ߞߊ߲ߞߊ߲߫ ߞߍ߲ߘߍߦߊ ߝߊ߰ߡߊ ߣߌ߫ ߛߊ߬ߙߌ߬ߦߊ߬ ߓߊ߰ߙߊ߬ߟߊ ߟߎ߫ ߣߐ߬ ߘߊ߲ߘߊߟߌ߫ ߦߙߐ߫ ߟߏ߯ߟߎ߫ ߟߋ߬ ߘߊ ߕߎ߲߯ ߠߊ߫ ߂߀߂߆ ߞߏ߲ߞߏߜߍ ߕߟߋ߬ ߁߁ ߡߊ߬، ߓߊߏ߬߸ ߘߌ߬ߢߍ߬ߛߓߍ߬ ߖߐ߲ߖߐ߲߫ ߕߴߊ߬ߟߎ߬ ߓߟߏ߫ ߞߊ߬ ߝߘߊ߫ ߞߎ߲߬ߠߊ߬ߛߌ߮ ߟߊ߫. ߦߙߍߞߍߟߌ ߣߌ߲߬ ߘߐ߫߸ ߕߐ߲ߓߟߏߡߊ ߟߎ߫ ߓߊ߬߸ ߞߟߍ߬ߡߐ߮ ߟߎ߫ ߓߊ߬߸ ߊ߬ ߣߌ߫ ߘߊ߲ߘߊߟߌߟߊ ߟߎ߬߸ ߏ߬ ߟߎ߬ ߓߍ߯ ߟߋ߬ ߕߘߍ߬ ߢߐ߲߮ ߞߐ߫ ߣߌ߲߬ ߞߏ ߘߐ߫، ߊ߬ߟߎ߬ ߥߊ߫ ߘߊ߫ ߞߊ߲ߞߊ߲ߞߎߘߊ߫ ߞߌ߲߬ߘߊ ߟߋ߬ ߟߊ߫߸ ߊ߬ ߣߌ߫ ߞߏߙߌ߬ߦߊ߬ߟߋ߲߬.
ߊ߬ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߘߊ߲ߘߊߟߌ߫ ߦߙߐ ߢߌ߲߬ ߠߎ߬ ߦߋ߫ ߓߊ߯ߙߊ߫ ߟߊ߫ ߛߊ߬ߙߌ߬ߦߊ ߛߐ߬ߛߐ ߟߋ߬ ߞߊ߲߬߸ ߞߊ߬ ߖߊ߲߬ߞߊ߬ߙߏ߬ߕߐ ߟߎ߫ ߓߌ߬ߟߊ߫ ߖߐ߬ߘߐ߫ ߘߍ߬ߜߍ ߘߐ߫، ߓߎ߬ߙߋ߬ ߣߊ߯ߣߌ߲߫ ߠߋ߬ ߘߊ ߕߎ߲߯ ߘߊ߫ ߞߊ߲ߞߊ߲ߞߎߙߊ߫ ߞߣߐ߫߸ ߞߊ߬ ߞߋߟߋ߲߫ ߘߊߕߎ߲߯ ߞߏ߬ߙߌ߬ߦߊ߬ߟߋ߲߬.
ߗߋߦߊߟߌ ߣߌ߲߬ ߢߍߦߊ ߕߍ߬ߘߍ߫ ߞߏ߲߬ߓߏ߫ ߕߎ߬ߙߋ ߡߏ߬ߤߊ߬ߡߍ߬ߘ ߊߡߙߊ߫ ߟߋ߬ ߓߟߏ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߓߊ߯ߙߊ ߣߌ߲߬ ߦߋ߫ ߞߍ߫ ߟߴߊ߬ߟߎ߬ ߓߟߏ߫ ߝߊ߰ߡߊ߬ ߟߎ߫ ߟߋ߬ ߟߊ߫ ߖߊ߬ߡߊߙߌ ߞߣߐ߫߸ ߡߍ߲ ߠߎ߬ ߣߴߊ߬ ߞߊ߫ ߞߊ߲߫.
<<ߊ߲ ߧߋ߫ ߛߊ߬ߙߌ߬ߦߊ߬ ߓߊ߰ߙߊ߬ߟߊ ߟߎ߬ ߣߌ߫ ߞߍ߲ߘߍߦߊ ߝߊ߰ߡߊ ߟߎ߬ ߟߊ߫ ߖߡߊ߬ߙߌ߬ߞߊ߲߬ߠߊ ߟߋ߬ ߟߊߓߊ߬ߕߏ߬ ߟߊ߫، ߓߎ߬ߙߋ ߡߍ߲ ߠ߬ߎ ߘߊߕߎ߲߯ߣߍ߲߫ ߣߌ߲߬߸ ߘߌ߬ߢߍ߬ߛߓߍ߬ ߛߌ߫ ߕߴߏ߬ ߟߎ߬ ߓߟߏ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߬ ߣߌ߫ ߓߊ߯ߙߊ ߦߊ߫ ߞߊ߲߫، ߝߘߏ߬ߓߊ߬ ߞߍ߲ߘߍߦߊ ߘߏ߲߬ ߕߴߛߋ߫ ߕߏ߫ ߟߊ߫ ߡߐ߰ ߟߎ߬ ߕߍ߯ ߞߘߐ߫߸ ߡߍ߲ ߠߎ߬ ߣߴߊ߬ ߡߊ߲߫ ߞߊ߲߫.>> ߊ߬ ߞߵߏ߬ ߟߋ ߝߐ߫.
ߘߊ߲ߘߊߟߌߟߊ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߡߐ߱ ߟߎ߬ ߟߊߟߐ߲ߠߌ߲߫ ߠߊ߫ ߡߍ߲ ߠߊ߫߸ ߣߌ߲߬ ߞߏ ߓߘߊ߫ ߛߋ߫ ߢߊߢߌߣߌ߲߫ ߞߎ߲ߘߊ߫ ߡߎ߬ߕߎ߲߬، ߓߊߏ߬߸ ߞߊ߬ ߕߏ߫ ߘߊ߲ߘߊߟߌ ߞߍ߫ ߟߊ߫ ߡߐ߰ ߟߎ߬ ߓߟߏ߫ ߛߐ߲߬߸ ߡߍ߲ ߠߎ߬ ߣߴߊ߬ ߡߊ߲߫ ߞߊ߲߫߸ ߊ߬ߟߎ߬ ߓߟߏߡߊߞߊ߬ߣߍ߲߬ ߕߍ߫ ߘߊ߲ߘߊߟߌ ߓߏߟߏ߲ ߡߍ߲ ߞߊ߲ߡߊ߬ ߛߐ߲߬߸ ߞߊ߬ ߕߴߏ߬ ߓߊ߯ߙߊ ߞߍ߫ ߟߊ߫߸ ߏ߬ ߕߍ߫ ߞߏ߫ ߗߋ߲߰ ߘߌ߫.
<<ߊ߲ ߞߵߊ߬ ߟߊߞߙߐ߬ߛߌ߬ ߞߏ߫ ߛߋߒߞߏߟߊ ߘߏ߫ ߟߎ߫ ߣߌ߫ ߛߍߡߊ ߘߏ߫ ߟߎ߫ ߓߍ߫߸ ߏ߬ ߟߎ߬ ߦߋ߫ ߘߊ߲ߘߊߟߌ ߘߏ߫ ߟߎ߫ ߞߍ߫ ߟߊ߫߸ ߓߟߏߡߞߊߓߊ߮ ߟߎ߬ ߟߊ߫ ߓߊ߯ߙߊ ߟߵߏ߬ ߘߌ߫، ߔߊߟߊ߲ߞߊ ߏ߬ ߘߏ߲߬ ߞߐߝߟߌ ߘߌ߫ ߛߋ߫ ߞߍ߫ ߟߊ߫ ߡߊ߬ߛߎߓߊ ߘߌ߫߸ ߝߏ߫ ߡߐ߱ ߘߌ߫ ߛߋ߫ ߓߣߐ߬ ߟߴߊ߬ ߣߌ ߘߐ߫.>> ߊ߬ ߣߡߌߛߊߣߍ߲ ߞߵߏ߬ ߟߋ ߝߐ߫.
ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߡߊ߫ ߥߊ߫ ߓߊ߬ߙߊ߫ ߢߌ߲߬ ߠߎ߬ ߘߐ߫ ߘߋ߬، ߊ߬ߟߎ߫ ߞߵߊ߬ߟߎ߬ ߓߍ߯ ߟߊߛߏ߬ߓߌ߫ ߟߋ߬ ߡߎߣߎ߲߬߸ ߞߊ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߠߎ߬ ߞߍ߫ ߞߊ߬ ߞߊߙߏ ߕߏ߫ ߊ߬ ߟߊ߫.
ߊ߬ ߘߏ߲߬߸ ߞߏ߫ ߊ߬ߟߎ߫ ߣߐ߬ ߡߍ߲ ߘߊߡߌ߬ߣߊ߬ ߟߊ߫ ߣߌ߲߬߸ ߊ߬ߟߎ߬ ߞߍߕߐ߫ ߟߋ߬ ߊ߬ߟߎ߬ ߢߊ ߕߏ߫ ߟߴߊ߬ ߝߍ߬߸ ߞߊ߬ ߓߎ߬ߙߋ߫ ߞߋ߬ߟߋ߲߬ߠߊ߬ߓߌߟߊ ߓߍ߯ ߘߊߕߎ߲߯ ߞߋߟߋ߲ߞߋߟߋ߲߫، ߖߐ߲߰ߛߴߊ߬ ߝߋ߲߫ ߘߊ ߞߊߣߊ߬ ߟߊߞߊ߬ ߢߊ ߡߍ߲ ߡߊ߬ ߡߎ߬ߕߎ߲߬ ߝߣߊ߫.
ߜߋ߬ߟߎ߲߬ߠߌ߲ ߞߍߢߊ߫ ߞߎߘߊ ߡߍ߲ ߘߊߡߌ߬ߣߊ߬ߣߴߊ߬ߟߎ߬ ߓߟߏ߫ ߣߌ߲߬߸ ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߝߙߋߞߋ ߘߏ߫ ߟߎ߫ ߢߊߓߐ߫ ߕߎߡߊ ߓߘߊ߫ ߛߋ߫߸ ߞߵߊ߬ ߓߍ߲߬ ߘߊ߲ߘߊߟߌ߫ ߦߙߐ ߟߎ߬ ߟߊ߫ ߞߏ ߡߊ߬، ߞߊ߬ߕߎ߲߯߸ ߘߊ߲ߘߊߟߌ߫ ߦߙߐ߫ ߛߌߦߊߡߊ߲߫ ߠߋ߬ ߓߘߊ߫ ߛߏ߰ߟߊ ߟߊߛߋ߫ ߡߐ߱ ߟߎ߫ ߡߊ߬ ߞߊߙߏ߫ ߘߊ߲ߘߐ ߣߌ߲߬ ߞߣߐ߫.
ߞߵߊߟߎ߫ ߦߟߌߓߌ߬ߟߊ߬߸ ߡߊߙߌߦߊߡ ߞߐ߲ߘߍ߫ ߡߍ߲ ߛߊ߬ ߘߊ߫ ߡߌߛߌ߬ߙߊ߲߬߸ ߊ߬ ߣߌ߫ ߝߊ߲ߕߊ߬ ߖߊ߰ߓߌ ߡߍ߲ ߛߊ߬ ߘߊ߫ ߛߍ߲߬ߞߍ߬ߝߙߊ߫ߑ߸ ߏ߬ ߟߎ߬ ߓߍ߯ ߟߊ߫ ߛߊ߬ߦߊ ߕߎ߬ߙߎ ߞߍ߫ ߘߴߊ߬ߟߋ߬ ߘߊ߲ߘߊߟߌ߫ ߦߙߐ߫ ߞߋ߬ߟߋ߲߬ߠߊ߬ߓߌߟߊ ߟߎ߬ ߟߊ߫ ߜߋ߲߬ߘߐ߬ ߓߊ߯ߙߊ ߟߎ߬ ߟߋ߬ ߘߌ߫ ߔߊߟߊ߲ߞߊ ߞߏߛߐ߲߬.
