ߡߊ߬ߛߎ߬ߓߊ߬ ߞߏ߬ߓߊ߫ ߟߋ߬ ߞߍߣߍ߲߫ ߞߙߏ߬ߡߊ߬ߘߎ߯ ߂߀߂߆ ߞߏ߲ߞߏߜߍ ߕߟߋ߬ ߇ ߣߌ߲߬ ߡߊ߬߸ ߏ߬ ߡߍ߲ ߓߍ߲߬ߣߍ߲߫ ߞߍ߲ߘߍߟߏ߲ ߡߊ߬ ߞߊ߬ߣߌ߲߬߸ ߞߐ߬ߖߊߙߊ߲߫ ߡߊ߬ߙߊ ߘߐ߫߸ ߞߎߘߍ߫ ߓߌߥߐߙߐ߲ߝߌ߬ߟߊ߬ ߣߌ߫ ߝߊ߲ߘߊ߫ ߟߵߊ߬ ߣߌ߫ ߞߊ߲ߞߊ߲߫ ߕߍ߫، ߛߙߊ߬ߟߏ߲߬ߞߊ߬ ߞߊ߲ߡߋߙߋ߲ ߘߏ߫ ߟߋ߬ ߣߐ߬ ߊ߬ ߖߍ߬ߘߍ߫ ߗߍ߬ߦߊ ߕߍ߰ ߟߴߊ߬ ߟߊ߫ ߞߡߋߛߎ ߟߊ߫، ߛߙߋ ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߣߐ߬ ߏ߬ ߞߍ߫ ߟߊ߫ ߖߌ߰ߕߍ߮ ߣߌ߫ ߓߊ߬ߟߌ ߟߋ߬ ߞߏߛߐ߲߬.
ߘߌ߲߬ߞߌߙߊ ߝߊ߰ߡߊ ߟߎ߬ ߟߊߟߐ߲ߠߌ߲߫ ߘߊ߫ ߁߀ߙߋ߲ ߠߋ߬ ߡߊ߬߸ ߏ߬ ߟߎ߬ ߝߣߊ߫ ߞߊ߬ ߞߟߍ߬ߡߐ߰ߘߊ ߟߊߟߐ߲ߠߌ߲߫߸ ߊ߬ߟߎ߫ ߞߵߊ߬ ߕߊ߬ ߞߊ߬ ߥߴߊ߬ ߘߌ߫ ߘߊ߲ߛߏ ߟߊ߫ ߦߋ߲߬߸ ߏ߬ ߟߎ߫ ߞߊ߬ ߡߊ߬ߜߍ߲߬ߠߌ߲߫ ߞߎ߲߬ߝߟߐ ߟߎ߬ ߞߍ߫ ߊ߬ ߟߊ߫߸ ߞߣߊ߬ߕߏ߫ ߊ߬ ߟߊߕߊ߯ ߟߊ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫ ߡߎ߬ߕߎ߲߬ ߛߊ߫.
<<ߊ߲ ߠߊߟߐ߲ߠߌ߲߫ ߘߊ߫ ߟߋ߬ ߞߏ߫ ߊ߲ ߓߊߘߋ߲ߡߊ ߘߏ߫ ߓߘߴߊ߬ ߖߍ߬ߘߍ߫ ߗߍ߬ߦߊ ߕߍ߰ ߊ߬ ߟߊ߫، ߊ߬ ߞߊ߬ ߞߡߋߛߎ ߟߋ߬ ߟߊߓߊ߯ߙߊ߫ ߞߵߏ߬ ߞߍ߫، ߊ߬ߟߋ ߣߊ߬ߣߍ߲߫ ߞߙߏ߬ߡߊ߬ߘߎ߯ ߦߊ߬ ߊ߬ ߤߊ߬ߙߌ߬ߖߍ߮ ߟߋ߬ ߡߊߝߟߍ߫ ߞߊ߲ߡߊ߬߸ ߓߊ߬ߙߌ߬ ߊ߬ ߓߘߊ߫ ߘߊ߬ߡߊ߲߬ ߞߋߟߋ߲߫ ߣߌ߫ ߝߌ߬ߟߊ߫ ߛߋ߲߬߸ ߊ߬ ߡߊ߫ ߓߍ߲߬ ߊ߬ ߓߟߏ߫.>> ߛߊ߯ߦߏ߲߫ ߂߲ ߞߙߏ߬ߡߊ߫ ߟߋ߬ ߞߵߏ߬ ߝߐ߫߸ ߊ߬ߟߋ ߡߍ߲ ߦߋ߫ ߞߙߏ߬ߡߊ߬ߘߎ߯ ߘߎ߰ߕߌ߮ ߘߌ߫ ߞߊ߬ߣߌ߲߬.
ߊ߬ ߟߊ߫ ߝߐߟߌ߫ ߘߐ߫߸ ߞߊ߲ߡߋߙߋ߲ ߣߌ߲߬ ߦߋ߫ ߞߣߐ߬ߘߐ߬ߝߟߌ߬ߓߊ߫ ߟߋ߬ ߘߐ߫ ߛߏ ߞߣߐ߫ ߦߋ߲߬، ߓߊߏ߬߸ ߊ߬ ߞߋߟߋ߲߫ ߠߋ߬ ߊ߬ ߣߊ߫ ߓߟߏ߫߸ ߏ߬ ߖߌ߱ ߦߴߊ߬ߟߋ ߟߋ߬ ߘߌ߫، ߌߞߏߡߌ߲߬ ߊ߬ ߦߴߊ߬ ߣߊ߫ ߞߟߌ߫ ߟߊ߫ ߕߋ߬ߟߋߝߌ߬ߟߊ ߣߌ߲߬ ߘߐ߫߸ ߏ߬ ߕߍ߫ ߞߟߌߟߌ߫ ߕߊ߬ ߟߊ߫߸ ߏ߬ ߕߊ߬ߣߍ߲ ߞߵߊ߬ ߟߊ߫ ߝߋ߲߫ ߛߐߘߐ߲ߓߊߟߌߦߊ ߞߊ߲߬، ߊ߬ ߝߣߊ߫ ߞߵߊ߬ ߣߊ߬ߕߊ߫ ߡߎ߬ߕߎ߲߬ ߞߏ߫ ߊ߬ ߦߋ߫ ߘߊ߲߭ߛߌ߰ ߊ߬ ߖߍ߬ߘߍ ߟߊ߫ ߢߣߊߡߦߊ ߟߊ߫߸ ߏ߬ ߟߋ ߓߐߘߊ ߘߌ߫.
ߘߎ߰ߕߌ߮ ߞߵߊ߬ ߟߴߊ߬ ߟߊ߫ ߛߙߊ߬ߣߎ߲ ߞߊ߲߬߸ ߞߏ߫: <<ߌߞߏߡߌ߲߬ ߘߊ߬ߡߊ߲߬ߛߋ߲ ߘߌߦߊߣߍ߲߫ ߕߴߊ߬ ߟߊ߫߸ ߊ߬ ߣߊ߫ ߘߏ߲߬ ߕߴߊ߬ ߟߊ߫ ߞߟߌߟߌ ߕߊ߬ ߟߊ߫߸ ߏ߬ ߖߌ߰ߕߍ߮ ߟߋ߬ ߥߙߊ߬ ߘߴߊ߬ ߡߊ߬ ߡߎ߬ߕߎ߲߬ ߛߊ߫.>> ߊ߬ ߞߵߏ߬ ߟߋ ߝߙߊ߬ ߞߎߡߊ ߞߊ߲߬.
ߘߎ߰ߕߌ߮ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߞߊ߲ߡߋߙߋ߲ ߣߌ߲߬ ߞߋߟߋ߲߫ ߔߋ߫ ߟߋ߬ ߛߌ߱ ߘߐ߫ ߦߋ߲߬߸ ߡߛߏ߬ ߕߴߊ߬ ߞߎ߲߬߸ ߘߋ߲߫ ߕߴߊ߬ ߓߟߏ߫ ߛߏ ߞߣߐ߫ ߦߋ߲߬߸ ߊ߬ ߘߏ߲߬ ߕߍ߫ ߡߌ߲߬ߠߌ߲߬ ߝߋ߲߫ ߡߌ߲߬ ߠߊ߫ <<ߊ߲ ߧߋ߫ ߡߍ߲ ߞߊ߬ߟߊߡߊ߬ ߞߊ߬ߣߌ߲߬.>> ߝߣߊ߫߸ ߊ߬ ߘߏ߲߬ ߘߊ߫ ߛߌ߬ߟߡߊ߬ߦߊ ߘߐ߫ ߛߌ߬ߣߌ߲߬ߟߏ߲߫ ߕߊ߬ߡߌ߲߬ߣߍ߲߬ ߖߊ߲ ߠߋ߬ ߡߊ߬ ߂߀߂߆ ߓߌ߲ߠߊߥߎߟߋ߲ ߕߟߋ߬ ߃߀߸ ߏ߬ ߞߎ߲߬ߢߐ߲߮ ߟߋ߬ ߕߘߍ߬ ߞߎߣߎ߲߬ ߖߎߡߊ ߘߌ߫، ߊ߬ ߟߊ߫ ߕߎ߬ߓߌ ߞߐ ߘߐ߫߸ ߊ߬ ߕߐ߯ߟߊ߫ ߘߊ߫ ߟߋ߬ ߞߏ߫ ߡߊ߬ߡߊ߬ߘߌ߬.
<<ߣߴߊ߬ ߡߊ߫ ߢߊ߬ ߞߏ߫ ߦߊ߲߬ ߦߋ߫ ߘߊ߬ߡߊ߲߬ߘߊ߬ ߓߏߟߏ߲ ߠߋ߬ ߘߌ߫߸ ߊ߲ ߧߋ߫ ߡߐ߰ ߛߌߦߊߡߊ߲߫ ߠߋ߬ ߟߊߛߐ߬ߘߐ߲߬ ߠߊ߫، ߏ߬ ߟߋ ߘߐ߫߸ ߊ߲ ߛߌ߲߬ߝߏ߲߬ߧߊ߬ߣߍ߲߬ ߞߏߛߓߍ߫߸ ߘߌ߲߬ߞߌߙߊ ߓߍ߯ ߡߐ߰ ߞߐߦߌ߬ߘߊ߬ߣߍ߲߫ ߠߋ߬ (ߌ ߓߙߎߞߌߣߊߓߋ߫ ߓߊ߬߸ ߛߙߊ߬ߟߏ߲߬ߞߊ߫ ߓߊ߬߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫)߸ ߞߏ߫ ߓߊ߯ ߡߍ߲ ߛߐ߬ߘߐ߲߬߸ ߏ߬ ߟߊ߫ ߞߐߦߌߘߊ ߏ߬ ߟߋ ߞߟߌ߫ ߟߊ߫.>> ߛߊ߯ߦߏ߲߫ ߂߲ ߞߙߏ߬ߡߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߛߏ߫ ߞߣߐ߫ ߡߐ߮ ߓߍ߯ ߞߟߌ߫ ߟߊ߫ ߖߊ߲߬ߕߏ߬ߒ߬ߘߐ߬ ߟߋ߬ ߡߊ߬߸ ߞߊ߬ ߡߐ߰ ߟߊߘߊ߬ߙߏ߬ߕߊ ߢߊߓߐ߫.
ߛߏ ߣߌ߲߬ ߛߌ߰ߓߊ߰ ߜߘߍ߫߸ ߞߏ߫ ߞߓߊ߬ ߘߎ߲ߓߎߦߊ߫߸ ߣߴߊ߬ ߦߋ߫ ߞߟߌ߫ ߟߊ߫ ߞߏ߫ ߛߐߟߑߘߊ، ߏ߬ ߞߵߊ߬ ߦߌ߬ߘߊ߬ ߞߏ߫ ߞߊ߲ߡߋߙߋ߲ ߕߎ߲߬ ߓߘߊ߫ ߕߋ߬ߟߋ߫ ߝߌ߬ߟߊ߬ ߞߍ߫ ߓߏ߲ ߠߊ߫߸ ߦߊ߬ߣߴߊ߬ ߦߋ߫ ߞߏߢߊ ߣߌ߲߬ ߞߍ߫.
<<ߊ߬ ߘߍ߬ߢߐ߲߮ ߠߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߵߊ߬ ߦߋ߫ ߖߋ߬ߟߌ ߟߋ߬ ߕߍߡߊ߬ ߛߐ߱ ߣߌ߲߬ ߡߊ߬، ߊ߬ ߕߘߍ߬ ߞߎߡߊ߫ ߟߊ߫߸ ߤߊ߲߯ ߞߵߊ߬ ߟߊߕߊ߯ ߞߊ߲ߞߊ߲߫߸ ߊ߬ ߕߘߍ߬ ߞߎߡߊ߫ ߟߊ߫، ߊ߲ ߞߏ߬ߣߌ߲ ߡߴߊ߬ ߟߐ߲߫ ߊ߬ ߦߋ߫ ߛߌ߰ߝߊߘߌ ߡߍ߲ ߘߐ߫ ߕߋ߲߬.>>
ߞߙߏ߬ߡߊ߬ߘߎ߰߰ ߦߋ߫ ߘߊ߬ߡߊ߲߬ߘߊ߬ ߛߏ ߡߍ߲ ߘߌ߫߸ ߊ߬ ߛߌ߰ߓߊ߮ ߘߌ߫ ߡߐ߱ ߇ ߀߀߀ ߢߐ߲߰ ߓߐ߫، ߘߎ߰ߕߌ߮ ߞߏ߬ߣߌ߲ ߞߵߊ߬ ߦߌ߬ߘߊ߬߸ ߞߏ߫ <<ߊ߬ ߛߋ߲߬ߢߊ߬ ߝߟߐ ߟߋ߬ ߕߋ߲߬߸ ߣߌ߲߬ ߛߎ߮ ߦߋ߫ ߞߍ߫ ߦߊ߲߬.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
