ߒߞߏ ߦߋ߫ ߛߓߍߛߎ߲߫ ߞߊ߲ߡߊߛߙߋߡߊ߫ ߟߋ߬ ߘߌ߫߸ ߡߍ߲ ߛߌ߲ߘߌ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫ ߁߉߄߉ ߟߊ߫، ߊ߲ ߧߋ߫ ߛߌ߲ߘߌߓߊ߮ ߏ߬ ߡߍ߲ ߠߊ߫ ߛߊ߬ߦߊ ߛߊ߲߬ ߃߈ ߘߝߊ ߘߐ߫ ߓߌ߬ ߂߀߂߅ ߣߍߣߍߓߊ ߕߋ߬ߟߋ߫ ߂߃ ߘߌ߫، ߒ߬ߓߊ߬߸ ߒߞߏ ߓߘߊ߫ ߟߊߘߏ߲߬ ߞߊ߬ߙߊ߲߬ߕߊ߬ ߛߌߦߊߡߊ߲߫ ߠߋ߬ ߟߊ߫ ߖߌ߬ߣߍ߬ ߞߣߐ߫߸ ߊ߬ ߣߌ߫ ߕߟߋ߬ߓߋ߬ ߊߝߙߌߞߌ߬ ߖߡߊ߬ߣߊ߬ ߛߌߦߊߡߊ߲߫، ߊ߲ ߧߴߏ߬ ߞߊ߬ߙߊ߲߬ߕߊ ߘߏ߫ ߟߋ߬ ߞߣߐ߫ ߛߌ߯ߙߌ߲߫ ߡߙߊ߬ߓߊ߰ߘߐ ߣߌ߲߬߸ ߓߎ߬ߙߋ߬ ߓߎߞߊߙߌߦߊ߫ ߛߏ ߞߣߐ߫߸ ߞߏ߫ ߞߊ߬ߙߊ߲߬ߕߊ߫ ߟߊ߲߱ߛߌ߬ߣߍ߬ ߓߙߋߕߋ߫، ߞߊ߬ߙߊ߲߬ߘߋ߲߬ ߛߌߦߊߡߊ߲߫ ߠߋ߬ ߦߊ߲߬߸ ߡߍ߲ ߠߎ߬ ߦߋ߫ ߟߐ߲ߠߌ߲ ߢߌߣߌ߲ ߞߊ߲߬ ߢߊ ߓߍ߯ ߘߏ߫ ߡߊ߬.
ߞߊ߬ߙߊ߲߬ߕߊ ߣߌ߲߬ ߜߙߋ߬ߡߊߕߍ߰ߓߊ߮ ߦߋ߫ ߖߋ߬ߟߌ߬ߓߊ߬ߞߘߐ߬ߞߊ ߟߎ߬ ߘߋ߲ߞߍ߫ ߟߋ߬ ߘߌ߫߸ ߡߏߙߌ ߓߙߋߕߋ߫، ߛߐ߬ߘߐ߲߬ߓߊ߰ ߞߊ߲߬ ߠߊ߬ߓߊߕߏ ߣߌ߫ ߡߊ߲߬ߘߋ߲߬ߞߊ߬ߦߊ ߟߊߘߌߦߊߢߍ߸ ߏ߬ ߟߋ ߞߵߊ߬ߟߋ߫ ߟߐ߬ ߞߊ߬ߙߊ߲߬ߕߊ ߣߌ߲߬ ߛߌ߰ ߟߊ߫ ߛߋ߲߬ߠߊ: <<ߒߠߋ ߝߊ߬ ߕߍ߬ߘߍ߫ ߡߊ߲߬ߘߋ߲߬ߞߊ߫ ߛߣߍ߬ߞߍ߬ߟߊ ߟߋ߬ ߘߌ߫߸ ߊ߬ ߞߵߊ߲ ߥߟߋ߫ ߞߵߊ߬ ߝߐ߫ ߊ߲ ߧߋ߫߸ ߞߏ߫ ߊ߬ ߘߋ߲߫ ߛߌ߫ ߓߊ߯ ߝߋ߲߫ ߛߐ߬ߘߐ߲߬߸ ߏ߬ ߦߴߊ߬ ߘߐߖߊ߬ ߞߊ߬ ߥߙߏ߬ߝߋ ߛߋ߲߬߸ ߥߟߊ߫ ߞߊ߬ ߞߐ߬ߟߐ߲ ߛߋ߲߬߸ ߤߊߡߊߕߍ߲߫ ߞߊ߬ ߦߙߌ ߕߘߎ߫، ߣߌ߫ ߡߍ߲ ߘߏ߲߬ ߡߴߏ߬ ߞߍ߫߸ ߏ߬ ߦߋ߫ ߞߊ߬ߙߊ߲߬ ߦߙߐ ߟߐ߬، ߊ߬ ߘߏ߲߬ ߞߊ߬ ߒߠߋ ߘߏ߲߬ ߠߋ߬ ߞߊ߬ߙߊ߲߬ߕߊ ߟߊ߫߸ ߊ߬ ߞߊ߬ ߒ ߡߊߛߊ߬ߙߊ߫ ߟߋ߬ ߜߘߋߜߘߋ߫߸ ߞߏ߫ ߒ ߓߊ߯ ߞߍ߫ ߓߊ߯ߙߊ ߡߍ߲ ߞߍ߫ ߟߴߊ߬ ߦߋ߫߸ ߒ ߧߋ߫ ߒ ߘߐߖߊ߬ ߒ ߧߴߏ߬ ߞߍ߫ ߞߊ߬ߙߊ߲߬ ߦߙߐ߬ ߟߊ߬ߞߊ ߟߋ߬ ߘߌ߫ ߥߟߊ߫ ߖߌߟߞߊ ߟߎ߬.>>
ߞߊ߬ߙߊ߲߬ߕߊ߫ ߟߊ߲߲߱ߛߌ߬ߣߍ߬ ߓߙߋߕߋ߫ ߦߋ߫ ߝߏ߯ ߞߣߐ߫ ߥߐ߯ߙߐ߫ ߟߋ߬ ߘߌ߫ ߓߎߞߊߙߌߦߊ߫ ߛߏ ߞߣߐ߫߸ ߡߍ߲ ߞߊ߬ߙߊ߲߬ߘߋ߲ ߠߎ߬ ߦߋ߫ ߟߐ߲ߠߌ߲߫ ߛߓߊ߬ ߡߊߕߍ߬ ߟߊ߫ ߞߊ߲߫ ߛߓߊ߬ ߘߐ߫߸ ߊߙߊߓߎ ߣߌ߫ ߝߊ߬ߙߊ߲߬ߛߌ ߣߌ߫ ߒߞߏ، ߏ߬ ߟߋ ߘߐ߫߸ ߛߘߊ ߦߴߊ߬ ߞߊ߬ߙߊ߲߬ߕߊ ߟߊ߫߸ ߊ߬ ߞߊ߬ߙߊ߲߬ߡߐ߰ ߞߏ ߞߵߊ߬ ߘߓߐ߫߸ ߟߞߊ߬ߙߊ߲߬ߠߌ߲߬ߠߊ߫ ߇ ߟߋ߬ ߞߊ߬ߙߊ߲߬ߕߊ ߢߌ߲߬ ߠߊ߫߸ ߒߞߏ ߞߊߙߊ߲ߡߐ߯ ߃ ߣߌ߫ ߝߊ߬ߙߊ߲߬ߛߌ߬ ߞߊߙߊ߲ߡߐ߯ ߂ ߣߌ߫ ߊߙߊߓߎ߫ ߞߊߙߊ߲ߡߐ߯ ߂߸ ߡߍ߲ ߠߎ߬ ߦߋ߫ ߥߟߊ߬ߘߊ ߘߌ߫ ߟߊ߫ ߝߏ߯ ߞߣߐ߫ ߥߐ߯ߙߐ ߢߌ߲߬ ߠߎ߬ ߟߊ߫:
<<ߞߊ߬ߙߊ߲߬ߘߋ߲ ߞߙߎߞߍ߬ߙߍ ߦߋ߫ ߂߁߆ ߟߋ߬ ߘߌ߫߸ ߓߏ߲߫ ߝߟߐ߸ ߏ߬ ߘߌ߫ ߡߐ߰ ߇߂ ߕߊ߬߸ ߓߏ߲߫ ߝߌߟߊߣߊ߲߸ ߏ߬ ߘߌ߫ ߡߐ߰ ߄߀ ߕߊ߬߸ ߓߏ߲߫ ߛߓߊߣߊ߲ ߘߌ߫ ߡߐ߰ ߃߅ ߕߊ߬߸ ߓߏ߲ ߣߊ߯ߣߌ߲ߣߊ߲߸ ߡߐ߰ ߂߆، ߓߏ߲ ߟߏ߯ߟߎߣߊ߲ ߡߐ߰ ߂߂، ߓߏ߲ ߥߐ߯ߙߐߣߊ߲߸ ߏ߬ ߟߎ߬ ߡߍ߲ ߦߋ߫ ߥߟߊ߬ߟߊ߬ߓߐ ߞߊ߲߬ ߢߌ߬ߣߊ߲߬߸ ߡߐ߰ ߁߅، ߏ߬ ߟߋ ߞߙߎߞߙߍ ߦߋ߫ ߓߍ߲߬ ߠߊ߫ ߡߐ߰ ߂߁߆ ߡߊ߬.>> ߡߏߙߌ߫ ߝߊ߬ߓߎ߬ ߞߐ߲ߘߍ߫ ߟߋ߬ ߞߊ߲߫ ߕߋ߲߬.
ߝߊߕߎߡߊߕߊ߬ ߛߌ߬ߛߋ߬ ߡߍ߲ ߦߋ߫ ߟߞߊ߬ߙߊ߲߬ߠߌ߲߬ߠߊ߫ ߘߌ߫ ߞߊ߬ߙߊ߲߬ߕߊ ߢߌ߲߬ ߠߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߘߋ߲ߣߍ߲ ߠߎ߬ ߟߊ߫ ߞߊ߲߫ ߛߌߦߊߡߊ߲߫ ߞߊߙߊ߲ ߕߍ߫ ߝߙߋߞߋ߫ ߛߌ߫ ߘߌ߫، ߓߊߏ߬ <<ߘߋ߲ߣߍ߲ ߠߎ߬ ߦߴߊ߬ ߓߍ߯ ߢߊߦߋ߫ ߟߊ߫، ߞߊ߲߫ ߛߌߦߊߡߊ߲߫ ߞߊߙߊ߲ ߕߐ߬ߣߐ ߞߊ߫ ߓߏ߲߬ ߓߊߟߋ߬.>>
ߡߙߊߡߙߊ߫ ߞߊ߲ߕߍ߫ ߡߍ߲ ߦߋ߫ ߞߊ߬ߙߊ߲߬ߘߋ߲߬ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ << ߒߠߋ ߦߋ߫ ߒߞߏ ߞߊ߬ߙߊ߲߬ ߠߊ߫߸ ߊ߬ ߘߌ߫ ߒ ߠߊ߫ ߤߙߐߦߊ ߕߏ߫ ߒ ߓߟߏ߫߸ ߞߊ߬ ߒ ߝߊ߬ ߓߘߊ ߕߏ߫ ߒ ߓߟߏ߫، ߊ߬ ߘߌ߫ ߒ ߠߊ߫ ߞߊ߲ ߕߏ߫ ߒ ߓߟߏ߫߸ ߊ߬ ߘߌ߫ ߒ ߠߊ߫ ߛߌߣߌ߲ߢߍߛߌ߮ ߝߣߊ߫ ߕߏ߫ ߒ ߓߟߏ߫.>>
ߝߊ߬ߛߊߟߌ߫ ߞߐ߲ߘߍ߫ ߞߵߊ߬ ߦߌ߬ߘߊ߬ ߞߏ߫: <<ߒߠߋ ߦߋ߫ ߒߞߏ ߞߊ߬ߙߊ߲߬ ߠߊ߫ ߟߋ߬߸ ߛߊ߫ ߒ ߘߌ߫ ߞߍ߫ ߡߊ߲ߞߊߣߌ߲ߛߍ߲ߓߊ ߘߌ߫.>>
ߞߊ߬ߙߊ߲߬ߕߊ ߣߌ߲߬ ߟߐ߬ ߘߊ߫ ߂߀߂߃ ߟߋ߬ ߟߊ߫߸ ߞߵߊ߬ ߕߊ߬ ߏ߬ ߡߊ߬ ߞߵߊ߬ ߛߌ߰ ߓߌ߬ ߟߊ߫߸ ߊ߬ߟߎ߬ ߦߋ߫ ߓߊ߯ߙߊ߫ ߟߊ߫ ߞߎ߲߬ߠߊ߬ߛߌ߮ ߟߊ߫ ߢߍߥߟߊ ߟߋ߬ ߡߊ߬، ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߊ߬ߟߎ߬ ߦߋ߫ ߒߞߏ ߖߍ߬ߘߍ ߢߍߥߟߊ ߟߎ߫ ߓߊ߬ߛߊ߲߬ ߠߴߊ߬ ߢߣߊ߫߸ ߞߊ߬ ߛߋ߫ ߟߐ߲ߠߌ߲ ߘߌ߫ ߟߊ߫ ߘߋ߲ߣߍ߲ ߠߎ߬ ߡߊ߬߸ ߦߏ߫ ߖߡߊ߬ߣߊ ߖߍ߬ߘߍ ߞߵߊ߬ ߝߐ߫ ߢߊ ߡߍ߲ ߡߊ߬، <<ߞߎ߲߬ߠߊ߬ߛߌ߮ ߟߊ߫ ߢߍߥߟߊ ߦߋ߫ ߞߍ߫ ߟߴߊ߲ ߓߟߏ߫ ߒߞߏ ߘߐ߫߸ ߒߞߏ ߖߍ߬ߘߍ ߝߣߊ߫ ߢߍߥߟߊ ߟߎ߬ ߦߋ߫ ߞߍ߫ ߟߴߊ߲ ߓߟߏ߫، ߤߊߟߵߊ߲ ߠߊ߫ ߞߟߌߟߌ߫ ߛߓߍ߸ ߏ߬ ߟߎ߬ ߓߍ߯ ߦߋ߫ ߒߞߏ ߟߋ߬ ߘߐ߫، ߞߎ߲߬ߠߊ߬ߛߌ߮ ߟߊ߫ ߢߍߥߟߊ߫ ߘߟߊߡߌ߬ߣߊ߬ߣߍ߲ ߏ߬ ߟߎ߫ ߟߋ߬ ߦߋ߫ ߞߍ߫ ߟߴߊ߲ ߓߟߏ߫ ߒߞߏ ߘߐ߫.>> ߗߋߕߌ߮ ߟߋ߬ ߞߊ߲߫ ߕߋ߲߬߸ ߡߏߙߌ߫ ߝߊ߬ߓߎ߬.
ߞߊ߬ߙߊ߲߬ߕߊ ߣߌ߲߬ ߜߙߋ߬ߡߊߕߍ߬ߓߊ߮ ߣߴߊ߬ ߟߞߊ߬ߙߊ߲߬ߠߌ߲߬ߠߊ ߟߎ߬ ߢߌߣߌ߲ߣߍ߲߫ ߡߍ߲ ߡߊ߬ ߓߌ߬߸ ߏ߬ ߟߋ ߓߏ߬ߙߌ߬ߝߋ߲߬ ߞߏ ߘߌ߫، ߞߊ߬ߕߎ߲߯߸ ߞߊ߬ߙߊ߲߬ߕߊ ߦߋ߫ ߞߏ߲߬ߞߏ ߝߍ߬ ߢߊ ߡߍ߲߸ ߓߏ߬ߙߌ߬ߝߋ߲߬ ߞߏ ߟߋ߬ ߘߐߙߐ߲߫ ߘߌ߫ ߛߋ߫ ߦߋ߲߬ ߠߊߛߐ߬ߘߐ߲ ߣߐ߰ߦߊ߬ ߟߊ߫ ߞߊ߬ߙߊ߲߬ߘߋ߲ ߠߎ߬ ߡߊ߬߸ ߞߊ߬ ߘߋ߲ߓߊߕߌ߮ ߟߎ߬ ߝߣߊ߫ ߓߐ߫ ߞߣߐ߬ߘߐ߬ߝߟߌ ߘߐ߫ ߊ߬ߟߎ߬ ߘߋ߲ ߠߎ߬ ߟߊ߫ ߞߊ߬ߙߊ߲߬ ߞߏ ߘߐ߫، <<ߡߍ߲ ߦߋ߫ ߕߙߐߦߊ ߖߍ߬ߘߍߖߍ߬ߘߍ ߘߌ߫ ߒߠߋ ߞߊ߲߬ ߓߌ߬߸ ߏ߬ ߟߋ ߓߏ߬ߙߌ߬ߝߋ߲߬ ߞߏ ߘߌ߫، ߓߊߏ߬߸ ߞߊ߬ߙߊ߲߬ߕߊ ߦߋ߫ ߞߏ߲߬ߞߏ ߟߋ߬ ߝߍ߬߸ ߊ߬ ߟߐ߯ ߦߋ߫ ߡߐ߰ ߛߌߦߊߡߊ߲߫ ߠߊ߫ ߞߵߊ߬ߟߎ߬ ߘߋ߲ ߕߊ߬ ߞߵߊ߬ ߟߊߣߊ߬ ߞߊ߬ߙߊ߲ ߠߊ߫ ߦߊ߲߬، ߓߊ߬ߙߌ߬߸ ߦߊ߲߬ ߠߊ߬ߛߐߘߐ߲ ߜߟߍ߬ߦߊ ߞߏߛߐ߲߬߸ ߏ߬ ߟߎ߬ ߘߌ߫ ߕߐ߬ߘߐߝߊ߰، ߓߊ߬ߙߌ߬ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߓߏ߬ߙߌ߬ߝߋ߲߬ ߞߏ ߣߐ߰ߡߊ߲߬߸ ߏ߬ ߘߌ߫ ߞߍ߫ ߛߊߓߎ߫ ߘߌ߫ ߞߊ߬ ߖߌ߰ߣߌ߬ߦߟߍ ߣߐ߰ߦߊ߬، ߞߊ߬ߕߎ߲߯߸ ߒߠߋ ߖߍ߬ߘߍ ߦߋ߫ ߡߐ߱ ߟߎ߬ ߡߊߘߏ߬ߣߌ߲߬ ߠߊ߫ ߞߕߊ߬ߞߕߊ ߟߋ߬ ߞߣߐ߫ ߦߊ߲߬.>>
ߞߊ߬ߙߊ߲߬ߕߊ ߣߌ߲߬ ߟߞߊ߬ߙߊ߲߬ߠߌ߲߬ߠߊ ߟߎ߬ ߦߋ߫ ߡߌ߬ߘߊ߬ ߞߏ߬ ߢߌߡߊ߫ ߘߐ߫߸ ߊ߬ߟߎ߬ ߟߊ߫ ߝߐߟߌ߫ ߘߐ߫ ߞߏ߫ ߊ߬ߟߎ߬ ߟߊ߫ ߞߏ ߟߎ߬ ߦߋ߫ ߢߊߓߐ߫ ߟߴߊ߬ ߢߌ߬ߡߊ ߟߊ߫߸ ߊ߬ ߣߴߊ߬ ߥߊ߯ߕߌ ߟߊ߫߸ ߓߐߒߣߘߐ ߟߋ߬ ߜߍ߬ߟߍ߲߬ߡߊ߲߫ ߊ߬ߟߎ߫ ߡߊ߬ ߛߍߣߍ߲߬ ߘߐߙߐ߲߫، <<ߜߟߍ߬ߦߊ ߡߍ߲ ߦߴߊ߲ ߞߊ߲߬ ߦߊ߲߬߸ ߏ߬ ߟߋ ߓߏ߬ߙߌ߬ߝߋ߲߬ ߞߏ ߘߌ߫، ߓߊߏ߬߸ ߒ ߧߋ߫ ߓߐ߫ ߟߊ߫ ߞߌ߲߬ߘߊ ߡߍ߲ ߠߊ߫߸ ߏ߬ ߣߌ߫ ߦߊ߲߬ ߕߍ ߖߊ߲߰ߡߊ߲߬، ߞߊ߬ ߓߐ߫ ߓߏ߬ߙߌ߬ߝߋ߲߬ ߞߏ ߞߐ߫߸ ߞߏ߫ ߜߘߍ߫ ߕߴߊ߲ ߞߊ߲߬ ߦߊ߲߬ ߡߍ߲ ߘߴߊ߲ ߢߊߓߐ߫ ߟߞߊ߬ߙߊ߲߬ߠߌ߲߬ߠߊ߬ ߜߘߍ߫ ߝߍ߬>>
ߟߞߊ߬ߙߊ߲߬ߠߌ߲߬ߠߊ߫ ߡߎߛߊ߫ ߖߌ߰ߡߊ߬ߝߊ߫ ߝߏߝߣߊ߫ ߞߵߊ߬ ߦߌ߬ߘߊ߬ ߘߋ߲ߓߊߕߌ߮߮ ߟߎ߬ ߟߊߟߌ ߘߐ߫߸ ߞߏ߫: <<ߓߍ߯ ߟߊߘߍ߬ߣߍ߲ ߦߴߊ߬ ߛߓߍ߬ ߞߍ߫ ߘߋ߲ ߠߊ߫ ߞߏ ߘߌ߫، ߡߊ߬ߣߌ߲߬ߞߊ ߟߎ߬ ߞߊ߲߫ ߞߏ߫ ߛߊ߲ߖߌ ߦߴߊ߬ ߞߐߕߏ߫ ߟߊ߫ ߞߐ߲ߓߌ ߟߋ߬ ߟߊ߫، ߊߘߡߊߘߋ߲ ߝߣߊ߫ ߞߐ ߟߋ߬ ߦߴߊ߬ ߘߋ߲ ߘߌ߫، (…) ߘߋ߲ߓߊߕߌ߮ ߟߎ߬ ߦߋ߫ ߣߵߊ߬ߟߎ߬ ߘߋ߲ ߘߌ߫ ߞߊ߬ߙߊ߲߬ ߦߌߟߊ߸ ߘߋ߲ ߠߊ߫ ߞߊ߬ߙߊ߲߬ ߕߎߡߊ ߟߋ߬ ߦߴߊ߬ ߘߐ߰ߡߊ߲߬ߣߍ߲ ߘߌ߫߸ ߊ߬ ߕߍ߫ ߓߊߟߏ߫ ߢߌߣߌ߲߫ ߠߊ߫߸ ߊ߬ ߕߍ߫ ߡߊ߲߬ߝߋ߲߬ ߛߐ߲ߞߐ߫ ߓߐ߫ ߟߊ߫߸ ߊ߬ ߕߍ߫ ߝߏߦߌ߬ ߜߘߍ߫ ߟߊ߫، ߝߏ߫ ߒ ߣߊ߬ ߌ ߣߌ߫ ߜߊ߬߸ ߒ ߝߊ߬ ߌ ߓߊߙߌߞߊ߫.>>
ߞߊ߬ߙߊ߲߬ߕߊ ߣߌ߲߬ ߟߐ߭ ߣߌ߫ ߛߌߛߍ߲߬ ߕߍ߫߸ ߊ߬ߟߎ߬ ߡߊ߫ ߕߙߐߦߊ߫ ߛߐ߬ߘߐ߲߫ ߞߊ߬ ߝߘߊ߫ ߞߎ߲߬ߠߊ߬ߛߌ߮ ߟߎ߫߸ ߊ߬ߟߎ߫ ߘߏ߲߬ ߡߊ߫ ߘߍ߬ߡߍ߲߬ ߝߣߊ߫ ߛߐ߬ߘߐ߲߫ ߞߊ߬ ߝߘߊ߫ ߞߎ߲߬ߠߊ߬ߛߌ߮ ߟߊ߫، ߏ߬ ߟߋ ߘߐ߫߸ ߊ߬ߟߎ߬ ߦߴߊ߬ߟߎ߬ ߓߟߏ ߘߐߛߌ߰ ߟߊ߫ ߡߐ߰ ߢߌߡߊ ߟߎ߬ ߦߋ߫ ߡߊ߬ߜߍ߲߬ߠߌ߲ ߘߌ߫:
<<ߊ߲ ߕߍ߫ ߡߊ߬ߜߍ߲߬ߠߌ߲߬ ߛߌ߫ ߛߐ߬ߛߐ߲߬ ߠߊ߫ ߞߊ߬ ߝߘߊ߫ ߘߍ߬ߞߙߎ߬ ߛߌ߫ ߟߊ߫߸ ߞߵߊ߬ ߝߐ߫ ߞߏ߫ ߊߟߎ߫ ߟߊ߫ ߞߊ߬ߙߊ߲߬ߕߊ ߡߊߜߍ߲ ߠߋ߬ ߣߌ߲߬߸ ߊߟߎ߫ ߦߋ߫ ߛߍ߬ߘߏ߲ ߡߍ߲ ߠߊ߫߸ ߊ߲ ߓߍ߯ ߟߊ߫ ߛߍ߬ߘߏ߲ ߠߋ߬ ߊߟߎ߫ ߟߊ߫ ߡߊ߬ߜߍ ߠߋ߬ ߣߌ߬߸ ߏ߬ ߡߊ߫ ߞߍ߫ ߝߟߐ߫، ߝߏ߫ ߞߎ߲߬ߠߊ߬ߛߌ߮ ߦߋ߫ ߞߟߌߟߌ ߡߍ߲ ߞߍ߫ ߟߊ߫ ߛߐ߲߬߸ ߞߊ߬ ߞߟߏߓߐ߮ ߘߏ߫ ߟߎ߫ ߘߌ߫߸ ߊ߬ ߣߌ߫ ߞߊ߬ߝߊ ߘߏ߫ ߟߎ߫، ߏ߬ ߘߏ߲߬ ߝߣߊ߫ ߦߋ߫ ߘߌ߫ ߟߊ߫ ߊ߬ߙߊ߬ߓߎ ߣߌ߫ ߝߊ߬ߙߊ߲߬ߛߌ ߛߌߟߊ ߟߋ߬ ߝߍ߬، ߓߊ߬ߙߌ߬߸ ߒߞߏ ߓߊ߬߸ ߍ߲߬ߍ߲߫.>>
<<ߣߴߌ ߞߵߊ߬ ߡߍ߲߫ ߞߏ߫ ߞߊ߬ߙߊ߲߬ߕߊ߸ ߞߊ߬ߙߊ߲߬ߕߊ ߦߋ߫ ߟߐ߬ ߟߊ߫ ߖߡߊ߬ߣߊ ߟߋ߬ ߦߋ߫، ߓߊߏ߬߸ ߟߐ߲ߠߌ߲ߠߊ ߓߊ߯ ߛߐ߬ߘߐ߲߬߸ ߊ߬ ߕߍ߫ ߞߍ߫ ߟߊ߫ ߘߏ߫ ߜߘߍ߫ ߘߌ߫ ߖߡߊ߬ߣߊ߬ߘߋ߲ ߞߐ߫، ߏ߬ ߟߋ ߘߐ߫߸ ߊ߬ߟߎ߬ ߦߴߊ߲ ߘߍ߬ߡߍ߲߫ ߞߊ߬ߙߊ߲߬ߝߋ߲߬ ߞߏ ߟߊ߫߸ ߞߵߊ߲ ߠߊ߫ ߞߊ߬ߙߊ߲ ߠߊߕߊ߯ ߢߍ߫߸ ߊ߬ ߣߌ߫ ߓߏ߬ߙߌ߬ߝߋ߲߬ ߞߏ.>>
ߒߞߏߞߏ ߛߌ߲ߘߌ ߛߊ߲߬ ߇߆ ߣߌ߲߬ ߞߣߐ߫߸ ߊ߬ ߓߘߊ߫ ߥߙߎߞߌ߫ ߘߊߞߎ߲߫ ߛߌߦߊߡߊ߲߫ ߠߋ߬ ߘߐ߫ ߕߋ߲߬߸ ߞߊ߬ߙߊ߲߬ߕߊ ߟߎ߬ ߦߋ߫ ߝߊ߲߬ ߛߌߦߊߡߊ߲߫، ߞߊ߬ߙߊ߲߬ߕߊ߫ ߟߊ߲߱ߛߌ߬ߣߍ߬ ߓߙߋߕߋ߫ ߦߴߏ߬ ߘߏ߫ ߟߋ߬ ߘߌ߫߸ ߓߍ߯ ߟߊߘߍ߬ߣߍ߲ ߞߊ߫ ߞߊ߲߫ ߞߊ߬ ߘߍ߬ߡߍ߲ ߟߐ߬ ߞߊ߬ߙߊ߲߬ߕߊ ߣߌ߲߬ ߡߊ߬ ߓߌ߬، ߓߊߏ߬߸ ߊ߬ߟߎ߬ ߟߊ߫ ߞߊ߬ߙߊ߲߬ߕߊ ߓߏ߲߫ ߞߣߐ߫ ߆ ߘߐ߫߸ ߅ ߟߋ߬ ߦߋ߫ ߓߊ߯ߙߊ߫ ߟߊ߫ ߕߋ߲߬߸ ߞߋߟߋ߲ ߕߍ߫ ߓߊ߯ߙߊ߫ ߟߊ߫ ߞߵߏ߬ ߛߊߓߎ ߞߍ߫ ߞߊ߬ߙߊ߲߬ߡߐ߰ ߞߏ ߘߌ߫، ߏ߬ ߡߊ߬߸ ߞߎ߲߬ߠߊ߬ߛߌ߮ ߓߊ߬߸ ߒߞߏ ߘߍߞߙߎ ߟߎ߬ ߓߊ߬߸ ߊ߬ ߣߌ߫ ߘߍ߬ߡߍ߲߬ߠߌ߲߬ ߘߍߞߙߎ ߕߐ߬ߡߊ ߟߎ߬߸ ߓߍ߯ ߞߊ߫ ߞߊ߲߫ ߞߵߊ߬ ߢߊ ߡߊߖߌ߰ ߣߌ߲߬ ߞߏ ߝߍ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߟߊ߫ ߞߊ߲߬ߞߎߡߊ ߟߋ߬
