ߔߊߞߌߛߦߊ ߟߋ߬ ߞߍ߫ ߘߊ߫ ߛߌ߯ߙߌ߲߫߸ ߞߵߊ߬ ߓߍ߲߬ ߘߊ߬ߡߊ߲ ߓߊ߯ߙߊ߫ ߢߊ߫ ߖߎ߮ ߘߏ߫ ߞߍ߬ߟߍ ߡߊ߬߸ ߣߴߏ߬ ߦߋ߫ ߔߏߞߑߟߍ߲߫ ߞߏ ߘߌ߫، ߒ߬ߓߊ߬߸ ߕߍ߮ ߞߍ߫ ߘߊ߫ ߘߋ߲ߡߌߛߍ߲ ߡߍ߲ ߠߎ߬ ߘߐ߫߸ ߣߴߊ߬ ߘߏ߫ ߟߎ߫ ߓߘߊ߫ ߘߏ߲߬ ߥߛߎ ߟߊ߫߸ ߏ߬ ߞߎߡߊ ߓߘߊ߫ ߛߌߦߊߦߊ߫ ߞߏߛߓߍ߫، ߞߊ߬ߕߎ߲߯߸ ߞߎߣߎ߲߬ ߞߍ߲ߘߍߟߏ߲ ߡߊ߬ ߂߀߂߆ ߞߏ߲ߞߏߜߍ ߕߋ߬ߟߋ߫ ߂߈߸ ߡߊ߬ߓߏ߲߬ߧߊ߬ߕߊ߫ ߛߋߞߎ߬ ߛߥߊ߬ߣߍ߫ ߡߍ߲ ߦߋ߫ ߥߛߊ߬ߘߋ߲߬ ߞߘߐ߫ ߘߌ߫߸ ߊ߬ ߣߌ߫ ߞߍ߬ߣߍߡߊ߲߬ߘߋ߲߫ ߢߊ߰ߛߏ߬ߟߊ߫ ߛߏߕߌ߯ ߗߍߡߐ߮߸ ߊ߬ ߓߐ߫ ߘߊ߫ ߡߊ߬ߞߎ߲ ߞߐߝߍ߬ ߞߵߊ߬ ߡߙߌߦߊ ߦߌ߬ߘߊ߫ ߖߊ߬ߡߊ ߟߊ߫߸ ߞߊ߬ ߘߋ߲ߡߌߛߍ߲߫ ߔߊߞߌߛߦߊߟߊ ߟߎ߬ ߞߐߡߊߓߌ߲ߓߌ߲߫ ߞߏߛߓߍ߫.
ߞߊ߬ߕߎ߲߯߸ ߞߏ߲ߞߏߜߍ ߕߋ߬ߟߋ߫ ߂߇ ߡߍ߲ ߓߍ߲߬ ߘߊ߫ ߛߌ߬ߣߌ߲߬ߟߏ߲ ߡߊ߬߸ ߛߌ߯ߙߌ߲߫ ߞߕߌߘߊ ߦߌߟߡߊ߫ ߝߟߐ ߟߊߦߟߍ߬ߡߊ߲߬ ߘߊ߫ ߟߋ߬ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߟߊ߫߸ ߊ߬ߟߎ߫ ߞߊ߬ ߘߋ߲ߡߌߛߍ߲߫ ߁߇ ߡߍ߲ ߡߌ߬ߣߊ߬ ߔߊߞߌߛߦߊ ߝߍ߬߸ ߏ߬ ߟߎ߬ ߟߊ߫ ߞߕߌ ߞߍ߫ ߞߊ߲ߡߊ߬، ߏ߬ ߟߎ߬ ߡߍ߲ ߠߎ߬ ߡߌ߬ߣߊ߬ ߘߊ߫ ߂߀߂߆ ߞߏ߲ߞߏߜߍ ߕߟߋ߬ ߁߇ ߡߊ߬߸ ߊ߬ߟߎ߬ ߟߊ߫ ߓߐߟߌ ߞߏߛߐ߲߬߸ ߞߏ߫ ߔߏߞߑߟߍ߲߫ ߦߋ߫ ߟߊ߬ߡߌߣߌ߲ ߘߐߖߊߛߌ߫ ߝߋ߲ ߠߋ߬ ߘߌ߫߸ ߞߊ߬ ߣߊ߬ ߘߋ߲ ߠߎ߬ ߟߊ߫ ߛߌߣߌ߲߫ ߘߐߕߌߢߍ߫، ߒ߬ߓߊ߬߸ ߡߌ߬ߣߊ߬ߓߊ߰ߕߐ ߏ߬ ߟߎ߬ ߘߐ߫߸ ߡߊ߬ߡߊ߬ߘߌ߫ ߛߌ߬ߟߊ߬ ߦߴߏ߬ ߟߋ ߘߐ߫߸ ߊ߬ߟߋ ߡߍ߲ ߞߊ߲߬ߕߐ߮ ߦߋ߫ <<ߕߐ߬ߔߑߛߌ߬>> ߘߌ߫، ߝߣߊ߫߸ ߊ߬ ߦߋ߫ ߛߌ߯ߙߌ߲߫ ߠߊߥߙߎߞߌ ߘߋ߲ߡߌߛߍ߲ ߠߎ߬ ߟߊ߫ ߘߍ߭ ߓߋߟߋ߲ߕߌ߮ ߟߋ߬ ߘߌ߫، ߊ߬ߟߋ ߖߊ߲߬ߞߌ߬ ߘߊ߫ ߞߊߙߏ߫ ߥߐ߯ߙߐ߫ ߥߛߎ߫ ߟߋ߬ ߟߊ߫߸ ߞߊ߬ ߟߏ߯ߟߎ߫ ߘߐ߲ߘߐ߫ ߊ߬ ߡߊ߬ ߏ߬ ߘߐ߫.
ߊ߲ ߠߊ߫ ߢߌ߬ߣߌ߲߬ߞߊ߬ߟߌ ߛߋ߫ ߘߊ߫ ߗߍ߬ߡߐ߮ ߡߊ߬߸ ߡߊ߬ߓߏ߲߬ߧߊ߬ߕߊ߫ ߛߋߞߎ߬ ߛߥߊ߬ߣߍ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߦߋ߫ ߘߋ߲ߡߌߛߍ߲ ߠߎ߬ ߝߏ߬ ߟߴߊ߬ߟߎ߬ ߟߊ߫ <<ߥߊ߬ߞߊߟߌ>> ߟߊ߫߸ ߞߵߊ߬ߟߎ߫ ߝߏ߬ ߊ߬ߟߎ߬ ߟߊ߫ <<ߝߓߊ߬ߘߋ߲߬ߧߊ>> ߟߊ߫.
ߊ߬ ߞߵߊ߬ ߦߌ߬ߘߊ߬ ߞߏ߫: <<ߘߋ߲ߣߍ߲ ߡߍ߲ ߠߎ߬ ߡߌ߬ߣߊ߬ߣߍ߲߫ ߛߌ߯ߙߌ߲߫ ߦߊ߲߬ ߞߊ߬ ߥߴߊ߬ߟߎ߬ ߘߌ߫ ߞߊ߬ߛߏ ߟߊ߫ ߞߊ߲ߞߊ߲߫ ߔߏߞߟߌߣߌ߲߫ ߓߊ߯ߙߊ߫ ߞߏ ߘߐ߫߸ ߒ ߧߋ߫ ߘߋ߲ߣߍ߲ ߏ߬ ߟߎߎ߫ ߝߏ߬ ߟߊ߫ ߞߊ߬ ߓߊߙߌߞߊ߫ ߓߌ߬ߟߵߊ߬ߟߎ߬ ߦߋ߫، ߣߌ߫ ߒߠߋ ߖߍ߬ߘߍ ߝߣߊ߫ ߕߘߍ߬ ߘߋ߲ߣߍ߲߫ ߘߌ߫ ߓߌ߬߸ ߛߊ߫ ߒ ߝߣߊ߫ ߞߊ߬ߛߏ ߟߊ߫ ߞߊ߲ߞߊ߲߫، ߊ߬ߟߎ߫ ߡߌ߬ߣߊ߬ߣߍ߲߫ ߝߊ߬ ߓߘߊ ߡߞߊߘߊ߲ ߠߋ߬ ߘߐ߫.>> ߊ߬ ߞߵߏ߬ ߟߋ ߝߐ߫.
ߛߏߕߌ߮ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߊ߬ ߞߏߟߊߒߞߏߡߊ ߞߍ߫߸ ߞߵߊ߬ ߟߊ߫ ߞߎߡߊ ߘߊ߬ߟߎ ߦߌ߬ߘߊ߬߸ ߊ߬ ߣߌ߫ ߞߊ߬ ߘߋ߲ߡߌߛߍ߲ ߠߎ߬ ߟߊ߫ ߓߊ߯ߙߊ߫ ߞߍߣߍ߲ ߕߐ߬ߣߐ ߦߌ߬ߘߊ߬: <<ߖߡߊ߬ߣߊ߬ ߟߎ߬ ߓߍ߫ ߓߌ߬߸ ߖߋ߬ߟߌ ߟߊߓߐ߲߭ ߦߴߌߘߐ߫ ߡߍ߲ ߞߣߐ߫߸ ߡߐ߱ ߟߎ߬ ߦߋ߫ ߓߋ߭ ߞߊ߲߬ ߊ߬ߟߎ߫ ߝߊ߬ ߓߘߊ ߞߏߛߐ߲߬، ߣߌ߫ ߛߌ߯ߙߌ߲ߞߊߘߋ߲ ߘߏ߫ ߟߎ߫ ߝߣߊ߫ ߡߌ߬ߣߊ߬ ߘߊ߫ ߞߊ߬ ߥߴߊ߬ߟߎ߬ ߘߌ߫ ߞߊ߬ߛߏ ߟߊ߫߸ ߞߏ߫ ߊ߬ߟߎ߬ ߦߴߊ߬ߟߎ߫ ߝߊ߬ ߓߘߊ ߡߞߊߘߊ߲ ߠߋ߬ ߟߊ߫߸ ߏ߬ ߟߎ߬ ߞߊ߫ ߞߊ߲߫ ߞߊ߬ ߝߏ߬ ߞߊ߬ ߓߊߙߌߞߊ ߓߌ߬ߟߴߊ߬ߟߎ߬ ߦߋ߫. ߣߌ߫ ߡߐ߱ ߞߊ߬ ߛߍ߱ ߘߏ߲߬ ߝߊ߬ ߓߘߊ ߦߋ߫߸ ߏ߬ ߡߊ߲߫ ߞߊ߲߫ ߞߊ߬ ߘߊ߲ߞߎ߲߫ ߡߐ߰ ߞߏߙߏ߲߫ ߘߌ߫.>>
ߌߞߏߡߌ߲߬ ߘߏ߫ ߟߎ߫ ߦߋ߫ ߡߐ߰ߓߊ ߟߎ߬ ߖߙߊ߬ߞߌ߬ ߟߊ߫ ߛߐ߲߬߸ ߞߏ߫ ߊ߬ߟߎ ߟߋ߬ ߘߋ߲ߡߌߛߍ߲ ߠߎ߬ ߘߐ߫ ߞߵߊ߬ߟߎ߬ ߞߣߐߘߐߛߎ߫߸ ߛߋߞߎ߬ ߛߥߊ߬ߣߍ ߞߵߊ߬ ߓߊ߲߬ ߞߎߡߊ ߏ߬ ߡߎ߰ߡߍ ߘߐ߫ ߟߋ߬߸ ߞߏ߫ ߖߌ߲ߘߊ߯ ߖߎ߫ ߞߘߐ߫ ߞߎߡߊ ߏ߬ ߛߌ߫ ߕߍ߫ ߞߌ߬ߛߍ߬ ߘߌ߫.
<<ߘߏ߫ ߟߎ߫ ߦߴߊ߬ ߝߐ߫ ߟߊ߫ ߊ߲ߠߎ߬ ߡߐ߰ߓߊ ߟߎ߫ ߟߋ߬ ߘߋ߲ߡߌߛߍ߲ ߠߎ߬ ߞߘߐ߫، ߒߠߋ ߕߍ߫ ߘߋ߲ߡߌߛߍ߲ ߠߎ߬ ߞߘߐ߫ ߘߋ߬، ߌ ߓߊ߯ ߞߍ߫ ߊ߬ߟߎ߬ ߞߘߐ߫߸ ߌ ߘߏ߲߰ߣߍ߲߫ ߠߵߏ߬ ߘߌ߫، ߒߠߋ ߦߴߊ߬ߟߎ߬ ߛߊ߲ߝߍ߬ ߟߋ߬߸ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߊߟߎ߫ ߦߋ߫ ߡߍ߲ ߞߊ߲߬ ߕߎ߬ߢߊ ߦߴߊߟߎ߫ ߝߍ߬߸ ߊߟߎ߫ ߦߋ߫ ߥߴߊ߬ ߡߊ߬.>>
ߊ߬ ߞߊ߲߫ ߡߍ߲ ߓߊ߯ ߞߍ߫ ߖߎ߯ߡߊ߲ ߟߊ߲ߞߣߍߡߟߊ ߘߌ߫߸ ߏ߬ ߕߌ߰ ߦߋ߫ ߖߊ߬ߕߋ߬ ߟߊ߫ ߖߎ߯ߟߞߊ ߟߋ߬ ߘߌ߫ ߓߘߍ߬ߓߘߍ߬ߟߌ ߘߊߞߎ߲ ߘߐ߫، ߞߵߊ߬ ߛߐ߬ߘߐ߲߬߸ ߟߊ߬ߡߌߣߌ߲ ߠߋ߬ ߘߐߕߌߢߍ߫ ߞߏ߫ ߞߎߡߊ ߝߐ ߦߴߌߘߐ߫. <<ߖߡߊ߬ߣߊ ߣߌ߲߬ ߞߣߐ߫߸ ߣߴߌ ߞߊ߬ ߞߏ߫ ߝߍ߬ߡߊ ߝߍ߬ߡߊ߬ ߦߙߐ ߝߐ߫ ߌߞߘߐ߫߸ ߊ߬ߟߎ߬ ߘߴߊ߬ ߝߐ߫ ߞߏ߫ ߝߊ߭ߞߊ߬ߘߌ߬ߛߊ߬ ߕߴߊ߲ ߝߍ߬، ߊ߬ ߘߏ߲߬߸ ߡߐ߰ ߺ ߐ ߺ ߡߐ߰ ߣߊ߬ߕߐ߫ ߊ߲ ߠߊ߫ ߖߡߊ߬ߣߊ ߕߌߢߍ߫ ߟߴߊ߲ ߓߟߏ߫߸ ߣߴߏ߬ ߟߊ߫ ߖߎ߯ߡߊ߲ ߏ߬ ߝߐ ߟߵߊ߬ ߦߌ߬ߘߊ߬ ߟߊ߫ ߞߏ߫ ߊ߲ ߕߴߊߟߎ߫ ߝߍ߬߸ ߒ߬ߓߊ߬ ߒߠߋ ߕߴߊߟߎ߫ ߝߍ߬.>> ߊ߬ ߞߵߏ߬ ߝߐ߫ ߣߌ߫ ߕߡߊ߬ߖߌ߬ ߕߍ߫.
ߥߛߊ߬ߘߋ߲߬ ߞߘߐ ߣߌ߲߬ ߠߠߊ߫ ߛߙߊ߬ߣߎ߲ ߘߐ߫ ߌߞߐ߫߸ ߊ߬ ߞߎߡߊ߫ ߘߊ߫ ߔߏ߬ߞߟߌ߬ߣߌ߲ ߠߊ߫ ߕߌߢߍߟߌߣߐ ߟߎ߫ ߞߊ߲߬ ߛߌ߯ߙߌ߲߫ ߣߴߊ߬ ߟߊߡߌߣߌ߲ ߞߣߐ߫، <<ߛߌ߯ߙߌ߲߫ ߞߐ߬ ߡߌߛߍ߲ %߈߀ ߓߘߊ߫ ߘߐߕߌߢߍ߫، ߊ߬ߟߎ߬ ߖߌ ߕߍ߫ ߡߌ߲߬߸ ߓߊߟߏ߫ ߕߴߛߋ߫ ߞߍ߫ ߟߴߊ߬ ߘߐ߫ ߝߋߎ߫، ߊ߲ ߠߊ߫ ߘߎ߰ߞߟߏ ߓߘߊ߫ ߘߐߕߌߢߍ߫، ߖߡߊ߬ߣߊ߬ߘߋ߲ ߠߎ߬ ߓߘߊ߫ ߕߙߐ߫، ߛߌ߯ߙߌ߲ߞߊ ߓߘߊ߫ ߕߙߐ߫، ߏ߬ ߛߓߊߓߎ ߞߍߣߍ߲߫ ߡߐ߱ ߡߍ߲ ߘߌ߫߸ ߌ ߘߴߌ ߛߌ߰ ߞߵߌ ߢߊ ߓߍ߲߬ ߏ߬ ߡߊ߬؟>>
ߊ߬ ߞߵߊ߬ ߦߌ߬ߘߊ߬ ߞߏ߫ ߘߊ߬ߡߊ߲߬ߛߋ߲ ߘߊߡߌ߬ߣߊ ߕߙߏ߬ߞߏ ߟߊ߫߸ ߏ߬ ߓߘߊ߫ ߛߌ߯ߙߌ߲߫ ߘߎ߰ߞߟߏ ߕߌߢߍ߫، ߞߊ߬ ߛߣߍ߬ߞߍ߬ ߘߎ߰ ߞߏ ߓߊ߲߫، ߊ߬ ߞߵߊ߬߬ ߞߊ߲ߠߊߘߌ߫ ߓߍ߯ ߟߊߘߍ߬ߣߍ߲ ߡߊ߬ ߖߡߊ߬ߣߊ ߞߣߐ߫߸ ߊ߬ ߣߌ߫ ߖߡߊ߬ߣߊ ߞߐߞߊ߲߬߸ ߞߏ߫ ߓߍ߯ ߦߴߊ߬ ߟߐ߬ ߊ߬߬ ߟߐ߬ ߦߌߟߊ ߣߌ߲߬ ߞߏ ߘߐ߫߸ ߞߊ߬ ߛߋ߫ ߟߊ߬ߡߌߣߌ߲ ߠߊߞߊ߲ߘߊ߫ ߟߊ߫.
ߡߊ߬ߓߏ߲߬ߧߊ߬ߕߊ ߛߋߞߎ߬ ߛߥߊ߬ߣߍ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߓߘߊ߫ ߓߊ߬ߟߌ߬߸ ߞߵߊ߬ ߞߣߐߘߐߓߊ߲߫߸ ߞߵߊ߬ ߓߍ߲߬ ߞߕߌ ߣߌ߲߬ ߕߍ߰ ߢߊ ߡߊ߬߸ ߘߋ߲ߡߌߛߍ߲ ߠߎ߬ ߡߌ߬ߣߊ ߞߐ ߣߌ߲߬ ߘߐ߫، ߊ߬ ߞߊ߲߫ ߞߏ߫ <<ߒߠߋ ߖߌ߰ߣߍ߲߫ ߠߋ߬ ߟߊ߬ߖߌ߬ߣߍ߬ ߞߕߌߓߏ߲ ߠߊ߫. […] ߊߟߎ߫ ߦߋ߫ ߘߋ߲ߣߍ߲ ߠߎ߬ ߡߌ߬ߣߊ߬߸ ߞߵߏ߬ ߟߎ߬ ߓߘߊ߫ ߖߌ߰ ߛߌߟߓߊ ߞߊ߲߬߸ ߞߊ߬ ߛߊ߬ߙߌ߬ߦߊ ߛߐ߬ߛߐ߬، ߐ߲߬ߤߐ߲߫߸ ߊ߲ ߠߊ߫ ߓߐ߰ߝߍ ߘߐߕߌߢߍ ߡߍ߲ ߦߴߌߘߐ߫߸ ߛߊ߬ߙߌ߬ߦߊ ߡߍ߲ ߠߎ߬ ߝߣߊ߫ ߞߵߏ߬ ߟߊߕߐ߲߫߸ ߏ߬ ߟߎ߬ ߥߊߣߍ߲߫ ߡߌ߲߫؟ ߏ߬ ߟߎ߫ ߘߏ߲߬ ߡߊ߫ ߝߐ߫؟>> ߊ߬ ߞߵߊ߬ ߖߍ߬ߘߍ߫ ߢߌ߬ߣߌ߲߬ߞߊ߬߸ ߞߏ߫ ߓߊ߰ ߏ߬ ߤߊߡߌ߲߫ ߡߊ߲߫ ߞߊ߲߫ ߞߊ߬ ߛߌ߰ ߡߐ߰ ߟߊ߫؟
ߊ߬ ߞߵߊ߬ ߞߊ߲ߠߊߘߌ߫ ߝߊ߰ߡߊ ߟߎ߫ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߬ ߘߐߖߊ߬߸ ߞߊ߬ ߛߋ߫ ߖߡߊ߬ߣߊ ߘߎ߰ߞߟߏ ߟߊߞߊ߲ߘߊ߫ ߟߊ߫، ߡߍ߲ ߠߎ߬ ߦߋ߫ ߓߐ߫ ߟߊ߫߸ ߏ߬ ߟߎ߬ ߦߋ߫ ߓߐ߫ ߟߊ߫ ߘߎ߰ߞߟߏ ߘߐߕߌߢߍ߫ ߞߏ ߟߋ߬ ߘߐ߫، ߏ߬ ߘߐ߫߸ ߞߏ ߡߍ߲ ߞߍߕߐ߫ ߘߋ߲ߣߍ߲ ߏ߬ ߟߎ߫ ߡߌ߬ߣߊ ߘߌ߫߸ ߣߴߏ߬ ߢߐ߲߰ ߞߍ߫ ߘߊ߫ ߟߊ߬ߡߌߣߌ߲ ߝߣߊ߫ ߟߊߞߊ߲ߘߊ ߘߐ߫߸ ߛߴߊ߬ ߞߏ ߓߘߊ߫ ߛߴߊ߬ ߘߊ߲߭ ߠߊ߫.
ߊ߬ ߟߊ߫ ߞߎߡߊ߫ ߟߊߓߊ߲ ߞߍ߫ ߘߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊߘߌߦߊ ߟߋ߬ ߘߌ߫߸ ߞߵߊ߬ ߘߏ߲߬ ߊߟߊ߫ ߘߐ߫، ߞߏ߫ <<ߊߟߊ߫ ߞߏߛߐ߲߬߸ ߊ߲ ߠߴߊ߬ ߘߊߟߌ߫ ߟߊ߫߸ ߊ߬ ߞߊߣߊ߬߬ ߖߌ߫ ߘߴߊ߲ ߡߊ߬ ߛߌ߯ߙߌ߲߫߸ ߊ߲ ߓߘߊ߫ ߘߌ߬ߢߍ߬، ߊ߬ ߞߊߣߊ߬ ߛߍ߲߫ ߟߊ߫ ߛߌ߯ߙߌ߲߫߸ ߊ߲ ߓߘߊ߫ ߘߌ߬ߢߍ߬، ߊ߬߬ ߞߊߣߊ߬ ߢߎߡߍ߫ ߟߊߘߏ߲߬ ߛߌ߯ߙߌ߲߫߸ ߊ߲ ߓߘߊ߫ ߘߌ߬ߢߍ߫ ߊ߬ ߟߊ߫ ߢߎߡߍ ߘߐ߫، ߓߊ߬ߙߵߊ߬ ߦߋ߫ ߤߌߣߴߊ߲ ߠߊ߫߸ ߊ߬ ߦߴߊ߲ ߠߊ߫ ߘߎ߰ߞߟߏ ߕߏ߫ ߊ߲ ߓߟߏ߫، ߊ߲ ߝߊ߬ ߟߎ߫ ߣߐ߬ ߘߎ߰ߞߟߏ ߡߍ߲ ߕߏ߫ ߟߴߊ߲ ߓߟߏ߫߸ ߊ߬ ߦߴߏ߬ ߕߏ߫ ߊ߲ ߓߟߏ߫ ߊߟߊ߫ ߞߏߛߐ߲߬.
ߌߓߙߊߤߌߡߊ߬ ߞߊߡߊ߲߫ ߝߙߊ߬ߓߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
