ߖߊ߬ߡߊ߫ ߘߍ߬ߜߍ ߟߋ߬ ߞߵߊ߬ߟߎ߬ ߟߊߘߍ߬ ߖߊ߲ߛߎߡߣߊ߫ ߞߣߐ߫߸ ߞߊ߬ߙߊ߲߬ߡߐ߯ ߛߏ߬ߟߏ ߞߊ߬ߣߌ߲߬ߓߊ߮ ߡߐ߱ ߥߊ߯ ߦߙߌߞߊ ߟߋ߬ ߝߘߊ߫ ߘߊ߫ ߦߙߐ߫ ߓߐߣߍ߲߫ ߢߐ߲߰ ߡߊ ߟߎ߬ ߣߌ߫ ߖߡߊ߬ߣߊ߬ ߓߐߣߍ߲߫ ߢߐ߲߰ ߡߊ ߟߎ߬ ߞߣߐ߫߸ ߞߊ߬ ߣߊ߬ ߛߐ߬ߘߐ߲߬ ߛߎ߲ߞߊߙߏߡߊߞߐߣߐ߲ ߕߟߋ߬ ߁߅ ߛߎ ߟߊߢߣߊߡߦߊ ߘߐ߫ ߞߊ߬ߙߊ߲߬ߡߐ߯ ߛߏ߬ߟߏ ߕߍ߰ߟߊ ߘߐ߫، ߏ߬ ߞߍ߫ ߘߊ߫ ߘߌ߯ߣߊ ߖߊ߲߬ߖߏ߲߬ߓߊ߫ ߟߋ߬ ߘߌ߫߸ ߘߎ߬ߥߊ߬ߥߎ߬ ߛߌߦߊߡߊ߲߫ ߞߍ߫ ߘߊ߫ ߡߍ߲ ߘߐ߫߸ ߟߊ߬ߟߌ߬ߟߌ߬ ߛߌߦߊߡߊ߲߫ ߞߍ߫ ߘߊ߫ ߡߍ߲ ߘߐ߫ ߞߵߊ߬ ߓߍ߲߬ ߝߊ߰ߡߊ ߟߎ߫ ߡߊ߬߸ ߊ߬ ߣߌ߫ ߖߡߊ߬ߣߊ߬ߘߋ߲ ߠߎ߫ ߖߍ߬ߘߍ ߡߊ߬.
ߖߊ߲ߛߎߡߣߊ߫ ߦߋ߫ ߘߎ߱ ߘߏ߫ ߟߋ߬ ߘߌ߫ ߞߊ߲ߞߊ߲߫ ߘߊߝߍ߬ ߞߎߘߍ߫ ߘߊ߲ߘߐ߫ ߟߊ߫߸ ߛߏ ߏ߬ ߟߋ ߝߊ߫ ߘߊ߫ ߞߐ߬ߓߊ߬ߟߏ߲ ߂߀߂߆ ߞߏ߲ߞߏߜߍ ߕߋ߬ߟߋ߫ ߂ ߡߊ߬߸ ߞߵߊ߬ ߝߊ߫ ߞߵߊ߬ ߓߐߟߐ߲ߓߐߟߐ߲ߓߐ߫، ߏ߬ ߞߎ߲߭ ߞߍ߫ ߘߊ߫ ߛߎ߲ߞߊߙߏߡߊߣߐ߲ ߕߟߋ߬ ߁߅ ߛߎ ߟߊߢߣߊߡߦߊ ߟߋ߬ ߘߌ߫ ߣߎߙߑߘߌߣ ߌߛߑߟߊߡ ߘߏ߲߬ߞߏ ߟߎ߬ ߓߟߏ߫߸ ߏ߬ ߡߍ߲ ߦߋ߫ ߞߍ߫ ߟߴߊ߬ߟߎ߬ ߓߟߏ߫ ߝߌ߬ߘߊ߬ߥߎ߬ߓߊ߫ ߘߌ߫ ߛߊ߲߭ ߓߍ߯ ߟߊ߫ ߛߐ߲߬، ߒ߬ߓߊ߬߸ ߏ߬ ߓߍ߲߬ߒ߬ߛߋ߲߬ߡߊ ߟߋ߬ ߞߍ߫ ߘߊ߫ ߕߙߎ߬ ߘߌ߫߸ ߛߌ߬ߟߡߊ߬ߘߋ߲ ߛߌߦߊߡߊ߲߫ ߕߊ߬ߣߍ߲ ߞߵߊ߬ ߟߊ߫ ߞߊ߲ߞߊ߲߫ ߝߊ߰ߡߊ ߟߎ߫ ߞߊ߲߬߸ ߏ߬ ߟߎ߫ ߞߵߊ߬ߟߎ߬ ߟߊߘߍ߬ ߥߊߟߖߌ ߣߌ߲߬ ߞߐߝߍ߬ ߊ߬ ߥߟߏߛߟߎ߫ ߡߐ߬ߛߟߎ ߟߊ߫߸ ߞߊ߬ߙߊ߲߬ߡߐ߯ ߛߎ߬ߟߋ߬ߡߊߣ ߛߘߌ߬ߓߋ߬߸ ߊ߬ߟߋ ߡߍ߲ ߡߊߟߐ߲߫ ߕߐ߮ ߦߋ߫ ߞߊ߬ߙߊ߲߬ߡߐ߯ ߛߏ߬ߟߏ ߘߌ߫، ߖߊ߲߬ߖߏ߲߬ߓߊ߫ ߟߋ߬ ߕߊ߬ߡߌ߲߬ ߘߊ߫߸ ߡߍ߲ ߞߣߐߞߏ ߥߙߊ߬ ߘߊ߫ ߘߎ߬ߥߊ߬ߥߎ߬ ߓߛߍ ߟߎ߬ ߟߊ߫߸ ߊߟߊ߫ ߡߊߕߙߊ ߟߊ߫.
ߞߊ߬ߙߊ߲߬ߡߐ߯ ߛߏ߬ߟߏ ߣߊ߬ ߘߊ߫߸ ߓߊ߬ߛߊ߲߬ ߦߙߌ߬ߞߌ߬ߓߊ߬ ߜߍߡߊ߲ ߞߊ߲߬ߓߍ߲ ߦߴߊ߬ ߞߊ߲ߠߊ߫߸ ߞߵߊ߬ ߟߊߡߌߣߌ߲ߣߍ߲ ߕߏ߫ ߣߊ߲߬ߕߌ߮ ߟߎ߬ ߟߴߊ߬ ߝߊ߬ߘߌ߬ߞߣߐ߬ߜߍ߲߬ ߞߊ߲ߡߊ߬، ߊ߬ ߞߵߊ߬ ߟߐ߬ ߊ߬ ߟߊ߫ ߓߏ߲ߓߊ߫ ߟߐ߬ߣߍ߲ ߘߊ ߟߋ߬ ߞߘߐ߫߸ ߞߊ߬ ߡߐ߱ ߟߎ߬ ߞߟߌ߫ ߊߟߊ߫ ߟߐ߲ ߡߊ߬߸ ߞߊ߬ ߓߊ߲߫ ߞߊ߬ ߛߎߓߊ ߣߌ߲߬ ߕߐ߬ߣߐ ߢߊߝߐ߫ ߛߌ߬ߟߡߊ߬ߦߊ ߞߣߐ߫߸ ߟߊ߬ߕߍ߰ ߞߏ ߣߌ߫ ߞߏ ߕߐ߬ߡߊ ߟߎ߬ ߘߐ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߛߎ ߣߌ߲߬ ߦߋ߫ ߛߎ߫ ߟߋ߬ ߘߌ߫߸ ߡߍ߲ ߣߌ߫ ߛߎ ߕߐ߭ ߟߎ߬ ߡߊ߲߫ ߞߊ߲߫. ߊ߬ ߞߵߊ߬ ߦߌ߬ߘߊ߬ ߞߏ߫ ߓߍ߯ ߣߴߊ߬ ߡߊ߬ߞߏ߫ ߟߋ߬ ߣߊ߬ߣߍ߲߬߸ ߓߍ߯ ߣߴߊ߬ ߥߊ߬ߣߌ߲߬ߞߋ߫ ߟߋ߬ ߘߏ߲߬ ߦߋ߫ ߞߣߍ ߞߊ߲߬، ߏ߬ ߘߐ߫߸ ߞߏ߫ ߊ߬ ߓߘߊ߫ ߊߟߊ߫ ߕߙߊ߫߸ ߊ߬ߟߋ ߤߊߡߌ߲ ߣߌ߫ ߖߊ߬ߡߊ ߤߊߡߌ߲ ߦߊ߬ߙߊ ߟߊ߫߸ ߞߊ߬ ߡߐ߱ ߟߎ߬ ߟߊ߫ ߟߊ߬ߕߍ߮ ߟߎ߬ ߡߊߦߟߍ߬ߡߊ߲߬߸ ߞߊ߬ ߓߍ߬ߘߍ ߟߎ߬ ߟߊߕߍ߰߸ ߖߎ߯ߡߊ߲ ߠߎ߬ ߡߊߝߊ߬ߟߋ߲߬، ߓߊߏ߬߸ ߊ߬ߟߋ ߟߊ߫ ߖߊ߬ߕߋ߬ ߘߐ߫߸ ߘߎ߬ߥߊ߬ߥߎ ߘߌ߫ ߛߋ߫ ߟߊ߬ߕߍ߮ ߘߐߦߟߍ߬ߡߊ߲߬ ߠߊ߫.
ߞߊ߬ߙߊ߲߬ߡߐ߯ ߛߏ߬ߟߏ ߟߊ߫ ߛߙߊ߬ߣߎ߲߬ߞߊ߲߬ߠߊ ߟߎ߬ ߘߐ߫߸ ߊ߬ ߞߊ߬ ߞߎߡߊ߫ ߕߣߐ߬ߡߊ߬ ߛߌߦߊߡߊ߲߫ ߝߐ߫ ߡߐ߱ ߟߎ߬ ߖߏ߯ߘߏ߲߭ ߘߐ߫߸ ߊߘߡߊߘߋ߲ߧߊ ߟߊߛߓߊ߬ߕߌ ߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߓߍ߯ ߟߊߘߍ߬ߣߍ߲ ߞߊ߫ ߞߊ߲߫ ߞߊ߬ ߛߌߟߊ߲߫ ߡߊ߰ߙߌ ߦߋ߫߸ ߞߊ߬ ߖߟߎ߬ߡߎ߲ ߠߎ߬ ߡߊߕߊ߲߬ߞߊ߬، ߊ߬ ߞߊ߬ ߡߏ߬ߛߏ ߟߎ߬ ߞߟߌ߫ ߝߘߎ߫ ߟߓߊߕߏ ߟߊ߫߸ ߞߊ߬ ߗߍ߭ ߟߎ߬ ߞߟߌ߫ ߘߋ߲ ߠߎ߬ ߖߏ߯ߘߏ߲߭ ߠߊ߫߸ ߞߊ߬ ߓߍ߯ ߞߟߌ߫ ߝߋ߲߫ ߜߘߍ߫ ߟߎ߫ ߓߊ߬ߕߏ ߡߊ߬ ߡߍ߲ ߕߍ߫ ߊߟߊ߫ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߛߌ߬ߟߡߊ߬ߦߊ ߟߋ߬ ߘߐߙߐ߲߫ ߦߋ߫ ߛߌߟߊ߫ ߜߍߣߍ߲ ߘߌ߫.
ߘߌ߯ߣߊ߫ ߢߍߡߐ߮ ߣߌ߲߬ ߞߵߊ߬ ߦߌ߬ߘߊ߬ ߌߞߐ߫߸ ߞߏ߫ ߖߡߊ߬ߣߊ ߝߊ߰ߡߊ ߟߎ߬ ߝߣߊ߫ ߛߋ߲߬ ߦߴߊ߬ ߟߊ߫ ߞߎߡߊ ߘߐ߫، ߊ߬ ߞߵߊ߬ ߢߍߛߌ߲߫ ߝߊ߰ߡߊ ߟߎ߬ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߕߍ߬ߢߐ߮ ߣߌ߫ ߤߊߞߍ ߡߊߕߊ߲߬ߞߊ߲߬߸ ߏ߬ ߟߋ ߖߎ߯ߡߊ߲߫ ߞߏ ߓߍ߯ ߘߌ߫، ߊ߬ ߞߊ߬ ߖߌ߬ߣߍ߬ ߞߊ߲ߓߍ߲ ߞߊ߲ߕߌ߮ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߐ߯ߘߐߕߍ߰߸ ߞߊ߬ ߞߎߡߊ ߢߍߛߌ߲߫ ߞߎ߲߬ߠߊ߬ߛߌ߮ ߛߌ߲߬ߝߏ߲ ߠߎ߬ ߡߊ߬߸ ߡߙߊ߬ߓߊ߰ߘߎ߯ߟߊ ߟߎ߫ ߡߊ߬߸ ߞߏߕߌ߮ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߝߘߊ߫ ߖߡߊ߬ߣߊ߬ߘߋ߲ ߠߎ߬ ߕߐ߬ߢߍ߰ ߟߊ߫، ߊ߬ ߞߊ߲߫ ߞߏ߫ ߕߐ߬ߢߍ߮ ߡߊ߫ ߢߌ߲߬߸ ߊ߬ ߦߋ߫ ߞߏߖߎ߯ ߟߋ߬ ߘߌ߫߸ ߓߊߛߌ߫ ߜߘߍ߫ ߕߍ߫ ߡߍ߲ ߠߊ߫ ߟߌ߬ߡߣߊ߬ߦߊ ߞߐ߫.
ߞߊ߬ߙߊ߲߬ߡߐ߯ ߛߏ߬ߟߏ ߞߵߊ߬ ߦߌ߬ߘߊ߬߸ ߞߏ߫ ߊߟߊ߫ ߦߋ߫ ߛߌ߬ ߘߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬، ߤߊߟߌ߬ ߣߴߊ߬ ߡߊ߫ ߘߌߦߊ߫ ߡߐ߰ ߦߋ߫߸ ߓߊ߬ߙߌ߬ ߖߌ߬ߣߍ߫ ߖߡߊ߬ߣߊ ߞߊ߫ ߞߊ߲߫ ߞߊ߬ ߘߌߦߊ߫ ߓߍ߯ ߦߋ߫߸ ߏ߬ ߟߋ ߕߐ߬ߣߐ ߓߏ߲߬ߓߊ߬، ߊ߬ ߞߵߊ߬ ߟߴߊ߬ ߞߊ߲߬ ߞߏ߫ ߊ߬ ߦߋ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߖߐ߲߭ ߠߋ߬ ߘߌ߫߸ ߤߊ߲߯ ߊ߬ ߦߋ߫ ߟߊ߫ ߞߊߛߊ߲ߞߋ ߘߐ߫ ߟߏ߲ ߡߍ߲.
ߞߊ߲ߞߊ߲߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ߸ ߝߊߙߌ߲ ߊ߬ߟߌ߫ ߓߊߘߊ߬ߙߊ߫ ߞߡߊ߬ߙߊ߬ ߝߣߊ߫ ߞߊ߬ ߖߊ߲߬ߖߏ߲߬ ߛߎ߮߮ ߣߌ߲߬ ߕߊ߲߬ߘߏ߫߸ ߡߍ߲ ߦߋ߫ ߛߌ߬ߟߡߊ߬ߦߊ ߣߐ߭ ߟߊߘߊ߲߫ ߠߊ߫ ߘߍ߭ ߞߣߐ߫߸ ߊ߬ ߣߌ߫ ߘߋ߲ߡߌߛߍ߲ߧߊ߫ ߖߍ߬ߘߍ ߝߣߊ߫ ߡߊ߬.
<<ߊ߲ ߛߍߥߊߣߍ߲߫ ߠߋ߬ ߖߡߊ߬ ߛߎ߮ ߢߌ߲߬ ߠߊ߫ ߓߐߟߌ ߟߊ߫ ߓߌ߬ ߢߐ߲߰ ߟߏ߲߫، ߣߌ߲߬ ߓߘߴߊ߬ ߦߌ߬ߘߊ߬ ߞߏ߫ ߛߌ߬ߟߡߊ߬ߦߊ ߛߋ߲߬ߓߊ߫ ߦߋ߫ ߊߘߡߊߘߋ߲ ߠߎ߬ ߟߊ߫ ߓߟߏ߫ ߘߌ߫ ߢߐ߲߰ ߡߊ ߘߐ߫߸ ߘߋ߲ ߠߎ߬ ߖߏ߯ߘߏ߲߭ ߘߐ߫، ߘߏ߫ ߓߘߊ߫ ߓߐ߫ ߖߊߟߌߞߊ ߟߊ߫ ߟߎ ߟߎ߬ ߞߣߐ߫߸ ߒ߬ߓߊ߬߸ ߊߟߎ߫ ߦߋ߫ ߥߊ߫ ߡߐ߱ ߟߎ߬ ߥߟߍߘߓߐ ߣߌ߲߬ ߡߊ߬، ߛߌ߬ߟߡߊ߬ߦߊ ߦߋ߫ ߖߡߊ߬ ߟߊ߬ߘߍ߬ ߘߌ߯ߣߊ ߟߋ߬ ߘߌ߫߸ ߡߍ߲ ߦߋ߫ ߡߐ߱ ߟߎ߫ ߞߊ߬ߙߊ߲߬ ߠߊ߫ ߢߌ߬ߡߊ߬ߦߊ ߟߊ߫.>> ߞߎ߲߬ߠߊ߬ߛߌ߰ߟߊ ߟߋ߬ ߞߊ߲߫ ߕߋ߲߬.
ߓߊߘߋ߲ ߠߎ߬߸ ߢߌ߬ߣߊ߲߬ ߛߎ߲ߞߊߙߏߡߊߞߐߣߐ߲ ߕߟߋ߬ ߁߅ ߛߎ ߟߊߢߣߊߡߦߊ ߕߊ߬ߡߌ߲߬ ߘߴߊ߬ ߢߌ߬ߡߊ ߟߊ߫ ߖߊ߲ߛߎߡߣߊ߫ ߞߣߐ߫߸ ߞߊ߬ߙߊ߲߬ߡߐ߯ ߛߏ߬ߟߏ ߞߊ߬ߣߌ߲߬ߓߊ߮ ߓߐ߫ ߘߊ߫ ߝߊ߲߭ ߓߍ߯ ߟߋ߬ ߘߐ߫ ߞߊ߬ ߣߊ߬، ߛߍߥߊ߸ ߊߟߊ߫ ߞߏߝߐ߸ ߘߎ߬ߥߊ߬ߥߎ߬ ߢߌߣߌ߲߸ ߏ߬ ߟߋ ߕߍ߬ߘߍ߫ ߖߊ߲߬ߖߏ߲ ߣߌ߲߬ ߘߐ߫ ߞߵߊ߬ ߛߌ߰ ߛߎߓߊ߯ ߛߊߟߌ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫
