߁߉߈߇ ߣߍߣߍߓߊ ߕߋ߬ߟߋ߫ ߂߃ ߟߋ߬ ߡߊ߬߸ ߖߌ߬ߣߍ߬ߞߊ߬ ߟߐ߲ߞߏߕߌ߯ ߛߌߣߌ߲ߦߋߟߊ߫ ߛߟߏ߬ߡߣߊ߬ ߞߊ߲ߕߍ߫ ߝߊߕߏ߫ ߘߊ߫߸ ߏ߬ ߡߍ߲ ߛߊ߲߬ ߃߈ ߘߝߊ ߦߋ߫ ߓߌ߬ ߘߌ߫ ߞߊ߬ߣߌ߲߬߸ ߂߀߂߅ ߣߍߣߍߓߊ ߕߋ߬ߟߋ߫ ߂߃، ߊ߬ߟߋ ߟߋ߬ ߞߊ߬ ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌ߫߸ ߏ߬ ߡߍ߲ ߠߊߘߊ߲ߣߍ߲߫ ߝߘߊ߬ߝߌ߲߬ ߞߊ߲ ߠߎ߬ ߛߓߍ߫ ߞߊ߲ߡߊ߬߸ ߊ߬ ߣߌ߫ ߟߐ߲ߠߌ߲ ߠߎ߬ ߟߊߡߊ߲߬ߘߌ߬ ߞߊ߲ߡߊ߬.
ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߡߏߦߌ߫ ߘߊ߫ ߞߊ߲ߞߊ߲߫ ߡߊ߬ߙߊ ߟߋ߬ ߞߣߐ߫ ߛߎߡߊ߲ߞߐ߬ߦߌ߫ ߞߐ߬ߟߐ߲߬ߣߍ߲߬߸ ߁߉߂߂ ߟߊ߫، ߊ߬ ߝߊ߬ ߕߐ߯ ߞߏ߫ ߊߡߙߊ߫ ߞߊ߲ߕߍ߫߸ ߊ߬ ߣߊ߫ ߕߐ߯ ߞߏ߫ ߖߊ߰ߞߊ߫ ߡߊ߲߬ߛߊ߬ߙߋ߲߬، ߊ߬ ߞߊ߬ ߥߊ߯ߕߌ߫ ߖߊ߲߫ ߠߋ߬ ߞߍ߫߸ ߊ߬ ߦߴߊ߬ ߡߙߌ ߞߊ߲߬ ߛߓߍߟߌ߫ ߞߏ ߡߊ߬߸ ߝߘߊ߬ߝߌ߲߬ ߞߊ߲ ߠߎ߬ ߘߌ߫ ߛߓߍ߫ ߡߍ߲ ߠߊ߫߸ ߞߵߊ߬ ߕߊ߬ ߁߉߄߄ ߡߊ߬ ߞߵߊ߬ ߛߌ߰ ߁߉߄߉ ߟߊ߫، ߊ߬ ߣߐ߬ ߊ߬ ߦߋ߫ ߟߊ߸ ߞߏ߫ ߛߓߍߛߎ߲߫ ߓߟߏߡߊߞߊ߬ߣߍ߲߬ ߖߐ߲ߖߐ߲߫ ߛߌ߫ ߕߴߦߋ߲߬߸ ߡߍ߲ ߘߌ߫ ߛߋ߫ ߡߊ߲߬ߘߋ߲߬ ߞߊ߲ ߠߎ߬ ߛߓߍ߫ ߟߊ߫߸ ߦߏ߫ ߖߎ߬ߟߊ߬ߞߊ߲ ߣߌ߫ ߓߡߊߣߊ߲ߞߊ߲ ߣߌ߫ ߡߊ߲߬ߘߋ߲߬ߞߏߞߊ߲߸ ߞߵߏ߬ ߟߊ߫ ߡߊ߬ߣߋ߲߬ߞߊ߬ߞߊ߲ ߞߊ߲߬، ߏ߬ ߟߋ ߘߐ߫߸ ߊ߬ ߞߊ߬ ߛߓߍߛߎ߲ ߘߏ߫ ߛߌ߲ߘߌ߫ ߁߉߄߉ ߟߊ߫߸ ߞߊ߲ ߏ߬ ߟߎ߬ ߛߓߍ߫ ߞߊ߲ߡߊ߬߸ ߞߵߊ߬ ߟߊ߫ ߛߓߍߟߌ߫ ߟߊߓߐߣߍ߲ ߏ߬ ߞߟߌ߫ ߞߏ߫ ߒߞߏ، ߊ߬ ߘߏ߲߬ ߞߊ߬ ߘߐ߬ߖߊ߬ ߛߌߦߊߡߊ߲߫ ߞߍ߫߸ ߞߊ߬ ߛߋ߫ ߞߝߊ߬ ߥߙߍ ߟߎ߬ ߛߓߍ߫ ߟߊ߫ ߟߐ߲ߠߌ߲ ߛߐ߬ߘߐ߲ ߠߊߣߐ߰ߦߊ߬ ߞߊ߲ߡߊ߬.
ߛߓߍߛߎ߲ ߛߌ߲ߘߌ ߞߐߝߍ߬ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫߸ ߊ߬ ߞߊ߬ ߛߊ߲߬ ߃߈ ߠߋ߬ ߞߍ߫ ߓߊ߯ߙߊ ߟߊ߫߸ ߞߵߊ߬ ߟߊ߫ ߛߓߍߟߌ߫ ߟߊߓߐߣߍ߲ ߏ߬ ߞߣߐߞߍ߫ ߟߐ߲ߠߌ߲ ߛߌߓߟߏߡߊ߫ ߛߌߦߊߡߊ߲߫ ߠߊ߫، ߓߊߏ߬߸ ߟߞߊ߬ߟߌ߬ߞߊ߲߬ߠߊ߫ ߖߐ߲ߖߐ߲ ߠߎ߬ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߊ߬ ߞߊ߬ߝߊ߫ ߁߈߃ ߤߊ߲߯ ߁߈߅ ߟߋ߬ ߛߓߍߦߊ߫ ߛߊ߲߬ ߓߌߛߓߊ߬ ߣߌ߫ ߞߐ ߏ߬ ߞߣߐ߫.
ߊ߬ ߟߊ߫ ߞߊ߬ߙߊ߲߬ߘߋ߲߬ ߛߌߦߊߡߊ߲߫ ߠߋ߬ ߞߵߊ߬ ߞߐ߫ ߛߌߟߊ ߕߊ߬߸ ߡߍ߲ ߠߎ߬ ߞߵߊ߬ ߟߊ߫ ߛߓߍߛߎ߲ ߞߣߐߞߍ ߘߊߡߌ߬ߣߴߊ߬ ߖߍ߬ߘߍ ߞߍ߲ߘߍ ߢߣߊ߫߸ ߞߵߊ߬ ߛߐ߬ߘߐ߲߬ ߊ߬ ߡߊ߫ ߛߊ߬ ߡߎߣߎ߲߬.
ߒ߬ߓߊ߬߸ ߊ߬ ߞߊ߬ ߛߊ߲߬ ߃߈ ߠߋ߬ ߞߍ߫ ߓߊߟߏ߫ ߘߐ߫߸ ߒߞߏ ߟߊߓߐ ߣߴߊ߬ ߟߊ߫ ߛߊ߬ߦߊ ߕߍ߫، ߓߊߏ߬߸ ߊ߬ ߛߊ߬ ߘߊ߫ ߁߉߈߇ ߣߍߣߍߓߊ ߕߋ߬ߟߋ߫ ߂߃ ߟߋ߬ ߡߊ߬߸ ߓߏ߲ߝߌ߲߫ ߞߌ߲߬ߘߊ ߟߊ߫߸ ߞߐߣߊߞߙߌ߫، ߞߵߊ߬ ߕߊ߬ ߏ߬ ߡߊ߬ ߞߵߊ߬ ߛߌ߰ ߓߌ߬ ߟߊ߫߸ ߏ߬ ߝߣߊ߫ ߛߊ߲߬ ߃߈ ߠߋ߬ ߕߋ߲߬، ߏ߬ ߦߋ߫ ߓߍ߲߬ߒ߬ߛߋ߲߬ߡߊ߬ߓߊ߫ ߘߌ߫.
ߒ߬ߓߊ߬߸ ߞߊ߲ߕߍ߫ ߟߊ߫ ߓߊ߯ߙߊߣߐ ߟߎ߬ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߒߞߏ ߕߍ߫ ߛߓߍߛߎ߲ ߘߐߙߐ߲߫ ߘߌ߫ ߘߋ߬ ߤߊ߲߫߸ ߊ߬ ߓߊ߯ ߝߐ߫ ߒߞߏ߸ ߏ߬ ߦߋ߫ ߝߘߊ߬ߝߌ߲߬ߠߊ߫ ߞߊ߲߫ ߛߌߦߊߡߊ߲߫ ߠߋ߬ ߟߊߘߍ߬ߣߍ߲ ߘߌ߫ ߕߊ߲߬ߘߐ ߞߊ߲ߓߏߟߏ߲ߓߊ߫ ߣߊ߯ߣߌ߲߫ ߘߐ߫: ߡߊ߬ߣߋ߲߬ߞߊ߬ߞߊ߲߸ ߓߡߊߣߊ߲ߞߊ߲߸ ߖߎ߬ߟߊ߬ߞߊ߲߸ ߊ߬ ߣߌ߫ ߡߊ߲߬ߘߋ߲߬ߞߏ߬ߞߊ߲.
ߡߊ߬ߣߋ߲߬ߞߊ߬ߞߊ߲ ߏ߬ ߝߣߊ߫ ߘߐߞߍߣߍ߲߫ ߝߐߓߏߟߏ߲߫ ߛߌߦߊߡߊ߲߫ ߠߋ߬ ߟߊ߫߸ ߦߏ߫ ߞߎ߬ߙߊ߲߬ߞߐ߫߸ ߞߐ߬ߣߌ߲߬ߧߊ߫߸ ߡߊ߬ߣߌ߲߬ߢߊ߲߸ ߥߊߛߏߟߏ߲߫߸ ߛߊ߲ߞߊߙߊ߲߫߸ ߡߊ߬ߥߎ߫߸ ߞߐ߬ߣߐ߫߸ ߒߝߊߦߌ߲߫، ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫.
ߣߴߌ ߘߏ߲߬ ߞߊ߬ ߓߡߊߣߊ߲ߞߊ߲ ߕߊ߬߸ ߞߊ߲ ߡߍ߲ ߦߋ߫ ߝߐ߫ ߟߊ߫ ߓߙߍ߬ߘߎ߯߸ ߓߎ߰ߣߌ߲߫߸ ߛߋߜ߭ߎ߫߸ ߛߌߞߊߛߏ߬߸ ߖߏ߬ߦߌ߬ߟߊ߫، ߏ߬ ߣߴߊ߬ ߢߐ߲߰ߘߐ ߟߎ߬ ߓߍ߯ ߦߋ߫ ߓߡߊߣߊ߲ ߝߐߓߏߟߏ߲ ߠߎ߬ ߟߋ߬ ߘߌ߫.
ߌ ߓߊ߯ ߖߎ߬ߟߊ߬ߞߊ߲ ߝߣߊ߫ ߕߊ߬߸ ߏ߬ ߘߏ߫ ߟߎ߫ ߦߋ߫ ߜߋ߲ߞߐ߰ߖߌ߬ߘߊ ߟߊ߫߸ ߖߎ߬ߟߊ߬ߓߊ ߟߎ߬߸ ߖߎ߬ߟߊ߬ߣߌ߲߬ߜߍ ߟߎ߬߸ ߖߡߌߣߌ߲߫ ߖߎߟߊ ߟߎ߬߸ ߞߐ߲ߞߊ ߟߎ߬߸ ߜߏ߬ߕߏ߰ߞߊ ߟߎ߬߸ ߞߏ߬ߙߏ ߟߎ߬߸ ߖߎ߬ߟߊ߬ ߝߊߙߊ߲ߝߊߙߊ߲ ߠߎ߬ ߦߴߊ߬ ߘߐ߫ ߊߓߌߖߊ߲߬ ߣߌ߫ ߓߐ߰ߞߍ߬ ߟߎ߬ ߘߐ߫. ߖߎ߬ߟߊ ߘߏ߫ ߟߎ߫ ߦߋ߫ ߜ߭ߊ߯ߣߊ߬߸ ߊ߬ ߦߋ߫ ߝߐ߫ ߟߴߏ߬ ߟߎ߫ ߡߊ߬ ߦߋ߲߬ ߞߏ߫ ߥߊ߲߬ߞߙߊ ߟߎ߬߸ ߊ߬ ߣߌ߫ ߟߌ߬ߜߌ ߟߎ߬. ߘߏ߫ ߟߎ߫ ߦߋ߫ ߓߙߎߞߌߣߊ߫ ߝߊ߬ߛߏ߬߸ ߊ߬ ߦߋ߫ ߝߐ߫ ߟߴߏ߬ ߟߎ߫ ߡߊ߬ ߘߊߝߌ߲ ߠߎ߬߸ ߟߏ߬ߓߌ߬ ߖߎߟߊ ߟߎ߬߸ ߊ߬ ߣߌ߫ ߓߐ߬ߓߐ߬ ߖߎߟߊ ߟߎ߬.
ߣߴߌ ߘߏ߲߬ ߞߊ߬ ߡߊ߲߬ߘߋ߲߬ߞߏ߬ߞߊ߲ ߕߊ߬ ߓߊߘߋ߲ ߠߎ߬߸ ߏ߬ ߘߏ߫ ߟߎ߫ ߦߋ߫ ߜ߭ߊ߲ߓߌ߫ ߣߌ߫ ߛߣߍ߬ߜ߭ߊߟߌ߫ ߣߌ߫ ߓߌ߬ߛߊߥߏ߫ ߖߌ߬ߣߍ߬ ߘߐ߫߸ ߡߊ߲߬ߘߋ߲߬ߞߏ ߝߐߓߏߟߏ߲ ߏ߬ ߘߏ߫ ߟߎ߫ ߟߋ߬: ߞߊ߬ߛߏ߲߫߸ ߞߌ߬ߕߊ߫߸ ߓߊߝߌߟߊߓߍ߲߫߸ ߞߙߊ߬ߕߊ߫ ߞߊ߬ߞߙߐ.
ߒ߬ߓߊ߬߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߞߵߊ߬ ߦߋ߫ ߢߌ߲߬ ߠߋ߬ ߓߍ߯ ߞߐ߫߸ ߞߏ߫ ߣߌ߫ ߛߓߍߛߎ߲߫ ߡߊ߫ ߟߊߘߊ߲߫ ߞߊ߲ ߢߌ߲߬ ߠߎ߬ ߛߓߍ߫ ߞߊ߲ߡߊ߬߸ ߊ߬ߟߎ߬ ߟߊߛߌߦߊߦߊ ߕߣߐ߬ ߛߌ߫ ߕߴߊ߬ ߟߊ߫، ߏ߬ ߟߋ ߘߐ߫߸ ߊ߬ ߞߵߊ߬ ߝߐ߫ ߊ߬ ߟߊ߫ ߛߍ߬ߘߏ߲ ߘߐ߫ ߟߋ߬ ߞߘߊߎ߫߸ ߞߏ߫ ߡߍ߲ ߠߎ߬ ߦߋ߫ ߡߊ߬ߣߋ߲߬ߞߊ߬ ߞߊ߲ ߣߌ߫ ߞߐ߬ߣߌ߬ߢߊ߬ ߞߊ߲ ߣߌ߫ ߡߊ߬ߣߌ߲߬ߢߊ߲߬ ߞߊ߲ ߠߎ߬ ߓߐ߫ ߟߊ߫ ߢߐ߲߮ ߡߊ߬ ߛߐ߲߬߸ ߏ߬ ߟߎ߬ ߖߏ߫ ߟߋ߬، ߣߌ߫ ߡߍ߲ ߠߎ߬ ߘߏ߲߬ ߞߵߊ߬ ߝߐ߫ ߞߏ߫ ߓߡߊߣߊ߲ ߣߌ߫ ߓߎ߰ߣߌ߲ ߕߍ߫ ߞߋߟߋ߲߫ ߘߌ߫߸ ߏ߬ ߖߏ߫ ߟߋ߬، ߓߊߏ߬߸ ߊ߬ߟߎ߬ ߡߊ߫ ߡߊ߲߬ߘߋ߲߬ ߞߊ߲ ߠߎ߬ ߕߐ߮ ߟߐ߲߫، ߣߴߊ߬ ߝߐ߫ ߘߊ߫ ߞߏ߫ ߡߊ߲߬ߘߋ߲߬ ߞߊ߲߸ ߏ߬ ߟߋ ߕߐ߯ ߞߏ߫ ߒߞߏ، ߏ߬ ߟߋ ߞߵߊ߬ ߞߍ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߝߣߊ߫ ߞߵߊ߬ ߟߊ߫ ߛߓߍߛߎ߲߫ ߛߌ߲ߘߌߣߍ߲ ߞߟߌ߫ ߞߏ߫ ߒߞߏ.
ߞߊ߲ߕߍ߫ ߛߟߏ߬ߡߣߊ߬ ߟߊ߫ ߢߣߊߡߦߊ ߞߣߐ߫߸ ߊ߬ ߞߊ߬ ߘߐ߬ߛߙߋ߬ ߛߌߦߊߡߊ߲߫ ߛߓߍ߫߸ ߞߊ߬ ߡߊ߲߬ߘߋ߲߫ ߘߐ߬ߝߐ ߢߊߝߐ߫ ߊ߬ ߢߊߝߐ߫ ߢߊ߫ ߓߘߍ ߡߊ߬، ߊ߬ߟߋ ߟߋ߬ ߞߏߛߐ߲߬߸ ߡߐ߰ ߥߊ߯ ߦߙߌߞߊ߫ ߓߘߊ߫ ߛߐ߬ߘߐ߲߫ ߓߌ߬߸ ߡߍ߲ ߠߎ߬ ߦߋ߫ ߛߋ߫ ߟߴߊ߬ߟߎ߫ ߝߊ߬ ߞߊ߲ ߝߐ߫ ߟߊ߫߸ ߞߊ߬ ߓߊ߲߫ ߞߵߊ߬ ߛߓߍ߫ ߒߞߏ ߛߓߍߟߌ ߘߐ߫، ߒߞߏ ߦߋ߫ ߞߊ߬ߙߊ߲߬ ߠߊ߫ ߖߌ߬ߣߍ߬ ߞߣߐ߫ ߢߊ ߡߍ߲߸ ߊ߬ ߦߋ߫ ߞߊ߬ߙߊ߲߬ ߠߊ ߡߊ߬ߟߌ ߟߊ߫ ߕߋ߲߬ ߠߋ߬߸ ߜߋ߲ߞߐ߰ߖߌ߬ߘߊ ߟߊ߫߸ ߜ߭ߊ߲ߓߌ߫߸ ߡߏߙߌߕߊߣߌ߫߸ ߊ߬ ߣߌ߫ ߦߙߐ߫ ߛߌߦߊߡߊ߲߫.
ߕߋ߲߭ߕߋ߲߭ ߣߌ߲߬ ߘߐ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߞߏߛߐ߲߬߸ ߝߘߊ߬ߝߌ߲߬ߧߊ ߞߊ߫ ߘߌ߫ ߡߐ߰ ߛߌ߫ ߦߋ߫߸ ߊ߬ ߓߍ߯ ߓߘߊ߫ ߞߍ߫ ߒߞߏ ߢߊߢߌߣߌ߲ߠߊ ߘߌ߫، ߓߊߏ߬߸ ߞߝߊ߬ ߓߘߍ ߟߎ߬ ߦߋ߫ ߒߞߏ ߘߐ߫߸ ߡߍ߲ ߠߎ߬ ߦߋ߫ ߟߐ߲ߠߌ߲ ߛߌߓߟߏߡߊ ߓߍ߯ ߢߊߝߐ߫ ߟߊ߫، ߘߌ߯ߣߊ ߓߊ߬߸ ߞߊ߬ߙߊ߲ ߓߊ߬߸ ߡߟߋߞߎߦߊ ߓߊ߬߸ ߟߐ߲ߠߌ߲ߦߊ ߓߊ߬߸ ߟߐ߲ߞߏ ߓߊ߬߸ ߊ߬ ߓߍ߯ ߟߋ߬ ߢߊߝߐߣߍ߲߫ ߒߞߏ ߘߐ߫.
ߞߊ߬ߙߊ߲߬ߕߊ ߟߎ߬ ߓߘߊ߫ ߟߐ߬ ߓߌ߬߸ ߒߞߏ ߦߋ߫ ߞߊ߬ߙߊ߲߬ ߠߊ߫ ߡߍ߲ ߠߎ߬ ߞߣߐ߫، ߏ߬ ߟߋ ߘߐ߫߸ ߊ߲ ߧߋ߫ ߟߏ߲ߓߊ߫ ߟߋ߬ ߘߐ߫ ߓߌ߬߸ ߊ߬ ߟߊ߫ ߓߊ߯ߙߊ ߓߘߊ߫ ߓߐ߫ ߜߍߟߊ߫ ߞߊ߬ ߓߍ߲߬ ߟߏ߲ ߡߍ߲ ߡߊ߬، ߓߊߏ߬߸ ߒߞߏ ߦߋ߫ ߜߋߟߋ߲ߜߋߟߋ߲ ߠߎ߬ ߞߣߐ߫ ߕߋ߲߬߸ ߊ߬ ߓߘߊ߫ ߛߋ߫ ߕߟߋ߬ߓߊ߮ ߟߎ߬ ߞߣߐ߫߸ ߟߥߊߟߌߟߊ߲ ߠߎ߬ ߦߋ߫ ߦߋ߲߬ ߕߋ߲߬ ߒߞߏ ߘߐ߫، ߏ߬ ߟߋ ߓߍ߯ ߦߴߊ߬ ߦߌ߬ߘߊ߬ ߟߊ߫ ߞߏ߫ ߛߟߏ߬ߡߣߊ߬ ߞߊ߲ߕߍ߫ ߗߍ ߓߘߊ߫ ߘߎߢߊ߫ ߣߝߊ߬.
ߛߌ߲ߘߌߓߊ߮ ߟߊ߫ ߛߊ߬ߦߊ ߕߍ߫ ߞߍ߫ ߟߊ߫ ߒߞߏ ߞߊߙߊ߲ߘߋ߲ ߠߎ߬ ߓߟߏ߫ ߡߊ߬ߞߎ߲߬ ߘߌ߫ ߦߋ߲߬ ߕߋ߲߬ ߘߋ߬߸ ߊ߬ߟߎ߬ ߦߴߊ߬ ߞߍ߫ ߟߴߊ߬ߟߎ߬ ߟߊ߫ ߞߍߣߍ߲ ߠߎ߬ ߢߊߝߐ߫ ߟߏ߲ ߠߋ߬ ߘߌ߫߸ ߞߊ߬ ߘߎߢߊ߫ ߤߊ߲ߞߟߌ ߟߊߖߌ߰ ߊ߬ ߟߊ߫ ߞߏ ߞߐ߫، ߏ߬ ߟߋ ߘߐ߫߸ ߞߎߣߎ߲߬ ߞߍ߲ߘߍߟߏ߲ ߡߊ߬߸ ߟ.ߞ.ߝ ߘߍ߬ߞߙߎ ߞߊ߬ ߓߍ߯ ߡߊߥߟߋ߫ ߞߐߣߊߞߙߌ߫ ߓߏ߲ߝߌ߲߫ ߞߊ߬ߙߊ߲߬ߘߊ߬ߓߊ ߟߊ߫߸ ߞߊ߬ ߛߌ߲߬ߓߏ߲߬ߛߌ ߞߍ߫.
ߊ߲ ߧߋ߫ ߞߎߡߊ߫ ߟߴߊߟߎ߫ ߦߋ߫ ߦߙߐ ߡߍ߲ ߝߣߊ߫ ߘߐ߫ ߕߋ߲߬߸ ߒߞߏ ߘߎ߲ߓߎ ߦߋ߫ ߖߊ߲߬ߖߏ߲߬ߓߊ߫ ߞߊ߲߬ ߡߌ߬ߙߌ߲߬ߘߌ ߟߊ߫ ߞߎߓߋ ߟߊ߫߸ ߖߡߊ߬ߣߊ ߡߐ߰ߘߐ߬ߜߍ߬ ߛߌߦߊߡߊ߲߫ ߡߊߞߟߌߣߍ߲߫ ߡߍ߲ ߘߐ߫، ߏ߬ ߝߣߊ߫ ߦߴߊ߬ߟߎ߬ ߛߌ߲߬ߓߏ߲߬ߛߌ߬ ߞߋߟߋ߲ ߠߋ߬ ߘߌ߫߸ ߞߊ߲ߕߍ߫ ߟߊߓߊ߯ߙߊ ߟߎ߬ ߢߊߝߐ߫ ߞߊ߲ߡߊ߬.
ߏ߬ ߢߊ߫ ߞߋߟߋ߲߫ ߔߋ ߟߋ߬ ߝߣߊ߫ ߡߊ߬߸ ߛߌ߯ߙߌ߲߫ ߟ.ߞ.ߝ ߦߋ߫ ߖߊ߲߬ߖߏ߲߬ߓߊ߫ ߞߊ߲߬ ߕߋ߲߬߸ ߞߊ߬ ߞߊ߬ߙߊ߲߬ߘߋ߲ ߠߎ߬ ߟߊ߫ ߖߐ߲ߓ߲߫ ߠߕߊߡߌ߲ ߠߎ߬ ߣߌ߫ ߥߊߟߢߌߡߊߟߐ߲߫ ߛߙߋߓߍ߫ ߟߕߊߡߌ߲ ߠߎ߬ ߞߍ߫، ߛߌ߲߬ߓߏ߲߬ߛߌ ߓߍߣߊ߬ ߞߍ߫ ߏ߬ ߟߎ߬ ߝߣߊ߫ ߓߟߏ߫ ߓߌ߬ ߛߎ ߣߌ߲߬ ߘߐ߫.
ߒߞߏ ߓߘߊ߫ ߞߍ߫ ߒ߬ ߠߊ߫ ߞߘߐ߬ߡߊ߲߫ ߕߊ߬ߡߌ߲߬ߣߍ߲ ߠߎ߬ ߞߏ߲ߢߌ߲ ߘߌ߫߸ ߞߊ߬ ߛߌߣߌ߲߫ ߣߊ߬ߕߐ ߦߋߟߋ߲߫ ߓߏ߲ߓߊ ߘߊ ߟߊߞߊ߬، ߊߟߊߡߵߊߟߊ߫ ߤߌߣߊ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߟߊ߫ ߟߊ߫ ߟߋ߬ ߘߍ߯.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
