ߊߡߋߙߌߞߌ߬ ߞߊ߬ߝߏ߫ ߘߍ߬ߣߍ߲ ߒߞߏ ߕߐ߲ ߡߙߊ߬ߘߊ ߞߏߟߊߕߍ߮ ߛߌ߲߬ߝߏ߲߬ ߞߟߏߡߊ ߘߏ߫ ߟߋ߬ ߛߏߡߊߦߟߍߡߊ߲ߣߍ߲߫߸ ߣߴߊ߬ ߕߐ߯ ߞߏ߫ ߛߣߊ߬ߛߌ߫ ߛߙߋ߬ߝߎ߬ (ߛߊ߲߬ߛߌ߫)، ߊ߬ ߛߊ߫ ߘߊ߫ ߣߌߦߙߐߞ ߟߋ߬߸ ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߂߀߸ ߞߵߊ߬ ߛߌ߬ߞߛߊߓߌ ߕߏ߫ ߛߊ߲߬ ߆߆ ߘߐ߫.
ߛߊ߲߬ߛߌ߫ ߛߙߋ߬ߝߎ߫ ߣߌ߲߬ ߝߊ߬ ߕߐ߯ ߟߋ߬ ߞߏ߫ ߊߓߘߎߙߊߤߑߡߊ߯ߣߌ߲߬ ߛߙߋ߬ߝߎ߫، ߊ߬ ߓߊ߫ ߕߐ߯ ߞߏ߫: ߝߊߕߎߡߊߕߊ߬ ߖߊ߰ߣߍ߫، ߊ߬ ߡߏߦߌ߫ ߘߊ߫ ߁߉߅߉ ߟߋ߬ ߟߊ߫ ߛߙߊ߬ߟߏ߲߬ ߞߊ߲ߓߍ߲، ߊ߬ ߞߊ߬ ߒߞߏ ߞߊߙߊ߲ ߘߊߡߌ߬ߘߊ߬ ߞ. ߌߓߙߊߤߌߡߊ߬ ߕߙߊߥߟߋ߫ ߝߍ߬ ߞߊ߬ ߓߊ߲߫ ߞߊ߬ ߞߊ߬ߙߊ߲ ߡߊߞߊ߬ߝߏ߬ ߂߀߁߅ ߟߊ߫ ߞ. ߖߌ߬ߓߙߌ߬ߟߊ߫ ߖߊ߰ߣߍ߫ ߝߍ߬ ߛߌ߬ߟߡߊ ߓߍ߯ ߟߊ߫ ߕߊ߲ߓߊ߲ ߕߌ߲ߓߌߘߌ߲ߘߊ ߟߊ߫߸ ߞߊ߬ ߛߋ߫ ߟߎߞߑߡߊ߯ߣ ߕߌ߲ߓߌߘߌ߲ߘߊ ߟߊ߫ ߝߏ߫ ߞߵߊ߬ ߞߍ߫ ߒߞߏ ߞߊߙߊ߲ߘߋ߲߫ ߞߎ߲ߕߌ߮ ߘߌ߫߸ ߞߵߏ߬ ߟߴߊ߬ ߟߊ߫ ߒߞߏ ߞߊߣߌ߲߫ ߘߍ߬ߜߍ ߣߴߊ߬ ߟߊ߫ ߡߊ߲߬ߘߋ߲߬ߞߊ߬ߦߊ ߘߐߘߌߦߊ ߞߊ߲߬ ߸ ߊ߬ ߕߎ߲߬ ߞߊ߬ ߊ߲߬ߜ߭ߌ߬ߟߋ߬ߞߊ߲ ߓߊߓߋ߬ߓߊ ߟߋ߬ ߞߍ߫߸ ߝߏ߫ ߊ߬ ߕߍ߬ߘߍ߫ ߊ߬ ߞߊ߬ߙߊ߲߬ߡߐ߯ ߖߌ߬ߓߙߌ߬ߟߊ߫ ߖߊ߰ߣߍ߫ ߘߍ߬ߡߍ߲߬ ߠߊ߫ ߥߟߊ߬ߘߊ ߟߎ߬ ߢߊߝߐ߫ ߕߎߡߊ ߟߊ߫ ߛߐ߲߬ ߘߟߊߡߌߘߊߟߌ ߘߐ߫.
ߊߡߋߙߌߞߌ߬ ߞߊ߬ߝߏ߫ ߘߍ߬ߣߍ߲ ߒߞߏ ߕߐ߲ ߡߙߊ߬ߘߊ ߞߏߟߊߕߍ߮ ߛߓߍߘߊ ߡߍ߲ ߛߏ߯ߙߏ߫ ߘߊ߫ ߂߀߁߆ ߞߏ߲ߞߏߘߓߌ ߁߇ ߡߊ߬߸ ߊ߬ ߞߍ ߘߴߏ߬ ߜߋ߬ߟߎ߲߬ߠߌ߲ ߞߟߊ߬ߕߌ߮ ߘߌ߫߸ ߞߊ߬ ߓߊ߲߫ ߞߊ߬ ߞߍ߫ ߞߏ߲߬ߘߏ߬ߕߌ߮ ߘߌ߫ ߂߀߁߈ ߕߎߟߊߝߌ߲ ߕߟߋ߬ ߃߀ ߡߊ߬ ߝߘߏ߬ߓߊ߬ ߜߙߊ ߛߓߊߣߊ߲ ߘߐ߫.
ߝߘߏ߬ߓߊ߬ ߜߙߊ ߣߊ߯ߣߌ߲ߣߊ߲ ߣߊ߬ ߘߴߊ߬ ߞߙߍߞߙߍ߫ ߂߀߂߁ ߠߊ߫ ߕߎ߲߯߸ ߞߵߊ߬ ߞߍ߫ ߜߋ߬ߟߎ߲߬ߠߌ߲ ߞߟߊ߬ߕߌ߮ ߘߌ߫߸ ߊ߬ ߛߏߡߊߦߟߍߡߊ߲ߣߍ߲߫ ߞߵߊ߬ ߕߏ߫ ߟߐ߬ߘߎ߮ ߏ߬ ߟߋ ߘߐ߫ ߕߋ߲߬.
ߊ߬ ߣߌ߫ ߒߞߏ ߡߌߞߙߏߛߐߝߕ ߘߟߊߡߌߘߊ ߓߟߏߟߊߘߍ ߡߍ߲ ߘߊߡߌ߬ߣߊ߬ ߘߊ߫ ߂߀߁߇ ߟߊ߫߸ ߊ߬ ߞߊ߬ ߡߊ߬ߜߍ߲߬ߓߊ߫ ߞߍ߫ ߏ߬ ߞߏ ߘߐ߫߸ ߞߊ߬ ߓߊ߲߫ ߞߵߊ߬ ߝߐ߫ ߞߏ߫ ߊ߬ ߓߌߣߍ߲߫ ߒߞߏ ߘߍ߬ߡߍ߲ ߠߊ߫ ߕߎ߬ߡߊ߬ߓߍ߯.
ߊ߬ ߞߊ߬ ߛߙߋߓߍ߫ ߛߓߊ߬ ߣߌ߫ ߛߌ߲߬ߝߏ߲߬ ߔߊߔߘߊ ߝߌ߬ߟߊ߫ ߛߐ߬ߘߐ߲߬ ߞߊ߬ ߝߘߴߊߡߋߙߌߞߌ߬ ߞ.ߘ. ߒߞߏ ߕߐ߲߫ ߠߊ߫ ߕߊ߲߬: ߛߌ߲߬ߝߏ߲߬ ߛߙߋߓߍ ߣߌ߫ ߒߞߏ ߞߊߙߊ߲ ߜߍߢߋߟߋ߲ ߛߙߋߓߍ ߣߌ߫ ߥߊߟߋߢߌߡߊߟߐ߲߫ ߛߙߋߓߍ.
ߒߞߏ ߣߌ߫ ߒߞߏ ߕߐ߲ ߠߊ߫ ߕߏ߰ߝߏ ߛߌ߫ ߡߊ߫ ߝߐ߫ ߊ߬ ߞߐ߫ ߊߡߋߙߌߞߌ߬߸ ߞߵߊ߬ ߘߊߡߌ߬ߘߊ߬ ߟߊ߬ߘߍ ߟߎ߬ ߣߌ߫ ߓߟߏߟߊߘߍ ߟߎ߫ ߡߊ߬ ߞߊ߬ ߛߋ߫ ߜߊ߬ߙߊ ߟߎ߬ ߣߌ߫ ߞߊ߬ߙߊ߲ ߠߎ߫ ߡߊ߬ ߸ ߏ߬ ߞߘߐ ߟߋ߬ ߞߏ ߒߞߏ ߞߊߙߊ߲ ߣߴߊ߬ ߟߊ߬ߞߐ߰ߟߌ ߟߎ߬ ߛߌ߫ ߡߊ߬ ߝߐ߫ ߊ߬ ߞߐ߫ ߣߌߦߐߙߞ ߞߣߐ߫ ߊ߬ ߣߌ߫ ߞߊ߬ߝߏ߬ ߜߘߍ ߘߏ߫ ߟߎ߫ ߦߏ߫: ߓߐߛߑߕߐ߲߫ ߤߊߙߑߝߊߘ ߖߊ߯ߓߘߊ ߣߌ߫ ߝߌߟߊߘߍߟߑߝߌߦߊ߫ ߣߌ߫ ….
ߊߟߊߡߊ߬ ߦߝߊ߬ ߞߍ߫ ߘߴߊ߬ ߡߊ߬، ߞߵߊ߬ ߟߊߦߙߐ ߛߎߡߊ߫، ߞߵߊ߬ ߝߙߊ߬ ߞߎ߲߬ߠߊ߲߬ߘߌ߬ ߝߎߙߋ ߟߎ߫ ߞߊ߲߬، ߞߵߊ߬ ߞߐ ߣߴߊ߬ ߢߍ ߘߐߓߍ߲߬،ߞߵߊ߬ ߓߐ߲ߛߐ߲ ߠߎ߬ ߟߊߢߊ߬، ߞߊ߬ ߦߝߊ߬ ߞߍ߫ ߞߊ߬ߙߊ߲߬ߡߐ߯ ߛߟߏ߬ߡߣߊ߬ ߞߊ߲ߕߍ߫ ߣߌ߫ ߒߞߏ ߞߊߙߊ߲ߘߋ߲߫ ߝߎߙߋ ߕߐ߭ ߟߎ߬ ߣߌ߫ ߡߐ߰ ߓߘߍ ߓߍ߯ ߡߊ߬.
ߞߊ߬ ߝߘߊ߫ ߊ.ߞ.ߘ ߒߞߏ ߕߐ߲ ߞߏߟߊߕߍ߮ ߟߎ߬ ߟߊ߫
