ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߆ ߕߙߊߓߊ ߕߟߋ߬ ߅߸ ߘߊ߬ߡߊ߲߬ߓߋ ߟߋ߬ ߞߍ߫ ߘߊ߫ ߓߎ߬ߙߋ߫ ߝߊ߬ߕߐ߬ߦߊ߫߸ ߊ߬ ߣߌ߫ ߓߎ߬ߙߋ߫ ߞߐ߭ߝߌ߬ߟߊ߬ߣߍ߲߬߸ ߝߏ߫ ߞߊ߬ ߡߐ߰ ߞߋߟߋ߲߫ ߓߐ߬ߣߐ߫ ߊ߬ ߣߌ ߘߐ߫، ߦߋ߲߬ ߦߋ߫ ߞߌ߲߬ߕߌ߬ߢߊ߲߫ ߡߙߊ߬ߘߊ߬ߙߋ߲ ߠߋ߬ ߘߐ߫߸ ߞߎߘߍ߫ ߂߅ ߟߊ߫ ߛߌ߯ߙߌ߲߫ ߡߙߊ߬ߓߊ߰ߘߊ ߞߣߐ߫، ߛߙߋ ߟߎ߬ ߟߊ߫ ߝߐߟߌ߫ ߘߐ߫߸ ߡߐ߰ ߛߌߦߊߡߊ߲߫ ߦߋ߫ ߜߊ߲ߜߘߊ ߞߘߐ߫ ߡߎߣߎ߲߬߸ ߡߍ߲ ߠߎ߬ ߢߌߣߌ߲ ߦߴߌߘߐ߫.
ߓߌ߬ߟߊ߬ߒ߬ߘߐ ߣߌ߲߬ ߞߍ߫ ߘߊ߫ ߘߊ߬ߡߊ߲߬ߛߋ߲߬ ߦߙߐ ߡߍ߲ ߘߐ߫߸ ߦߋ߲߬ ߠߋ߬ ߦߋ߫ ߞߟߌ߫ ߟߊ߫ ߞߏ߫ ߓߊߙߌߦߍߙ߸ ߘߊ߬ߡߊ߲߬ߛߋ߲߬ߠߊ߬ ߛߌߦߊߡߊ߲߫ ߣߌ߫ ߞߕߊ߬ߞߕߊ߬ߣߍ߲߬ ߕߌ߮ ߛߌߦߊߡߊ߲߫ ߠߋ߬ ߥߊ߫ ߟߊ߫ ߦߙߐ ߏ߬ ߘߐ߫ ߦߋ߲߬߸ ߢߍ߫ ߡߊߘߏߣߌ߲߫ ߞߊ߲ߡߊ߬، ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߘߊ߬ߡߊ߲߬ߓߋ ߣߌ߲߬ ߓߙߊ߬ ߘߊ߫ ߞߍ߫ ߟߊ߫ ߟߋ߬ ߕߋ߲߬߸ ߞߵߊ߬ ߛߐ߬ߘߐ߲߬ ߡߐ߰ ߛߌߦߊߡߊ߲߫ ߦߋ߫ ߥߏ߭ ߞߣߐ߫ ߘߊ߬ߡߊ߲ ߛߋ߲߬ ߞߊ߲ߡߊ߬.
ߖߋ߬ߟߌ߬ߓߊ߬ߞߘߐ߫ ߟߊ߬ߛߏ ߢߊ ߕߘߍ߬ ߜߍ ߘߐ߫ ߘߌ߲߬ߞߌߙߊ ߣߌ߲߬ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߘߊ߬ߡߊ߲ ߓߋ߬ ߘߊ߫ ߟߋ߬߸ ߞߵߊ߬ ߛߐ߬ߘߐ߲߬ ߞߕߊ߬ߞߕߊ߬ߣߍ߲ ߘߏ߫ ߣߴߊ߬ ߟߊ߬ߓߏ߬ߙߌ߬ߓߊ߮ ߦߴߊ߬ ߞߣߐ߫ ߦߋ߲߬.
<<߁߄ߙߋ߲ ߠߋ߬ ߡߊ߬߸ ߊ߬ߟߎ߫ ߞߊ߬ ߒ ߠߊߟߐ߲ߠߌ߲߫ ߞߏ߫ ߞߏ߫ ߘߊ߬ߡߊ߲ ߓߘߊ߫ ߓߋ߬، ߒ ߣߊ߭ ߡߍ߲ ߞߍ߫ ߘߊ߫߸ ߊ߬ ߝߐ߫ ߘߊ߫ ߒ ߧߋ߫ ߞߏ߫ ߒ ߠߊ߫ ߟߊ߬ߓߏ߬ߙߟߌ߬ߟߊ ߡߊߘߌߡߌ߲ߣߍ߲߫ ߓߊߟߋ߬߸ ߊ߬ ߣߌ߫ ߞߏ߫ ߊ߬ߟߎ߬ ߓߘߴߊ߬ ߕߊ߬ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫، ߞߕߊ߬ߞߕߊ߬ߣߍ߲߬ ߁߁ ߠߋ߬ ߕߍ߬ߘߍ߫ ߘߊ߬ߡߊ߲ ߞߣߐ߫߸ ߊ߬ ߣߌ߫ ߡߐ߰ ߛߌߦߊߡߦߊ߲߫، ߣߌ߫ ߕߙߏ߬ߞߏ ߕߍ߫߸ ߡߐ߱ ߟߎ߬ ߢߌߣߌ߲߫ ߞߏ ߘߌ߫ ߜߟߍ߬ߦߊ߬ ߞߏߛߓߍ߫، ߊ߬ ߞߏ ߖߎ߯ߦߊߣߍ߲߫ ߓߊߟߋ߬.>>ߊ߬ ߞߵߏ߬ ߟߋ ߝߐ߫.
ߕߟߊߓߊ߯ߕߐ ߟߎ߬ ߘߐ߫߸ ߛߎ߬ߟߋ߬ߡߊߣ ߞߋߕߊ߬ ߞߊ߬ ߢߊߝߐߟߌ ߞߍ߫߸ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߞߊ߲ ߘߏ߫ ߟߋ߬ ߝߟߐ߫ ߛߐ߰ ߘߊ߫ ߓߐ ߡߊ߬ ߡߎߣߎ߲߬߸ ߞߊ߬ ߣߊ߬ ߕߏ߫ ߘߊ߬ߡߊ߲ ߓߋ߬ ߟߊ߫ ߞߋߟߋ߲ߘߌ߫ ߕߋ߲߬ ߌߞߘߐ߫ ߥߙߏߎ߬، ߞߵߊ߬ ߛߐ߬ߘߐ߲߬߸ ߓߊ߯ߙߊߞߍߟߊ߫ ߛߌߦߊߡߊ߲߫ ߦߋ߫ ߥߏ߭ ߞߣߐ߫.
<<ߊ߲ ߕߏߣߍ߲߫ ߓߊ߯ߙߊ ߟߋ߬ ߟߊ߫ ߘߊ߬ߡߊ߲ ߞߣߐ߫ ߝߊ߬ߕߐ߬ߦߊ߬ ߓߊߙߌߦߍߙ ߟߊ߫߸ ߊ߬ ߣߌ߫ ߞߐ߭ߝߌ߬ߟߊ߬ߣߍ߲߬߸ ߡߊ߲߬ߞߊ߲߬ߓߊ ߘߏ߫ ߓߐ߫ ߘߊ߫ ߕߋ߲߬ ߌߞߘߐ߫، ߏ߬ ߞߐߝߍ߬߸ ߝߎ߯ߘߌ ߞߊߘߌ߫ ߘߊ߫ ߞߊ߬ ߖߌ߰، ߘߏ߫ ߟߎ߫ ߛߋ߫ ߘߊ߫ ߕߟߊ߫ ߟߊ߫߸ ߒ߬ߞߊ߬ ߘߏ߫ ߟߎ߫ ߡߊ߫ ߛߋ߫ ߕߟߊ߫ ߟߊ߫ ߘߋ߬، ߘߏ߫ ߟߎ߫ ߣߴߊ߬ߟߎ߬ ߟߊ߫ ߔߏߔߏ ߟߋ߬ ߕߘߍ߬߸ ߊ߬ ߣߌ߫ ߞߕߊ߬ߞߕߊ߬ߣߍ߲ ߠߎ߬، ߕߋ߲߭ߕߋ߲߭ ߣߌ߲߬ ߘߐ߫߸ ߊ߬ ߜߍ߬ߟߍ߲߬ߡߊ߲߫ ߞߵߊ߬ ߟߐ߲߫ ߡߐ߰ ߖߊ߬ߕߋ ߡߍ߲ ߦߋ߫ ߝߎ߯ߘߌ ߞߘߐ߫.>> ߊ߬ ߞߵߏ߬ ߟߋ ߦߌ߬ߘߊ߬، ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߖߍ߬ߘߍ ߟߋ߬ ߥߊ߫ ߘߴߊ߬ ߖߘߍ߬ ߢߍ߫ ߘߊ߲ߘߊߛߏ ߟߊ߫߸ ߊ߬ ߟߊ߫ ߖߐߞߟߌ߫ ߘߊ ߓߊߛߌ߫ ߞߊ߲ߡߊ߬.
ߝߊ߬ߕߐ߬ߦߊ߬ ߁߭ ߘߎ߰ߕߌ߮ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߕߐ߯ ߞߏ߫ ߓߙߋߡߊ߬ ߞߡߊ߬ߙߊ߬߸ ߊ߬ ߞߊ߲߫ ߞߏ߫ ߊ߬ߟߎ߬ ߘߌ߫ ߛߋ߫ ߡߐ߰ ߞߋߟߋ߲߫ ߠߋ߬ ߛߊ߬ ߞߏ ߟߊߞߊ߬ߟߌ߬ ߟߊ߫ ߡߎߣߎ߲߬.
<<ߡߐ߰ ߞߋߟߋ߲߫ ߠߋ߬ ߛߎ߭ ߦߋߣߍ߲߫ ߝߟߐ߫߸ ߊ߬ ߣߌ߫ ߖߐߞߌߓߊ߯ߕߐ߫ ߡߐ߰ ߟߏ߯ߟߎ߫߸ ߡߍ߲ ߠߎ߬ ߛߋ߫ ߘߊ߫ ߡߞߊߘߊ߲߫ ߠߊ߫، ߢߌߣߌ߲ߠߌ߲ ߠߎ߬ ߦߴߌߘߐ߫߸ ߓߊ߬ߙߌ߬ ߊ߬ ߞߣߐ߬ߘߐ߬ߝߟߌ ߓߏ߲߬ߓߊ߬ ߣߍ߲ߞߍ߫، ߘߊ߬ߡߊ߲߬ ߕߌ߮ ߟߎ߫ ߞߏ߬ߣߌ߲ ߠߊ߫ ߝߐߟߌ߫ ߘߐ߫߸ ߡߐ߰ ߛߓߊ߬ ߘߌ߫ ߞߍ߫ ߝߎ߯ߘߌ ߞߘߐ߫ ߡߎߣߎ߲߬.>>
ߊ߲ ߠߊ߫ ߟߌ߬ߤߟߊ ߣߌ߲߬ ߛߓߍ߫ ߕߎߡߊ ߟߊ߫߸ ߕߙߏ߬ߞߏ ߘߏ߫ ߕߎ߲߬ ߓߘߊ߫ ߟߊߖߌ߰ ߘߊ߬ߡߊ߲߬ߝߍ ߘߐ߫ ߦߋ߲߬߸ ߛߊ߫ ߢߌߣߌ߲ߠߌ߲ ߘߌ߫ ߣߐ߰ߦߊ߬ ߢߊ ߡߍ߲ ߡߊ߬.
ߌߓߙߊߤߌߡߊ߬ ߞߊߡߊ߲߫ ߝߙߊ߬ߓߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
