ߞߊ߬ߙߊ߲߬ߕߊ߬ ߘߟߊ߬ߞߊ ߟߋ߬ ߞߍ߫ ߘߊ߫ ߛߌߕߊߞߙߎ߫ ߞߌ߲߬ߘߊ ߟߊ߫ ߓߌ߬߸ ߘߎ߲߬ߘߎ߬ߡߊ߬ ߞߊߙߊ߲ߕߊ߫ ߡߎߙߊߓߡߊ߬ ߞߋߕߊ߬ ߘߊ ߟߊߞߊ߬ ߘߊ߫ ߞߵߊ߬ ߓߌ߬ߟߊ߬ ߘߋ߲ߓߊߕߌ߮ ߟߎ߬ ߣߌ߫ ߞߊ߬ߙߊ߲߬ߘߋ߲ ߠߎ߬ ߛߊ߬ߥߏ߬ ߘߐ߫߸ ߡߍ߲ ߞߍ߫ ߘߊ߫ ߞߊ߲ߞߊ߲߫ ߟߞߊ߬ߙߊ߲߬ߠߌ߲ ߞߏߟߊߕߍ߮ ߟߎ߬ ߢߣߊ߫.
ߞߊ߯ߙߌ ߣߌ߲߬ ߡߊ߬߸ ߂߀߂߅ ߞߏ߲ߓߌߕߌ߮ ߕߟߋ߬ ߅߸ ߖߊ߲߬ߖߏ߲߬ߓߊ߫ ߟߋ߬ ߕߎ߲߬ ߦߋ߫ ߛߋ߲߬ߠߊ߫ ߛߌߕߊߞߙߎ߫: ߣߊߟߌ߬ߡߎ߲߫ ߘߎ߲߬ߘߎ߬ߡߊ߬ ߞߊߙߊ߲ߕߊ߫ ߡߎߙߊߓߡߊ߬ ߞߋߕߊ߬ ߘߊ ߟߊߞߊ߭ ߘߌ߫، ߢߌ߬ߣߊ߬ ߞߍߣߍ߲߫ ߠߋ߬ ߛߌߕߊߞߙߎ߫ ߞߐ߫ ߞߏ߫ ߛߌߦߊߡߊ߲߫ ߘߐ߫߸ ߏ߬ ߟߋ ߞߏߛߐ߲߬ ߞߊ߬ߙߊ߲߬ߕߊ ߢߌ߲߬ ߠߋ߬ ߞߍߣߍ߲߫ ߞߊ߬ߙߊ߲߬ߕߓߊ߬ ߝߟߐ ߘߌ߫ ߝߊ߲߬ ߞߣߐ ߏ߬ ߘߐ߫ ߦߋ߲߬߸ ߖߡߊ߬ߣߊ߬ߘߋ߲ ߠߎ߬ ߖߍ߬ߘߍ ߟߊ߫ ߘߐ߬ߖߊ ߟߊ߫ ߞߊ߬ ߘߏ߫ ߓߐ߫ ߞߎ߲߬ߝߌ߲߬ߧߊ ߟߊ߫߸ ߞߊ߬ ߟߐ߲ߠߌ߲ ߛߌߟߊ ߟߊߞߊ߬.
ߖߊ߲߬ߖߏ߲ ߘߊߡߌ߬ߣߊ߬ ߘߊ߫ ߛߘߊߞߊߓߐ ߟߋ߬ ߝߟߐ߫ ߡߊ߬ ߡߎߣߎ߲߬߸ ߞߵߊ߬ ߓߍ߲߬ ߛߌ߰ ߦߙߐ ߟߊ߲߬ߘߊ߬ ߟߊ߬ߕߋߟߋ߲ ߠߎ߬ ߡߊ߬߸ ߢߍߓߊ߮ ߟߎ߬ ߢߊ ߕߘߍ߬ ߜߍ ߘߐ߫߸ ߒߞߏ ߛߍ߬ߘߏ߲߬ߠߊ ߟߎ߬߸ ߞߵߏ߬ ߟߊ߫ ߟߞߊ߬ߙߊ߲߬ߠߌ߲ ߞߏߟߊߕߍ߮ ߟߎ߫ ߞߊ߲߬߸ ߡߌߛߌ߬ߙߊ߲߬ ߛߌߕߊߞߙߎ߫ ߞߌ߲߬ߕߌ߮ ߕߍ߬ߘߍ߫ ߦߋ߲߬߸ ߊ߬ ߣߌ߫ ߘߋ߲ߓߊߕߌ߯ ߛߌߦߊߡߊ߲߫.
ߛߊߟߌߥߎ߬ ߖߊ߬ߞߌ߬ߕߋ߬ ߟߊ߫ ߓߋߟߋ߲ߠߊ ߘߐ߫߸ ߊ߬ߟߋ ߡߍ߲ ߦߋ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߞߏߟߊߕߍ߮ ߘߏ߫ ߘߌ߫߸ ߊ߬ ߞߵߊ߬ ߟߊ߫ ߛߍߥߊ ߦߌ߬ߘߊ߫ ߣߌ߲߬ ߞߏ ߘߐ߫ ߞߏߛߓߍ߫، ߞߊ߬ ߓߊ߲߫ ߞߊ߬ ߘߋ߲ߓߊߕߌ߮ ߟߎ߬ ߞߟߌ߫ ߞߏ߫ ߊ߬ߟߎ߬ ߦߴߊ߬ߟߎ߬ ߟߊ߫ ߟߊߒߠߦߊ ߟߊ߫ ߞߊ߬ߙߊ߲߬ߕߊ ߣߌ߲߬ ߘߐ߫: <<ߊ߲ ߣߐ߬ ߡߐ߰ ߟߎ߫ ߟߋ߬ ߕߊ߬ ߟߊ߫߸ ߟߐ߲ߠߌ߲ ߦߋ߫ ߡߍ߲ ߠߎ߬ ߟߊ߫߸ ߡߍ߲ ߠߎ߬ ߜߎ ߘߌ߫ ߛߋ߫߸ ߊ߬ߟߎ߫ ߘߏ߲߬ ߦߴߊ߬ ߦߙߐ ߟߋ߬ ߝߣߊ߫ ߘߐ߫߸ ߡߍ߲ ߛߊߣߌ߲ߡߊ߲߫߸ ߞߊ߬ߙߊ߲ ߛߌߟߊ ߓߍ߯ ߟߊߞߊ߬ߣߍ߲߬.>>
ߞߊ߬ߙߊ߲߬ߕߊ ߣߌ߲߬ ߞߣߐ߫߸ ߞߊ߬ߙߊ߲ ߦߋ߫ ߥߊ߫ ߟߊ߫ ߛߌߟߊ߫ ߝߌ߬ߟߊ߫ ߟߋ߬ ߞߊ߲߬: ߝߘߏ߬ߓߊ߬ ߢߍߥߟߊ ߟߎ߬ ߦߋ߫ ߞߍ߫ ߟߊ߫ ߝߊ߬ߙߊ߲߬ߛߌ ߘߐ߫߸ ߊ߬ ߣߌ߫ ߡߍ߲ ߠߎ߬ ߝߣߊ߫ ߦߴߊ߬ ߝߍ߬ ߞߊ߬ ߒߞߏ ߣߌ߫ ߝߊ߬ߙߊ߲߬ߛߌ ߞߍ߫߸ ߛߌߟߊ ߦߴߏ߬ ߟߎ߬ ߝߣߊ߫ ߓߟߏ߫، ߢߌ߬ߣߊ߲߫ ߛߊ߲߭ ߢߌ߲߬ ߠߊ߫߸ ߞߊ߬ߙߊ߲߬ߓߏ߲߫ ߂߄ ߘߐ߫߸ ߁߆ ߟߋ߬ ߟߊߓߊ߯ߙߊߕߐ߫، ߢߍ߲߯ ߂߄ ߘߐ߫߸ ߈ ߠߋ߬ ߟߊߊߓߊ߯ߙߊߕߐ߫߸ ߞߵߏ߬ ߟߊ߫ ߡߊ߬ߡߙߊ߬ߟߌ߬ ߛߓߍߘߊ߫ ߝߌ߬ߟߊ߬ ߝߣߊ߫ ߞߊ߲߬.
ߡߎߛߊ߫ ߞߋߕߊ߬ ߡߍ߲ ߦߋ߫ ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߓߊ߮ ߘߌ߫߸ ߏ߬ ߞߊ߬ ߓߍ߯ ߟߊ߫ ߛߓߍ߬ߘߏ߲ ߠߋ߬ ߕߐ߬ߣߐ ߦߌ߬ߘߊ߬: <<ߊ߲ ߕߍ߫ ߞߊ߬ߙߊ߲߬ߕߊ ߘߟߊߞߊ߬ ߟߊ߫ ߞߵߊ߬ ߘߊߕߎ߲߯ ߞߊߙߏ߫ ߘߊ߲ߘߐ߫ ߞߘߐ߫ ߕߋ߲߬ ߌߞߘߐ߫، ߣߌ߫ ߘߋ߲ߓߊߕߌ߮ ߟߎ߬ ߡߴߊ߬ߟߎ߬ ߘߋ߲ ߠߎ߬ ߟߊߘߏ߲߬߸ ߘߋ߲ߣߍ߲ ߠߎ߬ ߡߊ߫ ߣߊ߬ ߞߊ߬ߙߊ߲߬ ߦߙߐ߸ ߦߴߊ߬ ߟߐ߲߫ ߞߊ߬ߙߊ߲߬ߕߊ ߘߌ߫ ߘߊߕߎ߲߯ ߘߋ߬.>> ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߍߣߊ߬ ߜߋ߬ߟߎ߲߬ߠߌ߲߬ ߞߙߎ ߘߏ߫ ߟߎ߫ ߟߊߥߟߌ߬߸ ߡߍ߲ ߠߎ߬ ߘߌߣߵߊ߬ߟߎ߬ ߢߊ ߡߊߖߌ߰ ߞߊ߬ߙߊ߲߬ߕߊ ߣߌ߲߬ ߞߘߐ߫߸ ߞߵߊ߬ ߡߊߝߟߍ߫ ߣߌ߫ ߞߏ ߟߎ߬ ߦߴߊ߬ ߢߊ ߡߊ߬.
ߛߌߕߊߞߙߎ߫ ߞߌ߲߬ߕߌ߮߸ ߓߊ߲߬ߞߊߟߌ߬ ߡߍ߲ߘߌߦߊ߫ ߡߊ߬ߙߊ ߞߵߊ߬ ߟߊ߫ ߛߍߥߊ ߟߋ߬ ߦߌ߬ߘߊ: <<ߛߌߕߊߞߙߎ߫ ߦߋ߫ ߞߌ߲߬ߘߊ߫ ߟߋ߬ ߘߌ߫߸ ߝߋ߲ ߓߍ߯ ߞߏߖߊ ߦߋ߫ ߡߍ߲ ߠߊ߫، ߞߊ߬ߙߊ߲߬ߓߏ߲߬ ߕߍ߫ ߛߌߕߊߞߙߎ߫ ߓߟߏ߫߸ ߖߌ߫ ߕߴߊ߲ ߓߟߏ߫߸ ߢߎߡߍ߫ ߕߴߊ߲ ߓߟߏ߫߸ ߛߌߟߊ߫ ߕߴߊ߲ ߓߟߏ߫، ߣߌ߫ ߡߐ߬ ߞߵߌ ߡߙߌ߫ ߊ߬ ߡߊ߬ ߞߊ߬ ߣߊ߬ ߓߊ߯ߙߊ߫ ߛߎ߮ ߣߌ߲߬ ߞߍ߫ ߊ߲ ߠߊ߫ ߞߌ߲߬ߘߊ ߞߣߐ߫ ߥߊ߯ߕߌ ߏ߬ ߟߊ߫߸ ߏ߬ ߛߍߥߊ ߘߊ߲߭߸ ߊߟߊ߫ ߟߋ߬ ߞߵߏ߬ ߟߐ߲߫، (…) ߘߋ߲ ߠߎ߬ ߦߴߊ߲ ߓߟߏ߫ ߝߴߊ߲ ߓߊ߯ ߞߎߘߍ߫ ߦߙߌߞߊ ߕߊ߯ߡߊ߫ ߞߊ߬ ߥߊ߫ ߘߋ߲ ߠߎ߬ ߘߌ߫ ߞߊ߬ߙߊ߲߬ߕߊ ߟߊ߫.>>
ߓߊߛߓߊ߬ߕߌ߫ ߛߘߌ߬ߓߋ߬ ߡߍ߲ ߦߋ߫ ߡߎߙߊߓߡߊ߬ ߞߋߕߊ߬ ߞߊ߬ߙߊ߲߬ߕߊ ߣߌ߲߬ ߝߘߏ߬ߓߊ߬ ߗߋߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߖߊ߬ߡߊ ߡߊߥߟߋ߫ ߞߎ߲ ߊ߲ ߠߊ߫ ߞߊ߬ߙߊ߲߬ߕߊ ߢߌ߲߬ ߠߊ߫ ߓߌ߬߸ ߊ߬ ߞߎ߲߭ ߦߋ߫ ߞߏ߫ ߝߌ߬ߟߊ߫ ߟߋ߬ ߘߌ߫: ߊ߬ ߝߟߐߡߊ߸ ߞߊ߬ ߞߊ߬ߙߊ߲߬ ߦߙߐ ߛߘߊߞߊ ߓߐ߫، ߊ߬ ߝߌߟߊߣߊ߲߸ ߞߵߊ߬ ߘߊ ߟߊߞߊ߬ ߞߵߊ߬ ߦߌ߬ߘߊ߬ ߖߊ߬ߡߊ ߟߊ߫ ߞߵߊ߬ ߝߐ߫ ߞߏ߫ ߞߊ߬ߙߊ߲ ߘߌ߫ ߘߊߡߌ߬ߣߊ߬ ߊ߲ ߠߊ߫ ߞߊ߬ߙߊ߲߬ߕߊ ߢߌ߲߬ ߠߊ߫ ߢߌ߬ߣߊ߲߬.>> ߊ߬ ߞߵߊ߬ ߦߌ߬ߘߊ߬ ߞߏ߫ ߞߊ߬ߙߊ߲ ߓߍߣߊ߬߬ ߘߊߡߌ߬ߣߊ߬߸ ߞߵߊ߬ ߕߊ߬ ߞߊ߬ߙߊ߲߬ߓߏ߲ ߝߟߐߡߊ ߟߋ߬ ߡߊ߬ ߤߊ߲߯ ߉߲߸ ߘߊ߲߬ ߞߍߕߐ߫ ߦߋ߲߬ ߠߋ߬ ߢߌ߬ߣߊ߲߬ ߡߎߣߎ߲߬.
ߞߎ߲߬ߘߏ߲ ߘߐ߫߸ ߜߋ߬ߟߎ߲߬ߠߌ߲߬ߠߊ ߡߎߛߊ߫ ߞߋߕߊ߬ ߞߊ߬ ߖߎ߬ߟߎ ߘߐߕߍ߰߸ ߞߵߏ߬ ߞߍ߫ ߞߊ߬ߙߊ߲߬ߕߊ ߘߊ ߟߊߞߊ߬ߣߍ߲ ߘߌ߫ ߝߛߊߦߌ߫، ߞߣߊ߬ߕߏ߫ ߘߏ߲߬ ߠߊ߫ ߞߊ߬ߙߊ߲߬ߓߏ߲ ߞߋߟߋ߲߫ ߞߣߐ߫߸ ߞߊ߬ ߕߎ߬ߡߊ߬ߘߊ ߛߓߍ߫ ߥߊ߬ߟߊ ߟߊ߫߸ ߖߊ߬ߡߊ ߟߊ߫ ߕߍ߯ߜߊߛߌ ߞߣߐߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
