ߖߌ߬ߣߍ߬ ߞߊ߲ߓߍ߲ ߕߍ߫߸ ߦߏ߫ ߊ߬ ߛߌ߰ߢߐ߲߰ ߖߡߊߣߊ ߘߏ߫ ߟߎ߫ ߦߋ߫ ߢߊ ߡߍ߲߸ ߏ߬ ߟߎ߬ ߡߍ߲ ߠߎ߬ ߦߋ߫ ߛߍߝߊ߫ ߥߊߘߌ ߞߊ߲߬ ߞߊ߬ߣߌ߲߬، ߓߊߏ߬߸ ߖߌ߬ߣߍ߬ ߞߊ߲ߓߍ߲ ߞߵߊ߬ ߟߊ߫ ߥߊߘߌߞߏ ߖߘߍ߬ߕߌ߰ߦߊ ߕߊ߬ ߁߉߆߀ ߟߋ߬ ߟߊ߫، ߏ߬ ߞߍ߫ ߘߊ߫ ߕߙߎ߬ ߘߌ߫߸ ߖߌ߬ߣߍ߬ ߞߊ߲ߓߍ߲ ߜߍߓߏ߲ ߞߊ߬ ߥߊߘߌ ߘߏ߫ ߛߌ߰ ߛߋ߲߬ߠߊ߫߸ ߡߍ߲ ߕߐ߯ߟߊ߫ ߘߴߊ߬ߟߎ߬ ߓߟߏ߫ ߞߏ߫ ߖߌ߬ߣߍ߬ ߕߊߡߊ߲، ߖߌ߬ߣߍ߬ ߞߊ߲ߓߍ߲ ߜߍߓߏ߲ ߛߌ߲ߘߌ߫ ߘߊ߫ ߁߉߆߀ ߞߏ߲ߞߏߜߍ ߕߋ߬ߟߋ߫ ߂߉ ߟߋ߬ ߡߊ߬، ߁߉߆߁ ߞߊ߬ߙߌ߬ߝߐ ߕߋ߬ߟߋ߫ ߂߈ ߡߊ߬߸ ߟߊ߬ߕߍ߰ߦߊ ߘߏ߫ ߟߊߓߐ߫ ߘߊ߫ ߞߊ߬ ߜߍߓߏ߲ ߞߟߌ߫ ߢߊ ߡߊߝߊ߬ߟߋ߲߬߸ ߞߵߊ߬ ߝߐ߫ ߊ߬ ߡߊ߬ ߞߏ߫ ߖߌ߬ߣߍ߬ ߞߊ߲ߓߍ߲ ߜߍߓߏ߲߫ ߕߊ߲ߓߊ߲. ߓߊߏ߬߸ ߘߍ߬ߟߞߊ߬ߦߊ ߡߙߊ߬ߞߊ߲ ߡߍ߲ ߕߘߍ߬ ߛߋߞߎ߬ ߕߎ߬ߙߋ߬ ߓߟߏ߫߸ ߏ߬ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߖߌ߬ߣߍ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߕߊ߲ߓߊ߲ߦߊ߫ ߘߊ߫.
ߖߌ߬ߣߍ߬ ߕߊߡߊ߲ ߛߌ߲ߘߌ߫ ߘߊ߫ ߁߉߆߀ ߕߙߊߓߊ ߕߟߋ߬ ߁ߟߐ ߟߋ߬ ߡߊ߬߸ ߞߊ߲ߕߌ߯ ߛߋߞߎ߬ ߕߎ߬ߙߋ߬ ߟߊ߫ ߡߙߌߘߐ ߟߊ߫، ߊ߬ ߣߌ߫ ߛߍߝߊ ߓߍ߯ ߞߢߊߡߊ߲߫ ߠߋ߬ ߕߘߍ߬ ߖߐ߲، ߊ߬ ߜߍߓߟߎ ߦߋ߫ ߟߊߘߊ߲߫ ߠߊ߫ ߖߡߊ߬ߣߊ ߖߍ߬ߘߍ ߟߋ߬ ߓߟߏ߫߸ ߊ߬ߟߋ ߟߋ߬ ߘߏ߲߬ ߦߋ߫ ߞߍ߫ ߟߊ߫ ߞߊ߬ ߖߡߊ߬ߣߊ ߝߘߏ߬ߓߊ߬ ߥߊߟߌߘߊ ߓߍ߯ ߣߊ߲߬ߝߟߏ߬ߦߊ߫، ߕߎ߬ߡߊ ߏ߬ ߟߊ߫߸ ߊ߬ ߕߎ߲߬ ߕߍ߫ ߞߍ߫ ߟߊ߫ ߞߊ߬ ߝߋ߲߫ ߠߊߛߣߍ߫߸ ߊ߬ ߕߎ߲߬ ߕߍ߫ ߞߍ߫ ߟߊ߫ ߞߊ߬ ߝߋ߲߫ ߠߊߝߏ߬ߦߌ߬ (ߣߌ ߍߞߛߑߔߐߙߑߕߊߓߟ߸ ߣߌ ߍ߲ߔߐߙߑߕߊߓߟ)، ߊ߬ ߥߊߘߌ ߘߊ߲߭ ߠߋ߬ ߕߍ߬ߘߍ߫ ߖߡߊ߬ߣߊ ߞߣߐߟߊ ߘߌ߫߸ ߊ߬ ߕߎ߲߬ ߕߍ߫ ߓߐ߫ ߟߊ߫ ߡߎ߰ߡߍ߫، ߝߏ߫ ߁߉߇߂ ߞߏ߲ߓߌߕߌ߮ ߕߋ߬ߟߋ߫ ߀߂ ߟߋ߬ ߡߊ߬߸ ߞߊ߲ߕߌ߮ ߣߊ߬ ߘߊ߫ ߥߊߘߌ߫ ߞߎߘߊ߫ ߟߊߘߊ߲߫߸ ߞߵߏ߬ ߕߐ߯ߟߊ߫ ߞߏ߫ ߛߟߌ߫، ߏ߬ ߡߍ߲ ߘߐߕߟߊߣߍ߲߫ ߕߍ߬ߘߍ߫ ߞߏ߬ߙߏ߲߫ ߁߀߀ ߘߌ߫، ߏ߬ ߟߋ ߞߵߊ߬ ߞߍ߫߸ ߛߟߌ߫ ߁ ߕߎ߲߬ ߦߋ߫ ߕߊߡߊ߲߫ ߁߀ ߠߋ߬ ߘߌ߫ (ߖߌ߬ߣߍ߬ ߕߊߡߊ߲ ߁߀ ߞߊ߬ߣߌ߲߬). ߛߟߌ߫ ߞߏ ߞߏ߬ߣߌ߲ ߕߎ߲߬ ߡߊ߫ ߘߌߦߊ߫ ߡߐ߰ ߛߌߦߊߡߊ߲߫ ߦߋ߫ ߞߎ߲߬ߖߏߣߊ ߟߊ߫، ߝߣߊ߫߸ ߊ߬ ߡߊ߫ ߖߡߊ߬ߣߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߐߦߟߍ߬ߡߊ߲߬ ߢߊ߫ ߜߘߍ߫ ߛߌ߫ ߡߊ߬.
ߒ߬ߓߊ߬߸ ߛߋߞߎ߬ ߕߎ߬ߙߋ߫ ߛߊ߭ ߡߍ߲ ߞߍ߫ ߘߊ߫ ߁߉߈߄ ߕߙߊߓߊ ߕߋ߬ߟߋ߫ ߂߆ ߡߊ߬߸ߣߊ߲߬ߕߌ߮ ߟߎ߫ ߞߊ߬ ߝߊ߲߬ߞߊ ߕߊ߬ ߞߊ߬ߝߏ߬ ߖߊߛߏ߲ ߘߐ߫، ߞߊ߬ ߝߊߙߌ߲߫ ߟߊ߲߬ߛߣߊ߬ ߞߐ߲ߕߍ߬ ߟߊߛߌ߰ ߖߡߊ߬ߣߊ ߞߎ߲߬ߠߊ߬، ߖߡߊ߬ߣߊ ߘߏ߲߬ ߘߊ߫ ߜߟߍ߬ߦߊ ߘߐ߫߸ ߞߊ߬ ߞߏߖߊ ߟߊߘߏ߲߬، ߏ߬ ߟߋ ߘߐ߫߸ ߝߊ߲߬ߞߊ߬ߕߌ߰ ߞߎߘߊ ߟߎ߬ ߡߊ߫ ߛߋ߫ ߓߐߘߊ߫ ߜߘߍ߫ ߛߐ߬ߘߐ߲߬ ߠߊ߫ ߡߎ߬ߕߎ߲߬߸ ߝߏ߫ ߞߊ߬ ߕߋߙߌߦߊ ߟߎ߬ ߢߌߣߌ߲߫ ߠߋ߬ ߡߎߣߎ߲߬، ߏ߬ ߞߘߐ ߦߋ߫ ߡߎ߲߬ ߘߌ߫߸ ߞߵߊ߬ߟߎ߬ ߓߟߏ ߘߌ߫ ߖߡߊ߬ߣߊ ߘߎ߲߬ߘߎ߬ߡߊ߬ ߓߊ߯ߙߘߊ ߟߎ߫ ߡߊ߬߸ ߞߊ߬ ߦߟߍ߬ߡߊ߲ ߠߊߘߏ߲߬ ߞߏ߫ ߛߌߦߊߡߊ߲߫ ߘߐ߫.
߁߉߈߆ ߓߌ߲ߠߊߥߎߟߋ߲ ߕߟߋ߬ ߀߆ ߟߋ߬ ߡߊ߬߸ ߟߊ߲߬ߛߣߊ߬ ߞߐ߲ߕߍ߬ ߟߊ߫ ߡߙߊ߬ߞߊ߲ ߞߊ߬ ߛߟߌ߫ ߦߟߍ߬ߡߊ߲߫߸ ߞߵߊ߬ ߣߐ߬ߘߐߓߌ߬ߟߊ߫ ߖߌ߬ߣߍ߬ ߕߊߡߊ߲ ߠߊ߫، ߞߵߏ߬ ߣߌ߫ ߛߟߌ߫ ߓߍ߯ ߘߐߞߢߊ߫ ߖߋߞߎ߫߸ ߛߟߌ߫ ߁ = ߖߌ߬ߣߍ߬ ߕߊߡߊ߲ ߁. ߕߎ߬ߡߊ ߏ߬ ߟߊ߫߸ ߊߡߙߌߞߌ߬ ߘߟߊ߫ ߁ ߕߎ߲߬ ߦߋ߫ ߓߍ߲߬ ߠߊ߫ ߛߟߌ߫ ߂߅ ߟߋ߬ ߡߊ߬߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߃߀߀ ߟߋ߬ ߘߌ߫.
ߥߊ߯ߕߌ ߏ߬ ߟߊ߫߸ ߖߌ߬ߣߍ߬ ߕߊߡߊ߲ ߕߘߍ߬ ߥߊߘߌ߫ ߓߟߎ߫ ߃ ߟߋ߬ ߘߌ߫߸ ߅߀߀߀߸ ߁߀߀߀߸ ߊ߬ ߣߌ߫ ߁߀߀، ߞߵߏ߬ ߟߊ߫ ߜߊߣߊ߲߫ ߣߊ߯ߣߌ߲߫ ߞߊ߲߬: ߂߅߸ ߁߀߸ ߅߸ ߁.
ߊ߲ ߞߵߊ߬ ߦߌ߬ߘߊ߬ ߛߌߛߍ߲߬߸ ߒ ߞߏ߫ ߁߉߈߆ ߟߊ߫߸ ߊߡߙߌߞߌ߬ ߘߟߊ߫ ߁ ߕߎ߲߬ ߦߋ߫ ߖߌ߬ߣߍ߬ ߕߊߡߊ߲ ߃߀߀ ߟߋ߬ ߘߌ߫، ߒ߬ߞߊ߬߸ ߝߊ߬ߟߋ ߕߊ߬ߡߌ߲߬ ߘߊ߫ ߦߟߍ߬ ߟߊ߫ ߟߋ߬ ߞߘߊߎ߫، ߓߊߏ߬߸ ߂߀߀߇ ߟߊ߫߸ ߋߙߏ߫ ߁ ߕߎ߲߬ ߦߋ߫ ߖߌ߬ߣߍ߬ ߕߊߡߊ߲ ߄ ߄߀߀ ߠߋ߬ ߘߌ߫.
߂߀߁߂ ߟߊ߫߸ ߋߙߏ߫ ߁ ߕߎ߲߬ ߦߋ߫ ߖߌ߬ߣߍ߬ ߕߊߡߊ߲ ߉ ߀߀߀ ߟߋ߬ ߘߌ߫.
߂߀߁߇ ߟߊ߫߸ ߋߙߏ߫ ߁ ߕߎ߲߬ ߦߋ߫ ߖߌ߬ߣߍ߬ ߕߊߡߊ߲ ߁߀ ߀߀߀ ߠߋ߬ ߘߌ߫.
߂߀߂߄ ߠߊ߫߸ ߋߙߏ߫ ߞߋߟߋ߲ ߦߋ߫ ߖߌ߬ߣߍ߬ ߕߊߡߊ߲ ߉ ߂߈߈ ߠߋ߬ ߘߌ߫.
߂߀߆ ߡߍ߲ ߦߋ߫ ߕߋ߲߬߸ ߋߙߏ߫ ߁ ߦߋ߫ ߖߌ߬ߣߍ߬ ߕߊߡߊ߲ ߁߀ ߃߄߉ ߟߋ߬ ߘߌ߫.
ߏ߬ ߓߍ߯ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߥߊߘߌ ߟߊߘߏ߲߭ ߕߍ߫ ߜߍ߬ߟߍ߲߬ߡߊ߲߬ ߘߌ߫ ߜߋߟߋ߲ߜߋߟߋ߲ ߠߎ߬ ߞߣߐ߫ ߕߋ߲߬߸ ߊ߬ ߟߊߘߏ߲߭ ߕߍ߫ ߜߍ߬ߟߍ߲߬ߡߊ߲߬ ߘߌ߫ ߜߍߓߏ߲ ߠߎ߬ ߟߊ߫، ߓߊ߬ߙߌ߬߸ ߣߌ߫ ߥߊߘߌ߫ ߟߊߓߐ ߟߋ߬ ߓߌ߬ߟߊ߬ ߘߴߌ ߡߊ߬߸ ߊ߬ ߞߍ߫ ߘߊ߫ ߛߟߏߟߏߞߏ߲ߘߏ߫ ߘߌ߫ ߓߊ߬߸ ߥߟߊ߫ ߜߍߓߏ߲߫߸ ߌ ߡߊ߬ߞߏ ߦߋ߫ ߖߊ߬ߕߋ ߡߍ߲ ߠߊ߫߸ ߌ ߕߍ߫ ߏ߬ ߓߍ߯ ߛߐ߬ߘߐ߲߬ ߠߊ߫ ߝߋߎ߫.
ߖߌ߬ߣߍ߬ ߕߊߡߊ߲ ߞߏ߬ߣߌ߲ ߛߌ߲ߘߌ ߓߘߊ߫ ߛߊ߲߬ ߆߆ ߛߐ߬ߘߐ߲߬، ߊ߬ ߓߐ߫ ߘߊ߫ ߛߍߝߊ߫ ߞߏ ߘߐ߫ ߁߉߅߉ ߟߋ߬ ߟߊ߫߸ ߞߊ߬ ߘߏ߲߬ ߊ߬ ߖߘߍ߬ߞߊ߬ߣߌ߲߬ ߥߊ߬ߘߌ߬ ߞߏ ߘߐ߫، ߘߊ߲߬ߝߘߊ߬ߓߐ ߡߍ߲ ߦߋ߫ ߖߌ߬ߣߍ߬ ߣߌ߫ ߖߡߊ߬ߣߊ߬ ߜߘߍ ߟߎ߬ ߕߍ߫߸ ߊ߬ߟߋ ߖߘߍ߬ߞߊ߬ߣߌ߲߬ ߥߊߘߌ ߟߋ߬ ߦߴߊ߬ ߓߟߏ߫߸ ߊ߬ ߖߘߍ߬ߞߊ߬ߣߌ߲߬ ߜߍߓߏ߲ ߠߊ߫، ߛߍߝߊ ߘߏ߲߬ ߖߊ߬ߡߊߙߌ ߓߍ߯ ߦߋ߫ ߝߊ߬ߙߊ߲߬ߛߌ߫ ߟߋ߬ ߓߟߏ߫߸ ߡߙߌߘߐ ߓߍ߯ ߝߘߊ߫ ߟߴߏ߬ ߟߋ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߛߌߟߊߓߐߛߐ߯ߣߊ߫ ߝߐ߰ߓߍ߬ߦߊ߬ߟߊ
