ߏ߬ ߡߍ߲ ߡߊߡߙߊ߬ߣߍ߲߫ ߊߓߎߓߞߊߙ ߛߎߡߊ߬ ߓߟߏ߫߸ ߊ߬ ߞߵߊ߬ ߦߌ߬ߘߊ߬ ߞߏ߫:
<<ߊ߲ ߧߴߊ߲ ߖߘߍ߬ ߦߋ߫ ߟߊ߫ ߖߊ߲߬ߝߊ ߟߋ߬ ߕߍߡߊ߬، ߊ߬ߝߐ߫ ߊ߬ߟߎ߫ ߞߵߊ߲ ߠߊ߫ ߞߘߐ߬ߡߊ߲߫ ߕߊ߬ߡߌ߲߬ߣߍ߲ ߠߎ߬ ߟߐ߫؟ ߊ߬ߝߐ߫ ߊ߬ߟߎ߬ ߦߴߊ߬ ߞߊ߬ߟߊߡߊ߬ ߕߙߐߦߊ ߡߍ߲ ߓߘߴߊ߲ ߛߐ߬ߘߐ߲߬؟ ߊ߬ߝߐ߫ ߊ߬ߟߎ߬ ߦߴߊ߲ ߠߊ߫ ߛߍ߱ ߞߊ߬ߟߊߡߊ߬؟ ߊ߲ ߓߘߊ߫ ߥߊ߫ ߖߡߊ߬ߣߊ ߦߙߐ߫ ߡߊߕߊ߯ߣߍ߲ ߠߎ߬ ߘߐ߫ ߔߏ߲߫، ߞߵߊ߲ ߠߊ߫ ߖߊ߬ߕߋ߬ߘߊ ߟߎ߬ ߟߊߞߊ߬ ߜߍߓߏ߲ ߠߊ߫ ߞߵߊ߲ ߦߟߌߛߌ߰ߣߍ߲ ߕߏ߫ ߕߊ߬ߟߌ߬ ߞߏ ߡߊ߬، ߓߌ߬ ߏ߬ ߘߐ߫߸ ߊ߬ߟߎ߬ ߓߘߴߊ߲ߠߎ߬ ߕߐ߮ ߓߐ߫ ߞߏ ߟߎ߬ ߘߐ߫ ߣߌ߫ ߢߊߝߐߟߌ߫ ߕߍ߫߸ ߘߊ߬ߟߎ߬ ߕߍ߫. ߒ߬ ߕߍ߫ ߛߐ߲߬ ߏ߬ ߡߊ߬ ߝߛߍߞߘߎ߫.>>
ߊ߬ ߢߌ߬ߣߌ߲߬ߞߊ߬ߣߍ߲ ߞߵߊ߬ ߓߍ߲߬ ߊ߬ߟߎ߬ ߟߊ߫ ߕߏ߰ߝߏ ߥߊ߫ ߢߊ ߡߊ߬ ߞߐ߬ߓߊ߬ߟߏ߲ ߣߌ߲߬ ߡߊ߬߸ ߊ߬ ߞߵߏ߬ ߖߋ߬ߓߌ߬ ߣߌ߫ ߕߡߊ߬ߖߌ߬ ߕߍ߫:
<<ߊ߬ߟߎ߬ ߟߊ߫ ߓߍ߲߬ߞߊ߲߫ ߞߟߊ߬ߣߐ߬ߦߊ߬ߣߍ߲ ߏ߬ ߦߴߊ߬ߟߎ߬ ߕߊ ߟߋ߬ ߘߌ߫߸ ߊ߲ߠߎ߬ ߡߊ߬ߞߏ߬ ߛߌ߫ ߕߴߏ߬ ߟߊ߫، ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲߬ ߣߌ߫ ߘߎ߰ߡߊ߬ ߞߎߡߊ߫ ߕߍߣߊ߬ ߒ߬ߠߎ߬ ߡߙߌߦߊ ߡߊߝߊ߬ߟߋ߲߬ ߠߊ߫߸ ߝߏ߫ ߊ߲ ߠߊ߫ ߝߊ߲ߞߊ߲ ߠߋ߬ ߦߋ߫ ߞߟߊ߬ߣߐ߬ߦߊ߬ ߕߘߋ߫، ߞߍ߬ߟߍ ߓߘߊ߫ ߘߊߡߌ߬ߣߊ߬ ߛߍߣߍ߲߬߸ ߊ߬ ߘߏ߲߬ ߥߊߕߐ߫ ߊ߬ ߡߊ߬ ߟߋ߬ ߝߏ߯ ߊ߬ ߘߊ߲߭߸ ߊ߬ ߞߐ ߞߍ߫ ߘߊ߫ ߢߊ ߛߌ߫ ߡߊ߬.>>
ߊ߬ ߟߊߓߊ߲ ߘߐ߫߸ ߡߎߛߊ߫ ߖߊ߬ߞߌ߬ߕߋ߫ ߞߵߊ߬ ߘߍ߬ߢߐ߲߮ ߕߐ߭ ߟߎ߬ ߞߟߌ߫ ߖߡߊ߬ߣߊ ߢߊߝߍ߬:
<<ߡߍ߲ ߞߊ߫ ߢߌ߲߬߸ ߏ߬ ߟߋ ߊ߲ ߧߴߊ߲ ߓߟߏ ߘߌ߫ ߢߐ߲߮ ߡߊ߬ ߞߊ߬ ߕߏ߫ ߝߎ߬ߙߎ߲߬ߞߎ߬ߟߌ ߣߌ߲߬ ߞߐ߫߸ ߡߍ߲ ߛߌ߰ߣߍ߲߫ ߛߋ߲߬ߠߊ߫ ߕߐ߰ߕߐ߰ߟߌ߬ߘߊ߫ ߝߌ߬ߟߊ ߓߟߏ߫، ߏ߬ ߟߎ߫ ߟߋ߬ ߘߏ߲߬ ߘߐߙߐ߲߫ ߘߌ߫ ߛߋ߫ ߝߎ߬ߙߎ߲߬ߞߎ߬ߟߌ ߟߊߟߐ߬ ߟߊ߫، ߛߊߛߋ߫ ߟߊ߫ ߟߞߊߙߊߠߌ߲ߠߊ߫ ߝߏߦߌ߬ ߕߍ߫ ߥߊ߫ ߞߊ߬ߙߊ߲߬ߕߊ߬ ߟߊ߫ ߞߐ߬ߓߊ߬ߟߏ߲ ߣߌ߲߬ ߡߊ߬.>>
ߊ߬ ߞߊ߬ ߞߟߌߟߌ߫ ߞߊ߲ߠߊ߫ ߟߊߛߋ߫ ߞߎ߲߬ߠߊ߬ߛߌ߮ ߟߎ߬ ߝߣߊ߫ ߡߊ߬:
<<ߊ߲ ߧߴߊ߲ ߞߊ߲ߠߊߘߌ߫ ߟߊ߫ ߖߡߊ߬ߣߊ ߞߣߐߟߊ ߡߊ߬߸ ߘߎߢߊ߫ ߡߊ߬، ߝߏ߫ ߓߐߒߘߊ߫ ߟߋ߬ ߛߐ߬ߘߐ߲߬ ߛߍߣߍ߲߬߸ ߡߍ߲ ߘߌ߫ ߕߏ߫ ߊ߬ ߡߊ߬، ߡߍ߲ ߘߌ߫ ߕߋ߬ߟߋߝߌ߬ߟߊ ߢߌ߲߬ ߠߊߕߊ߬ߡߌ߲߬߸ ߏ߬ ߕߍ߫ ߘߋ߬، ߊ߲ ߘߏ߲߬ ߦߋ߫ ߡߍ߲ ߝߍ߬߸ ߏ߬ ߟߋ ߊ߲ ߠߊ߫ ߕߊ߬ߟߌ߬ ߞߏ ߘߌ߫ ߝߘߏ߬ߓߊ߬ ߓߊ߯ߙߊ ߘߐ߫، ߝߎ߬ߙߎ߲߬ߞߎ߬ߟߌ ߦߋ߫ ߓߊߟߏ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߓߟߏ߫
