ߣߌ߲߬ ߞߍ߫ ߘߊ߫ ߖߌ߬ߣߍ߬ ߕߎߞߘߐߟߊ ߞߎߓߋߘߊ ߟߋ߬ ߟߊ߫ ߒߛߙߍߜߘߍ߬߸ ߡߏ߬ߛߏ ߟߎ߬ ߓߘߴߊ߬ߟߎ߬ ߓߟߏߝߙߊ߬ ߢߐ߲߯ ߞߊ߲߬ ߞߊ߬ ߥߊߘߌ ߘߏ߫ ߟߊߘߍ߬ ߞߵߏ߬ ߞߍ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߡߌ߬ߘߊ߬ߟߌ ߞߎ߲߬ߞߘߐ߬ߛߌ߰ ߥߊߘߌ ߛߊ߬ߙߊ ߘߌ߫ ߂߀߂߅ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫.
ߞߊ߬ߦߌ߯ ߊ߬ ߝߐ߫ ߘߊ߫ ߞߏ߫ ߖߌ߬ߣߍ߬ ߞߊ߲ߕߌ߯ ߢߣߊߕߊߟߌ ߓߍߣߊ߬ ߞߍ߫ ߞߏߟߌ߲ߞߌߟߌ߲ ߕߋ߬ߟߋ߫ ߂߈ ߣߊ߬ߕߐ ߡߊ߬߸ ߡߙߌߦߊ ߘߏ߫ ߟߎ߫ ߞߎ߲߬ߠߊ߬ߓߐ ߦߋ ߘߊߡߌ߬ߣߊ߬ ߘߊ߫߸ ߦߏ߫ ߓߍ߯ ߟߊߘߍ߬ߣߍ߲ ߦߴߏ߬ ߞߙߐ߬ߛߌ߬ ߟߊ߫ ߕߋ߬ߟߋߝߌ߬ߟߊ ߣߌ߲߬ ߞߏ ߟߎ߬ ߡߊ߬ ߢߊ ߡߍ߲ ߡߊ߬، ߓߊߏ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߡߌ߬ߘߊ߬ߟߌ߬ ߞߏ߬ ߞߎߡߊ ߓߘߊ߫ ߞߍ߫ ߛߊ߲ߞߊߥߟߌ ߘߌ߫߸ ߡߐ߰ ߛߌߦߊߡߊ߲߫ ߓߘߴߊ߬ ߡߙߌߦߊ ߦߌ߬ߘߊ߫ ߏ߬ ߡߍ߲ ߘߐ߫ ߞߏ߫ ߝߏ߫ ߊ߬ ߦߋ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߢߣߊߕߊߟߌ߫ ߣߊ߬ߕߐ ߘߐ߫.
ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߎߡߓߊߟߌߦߊ ߣߴߊ߬ ߕߊ߫ ߞߵߊ߬ ߓߍ߲߬ ߡߊ߬ߡߌ߬ߘߊ߬ߟߌ߬ ߞߏ ߡߊ߬߸ ߞߊ߬ߦߌ߯ ߊ߬ ߝߐ߫ ߘߊ߫ ߞߏ߫ ߞߎ߲߬ߞߘߐ߬ߛߌ߰ ߥߊߘߌ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߉߀߀ ߟߋ߬ ߘߌ߫߸ ߏ߬ ߝߣߊ߫ ߓߘߊ߫ ߞߍ߫ ߊ߬ ߕߊ߫ ߞߏ߫ ߘߌ߫߸ ߓߍ߯ ߦߴߊ߬ ߝߍ߬ ߞߊ߬ ߘߏ߫ ߞߍ߫߸ ߞߊ߬ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊߜߍ߲߫߸ ߛߊ߫ ߥߊߘߌ߫ ߛߙߊ߬ߕߊ ߏ߬ ߘߌ߫ ߛߐ߬ߘߐ߲߬߸ ߊ߬ ߞߊߣߊ߬ ߞߢߊ߬ ߓߐ߫ ߟߊ߫ ߞߊ߲ߕߌ߯ߦߊ ߞߐ߫ ߥߊߘߌ ߏ߬ ߞߏߛߐ߲߬.
ߒ߬ߓߊ߬߸ ߟߊ߬ߡߊ߰ߓߊ߫ ߟߋ߬ ߕߘߍ߬ ߒߛߙߍߜߘߍ߬ ߞߎߓߋߘߊ ߟߊ߫ ߓߌ߬ ߞߍ߲ߘߍߟߏ߲ ߣߌ߲߬ ߡߊ߬ ߂߀߂߅ ߕߎߟߊߝߌ߲ ߕߋ߬ߟߋ߫ ߂߅߸ ߡߏ߬ߛߏ ߟߎ߫ ߞߵߊ߬ߟߎ߬ ߟߊߘߍ߬ ߘߋ߲ߡߌߛߍ߲ ߠߎ߬ ߟߊ߫ ߓߏ߲ߓߊ ߟߊ߫، ߡߏ߬ߛߏ ߢߌ߲߬ ߠߎ߬ ߦߋ߫ ߡߛߏ߬ ߞߙߎ߫ ߟߊߘߍ߬ߣߍ߲ ߠߎ߬ ߟߋ߬ ߘߌ߫߸ ߞߊ߬ ߝߘߊ߫ ߘߊߞߎ߲߫ ߛߌߦߊߡߊ߲߫ ߠߊ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߓߘߊ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߡߌ߬ߘߊ߬ߟߌ߬ ߥߊߘߌ ߞߋ߲߬ߥߟߎ߫ ߉߀߀ ߛߙߊ߬߸ ߊ߬ߟߎ߫ ߞߵߏ߬ ߜߍߛߓߍ ߘߌ߫߸ ߦߏ߫ ߊߟߎ߫ ߖߍ߬ߘߍ ߢߊ߫ ߦߴߏ߬ ߟߊ߫ ߖߌ߬ߦߊ߬ߓߍ ߘߐ߫ ߢߊ ߡߍ߲ ߡߊ߬߸ ߞߏ߫ ߛߊ߫ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߞߊ߲ߕߌ߯ ߢߣߊߕߊߟߌ ߞߊߣߊ߬ ߝߐ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐ߫.
ߊ߬ߟߎ߬ ߟߊ߫ ߖߡߊ߬ ߟߊ߬ߘߍ ߣߌ߲߬ ߘߐ߫߸ ߥߊ߲߬ߥߊ߲ ߘߏ߫ ߕߍ߬ߘߍ߫ ߊ߬ߟߎ߬ ߓߟߏ߫߸ ߊ߬ ߦߌ߬ߘߊ߬ߣߍ߲߬ ߡߍ߲ ߞߊ߲߫ ߞߏ߫: <<ߡߐ߰ ߞߋ߬ߟߋ߲߬ ߞߏ߫>> ߡߏ߬ߛߏ ߢߌ߲߬ ߠߎ߬ ߞߊ߲߫ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ <<ߜߟߍ߬ߦߊ ߓߍ߯ ߟߋ߬ ߟߊߥߟߌ߬>> ߞߵߊ߬ ߓߐ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߣߌ߲߬ ߢߍߡߊ߬، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߏ ߦߋ߫ ߢߊߓߏ ߟߋ߬ ߘߌ߫ ߓߌ߬: ߦߙߐ߫ ߟߐ ߣߌ߫ ߦߙߐ߫ ߟߊߞߎߘߦߊ ߟߎ߬ ߘߐ߫߸ ߟߊ߬ߞߊ߲߬ߘߊ߬ߟߌ ߘߐ߫߸ ߡߏ߬ߛߏ ߟߎ߬ ߟߊ߫ ߛߋߒߞߖߘߍߞߘߐ ߘߐ߫߸ ߊ߬ ߣߌ߫ ߓߊ߯ߙߊ߫ ߛߌߦߊߡߊ߲߫، ߏ߬ ߟߋ ߞߏߛߐ߲߬߸ ߞߏ߫ ߊ߬ߟߎ߬ ߕߍ߫ ߛߴߊ߬ߟߎ߬ ߢߊ ߓߍ߲߬ ߠߊ߫ ߞߊ߲ߕߌ߮ ߡߊ߬ ߢߊ߫ ߛߌ߫ ߡߊ߬.
ߡߏ߬ߛߏ ߘߏ߫ ߕߍ߬ߘߍ߫ ߖߊ߬ߡߊ ߣߌ߲߬ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ <<ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߴߊ߲ ߤߊߡߌ߲ ߦߙߊ߬߸ ߊ߬ ߞߋߟߋ߲߫ ߔߋ߫ ߟߋ߬ ߘߌ߫ ߛߴߊ߬ ߟߊ߫ ߓߊ߯ߙߊ ߟߎ߬ ߟߊߓߊ߲߫ ߠߊ߫߸ ߊ߬ ߣߐ߬ ߡߍ߲ ߠߎ߬ ߘߊߡߌ߬ߣߊ߬.>> ߞߎߡߊ ߏ߬ ߢߐ߲߰ ߝߐ߫ ߘߊ߫ ߡߐ߰ ߛߌߦߊߡߊ߲߫ ߠߋ߬ ߓߟߏ߫ ߦߋ߲߬߸ ߡߍ߲ ߠߎ߬ ߥߞߊ߬ߟߌ߬ߣߍ߲߬ ߢߊ ߓߍ߯ ߘߏ߫ ߡߊ߬߸ ߞߏ߫ ߝߏ߫ ߞߟߍ߬ߕߌ߮ ߦߋ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫.
ߓߊ߬ߙߌ߬߸ ߟߊ߬ߞߙߐ߬ߛߌ߬ߟߌ ߦߋ߫ ߘߊߞߎ߲ ߡߍ߲ ߘߐ߫ ߛߊ߫߸ ߖߊ߬ߡߊ ߡߙߌߦߊ ߘߌ߫ ߟߐ߲߫ ߢߊ ߡߍ߲߸ ߏ߬ ߟߋ ߢߊߢߌߣߌ߲ ߦߴߌ ߘߐ߫ ߓߊ߰ ߥߟߊ߫ ߡߎ߲߬ ߞߋߟߋ߲߫ ߦߴߊ߬ ߞߘߐ߫؟ ߓߊߏ߬ ߤߊ߲߯ ߊ߲ ߧߋ߫ ߟߏ߲ ߡߍ߲ ߘߐ߫ ߦߏ߫ ߓߌ߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߫ ߛߐ߰ߛߐ߰ ߡߎߣߎ߲߬ ߜߊ߲ߛߊ߲߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߦߴߊ߬ ߝߍ߬ ߞߊ߬ ߖߡߊ߬ߣߊ߬ ߞߎ߲߬ߕߌ߰ߦߊ ߢߌߣߌ߲߫، ߣߴߊ߬ ߡߊ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ߫ ߘߌ߫߸ ߥߊߘߌ߫ ߛߌߦߊߡߊ߲ߓߊ ߡߍ߲ ߠߎ߬ ߓߍ߯ ߓߘߊ߫ ߛߊ߬ߙߊ߫ ߣߌ߲߬߸ ߏ߬ ߟߎ߬ ߓߍߣߊ߬ ߞߍ߫ ߘߌ߬؟
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
