ߘߎߢߊ߫ ߦߴߊ߬ ߞߌ߬ߓߊ߬ߙߏ߬ߦߊ߬ߟߌ ߕߊ߲ߣߝߌߟߊߝߟߌ ߡߍ߲ ߘߐ߫ ߕߋ߲߬ ߝߢߊߝߢߊ߫߸ ߝߐ߰ߓߍ߬ߘߊ ߟߎ߬ ߦߋ߫ ߡߌ߬ߙߌ߲߬ߘߌ ߤߊ߲ߞߟߌ ߞߐ߮ ߕߏ߬ߕߍ߬ߡߊ߬ ߕߏ ߟߋ߬ ߘߌ߫، ߞߊ߬ߕߎ߲߯߸ ߓߍ߯ ߓߍ߲߬ߣߍ߲߫ ߝߐ߰ߓߍ߬ߦߊ߬ߟߌ ߞߎ߬ߙߎ߲߬ߘߎ ߡߍ߲ ߡߊ߬߸ ߏ߬ ߟߋ ߕߍߕߋߟߋ߲ ߘߌ߫، ߓߊ߬ߙߌ߬߸ ߥߊߦߌߞߊ߫߸ ߕߎ߬ߢߊ߬ ߜߘߍ߫ ߣߌ߫ ߞߏ߫ ߜߘߍ߫ ߦߴߏ߬ ߞߐߝߍ߬: ߏ߬ ߟߋ ߞߌ߬ߓߊ߬ߙߏ߬ ߟߊ߬ ߞߟߍ ߘߌ߫، ߏ߬ ߥߊ߯ߕߌ ߟߋ߬ ߟߊ߫߸ ߝߐ߰ߓߍ߬ߘߊ ߓߍ߯ ߣߴߊ߬ ߡߊ߬ߞߊ߲߬ߞߊ߲߬ߕߊ߫ ߟߋ߬ ߞߌ߬ߓߊ߬ߙߏ߬ ߞߎ߲ߘߊ߫߸ ߘߏ߫ ߟߎ߫ ߘߴߊ߬ߟߎ߬ ߕߊ ߞߍ ߝߊ߲ߞߊߢߊ߲߫߸ ߘߏ߫ ߟߎ߫ ߝߣߊ߫ ߕߊ ߦߋ߫ ߞߘߐߡߊߛߐߒߝߍ ߟߋ߬ ߘߌ߫، ߏ߬ ߘߏ߲߬ ߦߋ߫ ߞߍ߫ ߟߊ߫ ߞߎ߲߬ ߘߊ߲ߘߐ߫ ߟߋ߬ ߞߏߛߐ߲߬: ߓߘߍ߬ߓߘߍ߬ߟߌ߬ ߕߣߐ߸ ߛߐ߲߬ߘߐ߲ ߣߊ߬ߕߊ߸ ߊ߬ ߣߌ߫ ߝߊ߬ ߓߘߊ߬ ߟߊ߬ߝߛߊ ߥߟߊ߫ ߛߎ߯ߟߊߝߛߊ.
ߞߏ ߘߏ߫ ߦߴߊ߲ ߓߘߊ߫ ߡߐ߮ ߛߌߦߊߡߊ߲߫ ߞߎ߲߭ ߘߐ߫߸ ߏ߬ ߟߎ߬ ߕߍ߫ ߘߎߢߊ߫ ߞߊ߬ߞߎߘߊ ߝߐ߰ߓߍ߬ߦߊ߬ߟߊ ߟߎ߬ ߥߊ߫ ߢߊ߫ ߘߌ߫ ߤߊ߲߫߸ ߏ߬ ߕߘߍ߬ ߝߟߐ߫ ߟߋ߬ ߘߌ߫، ߏ߬ ߟߵߊ߬ ߝߐ ߘߌ߫߸ ߞߏ߫ ߞߌ߬ߓߊ߬ߙߏ߬ߘߊ ߟߎ߬ ߦߋ߫ ߥߎߦߊ߫ ߞߌߓߊߙߏ ߟߖߊߙߌ߫ ߟߊ߫ ߛߐ߲߬، ߞߊ߯ߙߌ߫߸ ߏ߬ ߕߍ߫ ߘߎߢߊ߫ ߕߊ߯ ߢߊ߫ ߞߎߘߊ ߣߌ߲߬ ߘߐ߫، ߓߊ߬ߙߌ߬߸ ߓߊ߯ߙߊ ߦߋ߫ ߞߍ߫ ߟߊ߫ ߘߌ߬؟ ߞߊ߬ ߞߏ ߕߍ߲ߕߍ߲߫߸ ߞߵߊ߬ ߛߍ߲ߛߍ߲߫، ߘߌߦߊߣߊ߲ ߦߋ߫ ߡߍ߲ ߘߌ߫߸ ߞߵߏ߬ ߕߊ߬߸ ߞߵߏ߬ ߟߊߛߋ߫، ߣߴߏ߬ ߘߏ߲߬ ߡߊ߫ ߦߴߊ߬ ߘߐ߫߸ ߞߊ߬ ߡߊ߬ߞߎ߲߬ ߞߍ߫ ߊ߬ ߡߊ߬ ߦߏ߫ ߞߏ߫ ߡߊ߫ ߞߍ߫߸ ߛߊ߫ ߛߘߊ ߞߊߣߊ߬ ߟߴߊ߬ ߟߊ߫.
ߒ߬ߓߊ߬߸ ߘߎߢߊ߫ ߞߍ߬ߟߍ ߡߍ߲ ߠߎ߬ ߦߴߌߘߐ߫ ߕߋ߲߬߸ ߏ߬ ߝߊ߲߬ߓߊ ߦߋ߫ ߞߍ߫ ߟߊ߫ ߏ߬ ߢߊ ߟߋ߬ ߡߊ߬߸ ߤߊ߲ߞߟߌߡߊ ߓߍ߯ ߘߏ߲߬ ߝߣߊ߫ ߢߊ߯ ߏ߬ ߟߊ߫، ߖߡߊ߬ߣߊ ߣߊ߲߬ߕߌ߮ ߟߎ߬ ߣߌ߫ ߡߙߎߕߌߓߊ߮ ߘߏ߫ ߟߎ߫ ߓߊ߯ ߞߍ߫ ߢߐ߲߮ ߠߊ߫ ߛߌߛߍ߲߬߸ ߥߟߴߊ߬ߟߎ߬ ߣߌ߫ ߓߊ߰ߓߊ߰ߟߌ߬ߟߊ߬ ߞߙߎ ߘߏ߫ ߟߎ߫، ߝߐ߰ߓߍ߬ߘߊ ߘߏ߫ ߟߎ߫ ߦߋ߫ ߡߎ߲߬ ߞߍ߫ ߟߊ߫߸ ߡߊ߲߬ߕߙߐ ߡߍ߲ ߣߐ߬ ߖߡߊ߬ߣߊ ߣߊ߲߬ߕߌ߮ ߟߎ߬ ߟߊߛߐ߬ߘߐ߲߬ ߠߊ߫߸ ߓߐ߬ߣߐ ߡߍ߲ ߘߏ߲߬ߣߍ߲߫ ߖߡߊ߬ߣߊ ߞߎ߲߬ ߖߐ߫߸ ߊ߬ߟߎ߬ ߦߴߊ߬ߟߎ߬ ߓߊ߲ߓߊ߲߫ ߠߴߏ߬ ߟߋ ߞߊ߲߬߸ ߞߊ߬ ߝߊ߲߬ߝߍ߬ߟߊ ߏ߬ ߟߖߊߡߊ߲߫ ߞߵߏ߬ ߟߊߥߦߐ߬ ߓߍ߯ ߕߟߏߞߘߐ߫، ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߣߊ߲߬ߕߌ߮ ߟߎ߬ ߟߊ߫ ߘߐ߬ߖߊ ߣߐ߬ ߕߌߢߍߟߌ ߡߍ߲ ߟߊ߫ ߟߊ߫ ߓߊ߰ߓߊ߰ߟߌ߬ߟߊ ߟߎ߬ ߞߊ߲߬߸ ߥߟߊ߫ ߡߙߎߕߌߓߊ߯ ߞߙߎ ߟߎ߫ ߞߊ߲߬߸ ߊ߬ߟߎ߬ ߘߴߏ߬ ߝߐߓߊߟߌ ߕߏ߫߸ ߥߟߊ߫ ߞߵߏ߬ ߘߏ߲߬ ߟߌ߬ߤߟߊ ߟߊߓߊ߲ ߘߐ߫߸ ߖߐ߲߰ߛߊ߫ ߓߊ߲ߓߊ߲߫ ߘߌ߫ ߞߍ߫ ߞߎ߲߬ߝߟߐ ߞߊ߲߬ ߛߣߐ߬ߡߍ ߟߎ߬ ߘߐ߫߸ ߞߐߟߕߊ ߘߌ߫ ߤߊ߲ߞߟߌ ߛߍ߰ߣߍ߲߫ ߛߐ߬ߘߐ߲߬. ߏ߬ ߦߋ߫ ߡߎ߲߬ ߦߌ߬ߘߊ߬ ߟߊ߫߸ ߟߌ߬ߤߟߊ ߡߍ߲ ߠߊߛߋߣߍ߲߫߸ ߕߎ߬ߢߊ ߟߋ߬ ߝߛߊߦߌ߫߸ ߓߊ߬ߙߌ߬ ߝߊ߲߬ߞߋ߬ߟߋ߲߬ߡߊ ߟߋ߬߸ ߞߊ߬ ߡߐ߱ ߟߎ߬ ߤߊ߲ߞߟߌ ߛߏ߲߬ߧߊ߫߸ ߞߊ߬ ߞߏ ߘߏ߫ ߓߊ߲ߓߊ߲߫ ߡߐ߱ ߟߎ߫ ߛߣߐ߬ߡߍ ߘߐ߫ (ߞߊ߬ ߖߡߊ߬߬ߣߊ ߟߊ߫ ߖߐ߲ߝߐ߲ ߦߌ߬ߘߊ߬߸ ߥߟߊ߫ ߣߊ߲߬ߕߌ߮ ߟߎ߬߸ ߤߊߡߊ߲ߕߍ߫ ߞߎ߲߬ߠߊ߬ߛߌ߮ ߡߊߣߐ߮).
ߒ߬ߓߊ߬߸ ߘߐ߬ߡߙߌ߬ߟߊ߬ߓߊ ߟߎ߬ ߦߴߊ߬ ߝߐ߫ ߟߊ߫ ߓߊ߯ߙߊ ߞߍߢߊ߫ ߛߎ߮ ߏ߬ ߟߋ ߡߊ߬ ߝߐ߰ߓߍ߬ߦߊ߬ߟߌ ߘߐ߫߸ ߞߏ߫ ߞߌ߬ߓߊ߬ߙߏ߬ ߟߊ߬ ߞߟߍ، ߊ߬ߟߋ ߟߵߊ߬ ߞߍ߫ ߟߊ߫߸ ߝߐ߰ߓߍ߬ߘߊ ߘߌ߫ ߞߍ߫ ߞߍ߬ߟߍ ߘߐ߫ ߝߏ߲߬ߝߏ߲߬ߠߊ߬ ߕߌ߮ ߘߌ߫، ߘߏ߫ ߟߎ߫ ߘߴߊ߬ ߞߍ߫ ߕߋߥߎ߫ ߓߟߏ ߡߊ߬߸ ߘߏ߫ ߟߎ߫ ߘߴߊ߬ ߞߍ߫ ߟߐ߲ߓߊߟߌߦߊ ߡߊ߬، ߏ߬ ߟߋ ߞߏߛߐ߲߬߸ ߊ߬ ߝߐ ߡߍ߲ ߞߍߣߍ߲߫ ߞߏ߫ ߞߍ߬ߟߍ ߛߊ߲߭ ߦߋ߫ ߥߎߦߊߝߐ ߛߊ߲߭ ߠߋ߬ ߘߌ߫߸ ߝߐ߰ߓߍ߬ߦߊ߬ߟߊ ߟߎ߬ ߓߘߴߏ߬ ߦߟߍ߬ߡߊ߲߫ ߡߎ߬ߕߎ߲߬߸ ߞߵߊ߬ ߞߍ߫ <<ߞߍ߬ߟߍ ߛߊ߲߭ ߦߋ߫ ߖߘߍ߬ ߝߐ ߛߊ߲߭ ߠߋ߬ ߘߌ߫.>> ߞߊ߬ ߓߍ߲߬ ߞߏ ߟߎ߬ ߟߊߞߊ߬ߟߌ߬ ߢߊ ߡߊ߬، ߡߍ߲ ߘߌߡߊ߲߫ ߖߎ߮ ߟߎ߬ ߟߊ߫߸ ߞߵߏ߬ ߟߎ߫ ߘߏ߲߰߸ ߡߍ߲ ߘߌߡߊ߲߫ ߖߘߍ߬ ߟߊ߫߸ ߞߵߏ߬ ߟߊߥߊ߲߬ߞߊ߲߬.
ߏ߬ ߟߊߒߡߊ ߟߎ߬ ߦߋ߫ ߟߊߞߙߐ߬ߛߌ߬ ߟߊ߫ ߞߐߞߊ߲߫ ߞߌߓߊߙߏߘߊ ߟߎ߬ ߟߊ߫ ߞߏ ߘߐ߫ ߛߐ߲߬ ߔߊߦߌ߫߸ ߏ߬ ߟߎ߬ ߡߍ߲ ߠߎ߬ ߟߊ߫ ߞߎߡߊ ߞߊ߫ ߛߌߦߊ߫ ߝߘߊ߬ߝߌ߲߬ߠߊ߫ ߞߍߞߎߘߊ ߟߎ߫ ߞߊ߲߬ ߞߊ߬ߣߌ߲߬، ߟߊ߬ߞߙߐ߬ߛߌ߬ߟߊ ߟߎ߬ ߞߵߊ߬ ߦߋ߫ ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߟߊ߫ ߓߊ߯ߙߊ ߕߊ߯ߛߌߟߊ ߘߐ߫߸ ߊ߬ߟߎ߬ ߦߴߊ߬ߟߎ߬ ߟߊ߫ ߖߡߊ߬ߣߊ ߟߋ߬ ߟߊ߫ ߕߐ߬ߣߐ ߡߞߊߘߊ߲߫ ߠߊ߫، ߞߐߣߌ߲ߧߊ߫ ߓߛߌߞߌ ߦߋ߫ ߦߋ߫ ߟߴߊ߬ ߘߐ߫ ߛߐ߲߬߸ ߦߏ߫ ߡߐ߰ ߖߎ߮ ߟߊ߫ ߛߙߊ߬ߒ߬ߞߊ߲߬ߠߊ ߓߊ߯ ߘߏ߲߬ ߌ ߘߊ߫ ߊ߬ ߡߞߊߘߊ߲߫ ߞߊ߲ߡߊ߬. ߊ߬ ߟߊߞߙߐ߬ߛߌ߬ ߘߊ߫߸ ߞߏ߫ ߏ߬ ߟߎ߬ ߟߊ߫ ߖߡߊ߬ߣߊ ߞߎ߲߬ߠߊ߬ߛߌ߮ ߟߎ߬߸ ߊ߬ ߣߴߊ߬ ߡߌ߬ߙߌ߲߬ߘߌ߬ ߛߋߕߌ߮ ߟߎ߫ ߟߋ߬ ߝߐ߰ߓߍ߬ߘߊ ߏ߬ ߟߎ߬ ߞߐߞߘߐ߫ ߘߓߌ߬ ߘߌ߫߸ ߞߊ߬ ߥߊߘߌ ߘߏ߲߬ ߊ߬ߟߎ߬ ߟߊ߫ ߞߏ ߟߊ߫߸ ߥߊߘߌ߫ ߞߟߊ߬ߥߟߎ ߝߋߎ߫، ߊ߬ߟߎ߫ ߘߏ߲߬ ߕߍ߫ ߕߣߐ߬ ߞߏ߫ ߘߐ߫ ߥߊߘߌ ߏ߬ ߢߐ߲߰ ߠߊ߬ߛߊߦߌ߲ ߘߌ߫ ߘߋ߬، ߓߊ߬ߙߌ߬߸ ߞߊ߬ ߞߍ߫ ߘߎߢߊ߫ ߞߌ߬ߓߊ߬ߙߏ߬ ߞߏ ߘߐ߫ ߝߟߐߡߊ ߘߌ߫߸ ߛߴߊ߬ߟߎ߬ ߡߙߌߦߊ ߘߌ߫ ߣߌ߬ߣߌ߫ ߢߊ ߡߍ߲ ߡߊ߬߸ ߞߵߊ߬ߟߎ߫ ߕߣߊ߬ߡߊ߬ ߞߏ ߣߴߊ߬ߟߎ߬ ߡߊߣߐ߯ ߞߏ ߓߍ߯ ߝߐߓߊߟߌ ߕߏ߫. ߏ߬ ߟߋ ߊ߬ߟߎ߬ ߟߊ߫ ߞߟߍ߬ߦߊ ߘߌ߫ ߘߎߢߊ߫ ߞߣߐ߫.
ߊ߬ ߘߏ߲߬߸ ߛߋߕߌ߯ ߖߡߊߣߊ ߟߎ߬ ߞߋߟߋ߲߫ ߕߴߏ߬ ߘߌ߫ ߘߋ߬، ߡߌ߬ߙߌ߲߬ߘߌ߫ ߝߣߍ߬ߝߣߍ ߛߌߦߊߡߊ߲߫ ߠߋ߬ ߝߣߊ߫ ߓߍ߫߸ ߡߍ߲ ߦߴߊ߬ߟߎ߫ ߞߎ߲߬ ߣߊ߲ߝߟߏ ߘߏ߲߬ ߠߊ߫ ߖߡߊ߬ߣߊ ߟߊ߫ ߣߊ߬ߝߊ ߘߐߙߐ߲߫ ߡߞߊߘߊ߲ ߞߏߛߐ߲߬ ߞߎ߲߬ߠߊ߬ߝߏ߬ߣߌ߲߬ ߞߏ ߘߐ߫، ߝߘߊ߬ߝߌ߲߬ ߖߡߊߣߊ ߟߎ߬ ߞߣߐ߫ ߕߋ߲߬߸ ߞߎ߲߬ߠߊ߬ߛߘߌ ߥߙߊ߬ߣߍ߲߬ߓߊ ߦߋ߫ ߝߊ߲߭ ߡߍ߲ ߠߎ߬ ߘߐ߫߸ ߦߋ߲߬ ߞߎ߲߬ߠߊ߬ߛߌ߮ ߓߊ߲߬ߣߍ߲߫߸ ߥߟߴߊ߬ߟߎ߫ ߞߢߊ߬ߣߍ߲߫ ߓߏ߲߬ߓߊ߫ ߘߏ߲߬ ߠߊ߫ ߞߌ߬ߓߊ߬ߙߏ߬ߦߊ߬ߟߌ ߘߟߊ߫߸ ߞߵߊ߬ ߞߍ߫ ߡߊ߬ߓߊ߰ߓߊ߰ߟߌ ߘߌ߫ ߞߏߟߊߖߎ߯ߦߊ ߕߐ߯ ߘߐ߫، ߊ߬ ߓߘߊ߫ ߟߊ߫ ߡߌ߬ߙߌ߲߬ߘߌ ߓߍ߯ ߦߟߌ߫ ߘߐ߫ ߛߍߣߍ߲߬߸ ߞߏ߫ ߣߌ߫ ߞߌ߬ߓߊ߬ߙߏ߬ߘߊ ߡߍ߲ ߡߊ߫ ߞߎߡߊ߫ ߞߵߊ߬ ߘߌߦߊ߫ ߞߎ߲߬ߠߊ߬ߛߌ߮ ߟߊ߫߸ ߏ߬ ߦߴߏ߬ ߖߎ߮ ߟߋ߬ ߘߌ߫، ߕߋ߲߭ߕߋ߲߭ ߣߌ߲߬ ߘߐ߫߸ ߣߊ߲߬ߕߌ߮ ߟߎ߬ ߟߊ߫ ߛߋ߫ ߛߐ߬ߘߐ߲߬ߣߍ߲ ߠߎ߬ ߟߊߞߊ߬ߟߌ ߟߋ߬ ߘߌߡߊ߲߫ ߕߟߏ ߟߎ߬ ߟߊ߫߸ ߏ߬ ߓߘߊ߫ ߞߍ߫ ߡߌ߬ߙߌ߲߬ߘߌ ߓߟߏ߫ ߓߍ߲߭ ߣߌ߫ ߞߋ߬ߟߋ߲߬ߧߊ ߕߐ߰ߡߊ߬ߛߙߋ ߘߌ߫، ߏ߬ ߛߌ߬ߣߊ ߟߊߞߊ߬ߟߌ ߦߋ߫ ߣߊ߲߬ߕߌ߮ ߟߎ߬ ߕߏ߲ߓߐ ߡߙߌߦߊ ߟߋ߬ ߘߌ߫߸ ߊ߬ ߣߌ߫ ߡߌ߬ߙߌ߲߬ߘߌ ߕߐ߰ߘߐߝߊ߱ ߟߋ߬ ߘߌ߫߸ ߞߊ߬ ߞߌ߬ߓߊ߬ߙߏ߬ߘߊ ߘߍ߬ߡߍ߲߬ߘߌ߫ ߖߎ߯ ߞߙߎ ߡߍ߬ߙߍ߲߬ߓߊ߯ ߣߴߊ߬ ߞߐߞߘߐߘߏ߲߬ߓߊ߯ ߘߌ߫ ߛߍߣߍ߲߬.
ߡߌ߬ߙߌ߲߬ߘߌ ߟߊ߫ ߛߣߐ߬ߡߍ߬ߘߐ߬ߦߊ ߏ߬ ߓߘߊ߫ ߞߍ߫ ߝߐ߰ߓߍ߬ߘߊ߬ ߛߌߦߊߡߊ߲߫ ߞߊ߲߬ ߘߋ߬ߥߎ ߘߌ߫، ߢߊ ߘߏ߫ ߡߊ߬߸ ߝߐ߰ߓߍ߬ߦߊ߬ߟߊ ߖߏ߫ ߟߋ߬، ߓߊߏ߬߸ ߊ߬ߟߋ ߟߊ߫ ߓߊ߯ߙߊ ߓߎ߲ߓߎ߲ߣߍ߲߫ ߕߎ߬ߢߊ ߢߌߣߌ߲ ߠߋ߬ ߡߊ߬ ߞߵߊ߬ ߟߊߓߐ߫߸ ߞߊ߬ ߞߏ ߟߎ߬ ߡߊߝߟߍ߫ ߣߴߊ߬ ߞߍߣߍ߲߫ ߞߍ߫ ߘߊ߫߸ ߞߵߊ߬ ߢߊߝߐ߫ ߕߍߕߋߟߋ߲ ߠߊ߫߸ ߞߊ߬ ߞߍ߫ ߖߋ߬ߓߌ߬ߦߊ߬ߟߊ߫ ߢߊߝߐߟߌ ߏ߬ ߘߐ߫߸ ߡߍ߲ ߣߌ߫ ߣߊߡߙߊ߫ ߕߍ߫، ߏ߬ ߟߎ߬ ߦߋ߫ ߝߐ߰ߓߍ߬ߘߊ߬ ߘߍ߲ߣߍ߲ߒߖߘߍ߬ߟߊ ߟߎ߫ ߟߋ߬ ߘߌ߫ ߜߍ ߘߐ߫߸ ߥߟߊ߫ ߘߏ߲߰ ߘߐ߫، ߣߴߌ ߡߊ߫ ߢߊ߬ ߝߐ߰ߓߍ߬ߘߊ ߏ߬ ߡߍ߲ ߤߊ߲ߞߟߌ ߛߏ߲߬ߧߊ ߞߐ߫߸ ߥߟߊ߫ ߣߌ߫ ߡߌ߬ߙߌ߲߬ߘߌ ߦߴߊ߬ ߝߍ߬ ߞߊ߬ ߝߐ߰ߓߍ߬ߘߊ ߡߍ߲ ߞߍ߫ ߊ߬ ߟߊ߫ ߞߟߍ߬ߡߎߙߊ߲ ߘߏ߫ ߘߌ߫߸ ߦߏ߫ ߕߐ߭ ߟߎ߬ ߕߊ ߦߋ߫ ߢߊ ߡߍ߲ ߡߊ߬߸ ߝߏ߫ ߢߊ ߦߋ߫ ߡߊߖߌ߰ ߛߐ߬ߘߐ߲ ߛߌߟߊ ߟߋ߬ ߝߍ߬، ߓߊߏ߬߸ ߟߌ߬ߤߟߊ ߢߊߢߌߣߌ߲ ߞߵߊ߬ ߕߍ߲ߕߍ߲߫ ߞߊ߬ ߡߌ߬ߙߌ߲߬ߘߌ ߣߤߍ߫ ߝߊ߲ ߛߎߥߊ߲ߘߌ߫ ߞߵߊ߬ ߟߊߞߊ߬ߟߌ߬߸ ߏ߬ ߡߊ߬ߞߏ ߦߋ߫ ߞߏ߫ ߛߌߦߊߡߊ߲߫ ߠߋ߬ ߟߊ߫: ߓߊ߯ߙߊ߫ ߡߎߙߊ߲߸ ߓߐߒߣߘߐ߸ ߝߐ߰ߓߍ߬ߦߊ߬ߟߊ ߟߎ߫ ߛߊ߬ߙߊ߸ ߊ߬ ߣߌ߫ ߓߊ߯ߙߊ߫ ߦߙߐ߫ ߞߏ ߟߎ߬.
ߒ߬ߓߊ߬߸ ߦߙߐߣߍ߲ ߏ߬ ߟߋ ߞߊ߬ ߝߐ߰ߓߍ߬ߘߊ ߟߎ߬ ߓߐ߫ ߢߐ߲߮ ߡߊ߬، ߓߊߏ߬߸ ߘߏߣߍ߲߫ ߦߋ߫ ߡߍ߲ ߠߎ߬ ߘߊ߫߸ ߊ߬ ߓߐ߫ ߘߊ߫ ߞߎ߲߬ߠߊ߬ߛߌ߮ ߟߊ߫ ߞߎ߲߬ߠߊ߫ ߓߊ߬߸ ߥߟߊ߫ ߡߐ߰ ߞߎ߲߬ߞߋߟߋ߲߫ ߓߊ߬߸ ߥߟߊ߫ ߘߍ߭ ߘߏ߫ ߓߊ߬߸ ߥߟߊ߫ ߥߎ߬ߦߊ߲߬ߞߟߌ߬ ߕߏ߯ߝߏ ߘߏ߫ ߓߊ߬߸ ߏ߬ ߟߎ߬ ߓߊ߯ ߛߋ߫ ߝߐ߰ߓߍ߬ߘߊ ߡߍ߲ ߘߡߊߢߌߣߌ߲߫ ߠߊ߫ ߛߐ߬ߘߐ߲ ߛߌߟߊ ߝߍ߬߸ ߏ߬ ߟߎ߬ ߓߘߊ߫ ߞߟߍ߬ߡߎߙߊ߲߫ ߝߊ߲߬ߞߊ߬ߡߊ ߟߋ߬ ߛߐ߬ߘߐ߲߫ ߏ߬ ߘߌ߫߸ ߞߊ߬ ߛߋ߫ ߊ߬ߟߎ߬ ߟߊ߫ ߛߋߓߊ߯ߦߊ ߟߊ߲ߞߣߍߡߊ߫ ߟߊ߫߸ ߞߵߊ߬ߟߎ߬ ߖߎ߮ ߟߎ߬ ߡߊ߬ߟߏ߬ ߘߊ ߛߌ߰ ߕߊ ߞߊ߲߬ ߕߎ߬ߡߊ߬ ߓߍ߯. ߒ߬ߓߊ߬߸ ߌ ߓߊ߯ ߞߍ߫ ߊ߬ ߝߍ߬ ߞߊ߬ ߝߐ߰ߓߍ߬ߘߊ ߡߍ߲ ߠߊ߫ ߞߎߡߊ ߞߎ߲߬ߕߋߟߋ߲ ߢߊߦߋ߫߸ ߊ߬ ߢߊߢߌߣߌ߲߫ ߡߎߣߎ߲߬߸ ߖߐ߲߫ ߦߴߊ߬ ߣߊ߲߬ߝߟߏ߬ߦߊ߬ ߟߊ߫، ߌ ߓߴߏ߬ ߟߐ߲߫ ߌߞߘߐ߫߸ ߌ ߘߴߊ߬ ߞߎ߲߬ߕߋߟߋ߲ ߟߐ߲߫.
ߐ߲߬ߤߐ߲߫߸ ߘߏ߫ ߦߋ߫ ߡߍ߲ ߠߎ߬ ߘߊ߫߸ ߥߟߊ߫ ߖߊ߬ߡߊ ߦߋ߫ ߡߍ߲ ߠߎ߬ ߞߐߝߍ߬ ߞߵߊ߬ߟߎ߬ ߘߡߊߢߌߣߌ߲߫߸ ߏ߬ ߟߎ߬ ߞߎߡߊ߫ ߢߊ ߣߌ߫ ߡߐ߰ ߟߎ߬ ߞߎߡߊ߫ ߢߊ ߘߌ߫ ߞߢߊ߫ ߓߊ߬߸ ߡߍ߲ ߠߎ߬ ߣߐ߬ ߊ߬ߟߎ߫ ߥߟߌ߬ ߟߴߊ߬ߟߎ߬ ߓߊ߫ ߞߐ ߟߊ߫؟ ߏ߬ ߞߏߛߐ߲߬߸ ߊ߲ ߧߋ߫ ߖߘߍ߬ߡߊ߬ ߕߎߢߊ ߟߋ߬ ߓߌ߬ߟߊ߬ ߟߊ߫ ߖߊ߬ߡߊ ߛߊ߬ߥߏ߬ ߘߐ߫ ߕߋ߲߬߸ ߜߎ߲߬ߘߎ ߡߍ߲ ߦߋ߫ ߘߎߢߊ߫ ߝߐ߰ߓߍ߬ߘߊ ߟߎ߬ ߓߊ߯ߙߊ߫ ߢߊ ߟߊ߫.
ߏ߬ ߘߐ߫߸ ߊ߲ ߓߘߊ߫ ߢߌ߬ߣߌ߲߬ߞߊ߬ߟߌ ߘߏ߫ ߛߐ߬ߘߐ߲߬ ߞߎߡߊ߫ ߢߊߝߐߣߍ߲ ߢߌ߲߬ ߠߎ߬ ߞߣߐ߫: ߝߐ߰ߓߍ߬ߦߊ߬ߟߌ ߞߊ߫ ߞߊ߲߫ ߞߊ߬ ߓߎ߲ߓߎ߲߫ ߝߐ߰ߓߍ߬ߦߊ߬ߟߌ ߖߍ߬ߘߍ ߞߎ߲߬ߕߋߟߋ߲ ߠߋ߬ ߡߊ߬ ߓߊ߰ ߥߟߊ߫ ߓߘߍ߬ߓߘߍ߬ߟߌ߬ ߕߣߐ ߣߌ߫ ߝߋ߲߫ ߕߣߐ ߣߌ߫ ߘߍ߬ ߕߣߐ߸ ߞߊ߬ ߡߌ߬ߙߌ߲߬ߘߌ ߘߏ߫ ߥߟߊ߫ ߖߡߊ߬ߣߊ ߘߏ߫߸ ߥߟߊ߫ ߕߊ߯ߛߌߟߊ ߘߏ߫ ߟߊ߫ ߞߏ ߞߍ߫ ߖߍ߲ߖߌ ߘߌ߫؟
ߓߊ߯ߙߊ ߣߌ߲߬ ߞߟߊ߬ߡߊ߬ߓߊ߮ ߟߎ߫ ߓߍ߲߬ߣߍ߲߬ ߡߍ߲ ߡߊ߬ ߢߌ߬ߣߌ߲߬ߞߊ߬ߟߌ ߣߌ߲߬ ߖߋ߬ߓߌ ߘߌ߫߸ ߝߐ߰ߓߍ߬ߘߊ ߞߊ߫ ߞߊ߲߫ ߞߊ߬ ߓߊ߯ߙߊ߫ ߕߍߕߋߟߋ߲ ߠߋ߬ ߟߊ߫߸ ߕߎ߬ߢߊ ߟߋ߬ ߟߊ߫.
ߘߎߢߊ߫ ߞߏ߬ߣߌ߲ ߦߋ߫ ߓߟߏ ߡߍ߲ ߞߘߐ߫ ߕߋ߲߬߸ ߛߊ߲ߞߊߢߐ߲߯ߦߊ߫ ߝߌ߬ߟߊ߬ ߕߍ߫ ߛߓߊ߬ ߕߍ߫߸ ߞߌ߬ߓߊ߬ߙߏ߬ ߟߊ߬ ߞߟߍ ߛߊ߲ߞߊߢߐ߲߯ߦߊ ߟߋ߬، ߏ߬ ߘߐ߫߸ ߣߌ߫ ߡߌ߬ߙߌ߲߬ߘߌ ߡߍ߲ ߠߎ߬ ߞߊ߬ ߝߋ߲߫ ߦߴߊ߬ߟߎ߫ ߖߘߍ߬ ߞߏ ߟߎ߬ ߘߐ߫߸ ߏ߬ ߟߎ߬ ߟߊ߫ ߞߟߍ߬ ߡߎߙߊ߲ ߘߌ߫ ߘߝߊ߫، ߏ߬ ߛߌ߬ߣߊ ߛߊ߫߸ ߊ߬ߟߎ߫ ߜߊ߲߬ߛߌ ߘߌ߫ ߞߍ߫ ߢߐ߲߯ ߡߊߖߎ߯ߦߟߊ ߟߎ߬ ߘߌ߫߸ ߞߵߊ߬ ߛߐ߬ߘߐ߲߬ ߓߍ߯ ߖߏ߫ ߦߴߌ ߕߊ߫ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
