ߓߌ߬ ߞߊ߯ߙߌ ߣߌ߲߬ ߡߊ߬߸ ߂߀߂߅ ߞߊ߬ߙߌ߬ߝߐ ߕߟߋ߬ ߁߃ ߕߟߋ߬ߞߎߣߊ ߣߌ߲߬ ߘߐ߫߸ ߖߋ߬ߟߌ߬ߓߊ߬ߟߊ߫ ߞߊ߲ߕߌ߯ ߞߘߐ ߡߎ߬ߤߊ߲߬ߡߊߘߎ߬ ߓߎߤߊߙߌ߫ ߝߊߕߏ߫ ߞߵߊ߬ ߛߌ߭ ߕߏ߫ ߛߊ߲߬ ߈߂ ߘߐ߫߸ ߏ߬ ߡߍ߲ ߞߎߡߊ ߟߊߖߍ߲ߛߍ߲߫ ߘߴߊ߬ ߟߊ߫ ߓߋߟߋ߲ߕߌ߮ ߓߟߏ߫ ߌߞߛ ߞߊ߲߬، ߖߋ߬ߟߌ߬ߓߊ߬ߟߊ߫ ߓߘߍ߬ߓߘߍ߬ߟߌ ߕߐ߯ߟߡߊ ߘߏ߫ ߟߋ߬ ߗߍ߭ ߢߌ߲߬ ߘߌ߫߸ ߡߍ߲ ߞߵߊ߬ ߕߋ߬ߟߋ ߞߍ߫ ߢߊ߫ ߝߌ߬ߟߊ߬ ߡߊ߬ ߖߡߊ߬ߣߊ ߞߎ߲߬ߠߊ߫߸ ߊ߬ ߣߊ߲߬ߕߌ߰ߟߊ߬ߡߊ ߣߴߊ߬ ߣߊ߲߬ߒ߬ߕߊ߲߬ߠߊ߬ߡߊ ߓߍ߯ߦߊ ߞߊ߬ߘߊ߲ ߞߣߐ߫.
ߓߎߤߊߙߌ߫ ߞߊ߬ ߞߊ߬ߝߏ߬ ߖߊߛߏ߲ ߠߋ߬ ߞߍ߫ ߁߉߈߃ ߟߊ߫߸ ߞߵߊ߬ ߛߐ߬ߘߐ߲߬ ߊ߬ ߦߋ߫ ߣߊ߲߬ߕߌ߰ߦߊ ߘߐ߫߸ ߏ߬ ߡߍ߲ ߞߍ߫ ߘߴߊ߬ ߟߊ߫ ߝߊ߲߬ߞߊ ߕߊ߬ߞߏ߬ ߝߟߐ ߘߌ߫ ߞߵߊ߬ ߛߌ߭ ߕߏ߫ ߛߊ߲߬ ߄߁ ߘߐ߫، ߊ߬ ߞߊ߬ ߞߊ߲ߕߌ߯ ߛߎߥߊ߲ߘߌߣߍ߲ ߛ߭ߋߟߎ߫ ߛ߭ߜ߭ߊߙߌ߫ ߟߋ߬ ߟߊߥߟߏ߫، ߊ߬ ߟߊ߫ ߖߡߊ߬ߣߊ߬ ߡߙߊ߬ ߝߟߐ ߏ߬ ߞߍ߫ ߘߊ߫ ߁߉߈߃ ߟߋ߬ ߟߊ߫ ߞߵߊ߬ ߛߌ߰ ߁߉߈߅ ߟߊ߫߸ ߊ߬ ߟߊ߫ ߞߊ߲ߕߌ߯ߦߊ ߛߋ߲߬ߢߊ߬ ߝߟߐ ߏ߬ ߞߍ߫ ߘߊ߫ ߞߟߊߦߊ ߖߍ߬ߘߍ ߟߋ߬ ߘߐ߫߸ ߕߍ߮ ߞߍ߫ ߘߊ߫ ߡߐ߰ ߛߌߦߊߡߊ߲߫ ߘߐ߫ ߖߡߊ߬ߣߊ ߞߣߐ߫߸ ߞߊ߬ ߢߊ ߕߏ߫ ߞߏ߫ ߛߌߦߊߡߊ߲߫ ߝߍ߬߸ ߝߏ߫ ߞߊ߬ ߡߐ߱ ߟߎ߬ ߘߐߜߍ߬ߘߍ߲߬ߣߍ߲ ߕߏ߫ ߖߡߊ߬ߣߊ ߞߣߐ߫، ߊ߬ ߞߊ߬ ߖߡߊ߬ߣߊ ߗߋߘߊߕߌ߮ ߓߍ߯ ߟߐ߬ ߡߊ߬ߝߊ ߟߊ߫߸ ߡߍ߲ ߠߎ߬ ߡߴߊ߬ߟߎ߫ ߞߎ߲߭ ߠߊߕߋߟߋ߲߫ ߛߌߟߊ߫ ߜߍߣߍ߲ ߞߊ߲߬߸ ߊ߬ ߞߵߏ߬ ߟߎ߬ ߛߌߦߊߡߊ߲߫ ߠߊߡߊ߬ߟߏ߬ߦߊ߫ ߟߋ߬ ߜߍ ߘߐ߫ ߓߍ߯ ߢߣߊ߫.
ߊ߬ ߟߊ߫ ߛߊ߬ߦߊ ߣߌ߲߬ ߣߐ߬ ߡߐ߰ ߛߌߦߊߡߊ߲߫ ߠߋ߬ ߛߎ߬ߣߎ߲߬ ߠߊ߫، ߊ߬ ߖߍ߬ߘߍ߸ ߖߋ߬ߟߌ߬ߓߊ߬ߟߊ߫ ߞߊ߲ߕߌ߮ ߓߏ߬ߟߊ߫ ߕߌ߬ߣߎ߬ߓߎ߫ ߞߵߊ߬ ߦߌ߬ߘߊ߫ ߟߋ߬ ߞߏ߫: <<ߛߎ߬ߣߎ߲ ߕߎ߬ߡߊ ߢߌ߲߬ ߠߊ߫߸ ߒ ߧߋ߫ ߛߊ߲߬ߞߊ߬ ߝߏߟߌ ߟߐ߬ ߟߴߊ߬ ߝߘߎߡߊ߫ ߊߦߌߛ߭ߊ߬ ߡߊ߬߸ ߊ߬ ߣߴߊ߬ ߘߋ߲ ߠߎ߬ ߣߴߊ߬ ߟߊ߫ ߘߋ߲ߓߦߊ ߡߎ߰ߡߍ ߡߊ߬߸ ߊ߬ ߣߴߊ߬ ߟߐ߲ߓߊ߮ ߟߎ߬ ߣߴߊ߬ ߟߊߘߌߦߊߢߍߓߊ߮ ߟߎ߬.>>
ߕߌ߬ߣߓߎ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ ߛߎ߬ߞߏ ߓߍߣߊ߬ ߛߌ߲߬ߝߏ߲߬ߧߴߊ߬ߟߎ߬ ߓߟߏ߫߸ ߞߵߊ߬ ߡߐ߬ߟߐ߲ ߣߴߊ߬ ߓߏ߲߬ߧߊ ߓߍ߯ ߘߴߊ߬ ߡߊ߬߸ ߞߵߏ߬ ߞߎ߲߭ ߞߍ߫ ߊ߬ ߖߋ߬ߟߌ ߘߌ ߘߌ߫ ߖߡߊ߬ߣߊ ߡߊ߬߸ ߊ߬ ߣߴߊ߬ ߟߊ߫ ߛߍ߰ ߞߍߣߍ߲ ߝߊ߬ߛߏ ߦߋ߫.
ߖ߭ߎ߬ߟߌߛ ߡߊ߯ߘߊ߫ ߓߌߦߏ߫ ߡߍ߲ ߦߋ߫ ߛߘߋߦߊߥߏ ߞߊ߲ߕߌ߮ ߘߌ߫߸ ߏ߬ ߝߣߊ߫ ߓߘߊ߫ ߛߊ߲߬ߞߊ߬ ߝߏߟߌ ߞߍ߫ ߊ߬ߟߋ߫ ߖߍ߬ߘߍ ߣߌ߫ ߛߙߊ߬ߟߏ߲߬ ߓߍ߯ ߕߐ߯ ߘߐ߫، ߎߡߊߙߏ߫ ߛߌ߬ߛߏ߬ߞߏ߫ ߊ߲ߓߊߟߏ߫ ߡߍ߲ ߝߣߊ߫ ߦߋ߫ ߓߌ߬ߛߊߥߏ߫ ߖߌ߬ߣߍ߬ ߞߊ߲ߕߌ߮ ߘߌ߫߸ ߏ߬ ߝߣߊ߫ ߞߵߏ߬ ߢߐ߲߰ ߛߊ߲߬ߞߊ߬ ߝߏߟߌ ߞߍ߫ ߖߋ߬ߟߌ߬ߓߊ߬ߟߊ߫ ߖߡߊ߬ߣߊ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߡߐ߰ߓߊ߫ ߟߋ߬ ߛߊ߬ߣߍ߲߫ ߣߌ߲߬߸ ߞߏ߫ ߊߟߊߡߵߊ߬ ߘߏ߲߬ ߘߊ߫ ߡߍ߲ߘߌߦߊ ߣߊߞߐ ߘߐ߫.
ߓߎߤߊߙߌ߫ ߛߐ߬ߘߐ߲߬ ߘߊ߫ ߁߉߄߂ ߞߏߟߌ߲ߞߏߟߌ߲ ߕߟߋ߬ ߁߇ ߟߋ߬ ߡߊ߬ ߘߏߙߊ߫߸ ߞߊߕߑߛߌߣߊ߫ ߞߊ߬ߝߏ ߞߣߐ߫، ߊ߬ ߝߊ߬ ߛߊ߬ ߘߊ߫ ߞߵߊ߬ ߛߌ߭ ߕߏ߫ ߛߊ߲߬ ߣߊ߯ߣߌ߲߬ ߠߋ߬ ߘߐ߫߸ ߊ߬ ߘߏ߲߬ ߘߊ߫ ߣߊ߲߬ߕߌ߰ߦߊ ߘߐ߫ ߖߡߊ߬ߣߊ ߟߊ߫ ߖߘߍ߬ߕߌ߰ߦߊ ߕߊ߭ ߞߐ ߟߋ߬ ߘߐ߫ ߣߍ߲ߞߍ߫߸ ߞߊ߬ ߕߊ߯ ߟߊ߬ߞߐ߰ߟߌ ߞߍ߫ ߓߙߌߕߊ߲ߓߊ߫، ߊ߬ ߞߊߟߌߦߊ߫ ߘߊ߫ ߦߟߍ߬ ߟߊ߫ ߦߋ߲߬ ߞߏߛߓߍ߫߸ ߝߏ߫ ߊ߬ ߣߊ߬ ߘߊ߫ ߞߐ߰ߘߎ߯ ߕߟߋ߬ߓߐ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ ߘߌ߫߸ ߞߣߊ߬ߕߏ߫ ߞߍ߫ ߟߊ߫ ߞߓߊߕߟߎ ߞߏߕߌ߮ ߘߌ߫ ߏߟߎߛߋߜ߭ߎ߲߫ ߏ߬ߓߊߛߊ߲ߖߏ߫ ߕߋ߬ߟߋ ߘߐ߫.
߁߉߈߅ ߟߊ߫߸ ߌߓߙߊߤߌߡ ߓߊߓߊ߲ߖߌߘߊ߫ ߞߊ߬ ߞߊ߬ߝߏ߬ ߖߊߛߏ߲ ߞߍ߫ ߓߎߤߊߙߌ߫ ߟߊ߫߸ ߊ߬ ߞߊ߬ ߛߊ߲߭ ߛߓߊ߬ ߞߍ߫ ߟߊ߬ߡߊ߲߬ߘߌ߬ߟߌ ߘߐ߫߸ ߊ߬ ߡߴߊ߬ ߛߋ߲߬ߓߐ߫ ߓߘߍ߬ߓߘߍ߬ߟߌ ߘߐ߫ ߏ߬ ߛߌ߫ ߘߐ߫، ߛߋ߲߬ߡߊ߬ߕߐ߬ߙߐ߲߬ߜߐ߬ߟߌ߬ ߛߌߦߊߡߊ߲ ߠߎ߬ ߞߐߝߍ߬߸ ߊ߬ ߣߊ߬ ߘߊ߫ ߛߎߘߊ߲߫ ߂߀߁߅ ߞߊ߲ߕߌ߯ ߢߣߊߕߊߟߌ ߝߍ߬، ߊ߬ߟߋ ߟߋ߬ ߝߣߊ߫ ߞߍ߫ ߘߊ߫ ߞߊ߲ߕߌ߯ ߝߟߐߝߟߐ ߘߌ߫ ߖߋ߬ߟߌ߬ߓߊ߬ߟߊ߫ ߞߣߐ߫߸ ߡߍ߲ ߞߊ߬ ߝߊ߲߬ߞߊ߬ߛߌ߬ߣߊ߬ߦߊ ߞߍ߫ ߞߊ߬ ߓߊ߲߫ ߞߊ߬ ߛߎߘߊ߲߫ ߓߍ߯ߦߊ ߓߟߏ ߡߊ߬ ߞߊ߬ ߛߌ߰ ߖߡߊ߬ߣߊ ߞߎ߲߬ߠߊ߬߸ ߊ߬ ߞߊ߬ ߜ߭ߎߘߑߟߐߞ ߖߏߣߕߊߣ ߠߋ߬ ߘߊ߬ߘߌ߫ ߏ߬ ߛߋ߲߬ߢߊ ߝߍ߬.
ߊ߬ ߞߊ߬ ߞߊ߲ߕߌ߯ߦߊ ߞߍ߫ ߟߐ߬ߒ߬ߞߋ߬ߟߊ߫ ߝߌ߬ߟߊ߫ ߟߋ߬ ߞߘߐ߫߸ ߂߀߁߅ ߣߌ߫ ߂߀߂߃ ߕߍߟߊ ߘߐ߫، ߊ߬ ߞߊ߬ ߜߟߍ߬ߦߊ߬ ߛߌߦߊߡߊ߲߫ ߛߐ߬ߘߐ߲߫ ߕߎ߬ߡߊ ߏ߬ ߟߊ߫ ߓߞߏ߫ ߤߙߊߡ ߞߏ ߘߐ߫߸ ߊ߬ ߣߌ߫ ߦߙߎ߬ߞߎ߬ߦߙߎߞߎ ߞߍ߬ߟߍ ߝߣߊ߫ ߘߐ߫، ߊ߬ ߞߵߊ߬ ߛߋߞߏ߫ ߛߌߦߊߡߊ߲߫ ߠߋ߬ ߞߍ߫ ߟߊ߬ߞߊ߲߬ߘߊ߬ߟߌ ߘߐ߫ ߖߡߊ߬ߣߊ ߞߣߐ߫߸ ߓߊ߬ߙߌ߬ ߕߋ߰ߙߋ߬ߦߊ ߥߙߊ߬ ߘߴߊ߬ ߕߋ߬ߟߋ ߞߏߛߓߍ߫߸ ߣߊߦߌߙߊ ߖߌ߰ ߘߴߊ߬ ߕߋ߬ߟߋ߸ ߞߎߡߊߕߍ߫ ߓߟߏߞߏߟߏ߲ߧߊ߫ ߘߊ߲߬ߠߊߕߊ߬ߡߌ߲߬ߣߍ߲ ߡߊ߬، ߂߀߁߆ ߖߊ߯ߓߊߕߐߦߊ ߕߊ߬ߣߍ߲ ߞߵߊ߬ ߟߊ߫ ߞߙߏߣߊߓߊ߰ߙߋ߲ ߞߊ߲߬߸ ߏ߬ ߞߵߊ߬ ߟߊ߫ ߞߏ ߡߊߣߐ߯ ߞߵߊ߬ ߟߐ߯ߓߐ߫ ߡߐ߰ ߛߌߦߊߡߊ߲߫ ߠߊ߫، ߊ߬ ߝߐ߫ ߘߴߴߊ߬ߟߋ ߟߋ߬ ߡߊ߬ ߞߏ߫: <<ߓߊߓߊ ߜ߭ߐߛߑߟߐ߫>> ߞߵߏ߬ ߞߎ߲߭ ߞߍ߫ ߊ߬ ߟߊ߫ ߛߎߡߦߊ ߘߌ߫ ߞߏ ߟߎ߬ ߝߍ߬، ߓߊߏ߬߸ ߊ߬ ߞߊ߬ ߞߊߙߏ߫ ߥߐ߯ߙߐ߫ ߞߍ߫߸ ߊ߬ ߦߴߊ߬ ߟߊ߫ ߞߎ߲߬ߠߊ߬ߛߌ߮ ߛߏ߯ߙߏ ߞߊ߲߬. ߡߐ߱ ߟߎ߫ ߕߍ߬ߘߍ߫ ߊ߬ ߡߊߓߎ߬ߙߎ߲߬ߕߌ߬ ߟߊ߫ ߝߣߊ߫ ߞߵߊ߬ ߓߍ߲߬ ߊ߬ ߝߊ߬ߘߌ߬ ߞߘߐ߬ ߞߏ ߡߊ߬.
ߡߊ߬ߙߊ ߕߍ߬ߘߍ߫ ߊ߬ ߓߟߏ߫ ߟߊ߫ ߢߊ ߡߍ߲ ߊ߬ ߣߊ߲߬ߕߌ߰ߟߊ߬ߡߊ߸ ߏ߬ ߡߊ߫ ߛߋ߫ ߓߐ߫ ߟߴߊ߬ ߓߟߏ߫ ߝߋߎ߫، ߓߊߏ߬ ߂߀߁߆ ߟߊ߫߸ ߊ߬ ߟߊ߫ ߓߐ߬ߟߐ߲߬ߞߊ ߊߦߌߛ߭ߊ߬ ߓߎߤߊߙߌ߫ ߞߵߊ߬ ߡߊߞߕߌ߫ ߞߏ ߘߏ߫ ߟߎ߫ ߘߐ߫߸ ߊ߬ ߞߵߊ߬ ߦߌ߬ߘߊ߫ ߏ߬ ߟߊ߫ ߞߏ߫ ߏ߬ ߦߋ߫ ߕߏ߫ ߊ߬ ߟߊ߫ ߡߛߏ߬ߦߊ߬ ߡߎߙߊ߲ ߞߣߐ߫߸ ߓߊߏ߬ ߡߏ߬ߛߏ ߦߋ߫ ߦߌߟߊ ߕߍ߫ ߦߙߐ߫ ߜߘߍ߫ ߘߌ߫ <<ߜߊ߭ ߞߐ߫߸ ߊ߬ ߣߌ߫ ߓߏ߲߫ ߞߣߐߟߊ.>> ߏ߬ ߞߎߡߊ ߞߊ߬ ߘߎߢߊ߫ ߟߊߝߏ߬ ߟߋ߬، ߞߎߡߊ ߏ߬ ߡߍ߲ ߞߍ߫ ߘߊ߫ ߊߟߌߡߊ߲ߘߎ߯ ߞߎ߲߬ߕߌ߰ ߓߐ߬ߟߐ߲߬ߞߊ߬ ߊߖ߭ߋߟߊ ߡߍߙߑߞߍߟ ߢߣߊ߫، ߂߀߂߁ ߠߊ߫ ߝߣߊ߫߸ ߊ߬ ߞߊ߬ ߕߑߥߌߕߍߙ ߟߊߕߐ߲߫ ߊ߬ ߟߊ߫ ߖߡߊ߬ߣߊ ߞߣߐ߫߸ ߞߊ߬ ߓߊ߲߫ ߞߵߊ߬߬ ߝߐ߫ ߊ߬ ߦߋ߫ ߞߏ߫ ߗߋߛߓߍ߫ ߝߏߦߌ߬߸ ߣߴߊ߬ ߘߌ߫ ߡߐ߱ ߟߎ߬ ߞߟߌ߫ ߖߎ߯ߡߊ߲ ߣߌ߫ ߡߙߎߕߟߌ ߡߊ߬߸ ߞߏ߫ ߞߵߏ߬ ߟߎ߬ ߓߍ߯ ߟߊߖߌ߰ ߞߵߊ߬ ߓߐ߫ ߦߋ߲߬.ߕߎ߬ߡߊ ߏ߬ ߟߋ ߖߍ߬ߘߍ ߟߊ߫߸ ߥߏߟߋ߫ ߛߏߦߌ߲ߞߊ߫ ߡߍ߲ ߦߋ߫ ߣߏߓߍߟ ߡߟߋߞߎߦߊ ߞߐ߲ߘߐ߲߫ ߕߌ߮ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߕߎ߬ߢߊ ߦߋ߫ ߡߍ߲ ߘߌ߫߸ ߓߎߤߊߙߌ߫ ߦߋ߫ ߖߊߟߌߞߦߊߟߊ ߟߋ߬ ߘߌ߫، ߓߊߏ߬߸ ߞߏ߫ ߞߊ߲ߕߌ߮ ߡߍߍ߲ ߛߎߥߊ߲ߘߌߣߍ߲߫ ߓߍ߯ߦߊ ߞߣߐ߫߸ ߏ߬ ߞߙߊߖߏ߯ ߕߴߊ߬ ߟߊ߫ ߝߋߎ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
