ߒߞߏ ߓߊߛߌߦߊ ߕߌߙߌ߲ߠߌ߲ ߘߍ߭ ߓߘߴߊ߬ ߟߌߟߌ߲ ߠߎ߬ ߟߊߞߎߘߦߊ ߘߊߡߌ߬ߣߊ߬ ߞߊ߲ߞߊ߲߫ ߡߙߊ߬ߓߊ߰ߘߊ ߞߣߐ߫، ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߟߊߛߌ߱ ߞߐ ߣߌ߲߬ ߘߐ߫ ߞߵߊ߬ ߞߍ߫ ߡߙߊ߬ߓߊ߰ߘߊ ߛߓߍߘߊ ߞߊ߲ߕߌ߮ ߘߌ߫߸ ߡߙߊ߬ߘߊ߬ߙߋ߲߬ ߁߅ ߘߐ߫߸ ߊ߬ ߓߘߊ߫ ߁߀ ߛߓߍߘߊ ߟߊߛߌ߰ ߞߊ߲ߞߊ߲߫ ߞߣߐ߫.
ߡߙߊ߬ߓߊ߰ߘߊ ߛߓߍߘߊ ߟߊ߫ ߝߐߟߌ߫ ߘߐ߫߸ ߊ߬ߟߎ߫ ߞߊ߬ ߛߓߍߘߊ߫ ߟߊߛߌ߮ ߏ߬ ߟߎ߬ ߞߍ߫ ߞߏ߲ߞߏߜߍ ߕߟߋ߬ ߇ ߣߴߊ߬ ߁߅ ߕߍߟߊ ߟߋ߬ ߘߐ߫ ߂߀߂߆ ߢߌ߲߬ ߠߊ߫، ߏ߬ ߞߍ߫ ߘߴߊ߬ߟߎ߬ ߓߟߏ߫ ߦߙߐ ߡߍ߲ ߠߎ߬ ߘߐ߫: ߝߟߏߣߌ߲߬ߜߍ߬ ߓߎ߯ߟߊ߫߸ ߓߊ߬ߟߌ߬ߡߊ߲߰ߠߊ߫ ߝߏߙߋߞߊߙߌߦߊ߫߸ ߞߙߎ߬ߟߊ߬ߡߌߣߌ߲߫ ߞߎ߲ߓߊ߲߫߸ ߖߏ߬ߡߊ߫ ߖߋ߬ߟߌ߬ߓߊ߬ߞߘߐ߫߸ ߥߙߏ߬ߓߋ߫ ߕߏ߭ߞߎ߬ߣߎ߲߬߸ ߓߊߛߊ߲ߘߐ߫ ߡߏ߬ߙߌ߬ߓߊ߬ߦߊ߫߸ ߓߊߕߍ߫ ߣߝߊ߬ߖߌ߫߸ ߡߊߣߊ߲߫ ߡߊ߬ߡߘߎ߬ߘߎ߯߸ ߜߙߋߘߎ߯ ߓߙߊߣߡߊ߬߸ ߞߵߏ߬ ߟߊ߫ ߓߊߕߍ߫ ߞߊ߬ߙߌ߬ߝߊ߬ߡߘߎ߬ߦߊ߫ ߞߊ߲߬.
ߡߙߊ߬ߘߊ߬ߙߋ߲ ߞߋ߬ߟߋ߲߬ߞߋߟߋ߲ ߓߍ߯ ߛߓߍߘߊ ߟߊߛߌ߰ ߘߊ߫߸ ߞߊ߬ ߗߋߕߌ߯ ߞߋߟߋ߲߫ ߠߊߛߌ߰ ߏ߬ ߟߎ߬ ߓߍ߯ ߞߎ߲߬ߠߊ߬߸ ߞߊ߬ ߘߌ߲߬ߞߌߙߊ ߏ߬ ߟߎ߬ ߡߊߡߙߊ߬ ߒ.ߓ.ߘ ߟߊ߫ ߞߎ߲߬ߠߊ߫، ߗߋߕߌ߯ ߞߎߘߊ ߏ߬ ߟߎ߬ ߘߐ߫߸ ߡߏߙߌ߬ ߞߋߕߊ߬ ߦߴߏ߬ ߘߐ߫ (ߝߟߏߣߌ߲߬ߜߍ߬ ߓߎ߯ߟߊ߫)، ߞߊ߬ߘߌ߬ߦߊ߬ ߡߊ߯ߘߌ ߘߎ߲ߓߎߦߊ߫ (ߓߊ߬ߟߌ߬ߡߊ߲߰ߠߊ߬ ߝߏߘߋߞߊߙߌߦߊ߫)، ߞߙߎ߬ߟߊ߬ߡߌ߬ߣߌ߲߬ ߞߎ߲ߓߊ߲߫ ߗߋߕߌ߯ߦߊ ߘߌ߫ ߘߊ߫ ߞߓߊ߬ ߕߙߊߥߟߋ߫ ߟߋ߬ ߡߊ߬، ߞߊ߬ ߓߊߕߍ߫ ߞߊ߬ߙߌ߬ߝߊ߬ߡߘߎ߬ߦߊ߬ ߗߋߕߌ߯ߦߊ ߞߊ߬ߙߌ߬ߝߊ߬ ߌߓߙߊߤߌߡߊ߬ ߡߊ߲߬ߘߋ߲߬ ߡߊ߲ߛߊ ߞߋߕߊ߬ ߟߊ߫، ߓߊߛߊ߲ߘߐ߫ ߡߏ߬ߙߌ߬ߓߊ߬ߦߊ߫߸ ߏ߬ ߗߋߕߌ߯ߦߊ ߘߌ߫ ߘߊ߫ ߡߎߛߊ߫ ߞߡߊ߬ߙߊ߫ ߟߋ߬ ߡߊ߬߸ ߞߵߏ߬ ߓߌ߬ߟߊ߬ ߒ.ߓ.ߘ ߞߎ߲߬ߠߊ߫ ߦߋ߲߬ ߡߙߊ ߡߎ߰ߡߍ ߘߐ߫، ߝߊߦߌߘߊ߫߸ ߛߏ ߕߐ߭ ߓߍ߯ ߕߊ߫ ߟߊߛߌ߰ ߘߊ߫ ߕߋ߲߬ ߠߋ߬.
ߗߋߦߊߟߌ ߡߍ߲ ߠߎ߬ ߕߘߍ߬ ߓߐ߫ ߟߊ߫ ߞߊ߲ߞߊ߲߫ ߡߙߊ߬ߓߊ߰ߘߊ ߞߣߐ߫ ߞߊ߬ ߕߊ߯ ߛߓߍߘߊ߫ ߟߊߛߌ߮ ߢߌ߲߬ ߠߎ߬ ߞߍ߫߸ ߏ߬ ߟߎ߬ ߛߌߟߊ߫ ߢߍߟߐ ߕߘߍ߬ ߞߊ߲ߕߌ߮ ߖߘߍ߬ߓߊ߬ߞߎ߲ ߠߋ߬ ߘߌ߫، ߞߏ߲߬ߓߏ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߛߎߥߊ߲ߘߌ߫ ߘߊ߫ ߂߀߂߅ ߞߏߟߌ߲ߞߏߟߌ߲ ߕߟߋ߬ ߁߆ ߟߋ߬ ߡߊ߬߸ ߛߊ߲߬ ߟߏ߯ߟߎ߫ ߟߐ߬ߒ߬ߞߋ߬ߟߊ ߞߍ߫ ߞߊ߲ߡߊ߬، ߊ߬ ߓߘߊ߫ ߣߊ߬ ߛߌ߲߬ߝߏ߲߬ߧߊ߬ߟߌ ߞߍߢߊ߫ ߞߎߘߊ ߘߏ߫ ߟߎ߫ ߘߌ߫߸ ߞߊ߬ ߓߊߛߌߦߟߊ ߟߎ߬ ߓߟߏߘߏ߲߬ ߢߐ߲߯ ߓߟߏ߫߸ ߞߊ߬ ߛߓߍߘߊ ߟߎ߬ ߓߊ߲ߓߊ߲߫ ߓߊ߯ߙߊ ߣߌ߫ ߖߡߊ߬ߦߊ߬ ߡߙߌߦߊ ߞߊ߲߬.
ߊ߬ ߞߵߊ߬ ߦߌ߬ߘߊ߬ ߛߓߍߘߊ߫ ߟߊߛߌ߮ ߣߌ߲߬ ߘߏ߫ ߘߊߞߎ߲ ߘߐ߫߸ ߞߏ߫: <<ߊ߲ ߠߊ߫ ߟߊ߬ߢߌߣߌ߲ ߦߋ߫ ߛߌ߲߬ߝߏ߲߬ߧߊ߬ߟߌ ߟߋ߬ ߘߌ߫߸ ߞߊ߬ ߞߏ ߟߎ߬ ߡߊߛߊ߲߬ߛߊ߲߬߸ ߞߊ߬ ߝߊ߲߬ߞߊ߬ ߘߌ߫ ߝߘߊ߬ߝߌ߲߬ ߘߊ߲ߘߊߟߌ ߣߴߊ߬ ߓߊߛߌߦߊ ߡߊ߬ ߞߊ߲ߞߊ߲߫ ߡߙߊ߬ߓߊ߰ߘߊ ߡߎ߰ߡߍ ߞߣߐ߫߸ ߛߊ߫ ߒ߬ ߝߣߊ߫ ߘߌ߫ ߒ߬ ߛߋߞߏ ߞߍ߫ ߊ߲ ߓߊߘߋ߲ ߠߎ߬ ߟߊ߫ ߞߍ߲ߘߍߦߊ߫ ߞߏ ߘߐ߫.>> ߊ߬ ߞߵߏ߬ ߝߐ߫ ߛߓߍߘߊ߫ ߟߊߛߌ߯ ߘߊߞߎ߲ ߘߏ߫ ߟߋ߬ ߘߐ߫.
ߡߙߊ߬ߘߊ߬ߙߋ߲߬ ߟߏ߯ߟߎ߫ ߟߋ߬ ߕߏߣߍ߲߫ ߡߎ߬ߕߎ߲߬߸ ߞߵߏ߬ ߞߍ߫ ߛߓߍߘߊ߫ ߟߊߛߌ߮ ߞߎ߲߬ߝߊ߮ ߘߌ߫߸ ߞߊ߬ ߒ.ߓ.ߘ ߟߌߟߌ߲ ߓߊ߲ߓߊ߲߫ ߡߙߊ߬ߓߊ߰ߘߊ ߞߣߐ߫، ߊ߬ߟߎ߫ ߞߵߊ߬ ߦߌ߬ߘߊ߬߸ ߞߏ߫ ߝߊ߬ߣߌ߫ ߛߓߍߘߊ߫ ߟߊߛߌ߮ ߢߌ߲߬ ߠߋ߬ ߡߊ߫ ߟߊߞߎߙߊ߲߫߸ ߓߊ߯ߙߊ ߟߎ߬ ߛߋ߲߬ߕߊ߬ ߜߏߡߊ߲߫ ߊ߬ ߢߊߓߘߍ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
