ߊߡߙߌߞߌ߬ ߣߐ߬ ߦߙߍߞߍߟߌ ߘߏ߫ ߟߋ߬ ߛߌ߰ ߟߊ߫ ߛߋ߲߬ߠߊ߫ ߓߌ߲ߠߊߥߎߟߋ߲ ߂ ߣߴߊ߬ ߃ ߣߌ߲߬ ߡߊ߬߸ ߞߊ߯ߙߞߊߛ، ߘߏߣߊߟ ߕߑߙߐ߲ߔ ߞߊ߲߫ ߞߏ߫ ߦߙߍߞߍߟߌ ߏ߬ ߞߍ߫ ߘߊ߫ ߕߙߎ߬ ߘߌ߫ ߊ߬ߟߎ߫ ߞߵߊ߬ߟߎ߬ ߕߍ߯ ߞߍ߫ ߝ߭ߣߋߖ߭ߎߥߋߟߊ߫ ߞߊ߲ߕߌ߮ ߣߌߞߏߟߊ ߡߊߘߎߙߏ߫ ߘߐ߫، ߞߓߊߞߏ߫ ߞߎߡߊ ߘߏ߫ ߟߎ߫ ߦߋ߫ ߣߌ߲߬ ߞߏ ߘߐ߫߸ ߡߍ߲ ߠߎ߬ ߡߊ߫ ߟߤߊߕߍߦߊ߫ ߝ߭ߣߋߖ߭ߎߥߋߟߊ߫ ߝߊ߰ߡߊ ߟߎ߬ ߓߟߏ߫ ߡߎߣߎ߲߬، ߖߡߊ߬ߣߊ ߞߏ߬ߣߌ߲ ߓߘߊ߫ ߓߌ߬ߟߊ߫ ߟߊ߲߬ߓߏ߲ ߘߐ߫߸ ߞߵߊ߬ ߓߌ߬ߟߊ߫ ߖߐ߬ߘߐ ߘߐ߫.
ߞߊ߬ߦߌ߯ ߔߣߊߡߊ߫ ߓߋ߬ߒ߬ߞߊ߲߬ߠߌ߲ ߓߐ߫ ߘߴߊ߬ ߟߊ߫ ߁߉߈߉ ߟߊ߫߸ ߡߊ߲߬ߞߊ߲ ߡߍ߲ ߥߟߌ߬ߣߍ߲߫ ߛߎ߫ ߕߊ߬ߡߌ߲߬ߣߍ߲ ߣߌ߲߬ ߡߊ߬߸ ߊ߬ ߢߐ߲߰ ߕߎ߲߬ ߡߊ߫ ߞߍ߫ ߊߡߙߌߞߌ߫ ߟߊߕߌߣ ߞߣߐ߫ ߡߎߣߎ߲߬، ߘߏߣߊߟ ߕߑߙߐ߲ߔ ߞߊ߲߫ ߞߏ߫ ߊ߬ߟߎ߫ ߞߊ߬ ߞߟߍ߬ߡߊ߬ߛߏ߲ߧߊ ߟߋ߬ ߞߍ߫ ߛߊ߲ߡߊ߬߸ ߞߊ߬ ߞߊ߯ߙߞߊߛ ߘߌ߲߬ߞߌ߬ߙߊ߬ ߛߌߦߊߡߊ߲߫ ߛߎߡߊ߲߫ ߖߐ߲ߖߐ߲ ߞߍ߫، ߊ߬ ߣߌ߫ ߝߣߊ߫߸ ߝߊ߲߬ߞߊ߬ ߓߟߏߡߊߞߊ߬ߣߍ߲ ߠߎ߬ ߛߋ߫ ߘߴߊ߬ߟߎ߬ ߕߍ߯ ߞߍ߫ ߟߊ߫ ߝ߭ߣߋߖ߭ߎߥߋߟߊ߫ ߞߊ߲ߕߌ߮ ߣߌߞߏߟߊ ߡߊߘߎߙߏ߫ ߘߐ߫، ߊ߬ߟߎ߫ ߞߵߊ߬ ߝߐ߫ ߦߙߍߞߍߟߌ ߣߌ߲߬ ߡߊ߬ ߟߋ߬ ߞߏ߫ <<ߊߓߑߛߏߟߎߕ ߙߋߖ߭ߐߟߝ߭>> ߣߊ߲߬ߕߌ߰ ߞߎߡߊߘߋ߲ ߏ߬ ߡߍ߲ ߞߘߐ ߦߋ߫ ߞߏ߫ <<ߞߐߝߍߣߍ߲ߓߊߟߌ߫>>߸ ߏ߬ ߡߊߗߍ߲߭ ߞߊߙߏ߫ ߦߙߌߞߊ ߟߋ߬ ߕߎ߲߬ ߦߋ߫ ߣߌ߲߬، ߊ߬ߟߎ߫ ߞߵߏ߬ ߘߊߡߌ߬ߣߊ߬ ߡߍ߲ ߡߊ߬߸ ߞߊ߬ ߦߙߐߣߍ߲ ߘߏ߫ ߟߐ߬ ߡߎߣߎ߲߬߸ ߞߵߊ߬߬ ߞߍ߫ ߦߏ߫ ߡߊߘߎߙߏ߫ ߘߏ߲߰ߣߍ߲߫ ߦߋ߲߬ ߠߋ߬، ߊ߬ߟߎ߫ ߞߊ߬ ߘߍߟߑߕߊ߫ ߝߐߙߛ ߗߍ߬ߘߋ߲ ߠߎ߬ ߡߊߞߊ߬ߙߊ߲߬ߧߊ߫ ߏ߬ ߟߋ ߡߊ߬ ߛߊ߫، ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߛߋ.ߌ.ߊ ߡߐ߰ ߜߍ߲ߛߍ߲ߞߍߙߍ߲ ߘߏ߫ ߟߎ߫ ߝߣߊ߫ ߓߟߏߡߊߞߊ߬ ߘߴߊ߬ߟߎ߬ ߓߟߏ߫߸ ߡߍ߲ ߠߎ߬ ߦߋ߫ ߞߊ߲ߕߌ߮ ߟߊ߫ ߖߌ߰ߣߌ߬ߦߟߍ ߓߍ߯ ߜߋ߬ߟߎ߲߬ ߠߊ߫ ߕߍߕߍߕߍ߫، ߊ߬ߟߎ߬ ߓߊ߯ ߞߏ ߡߍ߲ ߠߎ߬ ߛߏ߬ߓߌ߬ ߡߊߘߎߙߏ߫ ߟߊ߫ ߞߏ ߘߐ߫߸ ߊ߬ߟߎ߬ ߘߴߏ߬ ߢߊߝߐ߫ ߊߡߙߌߞߌ߬ ߦߋ߫، ߞߊ߬ߕߎ߲߯߸ ߊ߬ߟߎ߫ ߞߊ߬ ߡߐ߰ ߢߌߣߌ߲߫ ߡߊߘߎߙߏ߫ ߟߊߡߌߣߌ߲ ߘߐ߫߸ ߊ߬ߟߎ߬ ߣߌ߫ ߡߍ߲ ߕߘߍ߬ ߢߐ߲߮ ߞߊ߬ߟߊߡߊ߬ ߜߋ߲ߜߋ߲߫. ߊߡߙߌߞߌ߬ ߞߊ߬ ߛߊ߲ߡߊߞߎߟߎ߲߫ ߁߅߀ ߢߐ߲߰ ߠߋ߬ ߟߊߥߌ߬ߟߌ߫ ߣߌ߲߬ ߞߏ ߘߐ߫߸ ߍߝ-߃߅߸ ߍߝ-߂߂߸ ߞߵߏ߬ ߟߊ߫ ߘߐ߬ߝߏ߬ߙߏ߲߬ߕߏ߬ߟߊ߫ ߓ-߁ ߞߊ߲߬߸ ߏ߬ ߟߎ߫ ߟߋ߬ ߟߊߓߐ߫ ߘߊ߫ ߘߊ߯ ߡߎ߬ߥߊ߲߬ ߣߌ߫ ߞߐ߫ ߢߐ߲߰ ߞߣߐ߫߸ ߞߵߏ߬ ߟߎ߬ ߟߊߕߊ߯ ߗߋߦߊߟߌ ߢߌ߲߬ ߠߊ߫، ߞߟߍ߬ߞߙߎ ߡߍ߲ ߠߎ߬ ߥߊ߫ ߘߊ߫߸ ߍߝ.ߓߌ.ߊߦ ߡߐ߱ ߘߏ߫ ߟߎ߫ ߕߍ߬ߘߍ߫ ߊ߬ߟߎ߬ ߘߐ߫، ߒ߬ߓߊ߬߸ ߞߊ߲ߕߌ߮ ߘߏ߲߰ߣߍ߲߫ ߕߘߍ߬ ߦߙߐ ߡߍ߲ ߘߐ߫ ߖߐ߫߸ ߏ߬ ߟߎ߫ ߟߋ߬ ߘߏ߲߬ ߘߊ߫ ߦߋ߲߬߸ ߤߊ߲߯ ߡߊߘߎߙߏ߫ ߞߵߊ߬ ߖߘߍ߬ ߘߴߊ߬ߟߎ߫ ߡߊ߬، ߊ߬ ߟߊߓߐ߫ ߘߊ߫ ߦߋ߲߬ ߠߋ߬ ߣߊ߯ߣߊ߮ ߘߏ߫ ߛߌߟߊ ߝߍ߬߸ ߞߵߊ߬ ߟߊߘߏ߲߬ ߖߌߞߊ߲߫ ߞߎߟߎ߲߫ ߎ߳.ߍߛ.ߍߛ. ߌߥߏ ߖߌߡߊ ߞߣߐ߫، ߞߐ ߢߌ߲߬ ߠߊ߫߸ ߘߏߣߊߟ ߕߑߙߐ߲ߔ ߞߵߏ߬ ߖߌ߬ߦߊ߬ߓߍ ߘߏ߫ ߟߊߖߍ߲ߛߍ߲߫߸ ߤߊߟߌ߬ ߣߴߊߊ߬ ߦߋ߫ ߛߐ߬ߘߐ߲߬ ߞߏ߫ ߝߐ߰ߓߍ߬ߦߊ߬ߟߊ ߟߎ߬ ߡߊ߫ ߓߊ߲߫ ߕߍ߰ߒ߬ߞߊ߲߫ ߛߐ߬ߘߐ߲߬ ߠߴߏ߬ ߕߎ߬ߢߊ߬ߦߊ ߡߊ߬ ߡߎߣߎ߲߬، ߖߌ߬ߦߊ߬ߓߍ ߏ߬ ߘߐ߫߸ ߡߊߘߎߙߏ߫ ߢߊ ߛߘߌ߬ߣߍ߲߫ (ߢߟߊ߫ ߝߌ߲ ߠߊ߫)߸ ߗߍ߬ߓߊ߬ߡߌߣߊ ߦߴߊ߬ ߓߟߏ ߟߊ߫߸ ߖߌ߫ ߘߎ߲ߘߋ߲ ߦߴߊ߬ ߓߟߏ߫.
ߘߏߣߊߟ ߕߑߙߐ߲ߔ ߞߊ߬ ߝߐ߰ߓߍ߬ ߜߙߊ ߡߍ߲ ߞߍ߫ ߡߊߙߟߊߜ߭ߏ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊߡߙߌߞߌ߬ ߟߋ߬ ߞߍߕߐ߫ <<ߖߡߊ߬ߣߊ ߡߙߊ߬ ߟߊ߫>> ߤߊ߲߯ ߘߐ߬ߕߊߡߌ߲ ߦߋ߫ ߛߌ߰ ߛߋ߲߬ߠߊ߫ <<ߟߊ߬ߞߊ߲߬ߘߊ߬ߟߌ ߞߣߐ߫߸ ߛߊߣߌ߲ߧߊ ߣߌ߫ ߛߊ߬ߙߌ߬ߦߊ ߞߣߐ߫>> ߣߴߏ߬ ߞߍ߫ ߘߊ߫ ߕߎ߬ߡߊ ߡߍ߲ ߠߊ߫߸ ߊ߬ ߡߴߊ߬ ߝߐ߫ ߣߴߊ߬ߟߎ߬ ߕߍߣߊ߬ ߣߊ߲߬ߕߌ߰ ߟߊߕߊ߯ ߟߊ߫ ߦߋ߲߬ ߥߟߊ߫ ߍ߲߬ߍ߲ߍ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߖߐ߰ߣߍ߬ߦߊ߬ߟߌ ߡߍ߲ ߞߍߕߐ߫ ߊ߬ߟߎ߬ ߓߟߏ߫ ߣߌ߲߬ ߞߏ ߘߐ߫߸ ߏ߬ ߢߐ߲߱ ߕߊ߬ߕߐ߫ ߝ߭ߣߋߖ߭ߎߥߋߟߊ߫ ߖߡߊ߬ߣߊ ߞߓߊߕߟߎ ߟߋ߬ ߘߐ߫، ߕߑߙߐ߲ߔ ߞߊ߲߫ ߞߏ߫ ߊ߬ ߣߌ߫ ߞߊ߲ߕߌ߯ ߛߙߍߞߍ ߓߘߊ߫ ߞߎߡߊ߫߸ ߓߐ߬ߟߐ߲߬ߞߊ߫ ߘߍߟߑߛߌ ߙߏߘߙߌߖߋ߫߸ ߞߏ߫ ߊ߬ߟߎ߬ ߞߍߕߐ߫ ߏ߬ ߟߋ <<ߟߊߛߍ߲߫ ߠߊ߫>> ߞߵߊ߬ ߞߍ߫ ߞߊ߲ߕߌ߯ ߘߍ߲߬ߞߍ߬ߕߎ߬ߣߍ߲ ߘߌ߫، ߊ߬ ߞߏ߬ߣߌ߲߸ ߝ߭ߣߋߖ߭ߎߥߋߟߊ߫ ߞߎ߲߬ߠߊ߬ߛߌ߮ ߡߊ߫ ߝߋ߲߫ ߝߐ߫ ߞߎߡߊ ߏ߬ ߞߊ߲߬ ߡߎߣߎ߲߬، ߛߙߋ ߘߏ߫ ߟߎ߫ ߞߏ߬ߣߌ߲ ߞߊ߲߫߸ ߞߏ߫ ߝ߭ߣߋߖ߭ߎߥߋߟߊ߫ ߞߊ߲ߕߌ߯ ߛߙߍߞߍ߫ ߓߐ߬ߟߐ߲߬ߞߊ ߣߌ߲߬ ߘߌ߫ ߞߍ߫ ߙߎ߬ߛߌ߫ ߖߡߊ߬ߣߊ ߞߊ߲߬ ߕߋ߲߬߸ ߊ߬ ߣߴߊ߬ ߞߊ߲߫ ߞߏ߫ ߝߏ߫ ߞߊ߬ ߡߊߘߎߙߏ߫ ߟߊ߫ ߢߣߊߡߦߊ ߘߊ߬ߟߎ ߦߌ߬ߘߴߊ߬ߟߎ߬ ߟߊ߫ ߟߋ߬.
ߝ߭ߣߋߖ߭ߎߥߋߟߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮߸ ߝߑߟߊߘߡߌߙ ߔߊߘߙߌߣߏ߫ ߞߵߊ߬ ߦߌ߬ߘߊ߬ ߞߏ߫ ߓߋ߬ ߞߍߣߴߊ߬ߟߎ߫ ߞߊ߲߬ ߠߋ߬߸ ߞߏ߫ ߖߊ߬ߡߊ ߦߴߊ߬ ߟߐ߬ ߊ߬ ߦߌߟߊ ߞߵߊ߬ ߞߏ ߟߊߘߊ߲߬، ߊ߬ ߓߘߊ߫ ߣߊ߲߬ߕߌ߰ ߞߙߎ ߘߏ߫ ߟߎ߫ ߟߊߓߐ߫߸ ߡߍ߲ ߠߎ߬ ߦߋ߫ ߞߊ߯ߙߞߊߛ ߘߐߦߊ߯ߟߊ ߞߊ߲߬߸ ߡߊߘߎߙߏ߫ ߞߊ߬ߣߌ߲ ߘߌ߫߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߛߙߋ ߘߏ߫ ߟߎ߫ ߞߊ߲߫ ߞߏ߫ ߊ߬ ߞߏ ߟߊ߲߬ߓߏ߲ ߓߘߊ߫ ߡߊߓߍ߲߬.
ߡߊߘߎߙߏ߫ ߡߌ߬ߣߊ ߞߏ߬ߣߌ߲ ߓߘߊ߫ ߞߍ߫ ߞߏ߫ ߘߌ߫ ߘߋ߬، ߓߊߏ߬߸ ߞߊ߲ߕߌ߮ ߓߘߊ߫ ߡߌ߬ߣߊ߬ ߝߋߎ߫߸ ߒ߬ߞߊ߬ ߖߡߊ߬ߣߊ ߕߍ߫ ߊߡߙߌߞߌ߬ ߕߊ߫ ߓߟߏ߫ ߞߊ߲߬ ߡߎߣߎ߲߬ ߘߋ߬߸ ߙߎ߬ߛߌ߬ ߣߌ߫ ߞߎ߳ߓߊ߫ ߣߌ߫ ߌߙߊ߲߫߸ ߏ߬ ߟߎ߬ ߓߍ߯ ߣߐ߬ ߊ߬ ߞߏ ߞߐ߲߫ ߠߊ߫ ߟߋ߬߸ ߞߏ߫ ߊ߬ߟߎ߬ ߓߘߊ߫ ߝ߭ߣߋߖ߭ߎߥߋߟߊ߫ ߖߘߍ߬ߛߊ߬ߙߌ߬ߦߊ߬ߕߌ߰ߦߊ ߞߎ߬ߙߎ߲߬ߘߎ ߛߐ߬ߛߐ߬. ߖߡߊ߬ߣߊ ߞߍߕߐ߫ ߘߌ߬ ߓߘߍ߬ߓߘߍ߬ߟߌ ߘߊߞߎ߲ ߘߐ߫߸ ߏ߬ ߟߋ ߞߣߐ߬ߘߐ߬ߝߟߌ ߦߋ߫ ߓߍ߯ ߟߊ߫ ߡߎߣߎ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
