ߊ߬ ߞߎ߲߬ߢߐ߲߯ ߝߌ߬ߟߊ ߟߋ߬ ߕߋ߲߬߸ ߖߌ߬ߣߍ߬ ߞߊ߲ߓߍ߲ ߞߊ߲ߕߌ߮߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߍ߫ ߖߡߊ߬ߣߊ ߞߣߐ߫، ߒ߬ߓߊ߬߸ ߊ߬ ߓߘߊ߫ ߦߌ߬ߘߊ߬ ߞߏ߫ ߊ߬ <<ߞߍ߲ߘߍ߫ ߜߋߙߋ߲ߜߋߙߋ߲߫>>، ߞߊ߬ߕߎ߲߯߸ ߞߎߡߊ ߟߋ߬ ߓߘߊ߫ ߛߌߦߊߦߊ߫ ߘߌ߲߬ߞߌߙߊ ߟߎ߬ ߘߐ߫߸ ߞߵߊ߬ ߓߍ߲߬ ߊ߬ ߝߊ߬ߘߌ߬ ߞߘߐ߬ ߞߏ ߡߊ߬߸ ߥߎ߬ߣߎ߲߬ߥߎ߬ߣߎ߲߬ ߞߎߡߊ߫ ߛߌߦߊߡߊ߲߫ ߣߌ߫ ߖߌ߲ߘߊ߯ ߖߎ߫ ߞߘߐ߫ ߞߎߡߊ߫ ߛߌߦߊߡߊ߲߫ ߦߴߊ߬ ߞߏ ߘߐ߫، ߒ߬ߓߊ߬߸ ߝߊ߰ߡߊ ߟߎ߬ ߓߘߴߊ߬ ߦߌ߬ߘߊ߬ ߞߏ߫ ߊ߬ ߞߍ߲ߘߍ߫߸ ߞߏ߫ ߕߴߊ߬ ߟߊ߫߸ ߊ߬ ߘߏ߲߬ ߘߴߊ߬ ߞߐߛߊ߬ߦߌ߲߫ ߦߊ߬ߣߌ߫ ߕߟߋ߬ ߘߊ߲ߘߐ߫.
ߊ߬ ߟߊ߫ ߟߊ߬ߟߌ߬ߟߌ߬ߟߊ߸ ߗߍߙߑߣߐ߫ ߡߊߡߊߘߎ߬ ߓߊ ߞߊ߲߫ ߞߏ߫ ߘߎ߲߬ߓߎߦߊ߬ <<ߦߋ߫ ߝߊ߬ߘߌ߬ ߢߌߡߊ߫ ߘߐ߫ ߞߍ߲ߘߍߦߊ ߘߐ߫ ߝߋߎ߫>> ߊ߬ ߘߏ߲߬ ߓߘߴߊ߬ ߦߌ߬ߘߊ߬ ߞߏ߫ ߊ߬ ߘߌ߫ ߣߊ߬ ߞߐߣߊߞߙߌ߫ <<ߕߋ߬ߟߋߝߌ߬ߟߊ ߣߌ߲߬ ߘߐ߫>>߸ ߖߡߊ߬ߣߊ ߞߌ߬ߓߊ߬ߙߏ߬ߘߊ߬ ߛߌߦߊߡߊ߲߫ ߓߘߊ߫ ߟߊ߬ߟߌ߬ߟߌ߬ߟߊ ߟߊ߫ ߞߎߡߊ ߢߌ߲߬ ߠߊߞߊ߬ߟߌ߬.
ߊ߬ ߕߟߋ߬ ߕߊ߲߫ ߣߌ߫ ߞߐ ߟߋ߬ ߕߋ߲߬߸ ߥߟߊ߫ ߞߎ߲߬ߢߐ߲߯ ߝߌ߬ߟߊ߬ ߣߌ߫ ߘߏ߫߸ ߖߌ߬ߣߍ߬ߞߊ ߟߎ߬ ߟߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߍ߫ ߖߡߊ߬ߣߊ ߞߣߐ߫߸ ߊ߬ߟߋ ߡߍ߲ ߛߊ߲߬ ߄߁ ߦߋ߫ ߕߋ߲߬، ߊ߬ ߓߐ߫ ߘߊ߫ ߖߌ߬ߣߍ߬ ߞߣߐ߫ ߞߏ߲ߞߏߜߍ ߕߟߋ߬ ߁߃ ߟߋ߬ ߡߊ߬߸ ߞߊ߬ ߥߊ߫ ߛߐ߬ߘߐ߲߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߟߊ߫ ߜߊ߬ߙߊ ߘߐ߫ ߊ߬ߘߌߛߊ߬ߓߋ߬ߓߊ߬، ߓߊ߬ߙߌ߬߸ ߊ߬ ߞߐߛߊߦߌ߲߫ ߡߊ߫ ߦߋ߫ ߡߎ߬ߕߎ߲߬߸ ߞߎߡߊ߫ ߜߘߍ߫ ߘߏ߲߬ ߡߊ߫ ߡߍ߲߫ ߊ߬ ߣߐ߬ ߘߐ߫ ߞߵߊ߬ ߓߍ߲߬ ߊ߬ ߥߊ߫ ߦߙߐ ߞߏ ߡߊ߬.
ߕߟߋ߬ ߕߊ߲߫ ߣߌ߫ ߞߐ ߣߌ߲߬ ߞߣߐ߫߸ ߝߊ߰ߡߊ ߝߋ߲߫ ߕߎ߲߬ ߡߊ߫ ߞߎߡߊ߫ ߡߎߣߎ߲߬߸ ߞߵߊ߬ ߦߌ߬ߘߊ߬ ߞߏ߫ ߞߊ߲ߕߌ߮ ߕߍ߫ ߖߡߊ߬ߣߊ ߞߣߐ߫، ߒ߬ߓߊ߬߸ ߓߊ ߎ߯ߙߌ߬ ߟߋ߬ ߞߊ߬ ߕߡߊ߬ߖߌ ߓߐ߫ ߓߍ߯ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߊ߲ߕߌ߮ ߕߍ߫ ߖߡߊ߬߬ߣߊ ߞߣߐ߫߸ ߊ߬ ߞߏ߬ߣߌ߲ ߡߴߊ߬ ߝߐ߫ ߊ߬ ߦߋ߫ ߖߡߊ߬ߣߊ߬ ߞߋߟߋ߲ ߡߍ߲ ߞߣߐ߫.
ߊߟߎ߫ ߦߴߊ߬ ߟߐ߲߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߊ߬ ߘߊ߫ ߝߊ߲߬ߞߊ ߟߊ߫ ߞߊ߬ߦߌ߯ ߂߀߂߁ ߠߋ߬ ߟߊ߫߸ ߞߵߊ߬ ߛߐ߬ߘߐ߲߬ ߊ߬ ߦߋ߫ ߕߏ߲ߕߊߟߊ߲ ߘߐ߫، ߞߏߟߌ߲ߞߏߟߌ߲߫ ߕߊ߬ߡߌ߲߬ߣߍ߲ ߣߌ߲߬ ߡߊ߬ ߂߀߂߅ ߟߊ߫߸ ߊ߬ ߛߎߘߊ߲߫ ߘߊ߫ ߞߊ߲ߕߌ߯ ߢߣߊߕߊߟߌ ߘߐ߫߸ ߛߊ߲߬ ߥߐߙߐ߲ߝߌ߬ߟߊ߫ ߟߋ߬ ߝߍ߲߬ߛߍ߲߬ߣߴߊ߬ ߦߋ߫ ߕߋ߲߬߸ ߞߊ߬ ߖߡߊ߬ߣߊ ߡߊ߬ߙߊ߫ ߏ߬ ߞߣߐ߫، ߏ߬ ߞߍ߫ ߘߊ߫ ߢߣߊߕߊߟߌ߫ ߟߋ߬ ߘߐ߫߸ ߖߡߊ߬ߣߊ ߝߊ߲߬ߞߊߛߌ߬ߣߊ ߟߎ߬ ߘߐ߫ ߞߟߏߡߊ ߓߍ߯ ߛߋ߲߬ߓߐ߬ ߘߊ߫ ߡߍ߲ ߘߐ߫.
ߊ߬ ߓߘߊ߫ ߞߊߙߏ߫ ߥߐ߯ߙߐ߫ ߓߐ߫ ߕߋ߲߬߸ ߞߊ߲ߕߌ߮ ߡߊߕߊ߯ߣߍ߲߫ ߠߋ߬ ߖߊ߬ߡߊ ߟߊ߫߸ ߊ߬ ߟߊ߫ ߓߐߟߌ ߡߊ߲߫ ߛߌߦߊ߫߸ ߊ߬ ߟߊ߫ ߞߎߡߊ ߝߣߊ߫ ߕߜߋ߫، ߓߙߊߡߊߖߊ߲ߓߊ߲ ߡߎ߰ߡߍ ߞߍ߫ ߘߊ߫ ߟߋ߬߸ ߊ߬ ߡߊ߫ ߞߎߡߊ߫߸ ߊ߬ ߓߙߊߡߊߖߊ߲ߓߊ߲߫ ߞߍ߫، ߊ߬ ߦߋ߫ ߘߊ߫ ߛߋ߲߬ߢߊ߬ ߞߋߟߋ߲߫ ߘߐߙߐ߲߫ ߠߋ߬ ߏ߬ ߥߊ߯ߕߌ ߟߊ߫، ߏ߬ ߞߍ߫ ߘߊ߫ ߖߡߊ߬ ߟߊ߬ߘߍ ߘߏ߫ ߟߋ߬ ߘߐ߫߸ ߘߐ߲߬ߞߟߌ߬ߟߊ߬ߟߊ߬ ߛߌߦߊߡߊ߲߫ ߕߘߍ߬ ߡߍ߲ ߘߊߞߎ߲ ߘߐ߫߸ ߊ߬ ߘߏ߲߬ ߡߊ߫ ߞߎߡߊ߫ ߦߋ߲߬، ߏ߬ ߟߏ߲߸ ߊ߬ ߞߊ߬ ߘߐ߲߭ ߛߋ߲߬ߕߊ ߢߊ߫ ߘߊ߲ߘߐ߫ ߞߍ߫ ߕߋ߲߬߸ ߞߏ߲ߜ߭ߏ߫ ߘߐ߲߬ߞߟߌ߬ߟߊ߬ߟߊ߫ ߞߏ߬ߝߌ ߏߟߋߡߌߘߋ߫ ߘߊߝߍ߬، ߏ߬ ߟߋ ߞߐ ߘߐ߫߸ ߊ߬ ߦߋ߫ ߘߊ߫ ߢߣߊߕߊߟߌ߫ ߟߏ߲߸ ߊ߬ ߕߊ߯ ߘߴߊ߬ ߟߊ߫ ߛߎߥߊ߲ߘߟߌ ߞߍ߫߸ ߊ߬ ߣߴߊ߬ ߟߊ߫ ߓߐ߬ߟߐ߲߬ߞߊ.
ߓߌ߲ߠߊߥߎߟߋ߲ ߠߊ߫߸ ߊ߬ ߞߵߊ߬ ߛߍ߲߫ ߊ߬ ߟߊߘߌߦߊߢߍߓߊ߯ ߡߐ߰ ߥߊ߯ ߕߊ߲߫ ߣߌ߫ ߞߐ߫ ߢߊߞߘߐ߫ ߞߐߣߊߞߙߌ߫ ߕߏ߬ߟߊ߲߬ߕߊ߲߬ ߓߙߊ ߘߐ߫ ߣߐ߲ߜ߭ߐ߫، ߏ߬ ߞߐߝߍ߬߸ ߊ߬ ߦߋ߫ ߘߊ߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߟߊ߫ ߜߊ߬ߙߊ ߘߐ߫߸ ߊ߬ ߞߊ߬ ߓߋߟߋ߲ߠߊ߫ ߞߟߊߒߞߋ߫ ߞߍ߫ ߦߋ߲߬.
ߊ߬ ߞߏ߬ߣߌ߲߸ ߗߍߙߑߣߐ߫ ߡߊߡߊߘߎ߬ ߓߊ ߣߌ߫ ߡߏߖ߭ߊߦߞ ߖߌ߬ߣߋ ߝߐ߰ߓߍ߬ߘߊ ߟߊ߫ ߘߊߘߐߖߊߥߏ ߡߍ߲ ߞߍ߫ ߘߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߕߡߊ߬ߖߌ ߓߐ߫ ߓߍ߯ ߘߐ߫߸ ߞߏ߫ ߕߍ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫، ߞߏ߫ ߡߐ߰ ߛߌ߫ ߞߊߣߊ߬ ߡߐ߰ ߤߊ߲ߞߟߌ ߢߊ߯ߡߌ߲߫߸ ߞߏ߫ ߕߴߊ߬ ߟߊ߫، ߞߏ߫ ߞߎߣߎ߲߬ ߕߙߊߓߊ ߕߟߋ߬ ߝߟߐ ߡߊ߬߸ ߊ߬ߟߎ߬ ߞߎߡߊ߫ ߘߊ߫ ߟߋ߬ ߜߋߟߋ߲ߜߋߟߋ߲ ߠߊ߫߸ ߊ߬ߟߎ߬ ߖߍ߬ߘߍ ߡߍ߲߫ ߘߊ߫ ߞߎߡߊ ߟߊ߫، ߊ߬ ߞߊ߬ ߘߊ߬ߟߎ ߡߍ߲ ߝߐ߫ ߞߊ߲ߕߌ߮ ߟߊ߫ ߕߎߣߎ߲ ߢߌ߲߬ ߠߊ߫߸ ߞߏ߫ ߊ߬ ߛߊ߲߬ ߟߏ߯ߟߎ ߟߋ߬ ߕߋ߲߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߴߛߋ߫ ߟߴߊ߬ ߡߝߊ߫ ߟߊ߫ ߞߵߊ߬ ߢߐߢߐ߲߫ ߊ߬ ߢߊ ߡߊ߬، ߏ߬ ߘߐ߫߸ ߞߏ߫ ߊ߬ ߣߐ߬ ߓߍ߲߬ߒ߬ߛߋ߲߬ߡߊ ߟߋ߬ ߕߣߐ߬ߓߐ߬ ߟߊ߫߸ ߞߵߊ߬ ߢߐߢߐ߲߫، ߗߍߙߑߣߐ߫ ߡߊߡߊߘߎ߬ ߓߊ ߞߵߏ߬ ߟߋ ߛߐ߬ߘߐ߲߫ ߞߵߊ߬ ߝߐ߫ ߝߐ߰ߓߍ߬ߦߊ߬ߟߊ ߟߎ߬ ߦߋ߫ ߞߵߊ߬ ߓߍ߲߬ ߘߎ߲߬ߓߎߦߊ߬ ߟߊ߫ ߞߏ ߡߊ߬، ߊ߬ߟߋ ߦߋ߫ ߟߊ߬ߟߌ߬ߟߌ߬ߟߊ ߟߋ߬ ߘߌ߫ ߞߊ߲ߕߌ߮ ߘߊߝߍ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
