ߞߐߝߟߌ߫ ߓߊ߲ߝߟߍ߬ߟߍ ߟߎ߬ ߟߊߕߊ߬ߡߌ߲ ߞߐߝߍ߬ ߞߕߌߖߌ߲ ߛߊ߲ߘߐߕߊ ߓߟߏ߫߸ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߓߘߊ߫ ߢߣߊߕߊߟߌ ߕߊ߬ߡߌ߲߬ ߢߊ ߕߊ߲߬ߘߏ߫ ߖߐ ߣߌ߫ ߖߛߎ߬ߛߎߡߊ ߘߐ߫߸ ߞߊ߬ ߓߊ߲߫ ߞߊ߬ ߓߌ߲߬ߓߊߥߏ ߟߎ߬ ߟߊߥߟߌ߬ ߞߏ ߟߊߢߌߣߌ߲߫߸ ߊ߬ ߣߌ߫ ߣߐ߬ߝߍ߬ߜߍ߲߬ߠߌ߲߬ ߞߏ ߡߍ߲ ߠߎ߬ ߛߌ߰ ߘߊ߫ ߛߋ߲߬ߠߊ߫ ߛߌ߰ߞߊ߲ ߞߎ߲߬ߕߋߟߋ߲ ߡߊߢߌߣߌ߲ ߘߐ߫.
ߟߊ߬ߛߋ߬ߟߌ߬ ߛߓߍ ߘߏ߫ ߟߋ߬ ߟߊߖߍ߲ߛߍ߲ߣߍ߲߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߓߟߏ߫߸ ߞߊ߬ ߝߘߴߊ߬ߟߎ߬ ߟߊ߫ ߥߛߊ߬ߓߊ߰ߦߊ ߞߊ߲ߕߌ߮ ߟߊ߫߸ ߛߟߊߕߌ߯ ߡߊ߬ߓߏ߲߬ߧߊ߬ߕߊ߫ ߡߊ߬ߤߑߡߎ߯ߘ ߊ߬ߟߌ߬ ߦߎ߯ߛߎߝ ߞߵߊ߬ ߛߍߥߊߣߊ߲ߞߊ߲ ߦߌ߬ߘߊ߫ <<ߛߍߥߊ߫ ߞߍߣߍ߲߫ ߖߌ߬ߣߍ߬ ߞߊ߲ߕߌ߯ ߢߣߊߕߊߟߌ ߕߊ߬ߡߌ߲߬ ߢߊ ߟߊ߫>> ߏ߬ ߡߍ߲ ߛߌ߲߬ߝߏ߲߬ߧߊ߬ ߘߊ߫ <<ߖߐ ߣߌ߫ ߡߊ߬ߝߊ>> ߞߣߐ߫.
ߊ߬ ߞߵߊ߬ ߟߊ߫ <<ߞߎߟߎ߲ߖߋߟߌ߫ ߘߊ߲߬ߠߊ߬ߛߋ߬ߓߊߟߌ>> ߟߐ߬ ߞߊ߲ߕߌ߯ ߛߎߥߊ߲ߘߌߣߍ߲ ߡߊ߬߸ ߛߟߊߕߌ߯ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߏ߬ ߡߍ߲ ߞߍߣߍ߲߫ ߛߎߘߊ߲ߓߊ߮ ߘߌ߫ <<ߢߣߊߕߊߟߌ ߖߊ߰ߟߋ߬ ߝߟߐ ߝߍ߬ ߌߞߘߐ߫ ߞߊ߲ߧߊ߫ %߈߆،߇߂ ߟߊ߫.>> ߣߴߏ߬ ߟߐ߲߫ ߘߊ߫ ߞߕߌߖߌ߲ ߛߊ߲ߘߐߕߊ ߟߊ߫ ߟߊ߬ߥߊ߲߬ߞߊ߲߬ߠߌ߲ ߞߐ ߘߐ߫ ߂߀߂߆ ߓߌ߲ߠߊߥߎߟߋ߲ ߕߟߋ߬ ߄ ߡߊ߬.
ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߥߛߊ߬ߓߊ߰ߦߊ ߞߊ߬ ߕߊ߲߬ߘߏ߬ߟߌ ߟߊߛߋ߫ <<ߖߌ߬ߣߍ߫ ߡߌ߬ߙߌ߲߬ߘߌ>> ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߞߍߣߍ߲ <<ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߖߡߊ߬ߣߊ߬ߘߋ߲ ߠߎ߬ ߞߊ߬ ߝߋ߲߫ ߦߋ߫ ߢߣߊߕߊߟߌ ߞߏߢߊ ߟߎ߬ ߘߐ߫.>> ߊ߬ ߞߊ߬ ߕߊ߲߬ߘߏ߬ߟߌ߬ ߞߋߟߋ߲ ߏ߬ ߢߐ߲߰ ߠߊߛߋ߫ <<ߢߣߊߕߊߟߌ ߡߊ߬ߡߙߊ߬ߟߌ߬ ߛߌ߲ߝߏ߲ߘߊ ߟߎ߫ ߡߊ߬߸ ߡߊ߬ߡߌ߬ߘߊ߬ߟߌ߬ߟߊ ߟߎ߫ ߡߊ߬߸ ߞߙߎߞߊ ߟߎ߬ ߣߌ߫ ߢߌ߲߬ߘߍ ߟߎ߬߸ ߞߎ߲߬ߠߊ߬ߛߌ߮ ߣߌ߫ ߣߊ߲߬ߒ߬ߕߊ߲߬ ߘߍ ߛߌ߲߬ߝߏ߲߬ߘߊ ߟߎ߬.>> ߞߵߏ߬ ߟߊ߫ <<ߞߏߟߊߘߍߢߐ߲߮ ߠߎ߫ ߞߊ߲߬ ߛߋߒߞߏߟߦߊ ߡߊ߬ߘߎ߮ ߘߐ߫߸ ߊ߬ ߣߌ߫ ߣߊ߲߬ߝߟߏ߬ ߞߏ>> ߛߌߟߊ ߝߍ߬߸ <<ߊ߬ߟߎ߬ ߟߊ߫ ߥߣߊ߬ߦߊ ߣߴߊ߬ߟߎ߬ ߟߊ߫ ߖߋ߬ߓߌ߬ߦߊ߬ߟߌ ߞߏߛߐ߲߬.>>
ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߦߋ߫ <<ߖߌ߬ߣߍ߬ ߞߊ߲ߓߍ߲ ߛߊ߬ߥߏ߬ ߘߐ߫ ߝߛߊߦߌ߫߸ ߛߊ߫ ߖߡߊ߬ߣߊ ߘߌ߫ ߛߊ߬ߦߌ߲߫ ߛߌ߰ߞߊ߲ ߞߎ߲߬ߕߋߟߋ߲ ߘߐ߫ ߞߊߟߌߦߊ ߘߝߊߣߍ߲ ߘߐ߫߸ ߊ߬ ߣߌ߫ ߞߊ߬ ߓߍ߯ߦߊ ߜߘߌߛߌ߰߸ ߞߊ߬ ߖߡߊ߬ߣߊ ߞߍ߫ ߞߊ߬ߝߏ߫ ߛߊ߬ߙߌ߬ߦߊ߬ߡߊ ߘߌ߫.>> ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߛߌߟߊ ߡߍ߲ ߕߊ߯ߡߊ߫ ߘߊ߫ ߘߐ߬ߕߊߡߌ߲ ߓߟߏ߫ ߞߊ߬ߦߌ߯ ߂߀߂߁ ߠߊ߫߸ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߣߌ߫ ߡߊ߲߬ߕߏ߲߬ߕߍ߬ ߛߌ߲ߝߏ߲ߘߊ ߟߎ߬ ߘߌߣߵߊ߬ߟߎ߬ ߢߊ ߡߊߖߌ߰ ߏ߬ ߝߍ߬߸ <<ߞߵߊ߬ ߡߊߝߟߍ߫߸ ߛߊ߫ ߓߌ߲߬ߓߊߥߏ ߘߌ߫ ߟߊߥߟߌ߬ ߢߊ ߡߍ߲ ߡߊ߬.>>
ߟߊ߬ߓߊ߲ ߘߐ߫߸ ߟߊ߬ߛߋ߬ߟߌ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ߟߎ߬ ߞߊ߲ߠߊߘߌ߫ ߟߊ߫ ߓߍ߯ ߟߊߘߍ߬ߣߍ߲ ߡߊ߬ <<ߞߊ߬ ߘߊߘߐߖߊߥߏ ߛߌ߲ߛߌ߲߫߸ ߞߊ߬ ߞߏߟߊߒߞߘߐߢߐ߲߯ߦߊ ߓߊ߲ߓߊ߲߫߸ ߊ߬ ߣߌ߫ ߞߊ߬ ߞߏ ߟߎ߬ ߟߊߕߊ߯ߡߊ ߕߏ߫ ߛߊ߬ߙߌ߬ߦߊ߬ ߛߌߟߊ ߟߋ߬ ߘߐߙߐ߲߫ ߡߊ߬.>> ߊ߬ߟߎ߫ ߞߵߊ߬ ߟߊߢߌߣߌ߲߫ ߝߣߊ߫߸ ߞߏ߫ ߞߊ߬ ߝߙߍ߬ ߞߍ߫ ߞߊ߬ ߢߣߊߕߊߟߌ ߣߌ߲߬ ߓߟߏߟߊߕߎ߲߰ <<ߥߛߊ߬ߘߋ߲߬ ߢߣߊߕߊߟߌ ߣߌ߫ ߞߊ߲߬ߜߍ߬ߘߊ߬ ߛߎߥߊ߲ߘߟߌ ߣߌ߫ ߘߌ߲߬ߞߌߙߊ ߕߊ ߟߎ߬ ߟߊ߫.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
