ߞߊ߲ߞߊ߲߫ ߞߣߐ߫߸ ߘߊ߲ߘߊߟߌ߫ ߦߙߐ߫ ߟߊߘߌ߬ߢߍ߬ߓߊߟߌ ߟߎ߬ ߘߊ ߕߎ߲߮ ߠߋ߬ ߜߊ߬ߣߍ߲߫ ߕߋ߲߬، ߓߌ߬ ߓߌߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߞߏߜߍ ߕߟߋ߬ ߁߂߸ ߏ߬ ߟߋ ߞߍ߫ ߘߊ߫ ߦߙߐ߫ ߘߊߕߎ߲߮ ߣߌ߲߬ ߕߟߋ߬ ߝߌߟߊߣߊ߲ ߘߌ߫߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫ ߖߊ߬ߡߊߙߌ ߕߊ߬ߣߍ߲ ߞߐߝߍ߬، ߞߊ߬ߕߎ߲߯߸ ߞߙߎ ߘߏ߫ ߟߎ߫ ߟߋ߬ ߞߙߍߞߙߍߣߍ߲߫ ߣߌ߲߬ ߞߏ ߜߋ߬ߟߎ߲߬ ߞߊ߲ߡߊ߬߸ ߝߏ߫ ߊ߬ߟߎ߬ ߓߘߊ߫ ߥߴߊ߬ߟߎ߬ ߢߊ ߟߊߕߊ߬ ߘߊ߲ߘߊߟߌ߫ ߦߙߐߣߍ߲ ߘߏ߫ ߟߊ߫߸ ߡߍ߲ ߕߎ߲߬ ߓߘߊ߫ ߘߊߕߎ߲߯ ߞߘߐ߬ߡߊ߲߬߸ ߞߵߏ߬ ߞߎ߲߭ ߞߍ߫ ߘߋ߲ߣߍ߲ ߘߏ߫ ߟߊ߫ ߛߊ߬ߦߊ ߘߌ߫ ߦߋ߲߬، ߒ߬ߓߊ߬߸ ߊ߬ ߟߊߞߙߐ߬ߛߌ߬ ߘߊ߫߸ ߞߏ߫ ߓߊ߯ߙߊ ߓߘߊ߫ ߘߊߡߌ߬ߣߊ߫ ߦߋ߲߬.
ߦߙߐ ߣߌ߲߬ ߦߋ߫ ߞߏߞߏ ߘߏ߫ ߟߋ߬ ߞߣߐ߫߸ ߡߍ߲ ߛߓߍߟߌ ߟߎ߬ ߦߴߊ߬ ߦߌ߬ߘߊ߬ ߟߊ߫ ߞߏ߫ ߖߌ߫ ߟߊߘߊ߲߫ ߦߙߐ ߟߋ߬، ߒ߬ߓߊ߬߸ ߊ߬ ߟߊߞߙߐ߬ߛߌ߬ ߘߊ߫ ߞߏߞߏ ߞߣߐ߫߸ ߞߏ߫ ߓߏ߲ߓߊ߫ ߜߘߍ߫ ߦߋ߲߬߸ ߡߍ߲ ߦߋ߫ ߛߌ߬ߓߏ߲ ߘߌ߫ ߣߴߊ߬ ߣߌ߫ ߖߌ߫ ߟߊߘߊ߲߫ ߦߙߐ ߘߊ߲߬ߓߐ߬ߣߍ߲߫߸ ߓߏ߲ߞߣߐ߫ ߞߋߟߋ߲߫ ߞߙߍߞߙߍߣߍ߲߫ ߦߋ߲߬߸ ߘߊ߲ߘߊߟߌ ߦߋ߫ ߞߍ߫ ߟߊ߫ ߦߙߐ ߡߍ߲ ߘߐ߫، ߞߍ߲ߘߍߦߊ ߞߣߐ߬ߜߍ߲ ߞߏߟߊߕߍ߮ ߟߎ߬ ߟߊ߫ ߝߐߟߌ߫ ߘߐ߫߸ ߘߊ߲ߘߊߟߌ߫ ߦߙߐ ߏ߬ ߘߊ ߕߎ߲߬ ߓߘߊ߫ ߕߎ߲߯ ߞߘߐ߬ߡߊ߲߬߸ ߞߵߏ߬ ߞߎ߲߭ ߞߍ߫ ߘߋ߲ߣߍ߲ ߘߏ߫ ߟߊ߫ ߛߊ߬ߦߊ ߘߌ߫ ߦߋ߲߬، ߊ߬ߟߎ߫ ߞߵߏ߬ ߘߐߓߛߏ߫ ߟߋ߬߸ ߏ߬ ߛߎ߬ߡߊ߬ߣߎ߲ߜߊ߲ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߊ߬ ߡߊ߫ ߛߋ߫ ߓߐ߫ ߟߴߊ߬ ߘߐ߫.
<<ߊ߲ ߕߋ߬ߟߋ߫ ߝߌ߬ߟߊ ߟߋ߬ ߞߣߍ ߞߊ߲߬ ߕߋ߲߬߸ ߞߊ߬ ߘߊ߲ߘߊߟߌ߫ ߦߙߐ߫ ߞߟߊ߬ߒ߬ߕߊ߲ ߠߎ߬ ߘߊߕߎ߲߯، ߦߊ߲߬߸ ߊ߲ ߣߐ߬ ߘߊ߲ߘߊߟߌ߫ ߦߙߐ߫ ߞߋ߬ߟߋ߲߬ߠߊ߬ߓߌߟߊ ߘߏ߫ ߟߋ߬ ߦߋ߫ ߟߊ߫ ߟߎ ߘߏ߫ ߞߣߐ߫، ߊ߬ ߘߏ߲߬ߞߏ ߟߎ߫ ߞߵߊ߬ߟߎ߫ ߓߏ߬ߙߌ߫ ߟߋ߬߸ ߊ߲ ߡߊ߫ ߡߐ߰ ߛߌ߫ ߛߐ߬ߘߐ߲߫ ߦߊ߲߬.>> ߞߏ߲߬ߓߏ߫ ߕߎ߬ߙߋ ߡߏ߬ߤߊ߬ߡߍ߬ߘ ߊߡߙߊ߫ ߟߋ߬ ߞߵߏ߬ ߝߐ߫߸ ߊ߬ߟߋ ߡߍ߲ ߦߋ߫ ߞߊ߲ߞߊ߲߫ ߡߙߊ߬ߓߊ߰ߘߊ ߜߋߙߋ߲ߜߋߙߋ߲ߧߊ ߗߋߕߌ߯ߘߊ ߞߏߟߊߕߍ߮ ߘߏ߫ ߘߌ߫.
ߊ߬ ߞߵߊ߬ ߦߌ߬ߘߊ߬ ߞߏ߫ ߘߋ߲ߣߍ߲ ߠߊ߫ ߛߊ߬ߦߊ ߞߐ ߟߋ߬ ߘߐ߫ ߘߊ߲ߘߊߟߌ߫ ߦߙߐ ߣߌ߲߬ ߘߐ߫߸ ߊ߬ߟߎ߫ ߞߵߊ߬ ߘߊߕߎ߲߯ ߌߞߘߐ߫، ߊ߬ ߣߌ߫ ߝߣߊ߫߸ ߞߏ߫ <<ߘߐ߬ߛߙߋ߬ ߛߌ߫ ߕߍ߫ ߓߎ߬ߙߋ ߣߌ߲߬ ߓߟߏ߫߸ ߡߍ߲ ߦߴߊ߬ ߖߊ߯ߙߋ߫ ߟߊ߫ ߓߊ߯ߙߊ ߟߊ߫.>>.
ߥߛߊ߬ߘߊ߬ߕߌ߮ ߢߌ߲߬ ߠߎ߬ ߕߏߣߍ߲߫ ߜߋ߬ߟߎ߲߬ߠߌ߲ ߠߋ߬ ߞߊ߲߬ ߓߌ߬߸ ߊ߬ߟߎ߬ ߥߊ߫ ߘߊ߫ ߕߙߍ߬ߣߍ߫ ߊ߬ ߟߊ߫߸ ߞߏ߫ ߓߎ߬ߙߋ ߣߌ߲߬ ߓߘߊ߫ ߓߊ߯ߙߊ ߘߊߡߌ߬ߣߊ߬߸ ߟߊ߬ߕߐ߲߬ߠߌ߲ ߞߐߝߍ߬، <<ߦߏ߫ ߊߟߎ߫ ߖߍ߬ߘߍ ߢߊ߫ ߦߴߊ߬߬ ߟߊ߫ ߢߊ ߡߍ߲ ߡߊ߬߸ ߊ߬ߟߎ߬ ߦߋ߫ ߓߊ߯ߙߊ ߞߊ߲߬ ߤߊߟߌ߬ߛߊ߫، ߊ߬ߟߎ߫ ߣߐ߬ ߊ߲ ߦߋ߫ ߟߊ߸ ߊ߬ߟߎ߫ ߞߵߊ߬ߟߎ߫ ߓߏ߬ߙߌ߬، ߣߌ߲߬ ߞߏ߫ ߛߎ߮ ߘߏ߲߬ ߞߊ߫ ߛߌߦߊ߫ ߓߊߟߋ߬߸ ߌ ߓߊ߯ ߓߐ߫ ߞߣߍ ߞߊ߲߬߸ ߌ ߘߴߊ߬ ߟߐ߲߫ ߞߏ߫ ߊ߬ ߦߋ߫ ߦߙߐ߫ ߛߌߦߊߡߊ߲߫ ߠߋ߬ ߘߐ߫.>> ߘߊ߲ߘߊߟߌߟߊ ߞߵߏ߬ ߟߋ ߝߙߊ߬ ߞߎߡߊ ߞߊ߲߬.
ߗߋߦߊߟߌ ߡߍ߲ ߦߋ߫ ߕߊ߯ߡߊ ߞߊ߲߬ ߣߌ߲߬߸ ߘߊ߲ߘߊߟߌߟߊ ߟߎ߬ ߦߴߊ߬ߟߎ߬ ߘߐ߫߸ ߕߐ߲ߓߟߏߡߊ ߟߎ߬ ߦߴߊ߬ߟߎ߬ ߘߐ߫߸ ߞߵߏ߬ ߟߊ߫ ߞߕߌ߫ ߓߊ߯ߙߟߊ ߟߎ߫ ߞߊ߲߬߸ ߏ߬ ߟߎ߫ ߟߋ߬ ߟߊߖߌ߰ߣߍ߲߬ ߞߣߍ ߞߊ߲߬. ߞߏ߲߬ߓߏ ߙߣߋ߫ ߡߟߌ߬ߡߣߏ߬ ߡߍ߲ ߦߋ߫ ߓߌ߬ߟߊ߬ߢߐ߲߰ߡߊ ߖߋ߬ߓߌ߬ߦߊ߬ߟߊ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߞߎߣߎ߲߬߸ ߊ߲ ߠߊ߫ ߓߐߟߌ߫ ߞߏ߫ ߝߟߐ ߘߐ߫߸ ߊ߲ ߞߊ߬ ߦߙߐ߫ ߂߅ ߟߋ߬ ߜߋ߬ߟߎ߲߬، ߥߐߙߐ߲ߝߌ߬ߟߊ߬ ߦߴߏ߬ ߟߎ߬ ߘߐ߫߸ ߏ߬ ߟߎ߬ ߘߊߕߎ߲߯ ߘߊ߫ ߟߋ߬ ߝߋߝߋ߫߸ ߓߊߏ߬ ߘߐ߬ߛߙߋ߬ ߛߌ߫ ߕߴߊ߬ߟߎ߬ ߓߟߏ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߬ ߣߌ߫ ߓߊ߯ߙߊ ߦߊ߫ ߞߊ߲߫، ߊ߬ ߕߐ߭ ߟߎ߬߸ ߏ߬ ߟߎ߬ ߦߋ߫ ߛߊ߬ߙߌ߬ߦߊ߬ ߞߣߐ߫ ߢߊ ߘߏ߫ ߡߊ߬، ߓߊ߬ߙߌ߬ ߢߊ߫ ߜߘߍ߫ ߡߊ߬߸ ߝߏ߫ ߢߊ ߦߋ߫ ߡߊߖߌ߰ ߊ߬ߟߎ߬ ߟߊ߫ ߞߏ ߞߘߐ߫ ߡߎߣߎ߲߬.>>
ߦߙߍߞߍߟߌ ߣߌ߲߬ ߦߴߌߘߐ߫ ߞߌ߲߬ߘߊ߬ ߛߌߦߊߡߊ߲߫ ߠߋ߬ ߞߣߐ߫߸ ߊ߬ߟߎ߬ ߓߘߊ߫ ߞߌ߲߬ߘߊ߫ ߛߊ߬ߓߊ߫ ߟߋ߬ ߞߍ߫ ߡߎߣߎ߲߬߸ ߞߊ߲ߞߊ߲ߞߎߘߊ߫߸ ߓߐ߬ߙߑߘߏ߫߸ ߊ߬ ߣߌ߫ ߞߏ߬ߙߌ߬ߦߊ߬ߟߋ߲߬، ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߥߊߕߐ߫ ߟߋ߬ ߜߋ߬ߟߎ߲߬ߠߌ߲ ߣߌ߲߬ ߡߊ߬߸ ߟߐ߬ߟߌ߬ ߕߴߊ߬ ߘߐ߫، <<ߞߏ߫ ߟߋ߬ ߘߊߡߌ߬ߣߊ߬ߣߍ߲߫ ߣߌ߲߬߸ ߡߍ߲ ߕߍ߫ ߓߟߏߕߍ߰ ߟߊ߫، ߘߊߕߎ߲߯ߠߌ߲ ߣߌ߲߬ ߞߐߝߍ߬߸ ߥߛߊ߬ߓߊ߰ߦߊ߬ ߜߘߍ߫ ߘߌ߫ ߕߊ߬ߡߌ߲߬ ߝߣߊ߫، ߡߍ߲ ߺ ߍ ߺ ߡߍ߲߫ ߞߵߊ߬ ߝߐ߫ ߞߏ߫ ߊ߬ ߘߌ߫ ߓߊ߯ߙߊ߫ ߛߊ߬ߙߌ߬ߦߊ߬ ߛߐߛߐ ߞߊ߲߬߸ ߏ߬ ߣߐ߬ߝߍ߬ߜߍ߲߬ߕߐ߫ ߟߋ߬߸ ߣߌ߫ ߤߌߣߊ߫ ߣߌ߫ ߞߏߘߐߞߏߦߊߕߏ߫ ߕߍ߫.>> ߊ߬ ߞߵߏ߬ ߟߋ ߞߊ߲߬ߞߊߙߌ ߟߊ߫.
ߊ߬ߟߎ߬ ߟߊ߫ ߕߊ߯ߡߊ ߡߍ߲ ߦߴߌߘߐ߫ ߣߌ߲߬߸ ߏ߬ ߞߍߣߍ߲߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫ ߡߙߌߘߐ߫ ߕߊ߬ߣߍ߲ ߘߏ߫ ߟߋ߬ ߞߐߝߍ߬، ߞߕߌߞߊ߲ߘߊ ߝߏߘߋ߫ ߓߌ߲ߕߎ߬ ߞߋߕߊ߬ ߞߵߊ߬ ߦߌ߬ߘߊ߬ ߡߍ߲ ߘߐ߫߸ ߞߏ߫ <<ߊ߬ ߕߍ߫ ߘߋ߬ ߦߏ߫ ߊ߲ ߧߋ߫ ߓߎ߬ߙߋ ߓߍ߯ ߟߋ߬ ߞߊ߲ߡߊ߬، ߊ߬ߦߌ߫߹ ߞߍ ߦߴߌߘߐ߫ ߦߙߐ߫ ߟߎ߫ ߟߋ߬ ߞߐ߫߸ ߡߍ߲ ߠߎ߬ ߦߋ߫ ߘߊ߲ߘߊߟߌ ߞߊ߲߬߸ ߥߟߊ߫ ߘߊ߲ߘߊߟߌ ߟߊߡߎߣߎ߲ߧߊ ߘߏ߫ ߞߊ߲߬߸ ߞߵߊ߬ ߛߐ߬ߘߐ߲߬ ߞߎ߲߬ߠߊ߬ߛߌ߮ ߟߊ߫ ߘߐ߬ߛߙߋ߬ ߛߌ߫ ߕߴߦߋ߲߬߸ ߡߍ߲ ߦߴߊ߬ߟߎ߬ ߖߊߙߋ߫ ߟߴߊ߬ ߟߊ߫߸ ߊ߬ ߘߏ߲߬߸ ߏ߬ ߛߎ߮ ߟߎ߬ ߞߍߓߊ߮ ߟߎ߬ ߓߊ߬߸ ߊ߬ߟߎ߬ ߞߐߞߘߐߘߏ߲߬ߓߊ߮ ߟߎ߫ ߓߊ߬߸ ߊ߬ߟߎ߬ ߓߍ߯ ߦߋ߫ ߓߌ߲߬ߓߊ߬ߥߏ߬ߟߌ ߘߊߜߟߏ ߟߋ߬ ߟߊ߫ ߏ߬ ߘߌ߫߸ ߡߍ߲ ߖߎ߯ߡߊ߲߫>>
ߡߙߊ߬ߓߊ߰ߘߊ ߜߋߙߋ߲ߜߋߙߋ߲ߧߊ ߗߋߕߌ߯ߘߊ ߟߊ߫ ߝߐߟߌ߫ ߘߐ߫߸ ߊ߬ߟߎ߫ ߛߐ߰ ߘߊ߫ ߟߊ߬ߛߏ߬ߓߌ߬ߟߌ ߟߋ߬ ߡߊ߬ ߡߎߣߎ߲߬߸ ߊ߬ߟߎ߬ ߟߊ߫ ߕߊ߯ߡߊ߫ ߕߊ߬ߡߌ߲߬ߣߍ߲ ߠߎ߬ ߘߐ߫߸ ߞߊ߬ ߦߙߐ߫ ߛߌߦߊߡߊ߲߫ ߠߊߛߏ߬ߓߌ߬، ߊ߬ ߖߍ߬ߘߍ߸ ߊ߬ߟߎ߫ ߞߊ߬ ߟߊ߬ߟߐ߲߬ߠߌ߲߬ߠߌ߲ ߟߊ߬ߘߍ ߘߏ߫ ߛߌ߰ ߛߋ߲߬ߠߊ߫، ߟߊ߬ߘߍ ߏ߬ ߘߐ߫߸ ߛߙߊߕߌ ߡߍ߲ ߦߋ߫ ߓߎ߬ߙߋ ߘߟߊߞߊ߭ ߟߊ߫߸ ߊ߬ ߣߴߊ߬ ߦߋ߫ ߓߊ߯ߙߊ߫ ߟߊ߫ ߢߊ ߡߍ߲ ߠߎ߬ ߡߊ߬߸ ߊ߬ߟߎ߫ ߞߵߏ߬ ߓߍ߯ ߢߊߝߐ߫ ߦߋ߲߬.
ߒ߬ߓߊ߬߸ ߛߊ߬ߦߊ ߞߍ߫ ߘߊ߫ ߘߊ߲ߘߊߟߌ߫ ߦߙߐ ߡߍ߲ ߞߣߐ߫߸ ߣߴߊ߬ ߘߊߕߎ߲߯ ߘߊ߫߸ ߏ߬ ߟߊߞߊ߬ߣߍ߲ ߦߋ ߞߐ ߣߌ߲߬ ߘߐ߫߸ ߏ߬ ߓߘߊ߫ ߕߊ߬ߡߌ߲߬ ߕߊ ߞߍ߫ ߟߊ߫ ߝߊ߰ߡߊ ߟߎ߬ ߞߟߊߓߎ ߘߐ߫߸ ߞߵߊ߬ߟߎ߬ ߟߝߊߘߌ߲ߧߊ߫ ߜߋ߬ߟߎ߲߬ߠߌ߲ ߘߊߓߊ߲ ߘߐ߫، ߞߊ߲ߞߊ߲߫ ߞߣߐ߫ ߕߋ߲߬߸ ߞߎߡߊ߫ ߝߌ߬ߟߊ߬ ߕߴߦߋ߲߬߸ ߞߊ߬ ߓߊ߯ߙߊ߫ ߘߊ߲ߘߊߟߌ ߞߣߐ߫ ߞߵߊ߬ ߛߐ߬ߘߐ߲߬ ߌ ߡߊ߫ ߖߡߊ߬ߙߌ߫ ߊ߬ ߟߊ߫߸ ߝߘߏ߬ߓߊ߬ ߞߍ߲ߘߍߦߊ ߕߐ߯ ߘߐ߫߸ ߌߟߋ ߟߊ߫ ߓߊ߯ߙߊ ߟߊߟߐ߬ߕߐ߫ ߟߋ߬.
