ߡߙߊ߬ߒ߬ߡߊ߬ߟߌ ߡߍ߲ ߞߍ߫ ߘߊ߫ ߂߀߂߃ ߞߏ߲ߓߌߕߌ߮ ߕߟߋ߬ ߇ ߡߊ߬߸ ߏ߬ ߛߊ߲߭ ߝߌ߬ߟߊ ߟߋ߬ ߕߋ߲߬، ߟߏ߲ ߏ߬ ߕߴߛߋ߫ ߓߐ߫ ߟߊ߫ ߘߎߢߊ߫ ߦߟߌ߫ ߟߊ߫߸ ߞߵߏ߬ ߞߎ߲߭ ߞߍ߫ ߡߊ߲߬ߞߊ߲߬ߓߊ ߘߏ߫ ߥߌ߬ߟߌ ߘߌ߫ ߟߏ߲ ߏ߬ ߡߊ߬ ߌߛߌ߬ߙߊ߬ߌߟߊ߫ ߣߌ߫ ߔߊߟߍߛߑߕߌߣߌ߲߬ ߕߍ߫߸ ߡߍ߲ ߛߎߡߊߣߍ߲߫ ߕߍ߫ ߤߊ߲߯ ߕߋ߲߬.
߂߀߂߃ ߞߏ߲ߓߌߕߌ߮ ߕߟߋ߬ ߇ ߟߋ߬ ߡߊ߬߸ ߤߡߊߛ ߣߌ߫ ߡߙߊ߬ߒ߬ߡߊ߬ߝߋ߲߬ ߕߌ߰ ߞߙߎ ߘߏ߫ ߟߎ߫ ߕߊ߯ ߘߊ߫ ߗߍߒߞߊ߲ߠߌ߲ ߠߊ߫ ߜ߭ߊ߯ߖ߭ߊ߬ ߞߣߐ߫߸ ߌߛߌ߬ߙߊ߬ߌߟߊ߫ ߖߡߊ߬ߣߊ ߞߊ߲ߡߊ߬߸ ߞߊ߬ ߝߊ߰ߟߌ߬ ߛߌߦߊߡߊ߲߫ ߞߍ߫ ߦߋ߲߬߸ ߞߊ߬ ߡߐ߱ ߘߏ߫ ߡߌ߬ߘߊ߫ ߕߏ߬ߟߌ߬ߡߊ߬ߛߌ߮ ߘߌ߫߸ ߏ߬ ߟߋ ߞߍߣߍ߲߫ ߞߍ߬ߟߍ ߥߟߌ߬ ߢߊ ߘߌ߫ ߡߎ߬ߕߎ߲߬ ߛߊ߫߸ ߖߋߟߌ߫ ߞߘߐ߫ ߘߐߜߊ ߘߌ߫: ߝߏ߫ ߡߐ߰ ߁ ߂߀߀ ߓߘߊ߫ ߝߊ߰ ߌߛߌ߬ߙߊ߬ߌߟߊ߫ ߟߊ߫ ߡߐ߱ ߟߎ߬ ߘߐ߫ ߕߋ߲߬߸ ߞߊ߬ ߡߐ߱ ߥߊ߯ ߓߌ߫ ߦߙߌߞߊ߫ ߝߊ߰ ߔߊߟߍߛߑߕߌߣߌ߲ߞߊ ߟߎ߬ ߘߐ߫.
ߞߍ߬ߟߍ ߛߊ߲߭ ߝߌ߬ߟߊ ߣߌ߲߬ ߡߊ߬߸ ߖߡߊ߬ߣߊ߬ ߛߌߦߊߡߊ߲߫ ߓߘߊ߫ ߞߎߡߊ߫، ߓߊߏ߬߸ ߡߊ߲߬ߛߟߊ߬ ߟߊߘߍ߬ߣߍ߲ ߓߘߊ߫ ߞߎߡߊ߫߸ ߏ߬ ߟߎ߬ ߟߊ߫ ߞߏߕߌ߯ ߝߟߐ ߞߊߦߌߙ ߛߑߕߊߙߡߍߙ ߞߊ߲߫ ߞߏ߫ ߊ߬ߟߎ߬ ߛߌߟߊ߲ߣߍ߲߫ ߡߐ߰ ߟߎ߬ ߟߊ߫ ߞߏ ߘߌ߫߸ ߡߍ߲ ߠߎ߬ ߦߋ߫ ߓߐ߫ ߟߊ߫ ߔߊߞߌߛߦߊ ߘߌ߫ ߛߐ߲߬ ߔߊߟߍߛߑߕߌߣߌ߲߬ ߞߐߡߊߓߌ߲ߓߌ߲߫ ߞߊ߲ߡߊ߬، ߓߊߏ߬߸ ߏ߬ ߝߊ߲߬ߓߊ ߦߋ߫ ߟߊߓߊ߲߫ ߠߊ߫ ߢߐ߲߯ ߞߟߍ ߟߋ߬ ߡߊ߬.
ߍߛߑߔߊߢߌ߲߬ ߞߣߐ߫߸ ߔߋߘߙߏ ߛߊ߲ߛߋ߫ ߞߊ߲߫ ߞߏ߫ <<ߓߊ߰ߓߊ߰ߟߌ ߞߍߢߊ ߛߎ߮ ߟߋ߬>> ߦߴߌߘߐ߫ ߞߍ߬ߟߍ ߣߌ߲߬ ߘߐ߫߸ ߊ߬ ߣߌ߫ ߞߏ߫ ߝߏ߫ ߞߊ߬ ߞߍ߬ߟߍ ߢߌ߲߬ ߠߊߟߐ߬ ߟߋ߬ ߡߎ߬ߕߎ߲߬߸ ߏ߬ ߟߋ ߘߐ߫ ߞߏ߫ ߊ߬ߟߎ ߡߊ߬ߞߏ ߦߋ߫ ߘߊߘߐߖߊߥߏ ߟߋ߬ ߟߊ߫ ߣߌ߲߬ ߞߏ ߘߐ߫.
ߝߊ߬ߙߊ߲߬ߛߌ߬ ߞߣߐ߫߸ ߋߡߊߣߎ߳ߍߟ ߡߊߞߐߙߐ߲߫ ߞߊ߲߫ ߞߏ߫ ߝߏ߫ ߊ߬ߟߎ߬ ߓߍ߯ ߟߋ߬ ߝߙߊ߬ ߢߐ߲߮ ߞߊ߲߬߸ <<ߞߵߊ߲ ߝߊ߲߬ߞߊ ߟߎ߬ ߞߍ߫ ߞߋߟߋ߲߫ ߘߌ߫.>> ߞߊ߬ ߦߊ߬ߤߎ߰ߘߎ߬ߟߊ߲߬ߜߏ߬ߦߊ ߞߟߍ߬߸ ߞߊ߬ ߛߋ߫ ߖߐ ߟߊߘߏ߲߬ ߠߊ߫، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߝߊ߬ߙߊ߲߬ߛߌ߬ߞߊ߫ ߡߐ߰ ߅߁ ߠߋ߬ ߓߘߊ߫ ߝߊ߰ ߞߵߊ߬ ߕߊ߬ ߞߏ߲ߓߌߕߌ߮ ߕߟߋ߬ ߇ ߡߊ߬ ߂߀߂߃ ߟߊ߫ ߤߊ߲߯ ߕߋ߲߬،
ߌߕߊߟߌ߫ ߞߣߐ߫߸ ߖ߭ߌߦߐߙߑߖ߭ߌߦߊ ߡߋߟߏߣߌ߫ ߞߊ߲߫ ߞߏ߫ ߝߊ߰ߟߌ ߡߍ߲ ߠߎ߬ ߦߴߌߘߐ߫߸ ߏ߬ ߘߌߡߊ߲߫ ߕߴߊ߬ߟߎ߬ ߦߋ߫، ߌߛߌ߬ߙߊ߬ߌߟߊ߫ ߝߣߊ߫ ߣߐ߬ ߕߊߛߙߊߟߌ ߡߍ߲ ߛߌ߰ ߟߊ߫ ߛߋ߲߬ߠߊ߫ ߞߵߊ߬ ߟߊ߫ ߣߊ߲߬ߕߌ߮ ߟߎ߬ ߟߊߕߊ߯߸ ߏ߬ ߝߣߊ߫ ߓߘߊ߫ ߞߍ߫ ߘߊ߲߬ߠߊ߬ߕߊߡߌ߲ ߘߌ߫ ߡߎ߬ߕߎ߲߬، ߘߏߣߊߟ ߕߑߙߐ߲ߔ ߣߐ߬ ߞߊ߲ ߡߍ߲ ߝߐ߫ ߟߊ߫ ߞߵߊ߬ ߓߍ߲߬ ߞߍ߬ߟߍ ߟߊߟߐ߬ ߞߏ ߡߊ߬߸ ߊ߬ߟߋ ߦߴߏ߬ ߟߋ ߞߐߡߊߓߌ߲ߓߌ߲߫ ߠߊ߫.
ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߝߘߏ߬ߓߊ߬ ߞߟߊ߬ߕߌ߮ ߊ߲ߕߏߣߌߦߏ ߜ߭ߎߕߋߙߍߛ ߣߐ߬ ߞߟߌߟߌ ߞߍ߫ ߟߊ߫ ߥߊ߬ߥߎߟߋ ߟߊߟߐ߭ ߟߋ߬ ߡߊ߬ ߌߞߘߐߣߌ߲߬߸ ߞߊ߬ ߓߟߏߓߐ߫ ߕߏ߬ߟߊ߬ߡߊߛߌ߰ߣߍ߲ ߠߎ߬ ߘߐ߫߸ ߓߊߏ߬ ߜߊ߬ߟߏ ߓߘߊ߫ ߟߊ߫ ߊߘߡߊߦߊ ߞߊ߲߬ ߦߙߐ ߏ߬ ߟߎ߬ ߘߐ߫ ߕߋ߲߬ ߞߏߛߓߍ߫.
ߕߙߎߞߌ߫ ߞߣߐ߫߸ ߖߡߊ߬ߣߊ ߏ߬ ߣߐ߬ ߔߊߟߍߛߑߕߌߣߌ߲߬ ߖߏ߲߬ߖߏ߲ ߠߋ߬ ߟߊߦߟߍ߬ ߟߊ߫ ߜ߭ߟߊߕߊ߫߸ ߌߛߑߕߊ߲ߓߎߟ ߞߣߐ߫߸ ߞߵߏ߬ ߞߍ߫ ߔߊߟߍߛߑߕߌߣߌ߲߬ ߞߐߡߊߓߌ߲ߓߌ߲ ߣߴߊ߬ ߘߍ߬ߡߍ߲ ߕߐ߰ߡߊ߬ߛߙߋ ߘߌ߫.
ߌߛߌ߬ߙߊ߬ߌߟߊ߫ ߝߊ߲߭ ߝߍ߬߸ ߡߐ߰ ߁ ߂߁߉ ߟߋ߬ ߓߘߊ߫ ߝߊ߰ ߞߍ߬ߟߍ ߘߊߡߌ߬ߣߊ ߣߌ߫ ߛߌߛߍ߲߬ ߕߍ߫߸ ߡߍ߲ ߝߊ߲߬ߓߊ ߦߋ߫ ߣߊ߲߬ߒ߬ߕߊ߲ ߠߎ߬ ߘߌ߫߸ ߡߐ߰ ߂߅߁ ߦߋߣߍ߲߫ ߕߍ߫ ߡߎߣߎ߲߬߸ ߏ߬ ߟߎ߫ ߖߊ߬ߛߏ߲߬ߣߍ߲߫ ߠߋ߬߸ ߡߐ߰ ߄߇ ߦߴߏ߬ ߟߎ߬ ߘߐ߫߸ ߏ߬ ߟߎ߬ ߦߋ߫ ߓߟߏߘߐ߫ ߟߋ߬ ߕߏ߬ߟߌ߬ߡߊ߬ߛߌ߰ ߓߟߏ ߡߊ߬. ߏ߬ ߝߘߊ߫ ߘߊ߫ ߥߞߌߔߋߘߌߦߊ ߣߌ߫ ߝߐ߰ߓߍ߬ߘߊ߬ ߜߘߍ߫ ߟߎ߫ ߟߋ߬ ߟߊ߫ ߒ߬ ߠߊ߫ ߕߌߙߌ߲ߠߌ߲ ߞߣߐ߫ ߦߟߌߡߊߛߙߋ ߘߌ߫.
ߔߊߟߍߛߑߕߌߣߌ߲߬ ߝߊ߲߭ ߝߍ߬߸ ߌߛߌ߬ߙߊ߬ߌߟߊ߫ ߟߊ߫ ߜߊ߬ߟߏ߬ߡߊ߬ߦߌߘߊ ߣߌ߲߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߡߐ߰ ߆߇ ߁߆߀ ߝߊ߰ ߜ߭ߊ߯ߖ߭ߊ߬ ߞߣߐ߫߸ ߞߊ߬ ߝߘߊ߫ ߦߋ߲߬ ߜߋߙߋ߲ߜߋߙߋ߲ߧߊ ߞߏߕߌ߯ߘߊ ߟߊ߫߸ ߡߊ߲߬ߕߏ߲߬ ߠߊߘߍ߬ߣߍ߲ ߦߴߏ߬ ߟߎ߬ ߟߊ߫ ߖߊ߬ߕߋ ߏ߬ ߟߋ ߟߊߓߊ߯ߙߊ߫ ߟߊ߫ ߦߟߌߡߊߛߙߋ ߘߌ߫. ߏ߬ ߝߣߊ߫ ߕߐ߬ߡߐ߲߬ ߘߴߊ߲ ߓߟߏ߫ ߥߞߌߔߋߘߌߦߊ ߟߋ߬ ߞߊ߲߬߸ ߊ߬ ߣߌ߫ ߙߋߎ߳ߕߍߙ ߣߌ߫ ߦߙߐ߫ ߜߘߍ߫ ߟߎ߫ ߘߐ߫.
ߊߟߎ߫ ߓߘߴߊ߬ ߦߋ߫ ߡߎ߬ߕߎ߲߬߸ ߞߎߡߟߊ ߘߏ߫ ߟߎ߫ ߦߋ߫ ߌߛߌ߬ߙߊ߬ߌߟߊ߫ ߟߋ߬ ߞߐߡߊߓߌ߲ߓߌ߲߫ ߠߊ߫߸ ߏ߫ ߟߎ߫ ߦߋ߫ ߔߊߟߍߛߑߕߌߣߌ߲߬ ߞߐߡߊߓߌ߲ߓߌ߲߫ ߠߊ߫߸ ߘߏ߫ ߟߎ߫ ߡߊ߬ߞߏ ߦߋ߫ ߡߍ߲ ߠߊ߫ ߡߎ߬ߕߎ߲߬߸ ߏ߬ ߟߋ ߖߐ ߟߊߘߏ߲߭ ߘߌ߫߸ ߞߊ߬ ߘߎߢߊ߫ ߘߐߛߎߡߊ߫.
ߣߴߊߟߎ߫ ߞߵߊ߬ ߡߊߝߟߍ߫߸ ߞߏ ߘߏ߫ ߟߎ߫ ߟߋ߬ ߞߊ߬ ߞߏ߲ߓߌߕߌ߮ ߕߟߋ߬ ߇ ߞߍ߬ߟߍ ߣߌ߲߬ ߛߓߊߓߎߦߊ߫߸ ߏ߬ ߡߍ߲ ߓߐߛߎ߲߫ ߖߐ߲ߖߐ߲ ߞߣߐ ߘߎ߲߬ߡߊ߲߬ ߞߊߕߌ߫ ߞߵߊ߬ ߓߍ߲߬ ߌߛߌ߬ߙߊ߬ߌߟߊ߫ ߣߌ߫ ߔߊߟߍߛߑߕߌߣߌ߲߬ ߕߍ߫ ߞߟߍ ߡߊ߬߸ ߡߍ߲ ߘߌ߫ ߝߊ߯ߘߐߞߍ߫ ߞߋߟߋ߲߫ ߓߐ߫.
ߦߊ߬ߤߎ߰ߘߌ߬ߦߊ߬ ߞߏ ߟߋ߬ ߞߍ߬ߟߍ ߦߋ߫ ߣߌ߲߬ ߘߌ߫ ߞߊ߬ߦߌ߯ ߝߊ߯ߘߐߞߍ߫ ߁߉߲ ߟߊߓߊ߲ ߠߊ߫߸ ߡߍ߲ ߠߎ߬ ߞߵߊ߬ ߦߌ߬ߘߊ߬ ߞߏ߫ ߝߏ߫ ߊ߬ߟߎ߬ ߓߊ߯ ߦߊ߬ߤߎ߰ߘߌߦߊ ߟߎ߬ ߓߘߊ ߟߊߘߊ߲߫ ߔߊߟߍߛߑߕߌߣߌ߲߬ ߞߣߐ߫߸ ߏ߬ ߟߋ ߞߍߣߍ߲߫ ߦߊ߬ߤߎ߰ߘߌߦߊ ߟߎ߫ ߥߎ߲߬ߝߊ߲߬ ߢߊ ߘߌ߫ ߞߊ߬ ߔߊߟߍߛߑߕߌߣߌ߲߬ ߡߊߜߍ߲߫߸ ߊߙߊߓߎ ߟߎ߫ ߞߵߏ߬ ߡߍ߲ ߦߋ߫ ߖߐ߬ߘߐ ߘߴߊ߬ߟߎ߬ ߞߊ߲ߞߊ߲߬ ߞߊ߬ߣߌ߲߬.
߁߉߁߇ ߟߋ߬ ߟߊ߫߸ ߡߊ߲߬ߛߟߊ߬ ߟߊߘߍ߬ߣߍ߲ ߞߊ߬ ߟߊ߬ߥߊ߲߬ߞߊ߲߬ߠߌ߲ ߘߏ߫ ߞߍ߫ ߓߊߟߑߝߎߙ߸ ߞߵߏ߬ ߞߍ߫ ߦߊ߬ߤߎ߰ߘߎ ߟߎ߬ ߡߊߘߍ߬ߡߍ߲ ߘߌ߫ ߞߵߊ߬ߟߎ߬ ߞߐߡߊߓߌ߲ߓߌ߲߫ ߊ߬ߟߎ߬ ߘߊ߯ߡߊߞߍ ߘߐ߫ ߔߊߟߍߛߑߕߌߣߌ߲߬ ߞߣߐ߫߸ ߞߊ߬ ߢߌ߬ߣߊ߬ ߦߋ߲߬ ߟߊ߲߬ߔߊ߰ߛߌ ߟߎ߬ ߟߎ߬ ߤߊߞߍ ߞߐ߫߸ ߣߊߟߌ߬ߡߎ߲߬ ߊߙߊߓߎ ߟߎ߬ ߘߌ߫.
ߖߊ߯ߓߊ ߞߟߍ߬ ߝߌߟߊߣߊ߲ ߠߋ߬ ߞߐߝߍ߬߸ ߊ߬ ߣߌ߫ ߤߟߏߞߐߛߕ ߞߍ߬ߟߍ ߞߐߝߍ߬߸ ߦߊ߬ߤߎ߰ߘߎ ߟߎ߫ ߞߵߊ߬ ߦߌ߬ߘߊ߬ ߞߏ߫ ߝߏ߫ ߊ߬ߟߎ߬ ߓߊ߯ ߦߋ߲߬ ߞߍ߫ ߊ߬ߟߎ߬ ߟߊ߫ ߞߊ߬ߝߏ ߘߌ߫، ߁߉߄߇ ߟߊ߫߸ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߞߊ߬ ߘߐ߬ߕߟߊ߬ߟߌ ߝߊ߲߬ߝߘߊ ߘߏ߫ ߡߊߗߍ߲߬߸ ߞߊ߬ ߞߊ߬ߝߏ߫ ߝߌ߬ߟߊ߬ ߟߊߘߊ߲߫߸ ߞߋߟߋ߲ ߦߋ߫ ߊߙߊߓߎ߫ ߞߊߝߏ ߘߌ߫߸ ߊ߬ ߕߐ߬ ߞߋߟߋ߲ ߦߋ߫ ߦߊ߬ߤߎ߰ߘߎ߬ ߞߊߝߏ ߘߌ߫، ߦߊ߬ߤߎ߰ߘߎ߬ ߞߎ߲ߕߌ߮ ߟߎ߫ ߓߍ߲߬ ߘߴߏ߬ ߡߊ߬ ߝߛߊߦߌ߫߸ ߓߊ߬ߙߌ߬ ߊߙߊߓߎ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߊ߫ ߓߍ߲߬ ߏ߬ ߡߊ߬߸ ߏ߬ ߟߋ ߞߍ߫ ߘߊ߫ ߞߍ߬ߟߍ ߘߏ߫ ߟߊߥߌ߬ߟߌ ߛߓߊߓߎ ߘߌ߫ ߦߋ߲߬ ߁߉߄߈ ߠߊ߫، ߣߊߞߑߓߊ߫ ߞߍ߬ߟߍ ߏ߬ ߟߋ ߛߋ߲߭ߝߍ߬ ߁߉߄߈ ߠߊ߫߸ ߔߊߟߍߛߑߕߌߣߌ߲ߞߊ߫ ߡߐ߰ ߇߀߀ ߀߀߀ ߝߎ߲ߘߌ߫ ߘߊ߫ ߞߊ߬ ߥߴߊ߬ߟߎ߫ ߞߎ߲߭ߞߊ߬ߙߌ߬ߝߊ߬.
߁߉߆߇ ߞߍ߬ߟߍ ߝߍ߬߸ ߌߛߌ߬ߙߊ߬ߌߟߊ߫ ߞߊ߬ ߛߌߛߑߖ߭ߐߙߑߘߊߣߌ߫ ߡߌ߬ߣߊ߬߸ ߞߊ߬ ߜ߭ߊ߯ߖ߭ߊ߬ ߡߌ߬ߣߊ߬߸ ߊ߬ ߣߌ߫ ߖ߭ߋߙߎߛߊ߬ߟߍߡ ߕߟߋ߬ߓߐ، ߞߍ߬ߟߍ ߦߋ߫ ߘߌ߲߬ߞߌߙߊ ߏ߬ ߟߎ߫ ߟߋ߬ ߝߍ߬ ߡߎߣߎ߲߬ ߤߊ߲߯ ߕߋ߲߬.
ߒ߬ߓߊ߬߸ ߂߀߂߃ ߞߏ߲ߓߌߕߌ߮ ߕߟߋ߬ ߇ ߞߍ߬ߟߍ ߡߍ߲ ߥߟߌ߬ ߘߊ߫ ߣߌ߲߬ ߛߊ߫߸ ߤߡߊߛ ߞߵߊ߬ ߘߊ߬ߟߎ ߝߐ߫ ߞߍ߬ߟߍ ߟߊߥߌ߬ߟߌ ߘߐ߫߸ ߞߏ߫ ߌߛߌ߬ߙߊ߬ߌߟߊ߫ ߓߘߊ߫ ߘߊ߲߬ߠߊ߬ߕߊߡߌ߲ ߞߍ߫߸ ߊ߬ߟߎ߬ ߦߋ߫ ߕߊ߬ߡߌ߲߬ ߠߊ߫ ߜ߭ߊ߯ߖ߭ߊ߬ ߡߌ߬ߣߊ߬ ߟߊ߫ ߕߎ߲߫߸ ߞߊ߬ ߕߊ߬ߡߌ߲߬ ߊ߬ߟߎ߫ ߣߌ߭ ߟߊߥߙߊ߬ ߟߊ߫ ߛߌߛߑߖ߭ߐߙߑߘߊߣߌ߫߸ ߞߊ߬ ߜߊ߬ߟߏ ߟߊ߫ ߔߊߟߍߛߑߕߌߣߌ߲ߞߊ ߟߎ߫ ߞߊ߲߬ ߦߋ߲߬߸ ߞߵߊ߬ߟߎ߬ ߞߍ߫ ߖ߭ߋߙߎߛߊ߬ߟߍߡߎ߲߬ ߞߊ߲߬߸ ߘߎߢߊ߫ ߘߏ߲߬ ߢߊ ߓߍ߲߬ߣߴߊ߬ ߡߊ߬ ߡߐ߰ ߕߍ߫ ߝߋ߲߫ ߝߐ߫ ߟߊ߫.
ߏ߬ ߟߋ ߘߐ߫߸ ߞߏ߲ߓߌߕߌ߮ ߕߟߋ߬ ߇ ߡߊ߬߸ ߊ߬ߟߎ߬ ߝߣߊ߫ ߥߟߌ߬ ߘߊ߫߸ ߞߊ߬ ߓߎ߰ߓߎ߰ߡߊ߬ߟߊ߲߬ ߥߊ߯ ߦߙߌߞߊ߫ ߕߊ߬߸ ߞߊ߬ ߡߐ߱ ߟߎ߬ ߟߛߊߙߌ߫ ߘߎ߱ ߟߎ߬ ߞߣߐ߫߸ ߞߊ߬ ߣߊ߲߬ߒ߬ߕߊ߲ ߠߎ߬ ߛߎߡߊ߲߫ ߖߐ߲ߖߐ߲ ߞߍ߫߸ ߡߐ߰ ߛߌ߫ ߦߋ߫ ߜ߭ߊ߯ߖ߭ߊ߬ ߞߣߐ߫ ߣߴߊ߬ ߣߌ߫ ߌߛߌ߬ߙߊ߬ߌߟߊ߫ ߛߎ߬ߘߎ߲߬ߡߊ߲߬ ߞߵߊ߬ߟߎ߬ ߕߍ߯ ߞߍ ߘߊߡߌ߬ߣߊ߫ ߏ߬ ߟߎ߬ ߓߍ߯ ߘߐ߫߸ ߞߊ߬ ߡߐ߱ ߘߏ߫ ߟߎ߫ ߖߊ߬ߛߏ߲߬.
ߏ߫߬ ߟߋ ߖߍ߬ߘߍ ߞߏߛߐ߲߬߸ ߟߊ߬ߞߙߐ߬ߛߟߌ߬ߟߊ ߘߏ߫ ߟߎ߫ ߞߊ߲߫ ߠߋ߬ ߞߏ߫ ߌߛߌ߬ߙߊ߬ߌߟߊ߫ ߟߊ߫ ߟߊ߬ߛߏ߬ߓߌ߬ߟߌ ߟߋ߬ ߝߊ߲߬ߞߊ ߘߐ߯ߦߊ߫ ߘߊ߫ ߣߌ߲߬ ߞߏ ߘߐ߫، ߓߊߏ߬߸ ߊ߬ ߣߊ߬ ߘߊ߫ ߟߊߞߙߐ߬ߛߌ߫ ߣߊ߲߬ߕߌ߮ ߟߎ߬ ߟߊ߫ ߞߊ߲߬ߞߎߡߊ ߘߐ߫߸ ߏ߬ ߡߍ߲ ߡߊ߫ ߟߊߛߋ߫ ߖߏߣߊ߫߸ ߞߏ߫ ߊ߬ߟߎ߬ ߡߊ߫ ߛߋ߫ ߕߐ߬ߡߊ߬ߛߙߋ ߟߎ߬ ߡߌ߬ߘߊ߬ ߟߊ߫ ߛߓߍ߬ ߟߊ߫ ߕߎ߬ߡߊ߬ ߖߏߣߊ ߟߊ߫߸ ߊ߬ߟߎ߬ ߜߎ ߡߊ߫ ߛߋ߫ ߛߏ߬ߓߌ߬ ߟߊ߫ ߝߏߦߌ߬ ߡߊ߬ ߡߍ߲ ߘߴߊ߬ ߞߍ߫ ߊ߬ߟߎ߫ ߕߎ߲߬ ߘߌ߫ ߛߴߊ߬ߟߎ߬ ߢߍߕߍ߰ ߟߊ߫.
ߒ߬ߓߊ߬߸ ߊ߲ ߧߋ߫ ߓߌ߬ ߡߍ߲ ߘߐ߫ ߣߌ߲߬߸ ߞߟߍ߬ߟߊ߬ߢߐߢߐ߲ ߠߎ߬ ߦߋ߫ ߞߍ߫ ߟߊ߫ ߕߎ߬ߡߊ ߘߏ߫ ߟߎ߫ ߟߊ߫ ߝߋߎ߫߸ ߓߊ߬ߙߌ߬ ߥߊ߬ߥߎߟߋ ߦߴߌߘߐ߫ ߞߘߊߎ߫߸ ߡߐ߰ ߛߌߦߊߡߊ߲߫ ߠߋ߬ ߣߌ ߓߘߊ߫ ߕߏ߫ ߊ߬ ߘߐ߫߸ ߦߙߐ߫ ߛߌߦߊߡߊ߲߫ ߠߋ߬ ߓߘߊ߫ ߕߋ߬، ߜߟߍ߬ߦߊ ߓߘߊ߫ ߘߏ߲߬߸ ߓߊߟߏ߫ ߞߏߖߊ ߟߎ߬ ߣߌ߫ ߘߎߢߊߘߐߕߍ߮ ߣߐ߰ߦߊ߬ ߞߏ ߟߎ߬ ߜߟߍ߬ߦߊ߸ ߤߊߟߌ߬ ߘߊ߲ߘߊߟߌ߫ ߞߏ ߓߍ߯ ߜߍ߬ߟߍ߲߬ߡߊ߲߬.
ߜ߭ߊ߯ߖ߭ߊ߬ ߞߣߐ߫ ߓߌ߬߸ ߊ߬ ߓߏ߲߫ ߟߐ߬ߣߍ߲ %߆߀ ߓߍ߯ ߘߐߕߌߢߍߣߍ߲߫ ߠߋ߬߸ ߦߙߐ߫ ߁߉߀ ߀߀߀߸ ߛߋ߫ ߓߘߊ߫ ߞߍ߫ ߡߍ߲ ߡߊ߬ ߕߌߢߍߟߌ߫ ߓߟߏ ߡߊ߬߸ ߊ߬ ߕߌߢߍߟߌ ߝߊ߲߬ߓߊ ߞߏ߬ߣߌ߲ ߦߋ߫ ߞߐ߰ߘߎ߮ ߟߋ߬ ߘߐ߫ ߓߊߞߍ߭.
ߘߏߣߊߟ ߕߑߙߐ߲ߔ ߓߘߴߊ߬ ߛߐ߲߭ߖߊ߬ ߖߐ ߟߊߘߏ߲߬ ߞߏ ߣߌ߫ ߞߍ߬ߟߍ ߟߊߟߐ߬ ߞߏ ߞߊ߲߬߸ ߏ߬ ߞߎߡߊ ߓߘߊ߫ ߛߌߦߊߦߊ߫ ߞߏߛߓߍ߫، ߓߊߏ߬߸ ߛߐ߲߬ ߞߍߣߍ߲߫ ߕߴߊ߬ ߡߊ߬ ߡߎߣߎ߲߬ ߕߌ߯ߕߌ߯ߦߊ߫ ߓߟߏ ߡߊ߬، ߘߎߢߊ߫ ߞߣߐ߫ ߕߋ߲߬߸ ߖߡߊ߬ߣߊ ߟߎ߬ ߕߍ߫ ߡߙߌߦߊ߫ ߞߋߟߋ߲߫ ߞߊ߲߬߸ ߘߏ߫ ߟߎ߫ ߞߊ߲߫ ߞߏ߫ ߝߏ߫ ߞߊ߬ ߛߐ߲߬ ߞߍ߫ ߔߊߟߍߛߑߕߌߣߌ߲߬ ߠߊ߫ ߖߡߊ߬ߣߊ߬ߦߊ ߡߊ߬߸ ߘߏ߫ ߟߎ߫ ߞߊ߲߫ ߞߏ߫ ߞߍ߬ߟߍ ߛߊ߬ߙߌ߬ߦߊ߬ ߕߌߢߍ ߡߍ߲ ߦߴߌ ߘߐ߫߸ ߊ߬ߟߎ ߘߊ ߦߴߏ߬ ߟߋ ߘߐ߫ ߡߎߣߎ߲߬߸ ߣߴߏ߬ ߦߋ߫ ߟߊ߲ߝߊ߲ߠߌ߲ ߣߌ߫ ߛߌߟߛߊߟߌ ߘߌ߫، ߊ߬ ߞߣߐ߬ ߛߎ߬ ߕߊ߬ ߞߊ߲ ߠߎ߬ ߕߍ߫ ߓߊ߲߫ ߝߐ߫ ߟߊ߫.
ߜߟߍ߬ߦߊ ߦߋ߫ ߦߙߐ ߡߍ߲ ߘߐ߫ ߛߊ߫߸ ߏ߬ ߟߋ ߞߍ߬ߟߍ ߟߊߟߐ߬ ߞߏ ߘߌ߫ ߞߊ߬ ߡߍ߲߫߸ ߏ߬ ߛߋߣߍ߲߫ ߕߍ߫ ߞߍ߫ ߟߊ߫ ߡߎߣߎ߲߬ ߝߋߎ߫، ߊ߬ ߣߌ߫ ߦߙߐ ߡߍ߲ ߠߎ߬ ߕߋ߬ߣߍ߲߫ ߜ߭ߊ߯ߖ߭ߊ߬ ߞߣߐ߫߸ ߏ߬ ߟߎ߬ ߘߌ߫ ߟߐ߬ ߘߌ߬߸ ߡߐ߱ ߟߎ߬ ߤߊߞߍ ߘߌ߫ ߡߊߓߏ߲߬ߧߊ߫ ߘߌ߬ߑ ߘߊߐߘߖߊߥߏ ߘߌ߫ ߛߋ߫ ߛߌ߰ ߟߊ߫ ߛߋ߲߬ߠߊ߫ ߘߌ߬߸ ߓߍ߲߭ ߘߌ߫ ߛߋ߫ ߟߊߘߏ߲߬ ߠߊ߫ ߖߡߊ߬ߣߊ߫ ߝߌ߬ߟߊ ߢߌ߲߬ ߠߎ߬ ߕߍ߫ ߘߌ߬߸ ߏ߬ ߞߏ ߟߎ߬ ߟߋ߬ ߛߋߣߍ߲߫ ߕߍ߫ ߢߊߓߐ߫ ߟߊ߫ ߡߎߣߎ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
