ߞߊ߯ߙߌ߸ ߂߀߂߆ ߞߏ߲ߞߏߜߍ ߕߟߋ߬ ߆ ߡߊ߬߸ ߟߊ߬ߞߐ߰ߟߌ߬ ߝߌߛߙߌߡߊ ߟߋ߬ ߞߍ߫ ߘߊ߫ ߞߊ߬ߙߌ߬ߝߊ߬ߡߘߎ߬ߦߊ߬ ߘߋ߲ߡߌߛߍ߲߫ ߓߏ߲ߓߊ ߞߣߐߟߊ ߘߐ߫߸ ߁߆ߙߋ߲ ߣߌ߫ ߁߈ߙߋ߲ ߕߍߟߊ ߘߐ߫، ߕߎ߬ߡߊ߬ߙߋ߲߫ ߝߌ߬ߟߊ ߏ߬ ߟߊ߬ߞߐ߰ߟߌ ߞߍ߫ ߘߊ߫ ߛߏ߬ߙߌ߫ ߥߎ߬ߦߊ߲߬ߞߌ߬ߣߍ߲߫ ߞߊ߬ߓߊ߫ ߟߋ߬ ߓߟߏ߫߸ ߊ߬ߟߋ ߦߋ߫ ߖߌ߬ߣߍ߬ߞߊ߬ ߕߊ߯ߡߊߘߋ߲ ߠߋ߬ ߘߌ߫߸ ߡߍ߲ ߓߘߴߊ߬ ߟߐ߬ ߘߋ߲ߡߌߛߍ߲ ߠߎ߬ ߟߊߞߐ߮ ߟߊ߫ ߕߋ߲߬ ߞߏߛߓߍ߫، ߖߡߊ߬ ߛߌߦߊߡߊ߲߫ ߠߋ߬ ߛߐ߬ߘߐ߲߬ ߘߊ߫ ߟߊ߬ߞߐ߰ߟߌ ߣߌ߲߬ ߘߐ߫߸ ߡߍ߲ ߝߊ߲߬ߓߊ ߓߍ߯ ߕߎ߲߬ ߦߋ߫ ߘߋ߲ߡߌߛߍ߲ ߠߎ߬ ߘߌ߫߸ ߞߵߊ߬ߟߎ߬ ߟߊߞߐ߯ ߖߘߍ߬ߛߐߘߐ߲ ߞߍߞߌߦߊ ߟߎ߬ ߟߊ߫߸ ߢߎߡߍߙߋ߲ߦߊߟߌ ߕߊ߬ߣߍ߲ ߞߵߊ߬ ߟߊ߫ ߖߘߍ߬ߞߎ߲߬ ߠߊ߬ߥߙߎߞߌ ߞߊ߲߬.
ߛߌ߲߬ߝߏ߲߬ߧߊ߬ߟߌ߬ߟߊ ߟߊ߫ ߝߐߟߌ߫ ߘߐ߫߸ ߟߊ߬ߞߐ߰ߟߌ ߣߌ߲߬ ߞߎ߲߭ ߛߊߣߌ߲ߡߊ߲߫ ߠߋ߬ ߛߎߋ߫: << ߒ ߢߐ߲߰ ߘߋ߲ߡߌߛߍ߲ ߡߍ߲ ߠߎ߬ ߦߋ߫ ߞߊ߬ߙߊ߲߬ߕߊ ߟߊ߫ ߓߊ߬߸ ߡߍ߲ ߠߎ߬ ߕߍ߫ ߞߊ߬ߙߊ߲߬ߕߊ߬ ߟߊ߫߸ ߊ߬ߟߎ߬ ߛߌߦߊߡߊ߲߫ ߠߋ߬ ߕߊ߯ߡߊ߫ ߟߊ߫߸ ߢߌߣߌ߲ߞߏ߫ ߖߐ߲ߖߐ߲߫ ߕߴߊ߬ߟߎ߬ ߟߊ߫، ߒ ߠߊ߫ ߟߊ߬ߢߌߣߌ߲ ߠߋ߬ ߏ߬ ߘߐ߫߸ ߏ߬ ߟߎ߬ ߦߋ߫ ߛߋ߫ ߢߌߣߌ߲ߞߏ ߘߏ߫ ߛߐ߬ߘߐ߲߬ ߠߴߊ߬ߟߎ߫ ߖߘߍ߬ ߦߋ߫߸ ߦߊ߬ߣߴߊ߬ߟߎ߬ ߞߍߕߐ߫ ߡߐ߰ߓߊ߬ߞߘߐ ߘߌ߫߸ ߏ߬ ߦߴߊ߬ ߛߐ߬ߘߐ߲߬߸ ߊ߬ߟߎ߬ ߓߘߊ߫ ߢߊ߫ ߛߐ߬ߘߐ߲߬ ߞߏ ߘߏ߫ ߡߊ߬.>>
ߛߏ߬ߙߌ߫ ߥߎ߬ߦߊ߲߬ߞߌ߬ߣߍ߲ ߘߋ߬ߙߌ߬ߣߍ߲߫ ߟߊ߬ߞߐ߰ߟߌ ߣߌ߲߬ ߞߍ߫ ߟߊ߫ ߞߐߞߊ߲ߠߊ ߟߎ߬ ߘߐ߫߸ ߞߵߊ߬ ߛߐ߬ߘߐ߲߬ ߊ߬ ߦߋ߫ ߛߌ߱ ߘߐ߫ ߌߕߊߟߌ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߴߊ߬ ߝߍ߬ ߞߊ߬ ߣߵߊ߬ ߟߊ߫ ߟߐ߲ߠߌ߲߫ ߛߐ߬ߘߐ߲߬ߣߍ߲ ߏ߬ ߟߋ ߟߊߘߏ߲߬ ߛߏ߫߸ ߞߵߊ߬ ߝߊ߬ ߓߘߊ߬ ߡߐ߮ ߟߎ߬ ߝߣߊ߫ ߛߐ߫ ߟߐ߲ߠߌ߲ ߏ߬ ߟߊ߫، << ߕߣߐ߬ ߕߍ߫ ߟߐ߲ߠߌ߲ ߢߌߣߌ߲ ߠߊ߫߸ ߞߵߊ߬ ߟߊߡߙߊ߬ ߌ ߞߋߟߋ߲߫ ߓߟߏ߫، ߓߊ߬ߙߌ߬߸ ߌ ߓߴߊ߬ ߘߌ߫ ߘߋ߲ߣߍ߲ ߠߎ߬ ߡߊ߬߸ ߏ߬ ߟߎ߬ ߝߣߊ߫ ߦߋ߫ ߟߐ߲ߠߌ߲ ߘߏ߫ ߛߐ߬ߘߐ߲߬.>> ߊ߬ ߞߵߏ߬ ߟߋ ߝߐ߫، ߞߵߊ߬ ߦߌ߬ߘߊ߬ ߞߏ߫ ߟߊ߬ߞߐ߰ߟߌ ߞߍߕߐ߫ ߊ߬ߟߎ߬ ߓߟߏ߫ ߘߊߞߎ߲ߓߊ߫ ߁߁ ߠߋ߬ ߞߊ߲߬߸ ߞߵߊ߬ ߓߍ߲߬ ߢߎߡߍߙߋ߲ߧߊߟߌ ߡߊ߬߸ ߖߡߊ߬ ߘߐ߬ ߞߎߡߊ ߡߊ߬߸ ߝߍߛߑߓߎߞ ߞߐߜߍ ߟߊߞߊ߭ ߣߴߊ߬ ߡߊߡߊ߬ߙߊ߸ ߊ߬ ߣߌ߫ ߓߍ߯ ߘߌ߫ ߛߴߊ߬ ߟߊ߫ ߓߊ߯ߙߘߊ߫ ߟߊߥߙߎߞߌ߫ ߟߊ߫ ߢߊ ߡߍ߲ ߡߊ߬.
ߟߊ߬ߞߐ߰ߟߌ߬ߟߊ ߞߵߊ߬ ߦߌ߬ߘߊ߬߸ ߞߏ߫ ߊ߬ ߟߊ߫ ߟߊ߬ߞߐ߰ߟߌ ߣߌ߲߬ ߦߋ߫ ߝߌߛߙߌ ߟߋ߬ ߘߌ߫: << ߒߠߋ ߕߍ߫ ߥߊߘߌ߫ ߢߌߣߌ߲߫ ߠߊ߫߸ ߖߡߊ߬ߣߊ ߘߌ߫ ߥߊ߫ ߢߍߝߍ߬ ߢߊ ߡߍ߲ ߡߊ߬߸ ߒߠߋ ߦߴߏ߬ ߟߋ ߞߐ߫،>>
ߊ߬ ߞߵߊ߬ ߞߊ߲ߠߊߘߌ߫ ߝߊ߰ߡߊ ߟߎ߫ ߡߊ߬߸ ߛߊ߫ ߞߊ߬ ߟߊ߬ߞߐ߰ߟߌ ߣߌ߲߬ ߛߌ߲߬ߝߏ߲߬ߧߊ߬ߟߌ ߟߊߣߐ߰ߦߴߊ߬ߟߎ߬ ߓߟߏ߫߸ ߊ߬ ߣߌ߫ ߖߐ߯ߙߊ߲߫ ߞߏ ߟߎ߬، ߞߊ߬ߕߎ߲߯߸ ߊ߬ ߟߐ߯ ߦߴߊ߬ߟߎ߬ ߟߊ߫߸ ߟߊ߬ߞߐ߰ߟߌ ߣߌ߲߬ ߦߋ߫ ߞߍ߫ ߦߙߐ߫ ߛߌߦߊߡߊ߲߫ ߠߋ߬ ߘߐ߫߸ ߖߌ߬ߣߍ߫ ߡߙߊ߬ߓߊ߰ߘߊ ߟߎ߬ ߞߣߐ߫߸ ߊ߬ ߣߴߊ߬ ߡߙߊ߬ߘߊ߬ߙߋ߲ ߠߎ߬.
ߕߘߍ߬ߒ߬ߘߐ߬ߓߊ߮ ߟߎ߫ ߞߊ߬ ߟߊ߬ߞߐ߰ߟߌ ߣߌ߲߬ ߕߐ߬ߣߐ ߟߊߞߊ߬ߟߌ߬، ߓߍ߯ߓߊߖߘߍ߬ߦߋ߫ ߞߡߊ߬ߙߊ߬ ߡߍ߲ ߦߋ߫ ߟߍߙߘߊ߫ ߛߊ߬ߙߌ߬ߓߎ ߞߋߕߊ߬ ߛߌ߲ߘߌߓߊ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߞߊ߬ ߟߐ߲ߠߌ߲ ߘߏ߫ ߟߎ߫ ߛߐ߬ߘߐ߲߫ ߟߊ߬ߞߐ߰ߟߌ ߣߌ߲߬ ߘߐ߫߸ ߏ߬ ߟߎ߬ ߓߟߏߦߊ ߓߘߴߊ߬ ߘߍ߬ߡߍ߲߬ ߞߏߛߓߍ߫، <<ߒ ߓߘߊ߫ ߟߊ߬ߞߐ߰ߟߌ ߣߌ߲߬ ߕߐ߬ߣߐ ߛߐ߬ߘߐ߲߬ [ … ] ߒ ߓߘߴߊ߬ ߞߍߞߌߦߊ ߘߏ߫ ߟߎ߫ ߓߟߏߦߊ߫ ߒ ߠߊ߫ ߓߊ߯ߙߊ ߘߏ߫ ߟߎ߫ ߘߐ߫߸ ߏ߬ ߟߎ߫ ߕߐ߬ߣߐ ߛߋ߫ ߘߊ߫ ߒ ߡߊ߬ ߝߋߝߋ߫.>> ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߟߊ߬ߞߐ߰ߟߌ߫ ߕߊ߬ߡߌ߲߬ߣߍ߲ ߓߏ߬ߙߌ߬ ߘߊ߫ ߖߐ߬ߘߐ ߡߊ߬ߡߙߊ߬ߟߌ ߡߍ߲ ߞߊ߲߬߸ ߏ߬ ߕߐ߬ߣߐ߫ ߘߍ߬ߜߍ ߟߋ߬ ߛߋ߫ ߘߴߊ߬ ߡߊ߬.
ߡߊߙߌߦߡߊ߫ ߡߌ߬ߙߌ߲߬ߡߊ߫ ߞߡߊ߬ߙߊ߬ ߡߍ߲ ߦߋ߫ ߞߊ߬ߙߊ߲߬ߠߊ߬ߘߋ߲߬߫ ߘߌ߫ ߞߊ߲ߞߊ߲߫ ߖߊ߯ߓߘߊ ߟߊ߫߸ ߏ߬ ߝߣߊ߫ ߞߵߊ߬ ߕߊ߫ ߕߐ߬ߣߐ߫ ߛߐ߬ߘߐ߲߫ ߟߊ߬ߞߐ߰ߟߌ ߣߌ߲߬ ߘߐ߫ ߞߊ߲߫ ߞߏ ߡߊ߬ߘߎ߮ ߘߐ߫، <<ߒ ߞߊ߬ ߕߣߐ߬ ߛߌߦߊߡߊ߲߫ ߠߋ߬ ߛߐ߬ߘߐ߲߫ ߟߊ߬ߞߐ߰ߟߌ ߣߌ߲߬ ߘߐ߫ [ … ]߸ ߒ ߓߘߊ߫ ߞߏ߫ ߛߌߦߊߡߊ߲߫ ߟߐ߲߫ ߓߌ߬ ߟߊ߬ߞߐ߰ߟߌ ߣߌ߲߬ ߘߐ߫.>>
ߟߊ߬ߞߐ߰ߟߌ ߣߌ߲߬ ߘߐ߫߸ ߡߐ߰ߓߊ߬ ߛߌߦߊߡߊ߲߫ ߠߋ߬ ߕߘߍ߬ ߞߣߍ ߞߊ߲߬߸ ߡߍ߲ ߠߎ߬ ߡߊߖߌ߰ߣߍ߲߫ ߕߘߍ߬ ߜߊ߮ ߞߘߐ߫، ߖߘߍ߬ߞߟߏ߬ߓߊ߰ߦߊ ߢߍߓߊ߮ ߕߘߍ߬ ߞߣߍ ߞߊ߲߬߸ ߢߍߓߊ߯ ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ߬، ߊ߬ߟߋ߫ ߞߊ߬ ߕߌ߲ߞߌ߫ ߓߎ߰ߓߎ߰ߣߍ߲ ߠߎ߬ ߞߍ߫ ߟߊ߬ߞߐ߰ߟߌ߬ߟߊ ߦߋ߫߸ ߞߊ߬ ߓߊ߲߫ ߞߊ߬ ߟߊ߬ߞߐ߰ߟߌ ߣߌ߲߬ ߕߊ߲߬ߘߏ߬ ߞߏߛߓߍ߫، ߞߵߊ߬ ߦߌ߬ߘߊ߬ ߞߏ߫: << ߊߟߊߡߵߊ߬ ߛߋ߫ ߘߴߊ߬ ߢߌߣߌ߲ߞߏ ߓߍ߯ ߟߊߛߐ߬ߘߐ߲߬ ߠߊ߫، ߡߙߌߦߊ߫ ߢߌߡߊ ߡߍ߲ ߦߴߊ߬ ߟߊ߫ ߞߊ߬ߙߌ߬ߝߊ߬ߡߏ߬ߙߌ߬ߦߊ߬ ߞߊ߲ߡߊ߬߸ ߊߟߊߡߵߊ߬ ߛߋ߫ ߘߴߊ߬ ߓߍ߯ ߟߊߓߐ߫ ߟߊ߫.>> ߓߎߚߎߕߎߕߎߟߊ߫ ߡߊ߲߬ߘߋ߲߬ ߝߏߘߋ߫ ߣߊ߬ ߘߊ߫߸ ߞߵߏ߬ ߟߊ߫ ߞߊ߲ߞߊ߲߫ ߕߊߟߊ߲ ߞߊ߲߬߸ ߞߊߕߘߍ߬ߕߍ߫ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߡߊ߬.
ߞߊ߬ߙߌ߬ߝߊ߬ߡߏ߬ߙߌ߬ߦߊ߬ ߞߣߐ߫߸ ߟߊ߬ߞߐ߰ߟߌ ߣߌ߲߬ ߞߍ߫ ߘߊ߫ ߥߊ߬ߛߊ ߟߋ߬ ߘߌ߫ ߦߋ߲߬߸ ߟߐ߲ߠߌ߲߫ ߛߌߦߊߡߊ߲߫ ߛߐ߬ߘߐ߲߬ ߘߊ߫ ߡߍ߲ ߘߐ߫، ߝߊߦߌߘߊ߫߸ ߊ߬ ߞߍ߫ ߘߊ߫ ߘߋ߲ߡߌߛߍ߲ ߠߎ߫ ߖߌ߱ ߟߋ߬ ߘߌ߫ ߦߋ߲߬߸ ߓߍ߬ߒ߬ߛߋ߲߬ߡߊ߬ ߢߌߣߌ߲ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫
