ߛߌ߬ߣߌ߲߬ߟߏ߲ ߂߀߂߆ ߞߏ߲ߞߏߜߍ ߕߟߋ߬ ߆ ߡߊ߬߸ ߡߊ߬ߘߌ߬ߣߊ߬ߞߊ ߡߍ߲ ߠߎ߬ ߦߋ߫ ߛߌ߱ ߘߐ߫ ߞߐߣߊߞߙߌ߫߸ ߏ߬ ߟߎ߫ ߞߊ߬ ߛߘߊߞߊߓߐ ߟߋ߬ ߛߌ߰ ߛߋ߲߬ߠߊ߫߸ ߖߡߊ߬ ߛߌߦߊߡߊ߲߫ ߓߐ߫ ߘߊ߫ ߞߊ߬ ߛߐ߬ߘߐ߲߬ ߡߍ߲ ߘߐ߫، ߖߊ߲߬ߖߏ߲ ߞߍ߫ ߘߊ߫ ߁߅ߙߋ߲ ߣߌ߫ ߁߇ߙߋ߲ ߕߍߟߊ ߟߋ߬ ߘߐ߫ ߟߊ߱ߖߌ߬ ߓߊ߲߬ߞߊߟߌ ߞߋߕߊ߬ ߓߘߊ߸ ߏ߬ ߡߍ߲ ߦߋ߫ ߖߌ߬ߣߍ߬ ߘߌ߯ߣߊ ߞߏߢߊ ߟߎ߬ ߝߘߏ߬ߓߊ߬ ߞߟߊ߬ߕߌ߰ߘߊ ߛߌ߲߬ߝߏ߲ ߘߏ߫ ߘߌ߫߸ ߡߊ߬ߕߏߕߏ߬ ߞߌ߲߬ߘߊ ߟߊ߫ ߞߐߣߊߞߙߌ߫.
ߛߘߊߞߊߓߐ ߣߌ߲߬ ߞߍ߫ ߘߊ߫ ߖߐ ߣߌ߫ ߞߋ߬ߟߋ߲߬ߧߊ ߟߋ߬ ߓߊ߲ߓߊ߲߫ ߞߊ߲ߡߊ߬߸ ߡߊ߬ߘߌ߬ߣߊ߫ ߞߊ߬ߓߌ߬ߟߊ߬ ߟߏ߯ߟߎ ߓߍ߯ ߛߐ߬ߘߐ߲߬ ߘߊ߫ ߡߍ߲ ߘߐ߫: ߞߊ߯ߣߌ߲ߘߎ߯، ߡߊߟߢߌߡߊߘߎ߯، ߓߙߋߕߋߟߊ߫، ߞߓߊ߬ߘߎ߰ߟߊ߫، ߊ߬ߙߊ߬ߝߊ߲߬ߘߎ߯߸ ߏ߬ ߟߎ߫ ߟߋ߬ ߞߵߊ߬ߟߎ߬ ߦߟߌ ߣߴߊ߬ߟߎ߬ ߓߟߏ ߝߙߊ߬ ߢߐ߲߮ ߞߊ߲߬߸ ߞߊ߬ ߛߘߊߞߊߓߐ ߣߌ߲߬ ߛߌ߲߬ߝߏ߲߬ߧߊ߫، ߞߵߊ߬ ߓߍ߲߬ ߖߐ ߟߊߥߙߎߞߌ ߡߊ߬ ߖߌ߬ߣߍ߬ ߞߣߐ߫߸ ߞߊ߬ ߢߝߍߕߊ߮߮ ߘߌ߫ ߓߍ߯ ߟߊߘߍ߬ߣߍ߲ ߡߊ߬ ߝߊ߬ߛߏ ߟߊߥߙߎߞߌ ߘߊߞߎ߲ ߘߐ߫.
ߞߊ߬ߙߊ߲߬ߡߐ߰ߓߊ߬ ߄߂ ߟߋ߬ ߞߊ߬ ߞߎ߬ߙߣߊ߬ ߟߊ߬ߖߐߟߐ߲ ߞߍ߫߸ ߞߊ߬ ߓߊ߲߫ ߞߊ߬ ߡߊ߬ߕߙߊ߬ߟߌ ߟߎ߬ ߞߍ߫ ߕߌ߲ߞߌ߫ ߓߎ߰ߓߎ߰ߣߍ߲ ߠߎ߬ ߘߐ߫، ߛߌ߲߬ߝߏ߲߬ߧߊ߬ߟߌ߬ߟߊ ߟߎ߬ ߟߊ߫ ߝߐߟߌ߫ ߘߐ߫߸ ߊ߬ߟߎ߫ ߞߊ߬ ߣߌ߲߬ ߠߊߥߌ߬ߟߌ߫ ߟߋ߬ <<ߛߊ߫ ߞߍߞߋߟߋ߲ߘߌ ߛߌ ߘߌ߫ ߓߙߎ߬ߞߎ߬߸ ߞߊ߬ ߓߊߛߌ߮ ߟߊߘߏ߲߬߸ ߞߊ߬ ߖߡߊ߬ߣߊ ߤߙߍ ߡߊߞߊ߬ߝߏ߬، ߞߵߏ߬ ߢߐ߲߰ ߛߌߦߊߡߊ߲߫ ߝߣߊ߫ ߟߊߘߏ߲߬ ߡߊ߬ߘߌ߬ߣߊ߫ ߖߍ߬ߘߍ ߞߣߐ߫.>>
ߖߊ߬ߡߊ ߡߍ߲ ߓߐ߫ ߘߊ߫ ߛߘߊߞߊߓߐ ߣߌ߲߬ ߘߐ߫߸ ߊ߬ ߕߊ߬ߡߌ߲߬ ߘߊ߫ ߟߋ߬ ߞߊ߬ߓߌ߬ߟߊ߬ ߟߊ߬ߘߍ ߞߊ߲߬ ߝߛߊߦߌ߫، ߞߊ߬ߕߎ߲߯߸ ߗߋߘߋ߲ ߠߎ߬ ߝߘߊ߫ ߘߊ߫ ߦߙߐ߫ ߛߌߦߊߡߊ߲߫ ߠߋ߬ ߟߊ߫: ߞߎߙߟߊ߫، ߛߍ߰ߟߋ߲߬ ߡߎߛߦߊ߫، ߖߊ߯ߝߙߊ߫، ߊߡߊ߯ߣߊ߫ ߓߟߊߕߏ߫، ߓߊߕߍ߫ ߣߝߊ߬ߖߌ߫، ߓߊߕߍ߫ ߛߏ߬ߦߌ߬ߟߊ߫، ߓߊߕߍ߫ ߞߐ߭ߝߌ߬ߟߊ߬ߣߍ߲߫، ߖߊ߲߬ߞߊ߰ߣߊ߫، ߞߊ߬ߙߌ߬ߝߊ߬ߡߘߎ߬ߦߊ߫، ߡߊ߲߬ߝߙߊ߬، ߛߎߡߊ߲ߞߏ߬ߦߌ߲߬، ߓߊ߲ߞߊߟߊ߲߫، ߓߊߞߏ߲ߞߏ߫ ߛߌ߬ߛߋ߬ߟߊ߫، ߥߎߟߘߊ ߓߊ߲߬ߞߐ߫، ߏ߬ ߟߎ߬ ߓߍ߯ ߟߋ߬ ߞߊ߬ ߖߊ߲߬ߖߏ߲ ߣߌ߲߬ ߢߣߊߓߊ߯ߦߊ߫߸ ߞߵߊ߬ ߦߌ߬ߘߊ߬ ߞߏ߫ ߊߘߡߊߦߊ ߦߋ߫ ߓߊ߫ ߘߐ߫ ߖߐ߫.
ߞߊ߬ߙߊ߲߬ߡߐ߮ ߖߊߥߙߊ߫ ߡߍ߲ ߦߋ߫ ߘߌ߯ߣߊ ߞߏߢߊ ߟߎ߬ ߞߎ߲߬ߠߊ߫ ߖߌ߬ߣߍ߬ ߞߣߐ߫߸ ߏ߬ ߟߊ߫ ߗߋߘߋ߲߫ ߛߌߦߊߡߊ߲߫ ߕߘߍ߬ ߜߍ ߘߐ߫ ߦߋ߲߬߸ ߞߵߏ߬ ߟߊ߫ ߡߐ߰ߘߐ߬ߜߍ߬ ߛߌߦߊߡߊ߲߫ ߞߊ߲߬ ߖߡߊ߬ߣߊ ߞߣߐ߫.
ߛߘߊߞߊߓߐ ߣߌ߲߬ ߞߍ߫ ߘߊ߫ ߛߌ߲ߞߐ߲߫ ߢߌߡߊ߫ ߣߌ߫ ߕߐ߰ߡߊ߬ߛߙߋ߬ ߓߘߍ߫ ߘߌ߫ ߝߘߊ߬ߝߌ߲߬ߠߊ߬ ߥߊ߫ ߢߊ߫ ߞߘߐ߬ߡߊ߲ ߘߐ߫߸ ߏ߬ ߡߍ߲ ߦߋ߫ ߖߡߊ߬ ߟߊ߬ߘߍ ߘߌ߫ ߛߘߊߞߊߓߐ ߟߎ߫ ߡߊ߬ ߛߐ߲߬߸ ߞߊ߬ ߘߎߓߊ߫ ߝߊ߬ߛߏ ߦߋ߫߸ ߝߊ߬ ߖߡߊߣߊ ߦߋ߫߸ ߊ߬ ߣߌ߫ ߛߏ߫ ߛߌ߯ߓߊ߮ ߟߎ߬ ߣߌ߫ ߕߎ߲ߞߊߙߊ߲ߞߋ ߟߎ߬ ߓߍ߯ ߟߊߘߍ߬ߣߍ߲ ߦߋ߫، ߊ߬ ߛߌߦߊߡߊ߲ ߘߏ߲߬ ߦߋ߫ ߓߍ߲߬ ߠߴߊ߬ ߛߋ߲߬ߡߊ߬ ߖߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
