ߡߊ߬ߛߎ߬ߓߊ߬ ߞߏ ߘߏ߫ ߟߋ߬ ߞߍߣߍ߲߫ ߛߌ߬ߣߌ߲߬ߟߏ߲߫ ߕߊ߬ߡߌ߲߬ߣߍ߲߸ ߦߏߓߋ߬ ߞߊ߬ߝߏ ߖߌߘߟߊ߫ ߦߙߐ ߘߏ߫ ߘߐ߫߸ ߞߊ߬ ߡߐ߰ ߂߉ ߓߐ߬ߣߐ߫ ߊ߬ ߣߌ ߘߐ߫، ߊ߬ ߝߊ߰ߓߊ߰ߕߐ ߛߌߦߊߡߊ߲߫ ߛߎ߬ߘߏ߲ ߓߘߊ߫ ߞߍ߫߸ ߡߍ߲ ߠߎ߬ ߛߋ߫ ߘߊ߫ ߞߛߌ߫ ߟߊ߫߸ ߏ߬ ߟߎ߫ ߖߍ߬ߘߍ ߓߘߊ߫ ߓߐ߫ ߘߊ߲ߘߊߛߏ ߟߊ߫ ߕߋ߲߬߸ ߡߞߊ߬ߘߊ߲߬ߠߌ߲߬ߠߊ ߟߎ߬ ߦߋ߫ ߢߌߣߌ߲ߠߌ߲ ߞߊ߲߬، ߓߊߏ߬߸ ߊ߬ ߞߣߐ߫ ߡߐ߯ ߕߊ߲߫ ߣߌ߫ ߞߐ߫ ߓߍ߫ ߦߋ߲߬߸ ߡߍ߲ ߠߎ߬ ߦߋߣߍ߲߫ ߕߍ߫ ߡߎߣߎ߲߬.
ߡߐ߰ ߡߎ߬ߥߊ߲ ߣߌ߫ ߞߐ߬ߣߐ߲߬ߘߐ߫߸ ߡߍ߲ ߠߎ߬ ߛߎ߭ ߟߊߦߟߍ߬ ߘߊ߫ ߖߌ ߘߐ߫߸ ߞߵߊ߬ߟߎ߫ ߛߎ߭ߘߏ߲߬، ߞߊ߬ߕߎ߲߯߸ ߊ߬ߟߎ߫ ߕߎ߲߬ ߦߋ߫ ߞߎߟߎ߲ ߡߍ߲ ߞߣߐ߫ ߦߏߓߋ߫ ߞߊ߬ߝߏ ߞߣߐ߫߸ ߏ߬ ߡߍ߲ ߦߋ߫ ߖߋߟߌ߬ߓߊ߬ߟߊ߫ ߞߐ߰ߘߎ߯ ߕߟߋ߬ߓߐ ߘߐ߫߸ ߏ߬ ߟߋ ߝߘߌ߫ ߘߊ߫߸ ߞߊ߬ ߣߊ߬ ߓߐ߬ߣߐ ߏ߬ ߟߊߛߋ߫ ߡߐ߰ߦߊ ߡߊ߬، ߏ߬ ߞߎ߲߬ߠߊ߬ߝߎߟߋ߲ ߟߊߛߋ߫ ߘߊ߫ ߓߌ߬ ߞߐ߬ߓߊ߬ߟߏ߲ ߢߌ߲߬ ߠߋ߬ ߡߊ߬߸ ߦߏߓߋ߫ ߡߊ߬ߛߎ߬ߓߊ߬ߞߏ ߟߎ߬ ߣߴߊ߬ ߞߟߊߡߊ߲ߞߏ ߟߎ߬ ߡߊߡߊ߬ߙߊ ߖߋ߬ߕߌ߰ߘߊ ߓߟߏ߫.
ߊ߬ߟߎ߬ ߟߊ߫ ߟߥߊ߬ߟߌ߬ߟߌ ߞߟߊ߬ߕߌ߮ ߟߊ߫ ߝߐߟߌ߫ ߘߐ߫߸ ߡߏ߬ߤߊ߬ߡߍߘ ߜ߭ߏߖ߭ߋ߫߸ ߞߏ߫ ߕߎߣߎ߲ߓߊ߯ߕߐ ߟߎ߬ ߢߌߣߌ߲ ߦߴߌߘߐ߫ ߡߎߣߎ߲߬߸ ߊ߬ߟߎ߬ ߓߘߊ߫ ߡߐ߰ ߛߋߦߌ߲߫ ߦߋ߫، ߡߐ߰ ߕߊ߲߫ ߠߋ߬ ߕߏߣߍ߲߫߸ ߏ߬ ߟߎ߬ ߦߋߣߍ߲߫ ߕߍ߫ ߡߎߣߎ߲߬، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߛߎ߭ ߡߍ߲ ߠߎ߬ ߟߊߦߟߍ߬ ߘߊ߫߸ ߏ߬ ߟߎ߬ ߓߘߊ߫ ߛߴߊ߬ߟߎ߬ ߟߊ߫ ߦߙߐ ߘߐ߫ ߞߵߊ߬ ߓߍ߲߬ ߦߋ߲߬ ߛߌ߰ߓߊ߮ ߟߎ߫ ߖߍ߬ߘߍ ߟߊ߫ ߟߊ߲߬ߘߊ ߡߊ߬، ߡߍ߲ ߠߎ߬ ߞߙߌ߬ߞߙߊ߬ߣߍ߲ ߥߊ߫ ߘߊ߫ ߘߊ߲ߘߊߛߏ ߟߊ߫߸ ߏ߬ ߟߎ߬ ߓߘߊ߫ ߛߴߊ߬ߟߎ߬ ߡߊߞߍ߫ ߦߙߐ ߘߐ߫ ߡߎ߬ߕߎ߲߬.>>
ߡߐ߰ ߕߊ߲ ߣߌ߫ ߛߊ߬ߓߊ߫ ߢߐ߲߰߸ ߡߍ߲ ߠߎ߬ ߞߙߌ߬ߞߙߊ߬ߣߍ߲ ߟߊߟߊߣߍ߲߫ ߕߘߍ߬ ߘߊ߲ߘߊߛߏ ߟߊ߫߸ ߣߴߊ߬ߟߎ߫ ߣߊ߬ ߘߊ߫ ߕߏ߫ ߟߊߓߌ߬ߟߊ߬ ߞߏ߫ ߊ߬ߟߎ߬ ߦߋ߫ ߥߊ߫ ߟߎ ߡߊ߬، ߞߎߟߎ߲ ߝߘߌߣߍ߲߫ ߦߙߐ ߡߍ߲ ߘߐ߫߸ ߡߞߊ߬ߘߊ߲߬ߠߌ߲߬ߠߊ ߟߎ߬ ߦߴߊ߬ߟߎ߬ ߛߋߞߏ ߞߍ ߞߊ߲߬߸ ߛߡߐ߬ߣߐ ߟߎ߬߸ ߊ߬ ߣߌ߫ ߕߐ߲ߓߟߏߡߊ ߟߎ߬߸ ߏ߬ ߟߎ߬ ߦߋ߫ ߦߙߐ ߟߎ߬ ߛߏ߲߯ߓߊ ߞߊ߲߬߸ ߞߊ߬ ߖߌ ߘߐߞߏ߬ߙߏ߲߬ߞߊߙߊ߲߫߸ ߛߌߞߊ߫ ߞߍߣߍ߲߫ ߦߙߐ ߡߍ߲ ߠߎ߬ ߡߊ߬߸ ߛߊ߫ ߕߎߣߎ߲ߓߊ߯ߕߐ ߏ߬ ߟߎ߬ ߘߌ߫ ߦߋ߫.
ߡߊ߬ߛߎ߬ߓߊ߬ߞߏ ߣߌ߲߬ ߞߍ߫ ߘߊ߫ ߛߌ߬ߣߌ߲߬ߟߏ߲ ߠߋ߬ ߡߊ߬߸ ߜ߭ߊߙߌ߲߫ ߜ߭ߊߙߑߓߌ߫ ߘߎ߱ ߞߣߐ߫߸ ߏ߬ ߦߋ߫ ߒߜ߭ߙߎ߫ ߡߊ߬ߙߊ ߟߋ߬ ߘߐ߫، ߞߎߟߎ߲ ߡߍ߲ ߝߘߌߣߍ߲߫ ߣߌ߲߬߸ ߏ߬ ߣߴߊ߬ ߢߐ߲߰ ߘߐ ߟߎ߬ ߦߋ߫ ߣߊ߬ ߟߴߊ߬ߟߎ߬ ߓߟߏ߫ ߞߊ߬ ߡߐ߱ ߟߎ߫ ߟߋ߬ ߡߊߘߏ߬ߣߌ߲߫ ߊ߬ ߞߣߐ߫، ߊ߬ ߞߏ߬ߣߌ߲߸ ߞߎߟߎ߲ ߝߘߌ߫ ߢߊ߫ ߞߋߟߋ߲߫ ߟߐ߲ߣߍ߲߫ ߕߍ߫ ߡߎߣߎ߲߬߸ ߡߊ߲߬ߕߙߐ ߞߊ߬ ߘߋ߲ߓߦߊ߫ ߛߌߦߊߡߊ߲߫ ߠߋ߬ ߓߌ߬ߟߊ߫ ߛߎ߬ߣߎ߲ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
