ߖߡߊ߬ߣߊ ߞߕߌߘߊ߫ ߛߊ߲ߘߐ ߞߊ߬ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߟߊ߫ ߛߙߍߘߍ߫ ߓߊ߲ߝߟߍ߬ߟߍ ߟߊߓߐ߫ ߞߎߣߎ߲߬ ߞߎߣߎ߲ߟߏ߲ ߡߊ߬ ߂߀߂߅ ߣߍߣߍߓߊ ߕߟߋ߬ ߁߂߸ ߡߍ߲ ߠߎ߬ ߛߐ߬ߘߐ߲߬ߕߐ߫ ߞߏߟߌ߲ߞߏߟߌ߲߫ ߣߊ߬ߕߐ ߕߋ߬ߟߋ߫ ߂߈ ߞߊ߲ߕߌ߯ ߢߣߊߕߊߟߌ ߘߐ߫، ߡߐ߰ ߞߐ߬ߣߐ߲߬ߘߐ߫ ߟߋ߬ ߕߊ߬ ߘߊ߫߸ ߖߌ߬ߣߍ߬ߞߊ ߟߎ߬ ߞߊ߫ ߞߊ߲߫ ߞߊ߬ ߛߎߥߊ߲ߘߟߌ ߞߍ߲ ߡߍ߲ ߠߎ߬ ߣߌ߫ ߢߐ߲߯ ߕߍ߫ ߡߎ߬ߕߎ߲߬߸ ߞߵߏ߬ ߟߊߛߌ߰ ߖߡߊ߬ߣߊ ߞߎ߲߬ߠߊ߫، ߒ߬ߓߊ߬߸ ߞߊߙߌߢߊ߲ ߓߌ߬ߟߊ߬ ߘߊ߫ ߡߐ߰ ߛߌߦߊߡߊ߲߫ ߠߋ߬ ߛߋ߲߭ ߘߐ߫߸ ߎߛߑߡߊߣߌ߲߬ ߞߊ߬ߓߊ ߣߌ߫ ߟߊ߲߰ߛߣߊ߬ ߞߎߦߊߕߍ߫ ߦߴߏ߬ ߟߎ߬ ߘߏ߫ ߟߋ߬ ߘߌ߫߸ ߏ߬ ߟߎ߫ ߣߍ߰ߓߐ߬ߣߍ߲߫ ߠߋ߬ ߊ߬ ߞߏ ߘߐ߫ ߝߋߎ߫.
ߞߎߣߎ߲߬ ߛߎ ߘߐ߫ ߣߍߣߍߓߊ ߕߟߋ߬ ߁߂ ߡߊ߬ ߞߐߣߊߞߙߌ߫ ߞߣߐ߫߸ ߛߌ߰ ߞߍߣߍ߲߫ ߕߍ߬ߘߍ߫ ߞߊ߬ ߡߙߌߘߐ ߡߍ߲ ߡߊߞߐ߬ߣߐ߲߬߸ ߏ߬ ߖߌ߲ߞߌ߲߫ ߘߊ߫ ߞߕߌߖߌ߲ ߛߊ߲ߘߐߕߊ ߓߟߏ߫، ߊ߬ߟߎ߫ ߛߐ߲߬ ߘߊ߫ ߛߙߍߘߍ߫ ߞߘߐ߬ߡߊ߲ ߠߋ߬ ߡߊ߬߸ ߏ߬ ߟߎ߫ ߟߋ߬ ߞߊ߫ ߞߊ߲߫ ߞߊ߬ ߥߊ߫ ߞߊ߲ߕߌ߯ ߢߣߊߕߊߟߌ ߓߙߊߓߐ ߘߐ߫ ߡߎ߬ߕߎ߲߬ ߂߀߂߅ ߞߏߟߌ߲ߞߏߟߌ߲ ߂߈، ߊ߬ߟߎ߬ ߦߙߌߞߊ ߦߋ߫ ߡߐ߰ ߞߐ߬ߣߐ߲߬ߘߐ߫ ߟߋ߬ ߘߌ߫߸ ߏ߬ ߟߎ߫ ߟߋ߬ ߕߐ߮ ߕߊ߬ߣߍ߲߬ ߛߍߣߍ߲߬ ߝߋߝߋ߫߸ ߘߡߊߞߊߛߟߌ ߟߎ߬ ߣߌ߫ ߡߊ߬ߝߐ߬ߦߌ߲߬ߝߐ߬ߦߌ߲߬ߠߌ߲ ߠߎ߬ ߓߍ߯ ߞߐߝߍ ߛߙߍߘߍ߫ ߘߍ߲߬ߞߍ߬ߕߎ߬ߣߍ߲ ߠߊߓߐ ߞߐ ߘߐ߫߸ ߞߕߌߖߌ߲ ߛߊ߲ߘߐߕߊ ߡߊ߫ ߟߐ߬ߦߙߌ߬ ߝߏߦߌ߬ ߦߋ߫ ߏ߬ ߟߎ߬ ߘߐ߫߸ ߡߍ߲ ߦߋ߫ ߕߊ߬ߕߊ߫ ߘߌ߫، ߏ߬ ߟߋ ߘߐ߫߸ ߊ߬ߟߎ߫ ߞߊ߬ ߛߙߍߘߍ߫ ߞߘߐ ߏ߬ ߟߋ ߕߏ߫ ߊ߬ ߡߊ߬.
ߛߐ߲߬ ߞߍߣߍ߲߫ ߡߍ߲ ߠߎ߬ ߟߊ߫ ߡߊ߬ߡߌ߬ߘߊ߬ߟߌ ߘߐ߫߸ ߏ߬ ߟߎ߬ ߝߟߍ߫ ߣߌ߲߬:
ߊߓߘߎߟߊߦߌ߫ ߦߋߙߏ߬ ߓߊߟߑߘߋ߬
ߡߊ߬ߞߊߟߋ߫ ߞߡߊ߬ߙߊ߬
ߌߓߙߊߤߌߡߊ߫ ߊߓߋ߬ ߛߌ߬ߟߊ
ߝߊ߭ߦߊ߬ ߟߊ߲߱ߛߊ߬ߣߊ߫ ߡߟߌ߬ߡߣߏ߫
ߊߓߘߎߟߊߦߌ߬ ߞߙߎ߬ߡߊ߬
ߡߏ߬ߤߊߡߍߘ ߣߊ߬ߓߋ
ߟߊ߱ߖߌ߬ ߓߎߣߊ߬ ߞߋߕߊ߬
ߡߊ߬ߡߊ߬ߘߌ߬ ߘߎ߲ߓߎߦߊ߫
ߊ߬ ߣߌ߫ ߡߏ߬ߤߊ߬ߡߍߘ ߛߋ߬ߙߌߝ ߕߎ߲߬ߞߙߊ߬
ߒ߬ߓߊ߬߸ ߞߕߌߘߊ ߞߊ߬ ߛߙߍߘߍ ߢߌ߲߬ ߠߎ߫ ߟߋ߬ ߡߊߘߊ߲߫ ߟߊ߬ߓߊ߲ ߘߐ߫߸ ߞߵߏ߬ ߞߍ߫ ߘߊ߰ߣߍ߲߫ ߥߋ߬ߘߋߥߋ߬ߘߋ ߘߌ߫، ߟߊ߬ߛߋ߬ߟߌ ߏ߬ ߡߍ߲ ߞߍ߫ ߘߊ߫ ߞߕߌߕߍ߯ߟߊ߫ ߝߏߘߋ߫ ߓߊ߲߬ߜ߭ߎߙߊ߬ ߓߟߏ߫߸ ߊ߬ߟߎ߬ ߓߊ߲ ߞߐ ߡߞߊ߬ߛߟߌ߬ߟߊ߬ ߁߈ ߠߊ߫ ߘߡߊߞߊߛߟߌ߫ ߞߊ߲ ߠߎ߬ ߘߐߞߕߌ߫ ߟߊ߫ ߞߊ߬ߣߌ߲߬߸ ߏ߬ ߟߎ߬ ߡߍ߲ ߠߎ߬ ߛߋ߲߬ߓߐ߬ ߘߊ߫ ߛߙߍߘߍ߫ ߘߍ߲߬ߞߍ߬ߕߎ߲߬ߣߍ߲ ߘߐ߫، ߡߐ߰ ߘߏ߲߬ ߝߣߊ߫ ߡߊ߫ ߛߐ߬ߘߐ߲߫ ߊ߬ߟߎ߬ ߘߐ߫߸ ߓߟߏ߫ ߛߋ߫ ߘߊ߫ ߞߍ߫ ߟߊ߫ ߡߍ߲ ߠߊ߫ ߘߡߊߞߊߛߟߌ ߟߊ߫߸ ߊ߬ ߓߍ߯ ߦߋ߫ ߘߊ߫ ߛߐ߲߬ߒ߬ߘߐ߬ߓߊߟߌ ߟߋ߬ ߘߌ߫.
ߡߊ߬ߡߌ߬ߘߊ߬ߟߌ߬ߟߊ ߡߍ߲ ߠߎ߬ ߗߌߙߏ߲ߣߍ߲߫߸ ߞߏ߲߬ߓߏ ߎߛߑߡߊߣߌ߲߬ ߞߊ߬ߓߊ ߦߴߏ߬ ߘߐ߫߸ ߓߍ߯ߦߊߟߞߊ ߟߎ߫ ߖߌ߱ ߞߙߎߞߊ (ߔߊߘߍߛ) ߞߊ߲ߕߌ߮ ߟߵߏ߬ ߘߌ߫߸ ߊ߬ߟߋ ߟߊ߫ ߡߞߊ߬ߛߌ߬ߟߌ ߟߊߛߊ߬ߦߌ߲߬ ߘߊ߫ ߟߋ߬، ߊ߬ ߟߊ߫ ߘߐ߬ߛߙߋ߬ ߟߊߕߊ߯ߣߍ߲ ߦߋ߫ ߘߊ߫ ߘߝߊߓߊߟߌ ߟߋ߬ ߘߌ߫߸ ߞߵߏ߬ ߞߎ߲߭ ߞߍ߫ ߡߊ߬ߟߐ߲߬ߠߌ߲߬ ߞߐߕߐ߮ ߦߋߓߊߟߌߦߊ ߘߴߊ߬ ߘߐ߫߸ ߏ߬ ߡߍ߲ ߦߋ߫ ߘߌߦߊߜߏߦߊ ߘߌ߫ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߕߐ߲ߛߋ߲ ߁߂߉ ߞߣߐ߫، ߞߏ߲߬ߓߏ ߞߵߊ߬ ߡߊߝߟߍ߫ ߘߡߊߞߊߛߟߌ ߘߐ߫߸ ߞߵߊ߬ ߟߊ߫ ߛߓߍ ߏ߬ ߟߎ߬ ߘߝߊ߫ ߝߋߎ߫߸ ߞߵߊ߬ ߖߌ߰ ߞߏ߫ ߊ߬ ߘߌ߫ ߛߋ߫ ߛߊߞߍ߫ ߟߊ߫߸ ߦߏ߫ ߣߊ߬ߒ߬ߕߊ߲߬ߧߊ ߞߏߟߊߕߊ߯ߡߊ ߛߊ߬ߙߌ߬ߦߊ߬ߛߎ߲ ߕߐ߲ߛߋ߲ ߂߄߀߲ ߞߵߊ߬ ߝߐ߫ ߢߊ ߡߍ߲ ߡߊ߬، ߓߊ߬ߙߌ߬߸ ߞߕߌߖߌ߲ ߞߵߏ߬ ߛߋ߲߬ߞߘߐ߬ߡߊߕߍ߰ ߞߊ߲ ߞߏ߫߸ ߞߏ߫ ߢߣߊߕߊߟߌ ߛߌ߰ߣߍ߲߫ ߛߊ߬ߙߌ߬ߦߊ߬ ߜߘߋߜߘߋ ߟߎ߫ ߟߋ߬ ߡߊ߬߸ ߘߊߘߐߓߍ߲ߠߌ߲߫ ߝߏߦߌ߬ ߡߊ߫ ߞߍ߫ ߊ߬ ߞߊ߬ ߓߍ߲߬ ߛߓߍ߫ ߟߊߘߏ߲߬ ߕߎ߬ߡߊ߬ߘߊ ߡߊ߬߸ ߏ߬ ߕߍ߫ ߕߊ߬ ߟߊ߫، ߏ߬ ߘߐ߫߸ ߞߏ߲߬ߓߏ ߡߊ߫ ߛߴߊ߬ ߟߊ߫ ߞߏ ߟߎ߬ ߢߊߓߐ߫ ߟߊ߫ ߞߵߊ߬ ߓߍ߲߬ ߕߎ߬ߡߊ ߡߍ߲ߞߍ߬߸ ߊ߬ ߟߊߜߎ߬ߝߎ߲߬ ߘߴߏ߬ ߟߋ ߘߐ߫ ߞߵߊ߬ ߣߍ߰ߓߐ߬ ߘߏߦߌ߲߫.
ߡߐ߰ߓߊ߬ ߜߘߍ߫ ߝߣߊ߫ ߛߋ߲߬ߓߐ߬ ߘߊ߫ ߣߌ߲߬ ߞߏ ߘߐ߫߸ ߏ߬ ߟߋ ߟߊ߲߰ߛߣߊ߬ ߞߎߦߊߕߍ߫ ߘߌ߫߸ ߖߌ߬ߣߍ߬ ߞߏߕߌ߯ ߝߟߐ ߣߌ߫ ߝߊ߬ߛߏ ߟߊߥߙߎߞߌ ߖߊ߰ߡߝߊ߬ ߞߙߎߞߊ (ߔߋ.ߋ.ߘߋ.ߍߣ) ߞߊ߲ߕߌ߮، ߏ߬ ߝߣߊ߫ ߟߊ߫ ߡߊ߬ߡߌ߬ߘߊ߬ߟߌ ߦߋ߫ ߘߊ߫ ߛߐ߬ߒ߬ߘߐ߬ߓߊߟߌ ߟߋ߬ ߘߌ߫، ߊ߬ߟߋ ߓߘߊ߫ ߕߎ߬ߡߊ߬ ߖߊ߲߫ ߞߍ߫ ߖߌ߬ߣߍ߫ ߓߘߍ߬ߓߘߍ߬ߟߌ ߘߐ߫ ߝߋߎ߫߸ ߊ߬ ߓߘߊ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߛߋ߲߬ߢߊ߬ ߛߌߦߊߡߊ߲߫߸ ߓߊ߬ߙߌ߬ ߞߕߌߖߌ߲ ߡߊ߫ ߥߛߊ߬߸ ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߡߊ߫ ߛߋ߫ ߘߊ߬ߟߎ߬ ߖߐ߲ߖߐ߲߫ ߝߏߦߌ߬ ߛߐ߬ߘߐ߲߬ ߠߊ߫߸ ߡߍ߲ ߘߌ߫ ߞߕߌߖߌ߲ ߢߊߥߏ ߝߊ߫، ߏ߬ ߟߋ ߞߏߛߐ߲߬߸ ߊ߬ ߝߣߊ߫ ߡߊ߫ ߛߴߊ߬ ߟߊ߫ ߞߙߎ߬ ߣߊߡߘߊ ߟߊߦߟߍ߬ ߟߊ߫߸ ߡߍ߲ ߠߊߘ߲ߊߣߍ߲߫ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߓߟߏ߫، ߣߍ߰ߓߐ߬ߟߌ ߡߍ߲ ߠߎ߬ ߞߍߣߍ߲߫ ߣߌ߲߬߸ ߏ߬ ߓߘߊ߫ ߞߍ߫ ߘߝߐ߬ ߞߎߘߊ߫ ߟߋ߬ ߘߌ߫ ߣߌ߲߬ ߡߎ߬ߕߎ߲߬߸ ߓߊߏ߬ ߛߊ߲߬ ߇ ߟߐ߬ߒ߬ߞߋ߬ߟߊ ߦߋ߫ ߢߍߝߍ߬ ߡߎߣߎ߲߬.
ߏ߬ ߢߊ߫ ߞߋߟߋ߲ ߠߋ߬ ߝߣߊ߫ ߡߊ߬߸ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ (ߕߎ߲ߓߊ߬)߸ ߊߟߌߝߊ߫ ߞߐ߲ߘߍ߫ ߂߲߸ ߡߏߙߌ߬ ߞߊ߬ߓߊ߸ ߏ߬ ߟߎ߬ ߓߍ߯ ߟߊ߫ ߛߓߍ ߟߊߛߊ߬ߦߌ߲߬ߣߍ߲߫ ߠߋ߬.
ߞߕߌߖߌ߲ ߞߵߊ߬ ߘߊߣߐ ߕߏ߫ ߊ߬ ߡߊ߬߸ ߞߏ߫ ߡߞߊ߬ߛߟߌ߬ ߝߏߦߌ߬ ߞߍߣߍ߲߫߸ ߊ߬ ߛߌ߫ ߕߍ߫ ߞߊ߬ߟߊ߫ ߞߊ߲߬ ߞߵߊ߬ ߓߍ߲߬ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߝߐ߫ ߞߊ߲ ߠߎ߬ ߡߊ߬، ߊ߬ߟߎ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߛߓߍ߫ ߟߊߘߏ߲ ߛߙߊߕߌ ߓߍ߯ ߦߋ߫ ߘߝߊ߫ ߟߊ߫ ߞߵߊ߬ ߓߍ߲߬ ߕߎ߬ߡߊ߬ߘߊ ߟߋ߬ ߡߊ߬߸ ߣߴߏ߬ ߕߊ߬ߡߌ߲߬ ߘߊ߫߸ ߡߊ߬ߞߏ߬ ߕߍ߫ ߘߝߊߟߌ߫ ߝߏߦߌ߬ ߟߊ߫ ߡߎ߬ߕߎ߲߬.
ߡߙߌߘߐ ߡߍ߲ ߏ߬ ߘߌ߫߸ ߏ߬ ߟߋ ߞߊ߬ ߘߊ߲߭ߛߌ߰ ߊ߬ ߞߎߡߊ߫ ߡߌߛߍ߲ ߓߍ߯ ߟߊ߫߸ ߓߊߏ߬ ߣߴߊ߬ ߡߊ߫ ߢߊ߬ ߞߏ߫ ߛߓߍ߫ ߟߊߘߏ߲ ߕߎ߬ߡߊ ߓߘߊ߫ ߕߊ߬ߡߌ߲߬ ߞߊ߬ߦߌ߯ ߣߍߣߍߓߊ ߕߋ߬ߟߋ߫ ߃، ߒ߬ߓߊ߬߸ ߢߣߊߕߊߟߌ ߓߙߊߓߐ ߓߘߊ߫ ߕߏ߫ ߡߐ߰ ߞߐ߬ߣߐ߲߬ߘߐ ߏ߬ ߟߎ߫ ߟߋ߬ ߓߟߏ߫ ߛߍߣߍ߲߬. ߡߐ߰ ߛߌ߫ ߣߌ߫ ߟߊ߬ߛߏ߬ߓߌ߬ߟߌ ߦߊ߫ ߞߊ߲߫ ߡߙߌߘߐ ߢߌ߲߬ ߠߊ߫߸ ߏ߬ ߓߘߊ߫ ߞߍ߫ ߞߕߌߘߊ ߓߟߏ߫ ߞߊ߬ ߓߊ߲߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
ߊ߬ߟߋ߬ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߕߐ߮ ߣߴߊ߬ߟߎ߫ ߖߌ߬ߦߊ߬ߓߍ ߝߟߍ߫ ߣߌ߲߬:
