ߛߎ߫ ߘߐ߫ ߛߊ߲߫ ߣߊ ߘߏ߫ ߟߋ߬ ߞߍߣߍ߲߫ ߡߊ߬ߛߎߓߊ ߘߌ߫ ߖߍ߬ߣߍ߫ ߡߊ߬ߙߌ߬ߣߊ߫ ߘߎ߰ߣߍ߲ ߞߣߐ߫، ߞߊ߬ ߓߏ߲ ߘߏ߫ ߥߎ߬ߦߊ߫ ߞߊ߬ ߛߏ߰ߟߊ ߟߊߛߋ߫ ߘߋ߲ߣߍ߲߫ ߛߊ߬ߓߊ߫ ߡߊ߬߸ ߡߛߏ߬ߡߊ߲߬ߣߍ߲߫ ߛߊ߲߬ ߁߅ ߘߏ߫ ߓߣߐ߬ ߘߴߊ߬ ߣߌ ߘߐ߫߸ ߞߵߊ߬ ߕߐ߬ ߝߌ߬ߟߊ ߡߊߘߌߡߌ߲߫.
ߡߊ߬ߛߎ߬ߓߊ߬ ߞߏ ߣߌ߲߬ ߞߍ߫ ߘߊ߫ ߞߎߣߎ߲ߟߏ߲ ߛߎ ߟߋ߬ ߘߐ߫ ߂߀߂߅ ߞߏ߲ߓߌߕߌ߮ ߕߟߋ߬ ߈ ߡߊ߬ ߞߵߊ߬ ߘߎ߰ߛߊ ߜߍ߫ ߓߌ߬ ߓߌߟߏ߲ ߠߊ߫߸ ߦߋߙߋ߲ߦߋߙߋ߲ ߕߎ߬ߡߊ ߟߊ߫ ߖߍ߬ߣߍ߫ ߡߊ߬ߙߌ߬ߣߊ߬ ߛߏ ߞߣߐ߫߸ ߏ߬ ߡߍ߲ ߦߋ߫ ߕߌ߲ߕߌߥߎߟߋ߲߫ ߡߙߊ߬ߘߊ߬ߙߋ߲ ߘߐ߫ ߞߊ߬ߣߌ߲߬، ߘߋ߲ߓߦߊ ߢߌ߲߬ ߠߎ߬ ߟߊ߫ ߓߏ߲ ߝߊ߲߬ ߞߋߟߋ߲ ߠߋ߬ ߥߎ߬ߦߊ߬ߣߍ߲߫ ߛߊ߲ߖߌ ߞߘߐ߫߸ ߞߵߊ߬ ߛߐ߬ߘߐ߲߬ ߡߐ߱ ߟߎ߬ ߟߊߣߍ߲߫ ߛߎ߬ߣߐ߮ ߘߐ߫ ߓߏ߲ ߠߊ߫ ߦߋ߲߬، ߞߏ߫ ߞߊ߬ ߘߋ߲ߣߍ߲߫ ߡߐ߰ ߛߊ߬ߓߊ߫ ߟߋ߬ ߛߐ߬ߘߐ߲߬߸ ߊߡߌ߬ ߘߎ߲ߓߎߦߊ߫ ߛߊ߬ ߘߴߊ߬ ߘߊߞߎ߲ ߘߐ߫ ߦߋ߲߬ ߠߋ߬ ߌߞߘߐ߫߸ ߏ߬ ߡߍ߲ ߛߌ߬ߞߛߊߓߌ ߕߎ߲߬ ߦߋ߫ ߛߊ߲߬ ߁߅ ߢߐ߲߰ ߘߐ߫ ߞߊ߬ߣߌ߲߬߸ ߏ߬ ߓߣߐ߬ ߘߴߊ߬ ߣߌ ߘߐ߫.
ߛߋߞߎ߬ ߞߏ߲߬ߓߏ ߘߎ߲ߓߎߦߊ߫߸ ߊ߬ߟߋ ߡߍ߲ ߦߋ߫ ߞߏߕߐ ߢߌ߲߬ ߠߎ߫ ߝߊ߬ ߣߌ߫ ߟߎߕߌ߮ ߖߍ߬ߘߍ ߘߌ߫߸ ߏ߬ ߞߊ߬ ߘߏ߫ ߢߊߝߐ߫ ߊ߲ ߧߋ߫ ߡߊ߬ߛߎ߬ߓߊ߬ ߞߏ ߣߌ߲߬ ߞߊ߲߬: <<ߦߋߙߋ߲ߦߋ߲ ߕߎ߲߬ ߓߘߊ߫ ߛߋ߫، ߞߵߊ߬ ߛߐ߬ߘߐ߲߬ ߒߠߋ ߟߊߣߍ߲߫ ߕߌߓߏ߲ ߘߐ ߢߌ߲߬ ߠߊ߫߸ ߒ ߡߏ߬ߛߏ ߟߋ߬ ߣߊ߬ ߘߊ߫ ߘߊ ߞߐ߲ߞߐ߲߫ ߒ ߡߊ߬ ߞߏ߫ ߒ ߧߋ߫ ߒ ߥߌ߬ߟߌ߫ ߘߋ߬߸ ߞߏ߫ ߓߏ߲ ߓߘߊ߫ ߓߋ߬ ߘߋ߲ߣߍ߲ ߠߎ߬ ߞߊ߲߬، ߒ ߓߏ߬ߙߌ߬ ߢߊ ߟߋ߬ ߞߍߣߴߏ߬ ߘߌ߫ ߞߊ߬ ߛߐ߰ ߞߍ߲ߘߍ ߟߎ߬ ߟߊߓߐ ߡߊ߬ ߡߎߣߎ߲߬، ߏ߬ ߞߐߝߍ߬ ߒ ߞߊ߬ ߘߋ߲ߡߛߏߣߍ߲ ߞߋߟߋ߲ ߦߋ߫߸ ߊߡߌ߬߸ ߊ߬ߟߋ ߕߎ߲߬ ߓߘߊ߫ ߛߊ߬. ߒ ߥߊ߫ ߢߊ ߟߋ߬ ߞߍߣߍ߲߫ ߘߊ߲ߘߊߛߏ ߟߊ߫ ߏ߬ ߘߌ߫ ߞߊ߬ ߘߊ߲ߘߊߟߌߟߊ ߘߏ߫ ߕߊ߬ ߞߊ߬ ߣߵߊ߬ ߡߊߝߟߍ߫߸ ߏ߬ ߞߵߊ߬ ߟߊ߫ ߛߦߊ߬ ߞߏ ߟߊߛߙߋߦߊ߫ ߦߋ߲߬ ߌߞߘߐ߫.>>
ߊ߬ ߟߊ߫ ߝߐߟߌ߫ ߘߐ߫߸ ߡߐ߰ ߝߌ߬ߟߊ߫ ߟߋ߬ ߡߊߘߌߡߌ߲߫ ߘߊ߫ ߓߏ߲߫ ߓߋ ߣߌ߲߬ ߘߐ߫، ߊ߬ ߞߎ߲߬ ߖߐ߲ߖߐ߲߫ ߞߏ߬ߣߌ߲ ߡߊ߫ ߟߐ߲߫ ߊ߬ߟߎ ߓߟߏ߫، ߓߊ߬ߙߌ߬ ߟߊ߬ߞߙߐ߬ߛߌ߬ߟߌ ߟߎ߬ ߦߴߊ߬ ߦߌ߬ߘߊ߬ ߟߊ߫ ߞߏ߫ ߓߏ߲ ߞߘߐߟߊ ߟߊ߫ ߦߌߟߌ߲߫ ߞߏߖߎ߯ߦߊ ߛߊ߲ߖߌ ߓߟߏ߫߸ ߏ߬ ߟߋ ߞߵߊ߬ ߖߎߙߊ߲߫، ߛߋߞߎ߬ ߞߏ߲߬ߓߏ ߘߎ߲ߓߎߦߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߕߍ߬ߘߍ߫ ߛߌ߱ ߘߐ߫ ߞߐߣߊߞߙߌ߫ ߟߋ߬߸ ߞߊ߬ ߛߊ߲߬ ߦߙߌߞߊ߫ ߞߍ߫ ߌ߬ߡߊ߬ߡߎ߲߬ߦߊ ߟߊ߫ ߦߋ߲߬߸ ߊ߬ ߞߵߊ߬ ߡߊߘߏ߲߬ ߛߏ߫ ߟߴߊ߬ ߛߐ߬ߘߐ߲߬ߓߊ߮ ߟߊ߫ ߞߏ ߟߋ߬ ߘߐ߫߸ ߞߵߏ߬ ߞߎ߲߭ ߞߍ߫ ߏ߬ ߟߊ߫ ߖߊ߲߬ߞߊߙߏ ߘߌ߫، ߊ߬ ߞߊ߬ ߓߏ߲ ߢߌ߲߬ ߠߋ߬ ߟߐ߬ ߏ߬ ߘߐ߫߸ ߛߴߊ߬ ߟߊ߫ ߘߋ߲ߓߦߊ ߘߌ߫ ߘߏ߲߬ ߏ߬ ߟߊ߫߸ ߏ߬ ߟߋ ߘߏ߲߬ ߥߎ߬ߦߊ߬ߣߍ߲߫ ߕߋ߲߬، ߏ߬ ߟߋ ߞߏߛߐ߲߬߸ ߊ߬ ߞߵߊ߬ ߞߊ߲ߠߊߘߌ߫ ߘߍ߬ߡߍ߲߬ߠߌ߲߬ ߞߏ ߘߌ߫ ߕߊ߲߬: <<ߊ߲ ߓߟߏߝߋ߲߫ ߛߌߦߊߡߊ߲߫ ߠߋ߬ ߕߌߢߍߣߍ߲߫، ߊ߲ ߖߌ߱ ߞߏ߬ߣߌ߲ ߦߴߊߟߊ߫ ߞߊ߲߬، ߊ߲ ߧߴߊ߬ ߢߌߣߌ߲߫ ߠߊ߫ ߛߌ߬ߟߡߊ߬ ߓߘߍ ߟߎ߬ ߣߌ߫ ߞߎ߲߬ߠߊ߬ߛߌ߮ ߟߎ߬ ߝߍ߬߸ ߊ߬ߟߎ߬ ߦߴߊ߲ ߘߍ߬ߡߍ߲߬.>>
ߖߍ߬ߣߍ߫ ߡߊ߬ߙߌ߬ߣߊ߫ ߘߎ߰ߕߌ߮߸ ߛߋߞߎ߬ ߓߊ߲߬ߓߊ ߞߊ߬ ߣߌ߲߬ ߞߏ ߟߊߛߙߋߦߊ߫: <<ߛߊ߲ ߕߍ߬ߘߍ߫ ߣߊ߬ ߟߊ߫، ߓߏ߲ ߜߘߌ ߟߋ߬ ߢߌ߲߯ ߘߊ߫߸ ߏ߬ ߞߍ߫ ߘߊ߫ ߛߊߓߎ߫ ߘߌ߫ ߞߵߊ߬ ߖߎߙߊ߲߫، ߡߊ߬ߞߏ ߞߏ߬ߣߌ߲ ߦߋ߫ ߘߍ߬ߡߍ߲߬ߠߌ߲ ߠߋ߬ ߟߊ߫ ߕߋ߲߬ ߞߊߟߌߦߊ߫ ߘߐ߫߸ ߞߊ߬ ߛߋ߫ ߘߋ߲ߓߦߊ ߢߌ߲߬ ߠߎ߬ ߓߐ߫ ߟߊ߫ ߢߊ߫ ߛߎ߮ ߣߌ߲߬ ߡߊ߬ ߕߋ߲߬.>>
ߊ߲ ߛߋ߫ ߘߊ߫ ߛߎ߬ߣߎ߲ ߠߊߞߙߐ߬ߛߌ߬ ߟߊ߫ ߡߐ߱ ߟߎ߬ ߢߊߘߎ߮ ߘߐ߫ ߞߣߍ ߞߊ߲߬ ߦߋ߲߬ ߞߏߛߓߍ߫، ߘߏ߲߬ ߕߴߛߋ߫ ߞߍ߫ ߟߊ߫ ߓߏ߲߫ ߞߣߐ߫ ߝߌ߬ߟߊ ߢߌ߲߬ ߠߎ߬ ߞߣߐ߫ ߕߋ߲߬، ߡߊ߬ߞߏ ߦߋ߫ ߡߊ߬ߘߍ߬ߡߍ߲߬ߠߌ߲ ߠߋ߬ ߟߊ߫ ߕߋ߲߬߸ ߛߊ߫ ߞߊ߬ ߘߋ߲ߓߦߊ ߢߌ߲߬ ߠߎ߬ ߓߐ߫ ߓߟߏ߫ ߛߎ߮ ߣߌ߲߬ ߞߘߐ߫.
ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
