ߢߍߡߌߘߊ߫ ߡߎߛߊ߫ ߘߊ߬ߘߌߛ ߞߡߊ߬ߙߊ߬ ߟߊ߫ ߗߡߍ߬ ߓߙߋߡߊ߫ ߞߘߐ߬ߡߊ߲߸ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫߸ ߏ߬ ߕߐ߬ߡߐ߲߬ ߘߊ߫ ߟߋ߬ ߞߐߣߊߞߙߌ߫ ߥߛߎߖߌ߲ߓߊ ߟߊ߫ ߞߎߣߎ߲߬ ߞߏ߲ߞߏߜߍ ߕߟߋ߬ ߁߀ ߡߊ߬، ߓߐߛߎ߲߫ ߛߌߦߊߡߊ߲߫ ߞߵߊ߬ ߦߌ߬ߘߵߊ߲ ߠߊ߫߸ ߞߏ߫ ߕߎ߲ߓߊ߬ ߕߐ߬ߡߐ߲ ߥߛߎ ߞߣߐ߫ ߏ߬ ߢߊ߸ ߏ߬ ߞߍ߫ ߘߊ߫ ߟߊ߬ߞߊ߲߬ߘߊ߬ߟߌ ߦߙߍߞߍߟߌ߫ ߟߋ߬ ߛߋ߲߭ߝߍ߬߸ ߡߍ߲ ߡߊ߬ߙߌ߬ߝߊ߬ ߡߊ߲ߞߊ߲ ߥߙߊ߬ ߘߊ߫߸ ߞߊ߬ ߡߊ߬ߘߌ߬ߡߌ߲߬ߠߌ߲ ߓߐ߫ ߊ߬ ߘߐ߫، ߊ߬ ߕߊ߬ ߘߊ߫ ߞߵߊ߬ ߟߊߕߊ߯ ߞߐ߰ߦߊ߫ ߣߊ߲߬ߒ߬ߕߊ߲߬ ߥߛߎߖߌ߲ ߠߋ߬ ߟߊ߫߸ ߊ߬ ߞߍߣߍ߲߫ ߦߏ߫ ߊ߬ ߦߋ߫ ߟߊ߬ߡߙߊ ߘߐ߫ ߦߋ߲߬ ߕߋ߲߬ߕߋ߲߬ ߣߌ߲߬ ߘߐ߫.
ߛߊ߲߬ ߕߊ߲߫ ߥߛߎ߫ ߖߊ߲߬ߞߌ߬ߟߌ ߟߋ߬ ߟߊߣߴߊ߬ߟߋ ߞߎ߲߬ ߂߀߀߉ ߕߎߟߊߝߌ߲ ߂߈ ߞߕߌ ߛߋ߲߭ߝߍ߬߸ ߕߎ߲ߓߊ߬ ߕߎ߲߬ ߦߴߊ߬ ߟߊ߫ ߥߛߎ ߏ߬ ߞߊ߲߬ ߞߐߣߊߞߙߌ߫ ߞߎߓߋߘߊ ߖߍ߬ߘߍ ߟߋ߬ ߞߣߐ߫، ߓߊ߬ߙߌ߬߸ ߞߕߌ ߞߏߟߊߕߍ߮ ߟߎ߬ ߞߊ߲߫߸ ߞߏ߫ ߘߐ߬ߖߎ߬ߖߎ߰ߟߌ ߘߏ߫ ߟߋ߬ ߛߌ߰ ߘߴߊ߬ߟߎ߬ ߓߟߏ߫ ߛߋ߲߬ߠߊ߫߸ ߕߎ߲ߓߊ߬ ߞߵߊ߬ ߜߟߍ߬ߦߊ߫ ߏ߬ ߟߋ ߓߊ߯ߙߊ ߘߐ߫.
ߞߐߣߊߞߙߌ߫ ߞߕߌ߫ ߡߛߊߦߌ߲ߘߊ ߞߕߌߞߊ߲ߘߊ߸ ߝߊ߬ߟߎ߫ ߘߎ߲߬ߓߎ߬ߦߊ߬ ߞߊ߲߫ ߞߏ߫ ߣߊ߲߬ߕߌ߮ ߟߎ߬ ߟߊߕߊ߯ ߞߎ߲ ߡߊ߫ ߞߍ߫ ߘߏ߫ ߜߘߍ߫ ߘߌ߫߸ ߞߊ߬ ߡߊ߬ߝߊ ߟߊߘߏ߲߬ ߦߋ߲߬߸ ߛߊ߫ ߖߛߎ߬ߛߎߡߊ ߘߌ߫ ߕߏ߫ ߥߛߎ ߞߣߐ߫ ߢߊ ߡߍ߲ ߡߊ߬.
ߓߊ߬ߙߌ߬߸ ߛߙߋ ߘߏ߫ ߟߎ߫ ߟߊ߫ ߝߐߟߌ߫ ߘߐ߫ ߞߊ߬ ߝߘߊ߫ ߕߐ߲ߓߟߏߡߊ߫ ߞߎ߲ߘߊ߫ ߟߊ߫߸ ߕߎ߲ߓߊ߬ ߕߐ߬ߡߐ߲߬ߕߐ߫ ߕߘߍ߬ ߟߏ߲߫ ߝߟߐ ߡߍ߲ ߘߐ߫߸ ߞߏ ߓߍ߯ ߞߍ߫ ߘߊ߫ ߏ߬ ߟߏ߲߸ ߊ߬ ߡߊ߫ ߓߍ߲߬، ߏ߬ ߕߋ߬ߟߋ߫ ߝߌ߬ߟߊ ߟߋ߬ ߞߍ߫ ߘߊ߫ ߞߏ߲ߞߏߜߍ ߕߟߋ߬ ߁߀ ߘߌ߫߸ ߣߊ߲߬ߕߌ߰ ߖߡߊ߬ ߛߌߦߊߡߊ߲߫ ߣߊ߬ ߘߊ߫ ߏ߬ ߟߋ ߛߋ߲߭ߝߍ߬߸ ߝߊ߲߬ߞߊ߬ ߓߟߏߡߊߞߊ߬ߣߍ߲ ߗߍ߬ߘߋ߲߬ ߛߌߦߊߡߊ߲߫߸ ߏ߬ ߟߎ߬ ߡߊ߫ ߘߛߍ߫ ߊ߬ ߟߊߓߐ߫ ߟߊ߫ ߡߎ߬ߕߎ߲߬ ߛߊ߫.
ߟߊ߬ߓߐ߬ߟߌ ߏ߬ ߟߋ ߢߊ߰ ߘߐ߬ߢߌߡߌ߲ ߛߌߦߊߦߊ߫ ߘߊ߫ ߥߛߎ ߞߣߐ߫ ߦߋ߲߬ ߞߏߛߓߍ߫߸ ߞߊ߬ ߕߊ߬ߘߌ߬ߓߊ߬ߕߊߘߌߓߊ ߟߊߘߏ߲߬، ߡߊ߬ߙߌ߬ߝߊ߬ ߞߊ߲ ߠߎ߬ ߓߐ߫ ߘߊ߫، ߊ߬ ߦߌ߬ߘߊ߬ߣߍ߲߬ ߛߙߋ ߟߎ߬ ߓߟߏ߫߸ ߥߛߎߟߊߘߋ߲߫ ߞߋߟߋ߲߫ ߓߣߐ߬ ߘߴߊ߬ ߣߌ ߘߐ߫߸ ߞߊ߬ ߛߌߦߊߡߊ߲߫ ߜߘߍ߫ ߟߎ߫ ߡߊߘߌߡߌ߲߫߸ ߘߏ߫ ߟߎ߫ ߟߊ߫ ߡߊ߬ߘߌ߬ߡߌ߲߬ߠߌ߲ ߖߍ߬ߘߍ ߖߎ߯ߦߊ߫ ߘߊ߫ ߟߋ߬ ߞߏߛߓߍ߫، ߟߌ߬ߤߟߊ ߏ߬ ߟߎ߫ ߞߏ߬ߣߌ߲ ߡߊ߫ ߟߊߕߍ߰ ߞߎ߲߬ߠߊ߬ߛߌ߮ ߓߟߏ߫ ߡߎߣߎ߲߬߸ ߓߊ߬ߙߵߊ߬ ߦߋ߫ ߟߊ߬ߛߙߋ߬ߦߊ߬ߟߌ߬ ߞߊ߲ ߘߏ߫ ߟߎ߫ ߟߋ߬ ߘߌ߫߸ ߓߟߏ߫ ߘߌ߫ ߛߋ߫ ߞߍ߫ ߟߊ߫ ߡߍ߲ ߠߊ߫.
ߊߟߎ߫ ߦߴߊ߬ ߟߐ߲߫߸ ߕߎ߲ߓߊ߬ ߞߍ߫ ߘߊ߫ ߥߛߎߟߊߘߋ߲߫ ߛߘߊߡߊ ߟߋ߬ ߘߌ߫ ߥߛߎ ߞߣߐ߫ ߦߋ߲߬߸ ߛߘߊ ߕߎ߲߬ ߦߴߊ߬ ߟߊ߫ ߝߋߝߋ߫߸ ߊ߬ ߕߌ߯ߕߌ߯ ߖߍ߬ߘߍ߸ ߣߊ߲߬ߕߌ߮ ߡߍ߲ ߠߎ߬ ߦߋ߫ ߟߊ߬ߡߙߊ ߘߐ߫ ߦߋ߲߬߸ ߊ߬ ߣߴߏ߬ ߛߌߦߊߡߊ߲߫ ߕߎ߲߬ ߓߘߊ߫ ߘߋ߬ߙߌ߬، ߊ߬ ߘߏ߲߬߸ ߊ߬ߟߋ ߟߊ߫ ߞߏ߫ ߞߘߐ߫ ߕߊ߬ߡߌ߲߬ߣߍ߲ ߠߎ߬ ߖߡߊ߬ߣߊ ߣߌ߲߬ ߞߣߐ߫߸ ߂߀߀߈ ߣߌ߫ ߂߀߀߉ ߛߋߓߊ߯ߦߊ ߕߎ߬ߡߊ ߟߊ߫߸ ߊ߬ ߣߴߊ߬ ߞߊ߬ ߞߏ ߡߍ߲ ߠߎ߬ ߞߍ߫ ߂߀߀߉ ߕߎߟߊߝߌ߲ ߂߈ ߖߊ߲߬ߖߏ߲ ߘߐ߫߸ ߏ߬ ߞߵߊ߬ ߟߊ߫ ߞߏ ߕߏ߫ ߟߋ߬ ߓߍ߯ ߦߟߌ߫ ߟߊ߫߸ ߞߵߊ߬ ߘߌߦߊߣߊ߲߫ ߡߐ߮ ߛߌߦߊߦߊ߫.
ߊ߬ ߞߏ߬ߣߌ߲߸ ߊ߬ ߟߊߓߐ ߞߐ߬ߙߐ߲߬ߕߌ߬ ߥߛߎߖߌ߲ߓߊ ߟߊ߫ ߞߵߊ߬ ߟߊߕߊ߯ ߞߐ߰ߦߊ߬߸ ߏ߬ ߡߊ߫ ߞߍ߫ ߞߏ߫ ߣߐ߲߯ ߘߌ߫، ߊ߬ ߛߌߦߊߡߊ߲ ߘߏ߲߬ ߘߐ߫߸ ߊ߬ ߥߊߣߍ߲߫ ߦߙߐ ߞߎߘߊ ߡߍ߲ ߘߐ߫ ߣߌ߲߬߸ ߊ߬ ߟߌ߬ߤߟߊ ߓߍߣߊ߬ ߡߊߝߊ߬ߟߋ߲߫ ߦߋ߲߬߸ ߊ߬ ߕߘߍ߬ ߢߊ ߡߍ߲ ߡߊ߬ ߞߐߣߊߞߙߌ߫߸ ߞߵߏ߬ ߡߊߝߊ߬ߟߋ߲߬ ߝߛߊߦߌ߫، ߊ߬ ߟߊ߫ ߟߊ߬ߝߛߊ߬ߟߌ߬ߟߊ߸ ߞߊ߬ߙߊ߲߬ߡߐ߯ ߟߊ߲߱ߛߌ߬ߣߍ߫ ߛߌ߬ߟߊ ߓߘߴߊ߬ ߝߐ߫ ߞߵߊ߬ ߟߊߕߍ߰߸ ߞߏ߫ ߕߎ߲ߓߊ߬ ߦߋ߫ ߟߊ߬ߡߙߊ ߘߐ߫ ߞߐ߰ߦߊ߬، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ ߦߋ߫ <<ߡߌ߬ߣߊ߬ ߞߏ߬ߢߌߡߊ߫ ߘߐ߫>> ߦߋ߲߬.
ߕߎ߲ߓߊ߬ ߡߊߕߐ߬ߡߐ߲߬ ߢߊ ߡߍ߲ ߦߋ߫ ߣߌ߲߬߸ ߏ߬ ߢߐ߲߰ ߕߎ߲߬ ߓߘߊ߫ ߟߊ߫ ߣߊ߲߬ߕߌ߰ ߜߘߍ߫ ߟߎ߫ ߞߊ߲߬ ߦߋ߲߬ ߞߘߐ߬ߡߊ߲߬߸ ߡߍ߲ ߠߎ߬ ߦߋ߫ ߥߛߎ ߟߊ߫ ߞߐߣߊߞߙߌ߫ ߥߛߎߖߌ߲ߓߊ ߟߊ߫ ߞߊ߬ߣߌ߲߬، ߢߌ߬ߣߌ߲߬ߞߊ߬ߟߌ߬ ߛߌߦߊߡߊ߲ ߦߋ߫ ߦߙߐ ߡߍ߲ ߘߐ߫ ߛߊ߫߸ ߟߊ߬ߓߐ߬ߟߌ ߦߋ߫ ߞߍ߫ ߟߊ߫ ߝߊ߬ߘߌ ߡߍ߲ ߘߐ߫ ߣߌ߲߬߸ ߏ߬ ߦߋ߫ ߘߌ߬؟ ߝߣߊ߫߸ ߟߊ߬ߛߋ߬ߟߌ߬ ߞߟߊߒߞߋ߫ ߝߏߦߌ߬ ߕߍ߫ ߞߍ߫ ߟߴߊ߬ ߞߍߢߊ ߣߌ߲߬ ߞߊ߲߬߸ ߏ߬ ߝߣߊ߫ ߘߌ߬؟
