ߞߏ߲߬ߞߏ߬ ߞߊ߲ߕߌ߮ ߡߍ߲ ߛߎߘߊ߲߫ ߘߊ߫ ߢߣߊߕߊߟߌ ߘߐ߫ ߝߊ߲߬ߓߦߊ߬ ߞߐߟߌߞߐߟߌ ߟߊ߫߸ ߏ߬ ߓߘߊ߫ ߟߊߛߍ߲߫ ߓߙߊߖ߭ߊߝ߭ߌߟ ߞߏ߲ߞߏߘߓߌ ߕߟߋ߬ ߁߆ ߣߌ߲߬ ߡߊ߬.
ߝߘߊ߬ߝߌ߲߬ߠߊ߬ ߞߊ߲ߕߌ߮ ߟߎ߬ ߟߊ߫ ߞߊ߲ߕߌ߯ߦߊ߫ ߓߊ߲ߓߊߟߌ ߣߌ߲߬ ߓߘߊ߫ ߞߍ߫ ߞߏ߫ ߘߝߐߕߊ ߘߌ߫ ߝߊ߲߬ ߛߌߦߊߡߊ߲߫ ߘߐ߫ ߕߋ߲߬߸ ߡߍ߲ ߓߘߊ߫ ߥߏ߭ ߓߌ߬ߟߊ߫ ߝߘߊ߬ߝߌ߲߬ߠߊ߫ ߓߍ߯ߦߊ ߛߙߊߕߌ ߟߎ߬ ߡߊߓߏ߲߬ߧߊ ߟߊ߫.
ߘߋ߬ߣߌߛ ߛߊߛߎ߫ ߒߖߋߛߏ߫ ߟߊߛߍ߲߫ ߘߊ߫ ߓߌߟߏ߲߸ ߂߀߂߆ ߞߏ߲ߞߏߘߓߌ ߕߟߋ߬ ߁߆ ߡߊ߬߸ ߞߵߏ߬ ߞߍ߫ ߊ߬ ߟߊ߫ ߟߐ߬ߒ߬ߞߋ߬ߟߊ߬ ߟߏ߯ߟߎߣߊ߲ ߘߊߡߌ߬ߣߊ߬ߣߍ߲ ߘߌ߫ ߞߏ߲߬ߞߏ߬ ߞߊ߲ߓߍ߲ ߞߎ߲߬ߠߊ߫، ߟߊ߬ߛߌ߰ߟߌ ߖߊ߲߬ߖߏ߲ ߛߌ߲߬ߝߏ߲߬ߧߊ߬ ߘߊ߫ ߞߌ߲ߕߟߋ߫ ߓߙߊߞߣߍ ߟߋ߬ ߘߐ߫߸ ߞߊ߬ߝߏ߬ ߞߎ߲߬ߕߌ߰ ߛߌߦߊߡߊ߲߫ ߕߘߍ߬ ߡߍ߲ ߞߣߍ ߞߊ߲߬.
ߢߣߊߕߊߟߌ ߞߍ߫ ߘߊ߫ ߕߙߊߓߊ ߕߟߋ߬ ߁߅ ߟߋ߬ ߟߊ߫߸ ߊ߬ ߛߎߘߊ߲߫ ߘߊ߫ ߞߊ߲ߕߌ߯ ߢߣߊߕߊߟߌ ߖߊ߰ߟߋ߬ ߝߟߐ ߟߋ߬ ߘߐ߫ ߌߞߘߐ߫ %߉߄ ߠߊ߫، ߛߊߛߎ߫ ߒߖߋߛߏ߫ ߛߊ߲߬ ߈߂ ߟߋ߬ ߕߋ߲߬߸ ߊ߬ ߓߘߊ߫ ߛߊ߲߬ ߓߌߣߊ߯ߣߌ߲߫ ߣߌ߫ ߞߐ߫ ߞߍ߫ ߖߡߊ߬ߣߊ ߞߎ߲߬ߠߊ߫ ߕߋ߲߬، ߊ߬ ߛߌ߰ ߘߊ߫ ߞߊ߬ߦߌ߯ ߁߉߇߉ ߟߋ߬ ߟߊ߫߸ ߞߊ߬ ߥߟߌ߬ ߁߉߉߂ ߟߊ߫، ߊ߬ ߛߌ߰ ߘߊ߫ ߞߏߞߎߘߊ߫ ߁߉߉߇ ߟߋ߬ ߟߊ߫߸ ߞߵߊ߬ ߕߊ߬ ߏ߬ ߡߊ߬ ߤߊ߲߯ ߕߋ߲߬߸ ߊ߬ ߦߋ߫ ߖߡߊ߬ߣߊ ߞߎ߲߬ߠߊ߫، ߒ߬ߓߊ߬߸ ߞߊ߲ߕߌ߯ߦߊ߫ ߓߊ߲ߓߊߟߌ ߏ߬ ߓߘߊ߫ ߣߊ߬ ߞߏ߲ߞߏ߫ ߓߘߍ߬ߓߘߍ߬ߟߌ ߟߏ߲߬ߓߏ߲߬ߟߊ߲ߓߊ߲߫߸ ߝߏ߫ ߝߊ߲߬ߞߊߛߌ߬ߣߊ ߟߎ߬ ߦߴߊ߬ ߞߏ ߘߐߜߏߦߊ߫ ߟߊ߫ ߞߊߕߌ߫.
ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߞߊ߬ ߟߊ߬ߞߙߐ߬ߛߟߌ߬ߟߊ ߡߍ߲ ߠߎ߬ ߟߊߕߊ߯ ߦߋ߲߬߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߞߍ߫ ߘߊ߫ <<ߖߐ ߣߌ߫ ߘߏ߲߬ߖߟߎ߬ߡߊ>> ߘߝߊߣߍ߲ ߠߋ߬ ߘߐ߫߸ ߝߊ߲߬ߞߊߛߌ߬ߣߊ ߛߌߦߊߡߊ߲߫ ߞߊ߬ ߢߣߊߕߊߟߌ ߝߛߏ߬ߝߛߊ߬ ߞߏ ߝߐ߫ ߟߋ߬߸ ߦߙߐ߫ ߘߐߓߎ߬ߘߎ߲߬ߣߍ߲߬ ߛߌߦߊߡߊ߲߫ ߕߘߍ߬ ߡߍ߲ ߘߐ߫، ߤߊߟߌ߬ ߕߘߍ߬ߒ߬ߘߐ߬ߟߌ ߗߡߍ߬ߘߐ߬ߦߊ ߡߍ߲ ߝߐ߫ ߘߊ߫߸ ߝߊ߲߬ߞߊߛߌ߬ߣߊ ߟߎ߬ ߡߊ߫ ߓߍ߲߬ ߏ߬ ߡߊ߬، ߓߊߏ߬߸ ߊ߬ ߝߐ߫ ߘߊ߫ ߞߏ߫ ߏ߬ ߦߋ߫ %߈߄ ߠߋ߬ ߘߌ߫.
ߛߊߛߎ߫ ߒߖߋߛߏ߫ ߟߊ߫ ߟߊ߬ߛߌ߰ߟߌ ߓߋߟߋ߲ߠߊ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߟߐ߬ߒ߬ߞߋ߬ߟߊ߬ ߞߎߘߊ ߣߌ߲߬ ߓߎ߲ߓߎ߲ߕߐ߫ ߛߐ߬ߘߐ߲ ߞߏߢߊ ߟߎ߬ ߟߊߢߊ߭ ߟߋ߬ ߡߊ߬߸ ߞߊ߬ ߓߊ߲ߓߊ߲߫ ߞߍ߫ ߛߣߍ߬ߞߍ ߞߊ߲߬߸ ߊ߬ ߣߌ߫ ߘߍ߲߰ߦߊ߬ߟߌ، ߞߊ߬ ߓߊ߲߫ ߞߊ߬ ߘߋ߲ߡߌߛߍ߲ ߠߎ߬ ߟߊ߫ ߓߊ߯ߙߊ ߞߏ ߟߎ߬ ߢߊߓߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߡߙߌߦߊ ߡߍ߲ ߞߊ߲߬߸ ߏ߬ ߟߋ ߝߘߊ߬ߝߌ߲߬ߠߊ߬ߟߊ߲߬ߘߌ߬ߦߊ ߘߌ߫ ߛߐ߬ߘߐ߲ ߛߌߟߊ ߝߍ߬߸ ߊ߬ߟߎ߬ ߟߊ߫ ߖߡߊ߬ߣߊ ߣߌ߫ ߝߘߊ߬ߝߌ߲߬ ߖߡߊߣߊ ߟߎ߬ ߦߋ߫ ߓߊ߯ߙߊ߫، ߞߵߏ߬ ߟߊ߫߫ ߛߌ߲߬ߝߏ߲߬ߘߊ߬ ߛߌߦߊߡߊ߲߫ ߞߊ߲߬.
ߊ߬ߟߋ ߟߊߛߌ߰ߣߍ߲߫ ߠߋ߬ ߟߐ߬ߒ߬ߞߋ߬ߟߊ߬ ߟߏ߯ߟߎߣߊ߲ ߣߌ߲߬ ߞߊ߲ߡߊ߬ ߕߋ߲߬߸ ߞߵߊ߬ ߛߐ߬ߘߐ߲߬ ߖߡߊ߬ߣߊ ߦߋ߫ ߜߟߍ߬ߦߊ ߖߍ߬ߘߍߖߍ߬ߘߍ ߕߍߡߊ߬، ߞߓߊߕߟߎ ߦߋ߫ ߓߐ߫ ߟߊ߫ ߞߏ߲߬ߞߏ߫ ߖߡߊ߬ߣߊ ߞߊ߲߬ ߝߋߎ߫߸ ߓߊ߬ߙߌ߬ ߓߟߏߞߏߟߏ߲ߧߊ ߥߙߊ߬ߣߍ߲߫ ߠߋ߬ ߦߋ߲߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬، ߖߊ߯ߓߊߕߐߦߊ ߥߙߊ߬ߣߍ߲߬ ߘߋ߲ߡߌߛߍ߲ ߠߎ߬ ߟߊ߫ ߞߎ߲߬ߠߊ߫ ߞߏߛߓߍ߫.
ߞߏ߲߬ߞߏ߫ ߕߊ ߣߌ߲߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߝߘ߬ߊߝߌ߲߬ߠߊ߫ ߓߘߍ߬ߓߘߍ߬ߟߌ ߕߊ߯ ߢߊ ߦߋ߫ ߓߊ߬ߟߌ߬ߞߏ߫ ߘߌ߫، ߞߊ߬ߕߎ߲߯߸ ߛߌ߲߬ߝߏ߲߬ߘߊ ߡߍ߲ ߠߎ߬ ߦߋ߫ ߜߙߋߓߊ ߣߌ߲߬ ߞߊ߲߬߸ ߏ߬ ߟߎ߬ ߦߋ߫ ߣߊ߲߬ߕߌ߮ ߟߎ߬ ߟߊ߫ ߞߊ߬ߝߏ߬ ߖߊߛߏ߲ ߠߋ߬ ߘߐߙߐ߲߫ ߦߋ߫ ߟߊ߫ ߞߊ߬ߝߏ߬ ߖߊߛߏ߲ ߘߌ߫، ߓߊ߬ߙߌ߬߸ ߛߌ߰ߞߊ߲߬ ߡߊ߬ߛߊߦߌ߲ ߣߌ߫ ߛߌ߰ߞߊ߲߬ ߡߊ߬ߝߊߟߋ߲ ߡߍ߲ ߠߎ߬ ߦߋ߫ ߞߍ߫ ߟߊ߫ ߞߊ߬ ߛߋߓߊ߯ߦߊ ߕߏ߫ ߡߐ߰ ߞߋߟߋ߲߫ ߞߓߊ߬ ߞߘߐ߫߸ ߊ߬ߟߎ߬ ߕߴߏ߬ ߦߋ߫ ߞߊ߬ߝߏ߬ ߖߊߛߏ߲߫ ߘߌ߫߸ ߏ߬ ߕߍ߫ ߘߐߜߏߦߊ߫ ߟߊ߫، ߞߵߊ߬ ߛߐ߬ߘߐ߲߬ ߜߎ߸ ߛߋߓߊ߯ߦߊ ߡߐߚߐߕߐߕߐ ߦߋ߫ <<ߛߌ߰ߞߊ߲߬ ߠߊ߬ ߞߊߝߏ߫ ߖߊߛߏ߲>> ߠߋ߬ ߘߌ߫، ߢߌ߬ߣߌ߲߬ߞߊ߬ߟߌ߬ߟߊ ߛߌߦߊߡߊ߲߫ ߠߊ߫ ߞߎߡߊ ߦߋ߫ ߦߙߐ ߡߍ߲ ߘߐ߫ ߛߊ߫߸ ߊ߬ߝߐ߫ ߕߋߟߋ߲߫ ߦߋ߫ ߝߘߊ߬ߝߌ߲߬ߠߊ߫ ߛߌ߲߬ߝߏ߲߬ߘߊ ߟߎ߬ ߓߟߏ߫ ߞߵߊ߬ ߟߐ߬ ߝߘߊ߬ߝߌ߲߬ ߖߡߊߣߊ ߟߎ߬ ߣߴߊ߬ ߖߡߊ߬ߣߊ߬ߘߋ߲ ߠߎ߬ ߡߊ߬ ߓߊ߬؟
