ߒߛߙߍߜߘߍ߬ ߡߊ߬ߛߎߓߊ ߓߘߊ߫ ߛߊ߲߬ ߞߋߟߋ߲ ߘߝߊ߫

ߓߊߘߋ߲߫ ߓߘߍ ߟߎ߬߸ ߞߵߊߟߎ߫ ߦߟߌߓߌ߬ߟߊ߫߸ ߕߏ߬ߟߊ߲߬ߕߊ߲ ߘߏ߫ ߟߋ߬ ߛߌ߰ ߘߊ߫ ߛߋ߲߬ߠߊ߫ ߒߛߙߍߜߘߍ߬ ߂߀߂߄ ߕߊ߬ߡߌ߲߬ߣߍ߲ ߡߊ߬߸ ߖߌ߬ߣߍ߫ ߡߙߊ߬ߓߊ߰ߘߊ߬ ߛߌߦߊߡߊ߲߫ ߞߊ߬ ߡߍ߲ ߕߘߍ߬ߒ߬ߘߐ߬ߦߊ߫ ߞߊ߬ ߖߌߟߊߝߍ ߕߐ߮ ߘߍ߬ߡߍ߲߬ߘߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫߸ ߒ߬ߓߊ߬߸ ߏ߬ ߟߋ߬ ߕߊ߲ߠߌ߲߫ ߟߊߓߊ߲ ߥߊ߬ ߘߊ߫ ߓߍ߲߬ ߒߛߙߍߜߘߍ߬ ߣߌ߫ ߟߊߓߋ߬ ߡߊ߬.

ߏ߬ ߡߍ߲ ߕߍ߲߫ ߘߊ߫ ߞߏߟߌ߲ߞߏߟߌ߲ ߕߟߋ߬ ߁߭ ߡߊ߬ ߒߛߙߍߜߍ߬ߘߍ߫ ߕߏ߬ߟߊ߲߬ߕߊ߲ ߓߙߊ ߘߐ߫ ߡߍ߲ ߕߐ߯ ߞߏ߫<<ߛߑߕߊߘ ߕߎߙߑߥߊ ߊߝ߭ߙߌߟ>>ߕߏ߫ ߞߍ߫ ߘߊ߫ ߕߏ߬ߟߊ߲߬ߕߊ߲ ߏ߬ ߟߋ߬ ߞߣߍ ߞߊ߲߬ ߛߍߥߊ ߣߌ߫ ߢߊ߰ߢߊ߮ ߘߝߊߣߍ߲ ߘߐ߫ ߡߐ߱ ߟߎ߬ ߓߟߏ߫߸ ߌߞߘߐߣߌ߲߫ ߝߐߢߐ߲߯ߞߐ ߘߏ߫ ߣߊ߬ ߘߊ߫ ߘߏ߲߬ ߕߏ߬ߟߊ߲߬ߕߊ߲߬ߠߊ ߟߎ߬ ߣߌ߫ ߢߐ߲߯ ߕߍ߫ ߕߎ߬ ߞߏ ߘߐ߫.

ߞߴߏ߬ ߟߊߓߊ߲߫ ߓߟߏߞߘߎ ߣߌ߫ ߞߓߊ߫ ߟߊߝߟߌ ߡߊ߬ ߡߐ߱ ߟߎ߬ ߣߌ߫ ߢߐ߲߯ߕߍ߫߸ ߏ߬ ߟߋ߬ ߞߍ߫ ߘߊ߫ ߕߎ߬ߙߎ߫ ߘߌ߫ ߣߊ߲߬ߕߌ߰ ߝߊ߲ߞߊ ߟߎ߬ ߝߣߊ߫ ߣߊ߬ ߘߊ߫ ߢߊߖߌߓߐ߫ ߥߊߦߌ߲ ߠߊߝߌ߬ߟߌ߫ ߘߊߡߌ߬ߣߊ߬  ߡߐ߱ ߟߎ߬ ߞߊ߲߬߸ ߒ߬ߓߊ߬߸ ߏ߬ ߟߋ߬ ߞߐߝߟߌ ߣߊ߬ ߘߊ߫ ߞߍ߫  ߟߊ߬ߡߊ߮ ߟߊߘߏ߲߭ ߘߌ߫ ߖߊ߬ߡߊ ߘߐ߫߸ ߡߐ߱ ߟߎ߬ ߣߌ߫ ߜߘߌ ߏ߬ ߟߋ ߣߐ߬ ߕߏ߬ߟߊ߲߬ߕߊ߲߬ ߓߙߊ ߘߊ ߡߊߜߍ߲߫ ߘߊߡߌ߬ߣߊ߬ ߟߊ߫ ߞߊ߬ ߕߊ߯ ߝߘߌ߫ ߢߐ߲߮ ߘߐ߫.

ߥߊߦߌ߲ ߛߊߓߎ߫ ߟߊ߫߸ ߡߐ߰ ߛߌߦߊߡߊ߲߫ ߠߋ߬ ߝߊ߲߬ߞߊ ߘߐ߯ߦߊ߫ ߘߊ߫ ߡߍ߲ ߠߎ߬ ߡߊ߫ ߛߋ߫ ߊ߬ߟߎ߫ ߖߘߍ߬ߡߊߛߐ߬ߘߐ߲߬ ߠߊ߫߸ ߒ߬ߓߊ߬߸ ߏ߬ ߡߐ߰ ߛߌߦߊߡߊ߲߫ ߠߋ߬ ߓߐ߬ߣߐ߫ ߘߴߊ߬ ߣߌ ߘߐ߫߸ ߓߊߏ߬߸ ߘߏ߲߬ ߘߊ߬ ߞߋߟߋ߲߫ ߠߋ߬ ߕߘߍ߬ ߟߊߞߊ߬ߣߍ߲߫߸ ߓߍ߯ ߕߘߍ߬ ߦߋ߫ ߡߍ߲ ߡߊߜߍ߲߫ ߠߊ߫ ߓߐߟߌ߫ ߓߟߏ ߡߊ߬߸ ߡߐ߰ ߛߌߦߊߡߊ߲߫ ߠߋ߬ ߘߐߘߐ߲߬ ߘߊ߫ ߓߐ߫ ߦߌߟߊ ߘߐ߫.

ߞߵߊ߬ ߡߊߛߐ߬ߘߐ߲߬ ߓߐ߫ ߘߊ ߟߊ߫ ߘߐ߯ߦߊ ߝߍ߬߸ ߡߐ߱ ߟߎ߬ ߕߍ߬ߘߍ߫ ߊ߬ߟߎ߬ ߕߊ߯ߡߟߊ߫ ߟߋ߬ ߢߐ߲߮ ߞߊ߲߬  ߦߏ߫ ߡߊߢߊ߲߫߸ ߘߏ߫ ߟߎ߫ ߖߍ߬ߘߍ ߦߟߍ߬ ߘߊ߫ ߟߋ߬ ߞߏߞߏ ߡߊ߬ ߞߵߊ߬ߟߎ߬ ߖߎߙߊ߲߫߸ ߓߊ߬ߙߌ߫߸ ߏ߬ ߘߏ߫ ߟߎ߫ ߝߣߊ߫ ߛߊ߬ ߘߊ߫ ߟߋ߬߸ ߡߊ߬ߛߎߓߊ ߢߌ߲߬ ߛߋ߲߭ߝߍ߬߸ ߞߎ߲߬ߠߊ߬ߛߌ߮ ߟߊ߫ ߖߊ߬ߕߋ߬ߛߎ߲߬ߓߐ ߞߊ߬ ߞߏߕߐ߫ ߡߐ߰ ߅߆ ߟߋ߬ ߞߏߝߐ߫.

ߡߍ߲ ߠߎ߬ ߕߏ߫ ߘߴߊ߬ ߞߏ ߘߊ߫ ߘߐ߫߸ ߣߊ߲߬ߒߕߊ߲ ߠߎ߬ ߟߊ߫ ߘߍ߬ߞߙߎ ߞߏ߬ߣߌ߲ ߞߵߊ߬ ߦߌ߬ߘߊ߬ ߟߋ߬ ߞߏ߫ ߡߐ߰ ߁߄߀ ߠߋ߬ ߣߌ ߕߏ߫ ߘߴߊ߬ ߘߐ߫، ߛߙߋ ߛߌߦߊߡߊ߲ ߠߊ߫ ߝߐߟߌ߫ ߘߐ߫߸ ߞߏ߫ <<ߞߏߕߐ ߥߊ߬ߙߊ ߞߎ߲߭ ߞߍ߫ ߘߊ߫ ߕߐ߲߫ ߓߟߏߡߊ ߟߎ߬ ߟߊ߫ ߢߊߖߌߓߐ߫ ߥߊߦߌ߲ ߠߊߝߟߌ ߟߋ߬ ߘߌ߫>>

ߒ߬ߓߊ߬߸ ߞߵߊ߬ ߓߍ߲߬ ߏ߬ ߦߟߌߓߌߟߊ߫ ߖߎ߮ ߡߊ߬، ߒߛߙߍߜߍ߬ߘߍ߫ ߡߐ߰ߦߊ ߤߊߞߍ ߡߞߊߘߊ߲ ߘߍ߬ߓߊ ߣߐ߬ ߟߊ߬ߥߊ߲߬ߞߊ߲߬ߠߌ߲ ߘߏ߫ ߟߋ߬ ߞߍ߫ ߟߊ߫ ߓߌ߬߸ ߞߴߏ߬ ߖߎ߬ߓߌߟߊ ߞߍ߫ ߖߌ߬ߣߍ߫ ߛߌ߰ߞߊ߲߬ ߞߎߘߊ ߖߊ߬ߕߋ߬ߘߐ߬ߛߌ߮ ߞߎ߬ߙߎ߲߬ߘߎ߬ߛߋ߲ ߁߁߭ ߘߌ߫߸ ߏ߬ ߡߍ߲ ߞߊ߲߫ ߞߏ߫﴿ߊ߬ ߦߋ߫ ߤߊߞߍ߫ ߘߌ߫ ߓߍ߯ ߢߍ߫ ߞߢߊߟߌ ߓߟߏߡߊ߬.

ߞߊ߬ ߟߊߥߟߍ߫ ߞߕߌߘߊ߫ ߞߎ߬ߢߊ߬ߘߐ߬ߕߊ߬ ߘߍ߲ߖߘߍߟߊ ߘߏ߫ ߓߟߏ߫ ߊ߬ ߕߎ߬ߡߊ߬ ߓߘߍ ߟߊ߫߸ ߊ߬ ߦߋ߫ ߤߊߞߍ߫ ߘߴߊ߬ ߦߋ߫ ߞߊ߬ ߛߋ߫ ߞߕߌ ߟߊ߫ ߟߊ߫ ߕߍ߰ߟߊ ߘߐ߫ ߊ߬ ߤߊߞߍ ߡߞߊߣߌ߲߫ ߞߊ߲ߡߊ߬ ߞߎ߲߬ߠߊ߬ߛߌ߮ ߝߍ߬߸ ߊ߬ ߗߋߘߋ߲ ߠߎ߬ ߝߍ߬߸ ߥߟߊ߫ ߡߐ߰ ߜߘߍ߫ ߣߌ߫ ߛߌ߲߬ߝߏ߲߬ߘߊ߬ ߜߘߍ߫ ߝߍ߬﴾
ߊ߬ ߦߌ߬ߘߊ߬ ߘߴߊ߬ߟߎ߬ ߓߟߏ߫ ߝߣߊ߫.

ߞߏ߫ ߊ߬ߟߎ߫ ߞߊ߬ ߡߞߊ߬ߛߌ߬ߟߌ ߞߍ߫ ߞߏߕߐ ߟߎ߬ ߕߐ߯ ߘߐ߫ ߂߀߂߅ ߕߙߊߓߊ ߕߟߋ߬ ߁߀ ߡߊ߬߸ ߞߵߊ߬ ߓߍ߲߬ ߝߊ߰ߓߊ߰ߕߐ ߟߎ߬ ߣߌ߫ ߡߊ߬ߘߌ߬ߡߌ߲߬ߓߊ߰ߕߐ ߣߌ߫ ߓߟߏߝߋ߲߫ ߕߣߐ߬ߡߊ ߛߌߦߊߡߊ߲߫ ߕߌߢߍ߲߫߫ ߞߏߛߐ߲߬ ߕߏ߬ߟߊ߲߬ߕߊ߲ ߛߌ߲߬ߝߏ߲߬ߧߊ߬ߟߊ ߟߎ߬ ߞߊ߲ߡߊ߬ ߊ߬ߟߎ߫ ߛߐ߬ߘߐ߲ ߞߏߛߐ߲߬ ߞߏߢߊ ߣߌ߲߬ ߘߐ߫.

ߓߊ߬ߙߌ߫߸ ߞߵߊ߬ ߕߊ߬ ߡߞߊ߬ߛߌ߬ߟߌ ߟߊߘߏ߲߭ ߡߊ߬ ߒߛߙߍߜߘߍ߬ ߞߕߌ ߦߌߟߡߊ߫ ߝߟߐ ߟߊ߫߸ ߤߊ߲߯ ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߊ߬ߟߎ߫ ߣߐ߲߬ ߕߍ߫ ߖߋ߬ߓߌ߫ ߛߐ߬ߘߐ߲߬ ߠߊ߫ ߏ߬ ߟߎ߬ ߟߊ߫߸ ߊ߬ߟߋ߬ ߡߞߊ߬ߛߌ߬ߟߌ߬ ߞߋߟߋ߲ ߠߋ߬ ߝߣߊ߫ ߟߊߘߏ߲߬ ߘߊ߫ ߞߊ߲ߞߊ߲߫ ߝߓߏ߬ߓߊ߬ ߞߕߌߞߊ߲ߘߊ ߝߍ߬  ߞߕߌ ߦߟߌߡߊ߫ ߝߌߟߊߣߊ߲ ߠߊ߫.

ߓߊ߬ߙߌ߫߸ ߏ߬ ߟߎ߬ ߛߌ߫ ߡߊ߫ ߜߟߋ߬ߞߋ߫ ߓߌ߬ߟߴߊ߬ߟߎ߬ ߢߌ߲ߥߏ ߝߍ߬ ߊ߬ ߞߏߢߊ ߘߐ߫߸ ߊ߬ߟߎ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߫߸ ߞߏ߫ ߞߏߕߐ ߟߎ߬ ߟߊ߫ ߡߐ߱ ߟߎ߬ ߣߴߊ߬ߟߎ߬ ߟߊ߫ ߖߛߎ߬ߞߊߛߌ ߣߴߊ߬ߟߎ߬ ߟߊ߫ ߘߐ߰ߕߐ߬ߦߊ ߞߏ߬ߣߌ߲ ߡߴߊ߬ߟߎ ߞߊ߬ߢߊ߫ ߖߌ߬ߣߍ߫ ߕߊߡߊ߲ ߞߋ߲߬ߥߟߎ߫ ߡߎ߬ߥߊ߲߫ ߛߊ߬ߙߊ ߟߊ߫ ߒߛߙߍߜߘߍ߬ ߞߕߌ߫ ߦߌߟߡߊ߫ ߝߟߐ ߟߊ߫.

ߞߴߏ߬ ߞߎ߲߭ ߞߍ߫ ߣߊ߲߬ߒߕߊ߲ ߠߎ߬ ߡߊߞߊ߬ߛߌ ߘߌ߫ ߓߟߏߘߐߢߌ߲ ߠߎ߬ ߣߌ߫ ߡߐ߰ ߢߌߡߊ ߟߎ߬ ߛߊߓߎ߫ ߟߊ߫߸ ߓߊ߬ߙߌ߫߸ ߏ߬ ߞߏ ߓߘߊ߫ ߞߍ߫ ߕߋ߲߬ ߝߏߦߊ߲߫߸ ߊ߬ߟߎ߬ ߟߊ߫ ߞߎߡߊ߫ ߟߊߓߊ߲߫ ߘߐ߫߸ ߊ߬ߟߎ߫ ߞߊ߬ ߞߟߌߟߌ ߟߐ߬ ߒߛߙߍߜߘߍ߬ ߞߕߌߘߊ ߦߟߌߡߊ߫ ߝߟߐ ߡߊ߬߸ ߕߋߟߋ߲ߓߊ߯ߦߊ ߟߊߓߊ߯ߙߊ ߘߐ߫ ߞߏߕߐ ߟߎ߬ ߢߍ߫، ߞߏ߫ ߖߡߊ߬ߣߊ߬ߘߋ߲ ߠߎ߬ ߓߍ߯ ߟߊ߫ ߖߛߎ߬ߛߎߡߊ ߣߌ߫ ߤߙߍ ߦߋ߫ ߏ߬ ߟߋ ߘߐ߫.

ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ߟߐ ߓߟߏ߫
ߛߌߟߊߓߐߛߐ߯ߣߊ߫ ߞߐߦߌߘߊ.