ߞߎߣߎ߲߬ ߞߐ߬ߓߊ߬ߟߏ߲ ߡߊ߬ ߂߀߂߅ ߞߏߟߌ߲ߞߏߟߌ߲ ߕߋ߬ߟߋ߫ ߂߂߸ ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߞߊ߬ ߛߌ߲߬ߝߏ߲߬ߧߊ߬ߟߌ߬ߓߊ߫ ߞߍ߫ ߡߏ߬ߙߌ߬ߢߎ߬ߡߊ߬ߟߊ߫߸ ߞߊ߬ ߦߋ߲߬ߞߊ ߟߎ߬ ߣߴߊ߬ߟߎ߬ ߟߊߡߌߣߌ߲ ߡߎ߰ߡߍ ߟߊߓߐ߫ ߛߍߥߊ ߦߌ߬ߘߊ ߘߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫߸ ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲ ߘߐ߫، ߏ߬ ߞߍ߫ ߘߊ߫ ߟߐ߲ߠߌ߲ߦߊ߫ ߟߊߖߊ߲ߞߏ ߣߌ߫ ߡߙߌߦߊ߫ ߟߊߖ߲ߊߞߏ ߘߌ߫ ߥߎ߬ߘߊ߲ ߘߝߊߣߍ߲ ߠߋ߬ ߘߐ߫.
ߡߏ߬ߙߌ߬ߢߎ߬ߡߟߊ߬ ߦߋ߫ ߣߐ߬ߘߎ߯ ߟߋ߬ ߘߌ߫߸ ߡߍ߲ ߦߋ߫ ߓߊߙߏ߫ ߡߙߊ߬ߘߊ߬ߙߋ߲ ߘߐ߫، ߒ߬ߓߊ߬߸ ߖߡߊ߬ ߟߊ߬ߓߐ߬ߓߊ߫ ߟߋ߬ ߞߍ߫ ߘߊ߫ ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߓߘߍ߬ߓߘߍ߬ߟߌ߬ ߕߏ߯ߝߏ ߓߟߏ߫ ߦߋ߲߬߸ ߡߍ߲ ߦߋ߫ ߞߏ߫ ߟߊߞߊ߬ߟߌ߬ߕߊ ߖߍ߬ߘߍߖߍ߬ߘߍ ߘߌ߫، ߟߐ߲ߠߌ߲ߦߊ߫ ߟߊߖߊ߲ߞߏ߫ ߞߏ ߟߎ߬ ߞߍ߫ ߘߊ߫ ߟߋ߬߸ ߓߙߊߕߌ߮ ߟߎ߬ ߟߊ߫ ߘߎ߲߬ߘߎ߲߬ߓߊ߬ ߘߐ߲ ߣߌ߫ ߞߏ߲߬ߘߋ߲߬ ߠߊ߬ߓߐ ߣߌ߫ ߛߓߏ߬ߣߍ߲߬ ߠߊ߬ߓߐ ߟߎ߬ ߕߊ߬ߣߍ߲ ߞߵߊ߬ ߟߊ߫ ߘߏ߲߬ߛߏ ߟߎ߬ ߟߊ߫ ߓߙߊ߫ ߘߐߦߊ߯ߟߊ ߣߌ߫ ߛߙߍߥߊ߫ ߝߐߟߌ ߟߎ߬ ߞߊ߲߬߸ ߊ߬ ߣߌ߫ ߛߘߍ߫ ߕߏߟߏ߲ ߠߎ߬ ߣߌ߫ ߛߏ ߡߏ߬ߛߏ ߟߎ߬ ߟߊ߫ ߓߐߟߌ߸ ߏ߬ ߞߊ߬ ߟߊ߬ߡߊ߮ ߘߏ߲߬ ߓߙߊ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߘߋ߲߬ ߡߊ߫ ߕߌߢߍ߫، ߝߘߊߡߊ߫ ߓߊ߰ߓߎ߬ ߃ ߝߣߊ߫ ߞߊ߬ ߡߊ߲߬ߘߋ߲߬ ߞߊ߲ ߝߐ߫ ߡߊ߲߬ߘߋ߲߬ߞߊ ߟߎ߬ ߦߋ߫߸ ߞߵߊ߬ ߦߌ߬ߘߊ߬ ߞߏ߫ ߒߞߏ ߡߐ߮ ߟߎ߬ ߞߊ߫ ߢߌ߬ߣߴߊ߬ ߞߐ߫ ߘߋ߬߸ ߞߊ߬ ߓߍ߯ ߟߊ߲߬ߓߋ߲߬ ߘߴߊ߬ ߡߊ߬، ߏ߬ ߕߎ߬ߡߊ߸ ߗߋߘߋ߲ ߠߎ߬ ߓߘߊ߫ ߛߣߍ߫ ߞߊ߬ ߓߐ߫ ߝߊ߲߬ ߛߌߦߊߡߊ߲߫ ߘߐ߫߸ ߞߊ߲ߞߊ߲߫ ߣߌ߫ ߞߐߣߊߞߙߌ߫߸ ߞߵߏ߬ ߟߊ߫ ߞߙߎ߬ߛߊ߬ ߣߌ߫ ߛߏ߫ ߛߌߦߊߡߊ߲߫ ߜߘߍ߫ ߟߎ߫ ߞߊ߲߬.
ߖߊ߲߬ߖߏ߲ ߘߊߡߌ߬ߣߊ߬ ߘߊ߫ ߡߌ߬ߛߍ߲߬ ߞߋߟߋ߲߫ ߛߌߡߊߟߌ ߟߋ߬ ߡߊ߬ ߝߊ߲ߕߓߊ߫ ߝߌ߬ߟߊ ߦߋ߫߸ ߡߍ߲ ߠߎ߬ ߕߏ߫ ߘߊ߫ ߓߌ߬ߟߊ߬ߒ߬ߘߐ߬ߖߎ߮ ߘߐ߫ ߂߀߂߅ ߘߓߊ߬ߕߊ ߕߟߋ߬ ߁߁ ߡߊ߬߸ ߞߵߊ߬ߟߎ߬ ߞߐߛߊ߬ߦߌ߲߬ߕߐ߬ߟߊ ߕߏ߫ ߞߊ߬ ߓߐ߫ ߕߏ߰ߝߏ ߟߊߥߊ߲߬ߞߊ߲ ߘߐ߫ ߞߙߎ߬ߛߊ߬، <<ߊ߬ߟߎ߬ ߕߴߊ߲ ߝߍ߬ ߦߊ߲߬ ߓߌ߬߸ ߓߊ߬ߙߵߊ߬ߟߎ߬ ߦߴߊ߲ ߘߐ߫.>> ߞߊ߲ߕߌ߯ ߛߙߍߞߍ ߟߋ߬ ߞߵߏ߬ ߝߐ߫߸ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬.
ߊ߬ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߊ߬ ߕߏ߰ߝߏ ߡߙߌߦߊ ߦߌ߬ߘߊ߬ ߣߌ߫ ߞߎߡߊ߫ ߛߌߦߊߡߊ߲߫ ߣߌ߫ ߕߙߎߕߙߎߟߌ߫ ߕߍ߫: << ߊ߲ ߞߊ߲ ߡߊߦߟߍ߬ߣߍ߲ ߘߴߊ߬ ߝߐ߫ ߜߋ߲ߜߋߟߋ߲߫߸ ߞߵߊ߬ ߝߐ߫ ߖߌ߬ߣߍ߬ ߣߌ߫ ߖߌ߬ߣߍ߬ߞߊ ߓߍ߯ ߦߋ߫: ߞߏ߫ ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߓߘߊ߫ ߓߌ߫߸ ߞߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲߫.>> ߏ߬ ߡߍ߲ ߡߊ߫ ߞߍ߫ ߊ߬ߟߎ߬ ߓߟߏ߫ ߜߊ߲ߛߊ߲߫، ߓߊߏ߬߸ ߊ߬ߟߎ߬ ߟߊ߫ ߞߎߡߊ ߞߵߊ߬ ߦߌ߬ߘߊ߬ ߞߏ߫ << ߊ߬ ߞߎ߲߭ ߦߋ߫ ߘߍ߲߬ߞߣߍ߬ߦߊ ߟߋ߬ ߘߌ߫ ߢߌߣߌ߲ߞߏ ߘߏ߫ ߡߊ߬߸..>> ߞߊ߬ߕߎ߲߯߸ ߞߏ߫ ߓߊ߯ߙߊ ߡߍ߲ ߞߍߣߍ߲߫ ߛߌ߰ߞߊ߲ ߞߣߐ߫ ߝߊ߬ߛߏ߬ ߞߊ߲ ߠߎ߬ ߟߊߞߎ߲߬ߠߊ߬ߛߌ߰ߦߊ ߘߌ߫߸ << ߞߊ߬ߦߌ߯ ߖߌ߬ߣߍ߫ ߞߵߊ߬ ߟߊ߫ ߖߘߍ߬ߕߌ߰ߦߊ ߕߊ߬߸ ߊ߬ ߛߋ߲߬ߢߊ߬ ߝߟߐ ߟߋ߬ ߞߍ߫ ߘߴߏ߬ ߘߌ߫߸ ߖߡߊ߬ߣߊ߬ߘߋ߲ ߠߎ߬ ߟߊ߫ ߞߊ߲ ߦߋ߫ ߟߊߦߟߍ߬߸ ߞߵߊ߬ ߣߌ߫ ߝߊ߬ߙߊ߲߬ߛߌ߬ ߞߊ߲ ߓߍ߯ ߓߌ߬ߟߊ߬ ߘߊߞߎ߲߫ ߞߋߟߋ߲߫ ߘߐ߫ ߛߊ߬ߙߌ߬ߦߊ߬ߛߎ߲߬ߓߊ ߞߣߐ߫.>> ߏ߬ ߘߏ߲߬ ߦߋ߫ <<ߟߐ߲ߠߌ߲ߦߊ ߥߎ߬ߦߊ߲߬ߞߌ߬ߟߌ ߟߋ߬ ߘߌ߫.>>
ߝߊ߬ߛߏ߬ ߞߊ߲߬ ߞߏ ߛߍ߬ߘߏ߲߬ߠߊ ߣߌ߫ ߖߘߍ߬ߞߟߏ߬ߓߊ߰ߦߊ ߢߍߓߊ߮߸ ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ ߕߘߍ߬ ߞߣߍ ߞߊ߲߬߸ ߏ߬ ߞߊ߬ ߖߐ߲߲ߖߐ߲ ߠߊ߫ ߛߙߊ߬ߣߎ߲ ߞߊ߲߬ߟߊ߫، ߞߵߊ߬ ߦߌ߬ߘߊ߬ ߞߏ߫ <<ߖߌ߬ߣߍ߫ ߞߊ߬ߣߌ߲߸ ߏ߰ ߟߐ߲߫ ߠߊ߫ ߖߌ߬ߣߍ߬ ߞߊ߲ ߝߐ ߟߋ߬ ߘߐ߫.>> ߊ߬ ߓߊ߲߫ ߘߊ߫ ߞߊ߬ ߓߍ߯ ߞߟߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߛߎߥߊ߲ߘߌ ߡߊ߬ ߢߣߊߕߊߟߌ߫ ߣߊ߬ߕߐ ߘߐ߫، ߊ߬ ߞߊ߬ ߢߣߊߕߊߟߌ ߏ߬ ߞߍߢߊ ߢߊߝߐ߫߸ ߛߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߌ߫ ߛߎߘߊ߲߫߸ ߞߊ߬ ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲ ߓߊ߯ߙߊ ߘߊߓߊ߲߫.
ߊ߬ߟߋ߬ ߖߡߊ߬ ߟߊ߬ߓߐ߬ ߞߋߟߋ߲ ߣߌ߲߬ ߘߐ߫߸ ߞߊ߲ߕߌ߮ ߟߊ߫ ߞߐߙߍ ߞߊ߬ ߗߋߘߋ߲ ߘߏ߫ ߟߎ߫ ߟߊߕߊ߯ ߞߊ߬ ߝߘߊ߫ ߞߊ߲ߞߊ߲߫ ߠߊ߫߸ ߡߍ߲ ߠߎ߬ ߟߊߕߊ߯ ߘߊ߫ ߊߦߌߛ߭ߊ߬ ߘߎ߲ߓߎߦߊ߫ ߓߟߏ߫، ߗߋߘߋ߲ ߏ߬ ߟߎ߬ ߢߍߡߌ߬ߣߊ߬ߣߍ߲߫ ߕߘߍ߬ ߡߏ߬ߤߊ߬ߡߍߘ ߣߊ߬ߔߏ ߟߋ߬ ߓߟߏ߫߸ ߏ߬ ߟߎ߬ ߟߊߓߍ߲߬ ߘߊ߫ ߥߎ߬ߘߊ߲ ߘߝߊߣߍ߲ ߠߋ߬ ߘߐ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫: <<ߊ߲ ߕߎ߲߬ ߕߴߊ߬ ߖߌ߰ ߟߊ߫ ߕߋ߲߬، ߣߴߊߟߊ߫ ߛߐ߲߬ ߘߊ߫߸ ߊ߲ ߣߊ߬ߕߐ߫.>> ߊ߬ߟߎ߬ ߓߊ߲߫ ߘߊ߫ ߞߊ߬ ߖߐ߬ߟߋ߲߫ ߄߀߀ ߞߍ߫ ߛߌ߲߬ߝߏ߲߬ߧߊ߬ߟߌ߬ߟߊ ߟߎ߬ ߡߊߜߍ߲ ߘߌ߫.
ߛߌ߲߬ߝߏ߲߬ߧߊ߬ߟߌ߬ߟߊ ߟߎ߫ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߛߋ߫ ߘߊ߫ ߖߡߊ߬ ߟߊ߬ߓߐ ߣߌ߲߬ ߞߍ߫ ߟߊ߫ ߟߋ߬߸ ߣߌ߫ ߡߐ߰ ߟߊ߫ ߘߙߐߡߍ߫ ߕߴߊ߬ ߘߐ߫ ߊ߬ߟߎ߬ ߡߊߜߍ߲ ߘߌ߫߸ ߕߏ߰ߝߏ ߖߍ߬ߘߍ ߟߋ߬ ߞߵߊ߬ ߓߍ߯ ߞߍ߫، ߏ߬ ߟߋ ߘߐ߫߸ ߊ߬ߟߎ߬ ߞߊ߲߫ ߞߏ߫ ߡߏ߬ߙߌ߬ߢߎ߬ߡߊ߬ߟߊ߫ ߖߡߊ߬ ߟߊ߬ߓߊ ߣߌ߲߬ ߞߘߐ ߟߋ߬߸ ߞߏ߫: ߞߊ߬ ߝߋ߲߫ ߦߋ߫ ߝߊ߬ߛߏ߬ ߞߊ߲ ߠߎ߬ ߘߐ߫߸ ߞߵߊ߬ ߟߐ߲߫ ߞߏ߫ ߊ߬ߟߋ ߟߋ߬ ߞߊ߫ ߞߊ߲߫ ߞߊ߬ ߓߌ߬ߟߊ߬ ߞߏ ߓߍ߯ ߢߍ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
