ߦߊ߲߬ ߦߋ߫ ߒߞߏ ߞߊߙߊ߲ߕߊ ߘߏ߫ ߟߋ߬ ߘߌ߫߸ ߓߎ߬ߙߋ߬ ߖߡߊߣߊ ߞߊ߲߬߸ ߓߎߞߊߙߌߦߊ߫ ߛߏ ߞߣߐ߫، ߓߎߞߊߙߌߦߊ߫ ߦߋ߫ ߘߎ߱ ߘߏ߫ ߟߋ߬ ߘߌ߫߸ ߞߌ߲߬ߕߌ߬ߢߊ߲߫ ߡߙߊ߬ߘߊ߬ߙߋ߲ ߞߣߐ߫߸ ߡߍ߲ ߦߋ߫ ߛߌ߯ߙߌ߲߫ ߡߙߊ߬ߓߊ߰ߘߊ ߘߐ߫، ߊ߬ߟߎ߫ ߛߌ߰ߣߍ߲߫ ߘߊ߬ߡߊ߲ ߠߋ߬ ߡߊ߬.
ߛߏ ߣߌ߲߬ ߘߊ߬ߡߊ߲߬ ߓߊ߯ߙߊ ߣߴߊ߬ ߕߊ߫߸ ߊ߬ߟߎ߫ ߛߓߍ߬ ߦߋ߫ ߞߊ߬ߙߊ߲ ߡߊ߬ ߞߏߛߓߍ߫، ߏ߬ ߟߊߒߡߊ ߘߏ߫ ߟߋ߬ ߒߞߏ ߞߊߙߊ߲ߕߊ ߟߊ߫ ߛߌߦߊߦߊ ߘߌ߫ ߦߋ߲߬߸ ߏ߬ ߡߍ߲ ߦߙߌߞߊ ߘߌ߫ ߛߓߊ߬ ߓߐ߫، ߞߊ߬ߙߊ߲߬ߕߊ߫ ߒߝߊ߲߬ߘߋ߲߬ߡߏߙߌ߫ ߦߴߏ߬ ߞߊ߬ߙߊ߲߬ߕߊ߬ ߓߊߖߎߟߞߊ ߘߏ߫ ߟߋ߬ ߘߌ߫߸ ߡߍ߲ ߛߌ߲ߘߌߓߊ߮ ߦߋ߫ ߓߙߋ߬ߡߊ߫ ߞߡߊ߬ߙߊ߬ ߘߌ߫، ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߝߊ߬ߞߊ߲ ߠߊߘߌߦߊߢߍ߸ ߊ߬ ߣߌ߫ ߞߎ߲߬ߝߌ߲߬ߧߊ ߞߍ߬ߟߍ߸ ߏ߬ ߟߋ ߞߵߊ߬ߟߋ߫ ߟߐ߬ ߞߊ߬ߙߊ߲߬ߕߊ ߣߌ߲߬ ߛߌ߰ ߟߊ߫ ߛߋ߲߬ߠߊ߫: <<ߊ߲ ߞߊ߬ ߞߊ߬ߙߊ߲߬ߕߊ ߣߌ߲߬ ߛߌ߰ ߛߋ߲߬ߠߊ߫ ߂߀߁߅ ߟߋ߬ ߟߊ߫، ߊ߬ ߛߐ߰ ߘߊ߫ ߞߍ ߡߊ߬ ߛߎ߫ ߘߐ߫ ߞߊߙߊ߲ߕߊ ߟߋ߬ ߘߌ߫ ߡߎߣߎ߲߬، ߊ߬ ߣߊ߬ ߘߊ߫ ߢߊߦߋ߫ ߂߀߁߈ ߠߋ߬ ߟߊ߫߸ ߞߏ߫ ߜߌߛߌ߲ ߘߏ߫ ߟߎ߫ ߦߴߊ߬ ߝߍ߬ ߞߵߊ߬ߟߎ߬ ߘߋ߲ ߠߎ߬ ߟߊߘߏ߲߬ ߒߞߏ ߞߊߙߊ߲ ߠߊ߫߸ ߛߊ߫ ߏ߬ ߟߎ߬ ߘߌ߫ ߝߊ߬ ߞߊ߲ ߟߐ߲ߠߌ߲ ߛߐ߬ߘߐ߲߬، ߏ߬ ߟߋ ߘߐ߫߸ ߞߊ߬ߙߊ߲߬ߓߏ߲߬ ߓߟߏߡߊߞߊ߬ߣߍ߲ ߟߐ߬ ߕߞߏ ߡߙߌߘߐ ߕߊ߬ ߘߊ߫ ߂߀߁߈ ߠߊ߫ ߞߵߊ߬ ߛߌ߰ ߂߀߂߀ ߠߊ߫، ߂߀߂߁ ߠߋ߬ ߟߊ߫߸ ߞߊ߬ߙߊ߲ ߘߊߡߌ߬ߣߊ߬ ߘߊ߫ ߞߊ߬ߙߊ߲߬ߕߊ ߞߣߐ߫.>>
ߞߊ߬ߙߊ߲߬ߕߊ ߣߌ߲߬ ߘߏ߲߬ ߛߌ߲߬ߝߏ߲߬ߧߊ߬ߣߍ߲߬ߓߊ ߟߋ߬߸ ߓߊߏ߬ ߞߊ߬ߙߊ߲߬ߘߋ߲߬ ߛߌߦߊߡߊ߲߫ ߠߋ߬ ߞߊ߬ߙߊ߲߬ ߠߴߊ߬ߟߎ߬ ߓߟߏ߫ ߦߋ߲߬߸ ߗߍ߭ ߟߎ߬ ߣߌ߫ ߡߏ߬ߛߏ ߟߎ߬ ߘߐ߫߸ ߟߞߊ߬ߙߊ߲߬ߠߌ߲߬ߠߊ ߟߎ߬ ߦߋ߫ ߦߋ߲߬ ߝߣߊ߫، ߞߵߊ߬ ߟߴߊ߬ ߞߊ߲߬߸ ߞߊ߬ߙߊ߲߬ߕߊ ߒߝߊ߲߬ߘߋ߲߬ߡߏߙߌ߫ ߟߊ߫ ߞߊ߬ߙߊ߲߬ߘߋ߲ ߘߏ߫ ߟߎ߫ ߓߍߣߊ߬ ߕߊ߯ ߥߟߊ߬ߟߊ߬ߓߐ ߘߐ߫ ߢߌ߬ߣߊ߲߬߸ ߞߊ߬ ߛߐ߬ߘߐ߲߬ ߝߊ߬ߛߏ ߞߘߐߓߐߟߌߓߊ ߘߐ߫، ߊ߬ ߟߞߊ߬ߙߊ߲߬ߠߌ߲ ߗߋߕߌ߮߸ ߊߡߙߊ߫ ߞߏ߬ߣߊ߬ߕߍ߫ ߞߊ߬ ߞߊ߬ߙߊ߲߬ߕߊ ߣߌ߲߬ ߛߌ߰ߝߊߘߌ ߟߎ߬ ߢߊߝߐ߫: <<ߞߊ߬ߙߊ߲߬ߕߊ ߒߝߊ߲߬ߘߋ߲߬ߡߏߙߌ߫ ߘߐߞߍߣߍ߲߫ ߞߊ߬ߙߊ߲߬ߘߋ߲߫ ߡߐ߰ ߃߅߀ ߟߋ߬ ߟߊ߫ ߕߋ߲߬߸ ߊ߬ ߣߌ߫ ߞߊ߬ߙߊ߲߬ߡߐ߰ ߅ (ߡߍ߲ ߠߎ߬ ߦߋ߫ ߟߞߊ߬ߙߊ߲߬ߠߌ߲ ߞߊ߲߬)، ߞߊ߬ߙߊ߲߬ߘߋ߲ ߏ߬ ߟߎ߬ ߦߋ߫ ߞߊ߬ߙߊ߲߬ ߠߊ߫ ߓߏ߲߫ ߞߣߐ߫ ߥߐ߯ߙߐ߫ ߟߋ߬ ߞߣߐ߫߸ ߊ߬ ߓߏ߲߫ ߥߐ߯ߙߐ ߓߍ߯ ߘߏ߲߬ ߦߋ߫ ߓߊ߯ߙߊ߫ ߟߊ߫ ߞߵߊ߬ ߕߊ߬ ߁߭ ߡߊ߬ ߞߵߊ߬ ߛߌ߰ ߆߲ ߠߊ߫، ߢߌ߬ߣߊ߲߫ ߖߍ߬ߘߍ߸ ߞߊ߬ߙߊ߲߬ߕߊ ߓߍߣߊ߬ ߞߊ߬ߙߌ߬ߡߘߊ߬ ߝߟߐ ߘߏ߫ ߟߎ߫ ߟߊߕߊ߯ ߝߊ߬ߛߏ ߞߘߐߓߐߟߌ ߘߐ߫.>>
ߞߊ߬ߙߊ߲߬ߕߊ ߢߌ߲߬ ߞߣߐ߫߸ ߞߊ߲߫ ߝߌ߬ߟߊ߫ ߟߋ߬ ߦߋ߫ ߞߊ߬ߙߊ߲߬ ߠߊ߫ ߞߊ߬ߙߊ߲߬ߘߋ߲ ߠߎ߬ ߓߟߏ߫߸ ߗߋߕߌ߮ ߞߵߊ߬ ߦߌ߬ߘߊ߬ ߞߏ߫ ߝߙߋߞߋ߫ ߛߌ߫ ߕߴߦߋ߲߬߸ ߊ߬ߟߎ߬ ߦߋ߫ ߡߍ߲ ߛߐ߬ߘߐ߲߬ ߠߊ߫ ߞߊ߲߫ ߥߙߍ߫ ߞߊߙߊ߲ ߏ߬ ߛߊߓߎ߫ ߟߊ߫، ߏ߬ ߟߋ ߖߍ߬ߘߍ ߞߏߛߐ߲߬߸ ߞߊ߬ߙߊ߲߬ߘߋ߲ ߠߎ߬ ߝߣߊ߫ ߛߍߥߊߣߍ߲߫ ߞߏߛߓߍ߫߸ ߝߏ߫ ߊ߬ ߘߏ߫ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߊ߯ ߒߞߏ ߞߊ߬ߙߊ߲߬߸ ߊ߬ߟߎ߬ ߓߍߣߊ߬ ߞߍ߫ ߖߡߊ߬ߣߊ ߣߝߊ߬ ߝߋ߲߫ ߘߌ߫.
<<ߡߍ߲ ߕߍ߫ ߒߞߏ ߞߍ߫ ߟߊ߫߸ ߊ߬ ߣߌ߫ ߡߍ߲ ߦߋ߫ ߒߞߏ ߞߍ߫ ߟߊ߫߸ ߊ߬ߟߎ߬ ߟߊ߫ ߝߊ߰ߡߎ߲߬ߠߌ߲ ߠߎ߬ ߕߍ߫ ߞߋߟߋ߲߫ ߘߌ߫، ߟߊߒߡߊ߫ ߘߐ߫߸ ߌ ߓߊ߯ ߒߞߏ ߛߓߍߛߎ߲ ߞߍ߫ ߘߋ߲ߣߍ߲ ߡߍ߲ ߠߎ߬ ߞߎ߲߬߸ ߌ ߓߊ߯ ߝߊ߬ߙߊ߲߬ߛߌ߬ ߛߓߍߛߎ߲ ߞߍ ߘߊߡߌ߬ߣߊ߫ ߏ߬ ߞߎ߲߬ ߟߏ߲ ߡߍ߲ ߌߞߘߐ߫߸ ߊ߬ ߘߌ߫ ߢߊߦߋ߫ ߘߌߦߴߊ߬ ߓߟߏ߫، ߓߊߏ߬߸ ߊ߬ ߒߞߏ ߊ ߟߐ߲߫ ߤߊ߲߯ ߦ߸ ߊ߬ ߦߴߏ߬ ߟߋ ߟߊ߫ ߟߊ߫ ߘߐ ߏ߬ ߡߊ߬ ߌߞߘߐ߫ ߞߵߊ߬ ߢߊߦߋ߫.>> ߊߡߙߊ߫ ߓߙߋߕߋ߫ ߟߋ߬ ߞߊ߲߫ ߕߋ߲߬߸ ߗߋߕߌ߮.
<<ߣߌ߫ ߒߠߋ ߓߊ߲߫ ߘߊ߫ ߞߊ߬ߙߊ߲ ߠߊ߫ ߟߏ߲ ߡߍ߲߸ ߒ ߧߴߊ߬ ߝߍ߬ ߞߊ߬ ߞߍ ߞߊ߬ߙߊ߲߬ߡߐ߰ߓߊ ߟߋ߬ ߘߌ߫߸ ߞߊ߬ ߞߍ߫ ߒߞߏ ߟߊߥߙߎߞߌ ߞߊ߬ߙߊ߲߬ߡߐ߮ ߘߌ߫߸ ߡߍ߲ ߘߴߊ߲ ߠߊ߫ ߖߡߊ߬ߣߊ ߟߊߕߊ߯ ߢߍߝߍ߬.>> ߊߡߊߘߎ߬ ߞߎ߬ߟߌߓߊ߬ߟߌ߬߸ ߞߊ߬ߙߊ߲߬ߘߋ߲.
<<ߒߠߋ ߦߋ߫ ߒߞߏ ߞߊ߬ߙߊ߲߬ ߠߊ߫ ߟߋ߬߸ ߓߊߏ߬ ߒ ߖߘߍ߬ ߞߊ߲ ߠߋ߬، ߦߊ߬ߣߴߌ ߦߋ߫ ߥߙߎߞߌ߫ ߡߐ߰ ߜߘߍ߬ ߞߊ߲ ߘߐ߫߸ ߥߙߎߞߌ߫ ߌ ߖߍ߬ߘߍ ߕߊ ߘߐ߫ ߝߟߐ߫، ߦߏ߫ ߛߎߡߊߥߙߏ߫ ߞߵߊ߬ ߝߐ߫ ߢߊ ߡߍ߲߸ ߖߌ߫ ߟߐ߲߫ ߛߏ߬ ߟߐ߲߫߸ ߖߘߍ߬ߟߐ߲ ߠߋ߬ ߢߐ߲߰ ߕߍ߫.>> ߖ߭ߎߡߊߣߊ߬ ߞߐ߲ߘߍ߫߸ ߞߊ߬ߙߊ߲߬ߘߋ߲.
<<ߒߠߋ ߦߋ߫ ߒߞߏ ߞߊ߬ߙߊ߲߬ ߠߊ߫ ߟߋ߬߸ ߓߊߏ߬ ߒ ߝߊ߬ ߞߊ߲ ߠߋ߬، ߡߐ߰ ߛߌߦߊߡߊ߲߫ ߝߣߊ߫ ߦߋ߫ ߓߏ߬ߙߌ߬ ߟߊ߫ ߒߞߏ ߟߋ߬ ߞߐ߫ ߓߌ߬߸ ߊ߲ ߘߏ߲߬ ߣߊ߬ߕߐ߬ ߟߊߓߊ߲߫ ߠߊ߫ ߒߞߏߞߏ ߟߋ߬ ߡߊ߬، ߣߴߌ ߞߊ߬ ߘߎߢߊ߫ ߞߊ߲ ߓߍ߯ ߞߊ߬ߙߊ߲߬ ߣߴߌ ߡߴߌ ߝߊ߬ߞߊ߲ ߞߊ߬ߙߊ߲߬߸ ߌ ߡߊ߫ ߝߏߛߌ߬ ߞߍ߫ ߝߟߐ߫.>> ߞߊߘߌߦߊߕߎ߬ ߖߊ߬ߞߌ߬ߕߋ߬.
ߞߊ߬ߙߊ߲߬ߕߊ ߒߝߊ߲߬ߘߋ߲߬ߡߏߙߌ߫ ߦߋ߫ ߞߊ߬ߙߊ߲߬ߕߊ߬ ߓߊߖߎߟߞߊ߫ ߟߋ߬ ߘߌ߫߸ ߡߍ߲ ߞߣߐߞߍߣߍ߲߫ ߘߋ߲ߣߍ߲߫ ߛߌߦߊߡߊ߲߫ ߠߊ߫߸ ߡߍߍ߲ ߠߎ߬ ߦߋ߫ ߖߡߊ߬ߣߊ ߟߊ߫ ߛߌߣߌ߲߫ ߢߍߛߌ߮ ߘߌ߫، ߊ߬ ߘߏ߲߬߸ ߛߌߣߌ߲߫ ߢߍߛߌ߮ ߓߊ߯ߙߊ ߓߍ߲߬ߣߍ߲߫ ߛߋߞߏߦߊ ߘߏ߫ ߟߎ߫ ߟߋ߬ ߘߐ߫، ߓߊ߬ߙߌ߬߸ ߘߍ߬ߡߍ߲߬ߠߌ߲߬ ߛߌ߫ ߡߊ߫ ߛߋ߫ ߞߊ߬ߙߊ߲߬ߕߊ ߣߌ߲߬ ߡߊ߬ ߡߎߣߎ߲߬߸ ߞߊ߬ ߝߘߊ߫ ߞߎ߲߬ߠߊ߬ߛߌ߮ ߟߊ߫ ߥߟߊ߫ ߘߍ߬ߞߙߎ߬ ߜߘߍ߫ ߟߎ߫، ߏ߬ ߟߋ ߘߐ߫߸ ߊ߬ߟߎ߬ ߦߴߊ߬ߟߎ߬ ߓߟߏ ߘߐߛߌ߰ ߟߊ߫ ߓߍ߯ ߟߊߘߍ߬ߣߍ߲ ߦߋ߫߸ ߟߐ߲ߠߌ߲ ߠߊߛߓߊ߬ߕߌ߬ ߞߊ߲ߡߊ߬.
<<ߒ ߓߊ߯ߙߊߢߐ߲߮ ߠߎ߬ ߞߵߊ߬ ߦߌ߬ߘߊ߬ ߞߏ߫ ߘߍ߬ߞߙߎ ߘߏ߫ ߟߎ߫ ߞߵߊ߬ߟߎ߬ ߡߊߜߍ߲߫ ߞߝߊ߬ ߞߏ ߛߌߟߊ ߝߍ߬، ߏ߬ ߓߞߐߕߍ߫߸ ߤߊߟߌ߬ ߣߌ߫ ߘߍ߬ߞߙߎ߬ ߜߘߍ߫ ߞߍ߫ ߘߊ߫ ߘߍ߬ߡߍ߲߬ߠߌ߲ ߞߍ߫ ߟߊ߫߸ ߒߠߋ ߕߴߏ߬ ߞߊ߬ߟߊߡߊ߬، ߊ߲ ߣߌ߫ ߞߎ߲߬ߠߊ߬ߛߌ߮ ߟߎ߬ ߓߟߏ߫ ߦߋ߫ ߢߐ߲߯ ߓߟߏ߫߸ ߊ߬ߟߎ߬ ߦߋ߫ ߣߊ߬ ߟߊ߫ ߓߐ߫ ߟߊ߫ ߦߊ߲߬ ߛߐ߲߬߸ ߟߊ߬ߞߙߐ߬ߛߌ߬ߟߌ ߟߎ߬ ߟߊ߫، ߤߊߟߌ߬ ߞߊ߬ߙߊ߲߬ߕߊ߬ ߘߟߊ߬ߞߊ ߞߊ߲߬ߞߎߡߊ ߦߋ߫ ߦߊ߲߬ ߕߋ߲߬߸ ߡߍ߲ ߞߊ߫ ߞߊ߲߫ ߞߊ߬ ߟߝߊ߫ ߞߵߊ߬ ߟߊߕߊ߯߸ ߘߊߕߎ߲߮ ߕߊ ߝߣߊ߫ ߦߋ߫ ߛߌߟߊ߫ ߟߊ߫.>>
ߊ߬ ߞߵߊ߬ ߟߊ߫ ߞߎߡߊ ߟߊߕߎ߲߰ ߝߣߊ߫ ߞߏ߫: <<ߖߌ߫ ߞߏ߫ ߜߟߍߦߊ ߦߴߊ߲ ߞߊ߲߬ ߦߊ߲߬߸ ߏ߬ ߦߴߊ߲ ߠߊ߫ ߘߋ߲ߣߍ߲ ߠߎ߬ ߕߙߐ߫ ߟߊ߫، ߡߊ߬ߞߏ ߦߋ߫ ߖߌ ߟߊ߫ ߦߊ߲߬ ߕߋ߲߬ ߝߛߊߦߌ߫، ߣߴߏ߬ ߕߍ߫߸ ߊ߲ ߓߘߊ߫ ߞߏߞߏ ߟߐ߬ ߞߵߊ߲ ߠߊ߫ ߞߊ߬ߙߊ߲߬ߘߋ߲ ߠߎ߬ ߟߊߞߊ߲ߘߊ߫، ߓߊߏ߬߸ ߞߊ߬ߙ߲߬ߕߊ ߦߋ߫ ߛߌߟߊ߫ ߘߊ ߟߋ߬ ߝߍ߬.>>
ߞߊ߬ߙߊ߲߬ߕߊ ߣߌ߲߬ ߛߌ߲ߘߌߓߊ߮ ߛߍߥߊ߫ ߘߊ߫߸ ߞߏ߫ ߊ߬ ߢߌߣߌ߲ߞߏ ߟߎ߬ ߦߋ߫ ߓߐ ߞߊ߲߬ ߢߟߊ߫߸ ߊ߬ ߘߏ߲߬ ߦߴߊ߬ ߞߊ߲߬ ߞߏ߫ ߛߌߦߊߡߊ߲߫ ߖߊ߬ߕߋߛߌ߰، ߓߊߏ߬ <<ߢߌߣߌ߲ߞߏ ߡߍ߲ ߠߎ߬ ߦߴߊ߲ ߠߊ߫߸ ߏ߬ ߟߎ߬ ߦߋ߫ ߓߐ ߞߊ߲߬ ߜߍߟߊ߫، ߢߌߣߌ߲ߞߏ߫ ߝߟߐ ߟߋ߬ ߡߐ߱ ߛߐ߬ߘߐ߲߲ ߘߌ߫ ߞߊ߬ ߣߊ߬ ߟߞߊ߬ߙߊ߲߬ߠߌ߲ ߞߍ߫ ߞߊ߬ߙߊ߲߬ߕߊ ߟߊ߫߸ ߝߌߟߊߣߊ߲ ߦߋ߫ ߡߐ߱ ߛߐ߬ߘߐ߲ ߘߌ߫߸ ߡߍ߲ ߠߎ߬ ߘߌ߫ ߞߊ߬ߙߊ߲߬، ߞߏ߫ ߣߊ߬ߕߐ ߟߎ߬ ߘߐ߫߸ ߊ߲ ߧߴߊ߬ ߝߍ߬ ߞߏ߫ ߜߘߍ߫ ߟߎ߫ ߦߋ߫ ߛߌ߰ ߛߋ߲߬ߠߊ߫߸ ߡߍ߲ ߣߌ߫ ߞߊ߬ߙߊ߲߬ ߓߎߚߎߕߎߕߎ ߕߍ߫ ߞߋߟߋ߲߫ ߘߌ߫، ߦߏ߫ ߓߊ߯ߙߊ߫ ߡߞߊߙߊ߲߫ ߞߊߙߊ߲ߕߊ߸ ߛߊ߫ ߘߋ߲ߣߍ߲ ߠߎ߬ ߘߌ߫ ߟߊ߬ߞߐ߰ߟߌ ߘߏ߫ ߛߐ߬ߘߐ߲߬߸ ߦߊ߬ߣߴߊ߬ߟߎ߬ ߟߊ߫ ߞߊ߬ߙߊ߲ ߦߋ߫ ߖߊ߲߬ߝߊ߬.>>
ߞߊ߬ߙߊ߲߬ߕߊ ߣߌ߲߬ ߞߣߐ߫߸ ߘߋ߲ߣߍ߲ ߥߙߍߓߊߓߊ ߟߋ߬ ߦߋ߲߬߸ ߡߍ߲ ߘߌߣߊ߬ ߞߍ߫ ߡߊ߬ߞߟߐ ߘߌ߫ ߖߡߊ߬ߣߊ ߟߊ߫ ߛߌߣߌ߲߫ ߣߊ߬ߕߐ ߘߐ߫، ߏ߬ ߟߋ ߘߐ߫߸ ߞߎ߲߬ߠߊ߬ߛߌ߮ ߢߊ ߟߐ߬ ߕߎߡߊ ߓߘߊ߫ ߛߋ߫ ߞߊ߬ߙߊ߲߬ߕߊ ߣߌ߲߬ ߘߐ߫߸ ߊ߬ߟߋ ߣߴߊ߬ ߢߐ߲߰ ߜߘߍ ߡߍ߲ ߠߎ߬ ߦߋ߫ ߖߡߊ߬ߣߊ ߢߊߝߍ߬، ߓߊߏ߬߸ ߊ߬ߟߎ߬ ߦߋ߫ ߘߋ߲ߣߍ߲ ߠߎ߬ ߞߊ߬ߙߊ߲ ߞߊ߲߬ ߟߐ߲ߠߌ߲ ߛߌߓߟߏߡߊ߫ ߛߌߦߊߡߊ߲߫߫ ߠߋ߬ ߟߊ߫߸ ߞߵߊ߬ߟߎ߫ ߞߊ߬ߙߊ߲߫ ߝߊ߬ߙߊ߲߬ߛߌ ߣߌ߫ ߒߞߏ ߣߌ߫ ߊߙߊߓߎ ߟߊ߫ ߢߐ߲߮ ߝߍ߬ ߞߋߟߋ߲ߘߌ߫، ߊ߬ ߘߏ߲߬߸ ߊ߲ ߞߊ߬ ߟߐ߲ߠߌ߲ ߡߍ߲ ߦߋ߫ ߞߊ߬ߙߊ߲߬ߕߊ ߢߌ߲߬ ߠߊ߫߸ ߏ߬ ߞߵߊ߲ ߢߊߞߘߐߛߋ߫ ߟߋ߬ ߞߏߛߓߍ߫.
ߊ߲ ߠߊ߫ ߟߊ߬ߞߙߐ߬ߛߟߌ߬ ߘߐ߫߸ ߞߊ߬ ߝߘߊ߫ ߞߊ߬ߙߊ߲߬ߕߊ ߜߙߋ߬ߡߊߕߍ߰ߓߊ߮ ߟߊ߫߸ ߊ߬ ߣߴߊ߬ ߓߟߏߡߊߘߍߡߍ߲ߠߊ߸ ߟߊ߬ߢߌ߬ߣߌ߲߬ ߛߌߦߊߡߊ߲߫ ߦߴߊ߬ߟߎ߬ ߟߊ߫، ߞߊ߬ߕߎ߲߯߸ ߊ߬ߟߎ߬ ߦߴߊ߬ ߝߍ߬ ߞߊ߬ ߛߋ߫ ߞߊ߬ߙߊ߲߬ߘߊ ߣߌ߫ ߞߊ߬ߙߊ߲߬ߘߊ߬ߓߊ ߟߎ߫ ߟߐ߬ ߟߊ߫߸ ߞߊ߬ ߛߋ߫ ߓߊ߯ߙߊ߫ ߡߞߊߙߊ߲߫ ߞߊߙߊ߲ߕߊ ߟߎ߫ ߟߐ߬ ߟߊ߫߸ ߡߍ߲ ߠߎ߬ ߘߌ߫ ߞߍ߫ ߕߙߎ߬ ߘߌ߫ ߞߊ߬ ߓߊ߯ߙߓߊߟߌߦߊ ߛߌ ߟߊߜߊ߬ߣߊ߲߫ ߡߊ߲߬ߘߋ߲߬ ߖߡߊߣߊ ߟߎ߬ ߞߣߐ߫، ߓߊ߬ߙߌ߬ ߥߊߦߌߞߊ߫߸ ߝߍ߬ ߞߋߟߋ߲ ߡߍ߲ ߦߋ߫ ߘߴߊ߬ ߟߊ߫ ߛߊ߫߸ ߏ߬ ߟߋ ߞߍ߫ ߘߊ߫ ߓߟߏߞߏ ߘߌ߫، ߓߊߏ߬߸ ߊ߬ ߦߋ߫ ߘߊ߫ ߞߏ߫ ߘߋ߲ߓߊߕߌ߮ ߝߊ߲߬ߓߊ ߟߊ߫ ߞߊ߬ߙߊ߲߬ ߛߙߊ߬ ߓߐ ߕߍ߫ ߢߊ ߏ߬ ߡߊ߬، ߞߊ߬ߙߊ߲߬ߕߊ߬ ߕߌ߮ ߟߎ߫ ߘߏ߲߬ ߓߟߏߞߏ ߖߐ߲ߖߐ߲߫ ߕߍ߫، ߏ߬ ߟߋ ߘߐ߫߸ ߟߊ߬ߢߌ߬ߣߌ߲߬ ߛߌߦߊߡߊ߲߫ ߦߴߊ߬ߟߎ߬ ߟߊ߫߸ ߡߍ߲ ߠߎ߬ ߞߢߊ߬ߣߍ߲߬ ߓߐ߫ ߟߊ߫ ߜߍߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߓߊ߬ ߟߊ߫ ߞߊ߲߬ߞߎߡߊ ߟߋ߬߸ ߓߎ߬ߙߋ߬ ߛߏ ߞߣߐ߫ ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߂߂ ߡߊ߬
ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
