ߊߦߊߕߏߟߊ߫ ߊ߬ߟߌ ߞߊߡߣߋߦߌ߫ ߟߋ߬ ߌߙߊ߲߫ ߛߌ߬ߟߡߊ߬ ߞߊ߲ߓߍ߲ ߢߍߓߊ߯ ߛߊ߲ߘߐߕߊ ߘߌ߫ ߞߊ߬ߦߌ߯ ߁߉߈߉ ߟߊ߫߸ ߊ߬ ߝߊ߰ ߘߊ߫ ߂߀߂߆ ߞߏ߲ߞߏߜߍ ߕߋ߬ߟߋ߫ ߂߈ ߢߌ߲߬ ߠߋ߬ ߡߊ߬߸ ߞߵߊ߬ ߛߌ߬ߞߛߊߓߌ ߕߏ߫ ߛߊ߲߬ ߈߆ ߘߐ߫، ߏ߬ ߞߍ߫ ߘߊ߫ ߥߊ߬ߟߏ߲߬ߠߌ߲߬ ߓߟߋߓߟߋ ߘߏ߫ ߟߋ߬ ߘߐ߫߸ ߞߊ߬ ߝߘߊ߫ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߣߌ߫ ߌߛߌ߬ߙߊ߬ߌߟߊ߫ ߟߊ߫، ߊ߬ ߦߟߍ߬ߘߐ߬ߞߍ߫ ߛߊ߬ߓߊ ߟߋ߬ ߕߎ߲߬ ߦߋ߫ ߣߌ߲߬߸ ߗߍ߭ ߣߌ߲߬ ߦߋ߫ ߌߙߊ߲߫ ߛߌ߬ߟߊ߬ߡߊ ߟߎ߬ ߟߊ߫ ߡߙߊ߬ߞߊ߲ ߞߏߟߊߕߍ߯ߦߊ ߟߊ߫߸ ߖߡߊ߬ߣߊ ߓߘߍ߬ߓߘߍ߬ߟߌ߬ ߛߊ߲ߘߐߕߊ ߛߋߓߊ߯ߦߊ ߕߊ߬ߣߍ߲ ߞߵߊ߬ ߟߊ߫ ߘߌ߯ߣߊ ߕߊ ߣߌ߫ ߣߊ߲߬ߕߌ߰ߦߊ ߕߊ߫ ߝߊ߲߭ ߞߊ߲߬߸ ߏ߬ ߓߍ߯ ߕߎ߲߬ ߦߴߊ߬ߟߋ ߟߋ߬ ߓߟߏ߫.
ߊ߬ ߛߐ߬ߘߐ߲߬ ߘߊ߫ ߁߉߃߉ ߞߊ߬ߙߌ߬ߝߐ ߕߟߋ߬ ߁߇ ߟߋ߬ ߡߊ߬߸ ߛ߭ߌ߯ߦߊ ߟߎ߬ ߟߊ߫ ߘߌ߯ߣߊ߫ ߓߏ߲ ߘߏ߫ ߞߣߐ߫߸ ߞߊ߬ ߝߘߊ߫ ߊߖ߭ߋߙߌ߫ ߟߊ߫، ߊ߬ߟߌ ߞߊߡߣߋߦߌ߫ ߞߵߊ߬ ߞߐߘߏ߲߬ ߠߋ߬ ߛ߭ߊ߫ ߡߏ߬ߡߊ߬ߡߍ߬ߘ ߙߋߖ߭ߊ߬ ߔߊߤߑߟߊߝ߭ߌ߫ ߟߊ߫ ߡߙߊ߬ߞߊ߲ ߠߊ߫ ߖߏߣߊ߫، ߊ߬ ߞߍ߫ ߘߊ߫ ߊߦߊߕߏߟߊ߫ ߙߎߤߏߟߊ߫ ߞߏߡߋߦߣߌ߫ ߡߊߛߎ߬ߘߎ߲߬ߧߊ߬ߓߊ߮ ߟߋ߬ ߘߌ߫߸ ߕߍ߮ ߞߍ߫ ߘߊ߫ ߡߍ߲ ߘߐ߫ ߛߋ߲߬ߢߊ߬ ߦߙߌߞߊ߫߸ ߞߊ߬ ߥߛߎ ߞߍ߫߸ ߝߏ߫ ߞߵߊ߬ ߓߏ߬ߙߌ߫ ߞߊ߬ ߕߊ߯ ߢߊߣߌ߲ߡߊߓߏߙߌ ߘߐ߫ ߌߙߊ߲ߛ߭ߊߙ߸ ߞߣߊ߬ߕߏ߫ ߊ߬ ߞߐߛߊ߬ߦߌ߲߬ ߠߊ߫ ߡߊߛ߭ߊߘ߸ ߛߌ߬ߟߊ߬ߡߊ ߟߎ߬ ߟߊ߫ ߥߎ߬ߦߊ߲߬ߞߌ߬ߟߌ ߛߊ߲߬ߝߌ߲ ߡߊ߬ ߁߉߇߉ ߟߊ߫.
ߡߊ߲߬ߛߊ߬ (ߛ߭ߊ) ߏ߬ ߟߎ߬ ߟߊ߫ ߡߙߊ߬ߞߊ߲ ߘߊߝߘߌ ߞߐ ߘߐ߫ ߛߌ߬ߟߊ߬ߡߊ ߟߎ߬ ߓߟߏ߫، ߊ߬ߟߌ ߞߊߡߣߋߦߌ߫ ߞߍ߫ ߘߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߯ ߛߙߍߞߍ ߘߌ߫߸ ߥߎ߬ߦߊ߲߬ߞߌ߬ߟߌ ߡߊߛߊ߲߬ߛߊ߲߬ߓߊ߰ ߞߎ߲ߕߌ߮، ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߊ߬ ߕߎ߲߬ ߦߋ߫ ߥߛߊ߬ߘߋ߲߬ߧߊ ߟߊ߫߸ ߊ߬ ߣߌ߫ ߢߍߓߊ߯ߦߊ ߟߊ߫ ߕߤߋߙߊ߲߫ ߖߎߡߊ߫ ߛߊߟߌ ߘߐ߫، ߁߉߈߁ ߠߊ߫߸ ߞߵߊ߬ ߛߐ߬ߘߐ߲߬ ߌߙߊ߲߫ ߣߌ߫ ߌߙߊߞߌ߬ ߟߊ߫ ߞߍ߬ߟߍ ߦߴߊ߬ ߕߊߥߛߎ ߘߐ߫߸ ߊ߬ ߞߍ߫ ߘߊ߫ ߘߌ߯ߣߊ ߘߏ߲߬ߞߏ߬ ߝߟߐ߫ ߘߌ߫߸ ߡߍ߲ ߞߍ߫ ߘߊ߫ ߛߌ߬ߟߡߊ߬ ߞߊ߲ߓߍ߲ ߞߊ߲ߕߌ߮ ߘߌ߫، ߁߉߈߅ ߟߊ߫߸ ߊ߬ ߛߎߥߊ߲ߘߌ߫ ߘߊ߫ ߞߏߞߎߘߊ߫ ߞߵߊ߬ ߞߍ߫ ߞߊ߲ߕߌ߮ ߘߌ߫، ߛߊ߲߬ ߞߋߟߋ߲ ߏ߬ ߟߋ ߟߊ߫߸ ߊ߬ ߡߊߖߊ߲߬ ߘߊ߫ ߝߏߘߏ߲ ߘߏ߫ ߓߟߏ߫߸ ߊ߬ ߝߐ߫ ߘߊ߫ ߞߏ߫ ߡߍ߲ ߝߟߌ߬ ߘߊ߫ ߡߎ߬ߖߊ߬ߤߌ߬ߘߌߣ ߓߟߏ߸ ߏ߬ ߟߎ߬ ߦߋ߫ ߞߙߎ߫ ߟߋ߬ ߘߌ߫߸ ߡߍ߲ ߠߎ߬ ߡߊ߫ ߛߐ߲߬ ߛߌ߬ߟߊ߬ߡߊ ߟߎ߬ ߟߊ߫ ߡߊ߬ߙߊ ߡߊ߬ ߌߙߊ߲߫ ߞߣߐ߫.
ߞߏߡߋߦߣߌ߫ ߛߊ߭ ߡߍ߲ ߞߍ߫ ߘߊ߫߸ ߞߟߊ߬ߡߊ߬ߓߊ߮ ߟߎ߬ ߟߊ߫ ߜߊ߬ߙߊ ߞߵߊ߬ ߞߙߍߞߙߍ߫ ߞߵߊ߬ ߞߍ߫ ߢߍߓߊ߯ ߛߊ߲ߘߐߕߊ ߘߌ߫ ߁߉߈߉ ߥߊ߬ߛߌ߬ߥߙߊ ߕߟߋ߬ ߄ ߡߊ߬، ߊ߬ ߞߍ߫ ߘߊ߫ ߌߙߊ߲߫ ߡߊ߬ߙߊ ߞߊ߲ߞߋߦߊ ߕߍߟߐ ߘߌ߫ ߡߎ߬ߕߎ߲߬߸ ߞߵߊ߬ ߖߊ߲߬ߕߏ߫ ߖߡߊ߬ߣߊ ߓߘߍ߬ߓߘߍ߬ߟߌ߬ ߞߏ ߟߎ߬ ߘߐ߫߸ ߊ߬ ߣߌ߫ ߞߕߌ߫ ߞߏ ߟߎ߬ ߣߌ߫ ߣߊ߲߬ߕߌ߰ ߞߏ ߟߎ߬.
ߛߊ߲߬ ߛߌߦߊߡߊ߲ ߏ߬ ߞߣߐ߫߸ ߊ߬ ߞߵߊ߬ ߟߊ߫ ߛߋߓߊ߯ߦߊ ߟߊߡߙߊ߬߸ ߜߟߍ߬ߦߊ߬ ߛߌߦߊߡߊ߲ ߠߎ߬ ߣߴߊ߬ ߕߊ߫߸ ߊ߬ ߡߊ߫ ߦߙߍߦߙߍ߫ ߝߋߎ߫، ߞߊ߬ߕߎ߲߯߸ ߡߐ߰ ߟߎ߫ ߛߐ߬ߘߐ߲߬ ߘߴߊ߬ ߞߍ߬ߙߍߝߍ߬߸ ߡߍ߲ ߠߎ߬ ߕߍ߬ߘߍ߫ ߊ߬ ߛߋ߲߬ߡߊ߬ߕߐߙߐ߲ߜߐ߫ ߟߊ߫، ߊߙߊߓߎߟߊ߫ ߝߊ߲߬ߞߣߐ ߏ߬ ߟߎ߫ ߡߊ߲߬ߞߊ߲߬ ߛߌߦߊߡߊ߲߸ ߞߵߏ߬ ߟߊ߫ ߘߎߢߊ߫ ߟߊ߫ ߓߌ߲߬ߓߊߥߏ ߘߏ߫ ߟߎ߫ ߞߊ߲߬߸ ߊ߬ ߣߌ߫ ߣߎ߳ߞߑߟߍߙ ߞߏ ߘߊߘߐߖߊߥߏ߫ ߛߌߦߊߡߊ߲ ߠߎ߬، ߂߀߁߅ ߟߊ߫߸ ߊ߬ ߞߵߊ߬ ߝ߭ߌߦߍߣ ߓߍ߲߬ߞߊ߲ ߞߐߡߊߓߌ߲ߓߌ߲߫ ߞߵߊ߬ ߓߍ߲߬ ߌߙߊ߲߫ ߣߌ߫ ߣߎ߳ߞߑߟߍߙ ߞߏ ߡߊ߬، ߂߀߂߂ ߟߊ߫߸ ߊ߬ ߞߵߊߡߙߌߞߌ߬ ߡߊߝߌ߲߬߸ ߊ߬ ߣߴߌߛߌ߬ߙߊ߬ߌߟߊ߫߸ ߞߏ߫ ߊ߬ߟߎ߬ ߓߘߊ߫ ߡߊ߲߬ߞߊ߲ ߠߊߥߟߌ߬ ߞߵߊ߬ ߓߍ߲߬ ߡߊߤߑߛߊ߬ ߊߡߣߌ߫ ߝߊ߰ ߞߏ ߡߊ߬، ߂߀߂߆ ߓߌ߲ߠߊߥߎߟߋ߲ ߠߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߛߌ߫ ߓߐ߫ ߘߊ߫ ߞߎ߲߬ߠߊ߬ߛߌ߮ ߟߊߜߎ߬ߝߎ߲߬ ߞߊ߲ߡߊ߬߸ ߞߏ߫ ߊ߬ߟߎ߬ ߘߌ߫ ߜߊ߬ߟߏ ߟߴߏ߬ ߟߎ߫ ߞߊ߲߬.
ߗߍ߭ ߣߌ߲߬ ߦߋ߫ ߞߊ߲ߥߙߍߟߐ߲ߠߊ ߟߋ߬ ߘߌ߫߸ ߡߍ߲ ߓߘߊ߫ ߞߝߊ߬ ߛߌߦߊߡߊ߲߫ ߛߓߍ߫߸ ߞߊ߬ ߛߌߦߊߡߊ߲߫ ߘߟߊߡߌ߬ߣߊ߬، ߡߏ߬ߛߏ ߦߴߊ߬ ߞߎ߲߬߸ ߘߋ߲߫ ߥߐ߯ߙߐ߫ ߦߴߊ߬ ߓߟߏ߫، ߊ߬ ߞߵߊ߬ ߕߐ߮ ߕߏ߫ ߟߋ߬ ߌߙߊ߲߫ ߓߘߍ߬ߓߘߍ߬ߟߌ ߘߐ߬ߝߐ ߘߐ߫ ߝߛߊߦߌ߫، ߊ߬ ߟߊ߫ ߛߊ߬ߦߊ ߓߘߊ߫ ߌߙߊ߲߫ ߓߌ߬ߟߊ߫ ߞߣߐ߬ߘߐ߬ߝߟߌ ߟߋ߬ ߘߐ߫ ߕߋ߲߬ ߝߊߦߌߘߊ߫، ߊ߬ߟߎ߫ ߞߏ߬ߣߌ߲ ߦߋ߫ ߕߊߢߐ߲߯ߓߐ ߞߊ߲߬ ߤߊߟߌ߬ߛߊ߬߸ ߊ߬ ߣߴߊ߬ߟߎ߬ ߓߘߊ߫ ߕߟߋ߬ ߄߀ ߝߐ߫߸ ߞߵߏ߬ ߞߍ߫ ߝߙߌ߬ߦߊ ߘߌ߫ ߞߵߊ߬ ߓߍ߲߬ ߊ߬ߟߌ ߞߊߡߣߋߦߌ߫ ߟߊ߫ ߛߊ߬ߦߊ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
