ߣߌ߲߬ ߞߍ߫ ߘߊ߫ ߓߌߟߏ߲߫ ߕߊ߬ߡߌ߲߬ߣߍ߲ ߛߎ ߟߋ߬ ߘߐ߫߸ ߒߓߊߟߌߦߊ߫ ߞߌ߲߬ߘߊ ߟߊ߫߸ ߞߊ߲ߞߊ߲߫ ߛߏ ߞߣߐ߫، ߦߛߎߝߎ߬ ߞߡߊ߬ߙߊ ߦߋ߫ ߝߎߣߎ߲ߞߋߣߍ߲߫ ߛߊ߲߬ ߁߄ ߠߋ߬ ߘߌ߫߸ ߏ߬ ߛߐ߰ ߘߊ߫ ߡߎ߬ߙߎ ߟߊ߫ ߡߏ߬ߛߏ ߘߏ߫ ߓߟߏ߫߸ ߡߍ߲ ߦߋ߫ ߝߊ߲ߕߊ߬ ߞߊ߬ߓߊ ߘߌ߫߸ ߊ߬ ߛߌ߬ߞߛߊߓߌ ߦߋ߫ ߛߊ߲߭ ߂߅ ߘߐ߫، ߝߎߣߎ߲ߞߋߣߍ߲ ߓߘߊ߫ ߕߊ߬ ߞߊ߬ ߥߴߊ߬ ߘߌ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߊ߬ ߦߋ߫ ߘߊ߲ߘߊߟߌ ߘߊߞߘߐ߫ ߦߋ߲߬ ߕߋ߲߬.
ߝߊߕߎߡߊߕߊ߬ ߞߡߊ߬ߙߊ߬ ߡߍ߲ ߦߋ߫ ߞߏߕߐ ߛߐ߬ߘߐ߲߬ ߣߊ ߘߌ߫߸ ߏ߬ ߟߊ߫ ߝߐߟߌ߫ ߘߐ߫߸ ߞߏ߫ ߣߌ߲߬ ߞߏ ߓߍ߯ ߖߎ߬ߛߌ߮ ߞߍߣߍ߲߫ ߘߌ߯ߣߊ߫ ߞߕߎߓߊ ߘߏ߫ ߟߋ߬ ߘߊߘߛߐߛߐߟߌ ߘߌ߫߸ ߟߊ߬ߝߐ߬ߓߊ߰ ߌߓߙߊߤߌ߬ߡߊ߬ ߟߊ߫ ߞߏߢߊ ߞߊ߲߬߸ ߞߵߊ߬ ߓߍ߲߬ ߘߋ߲ ߠߊ߫ ߢߌ߬ߡߊ߬ߦߊ ߟߎ߫ ߡߊ߬ ߛߐ߬ߘߐ߲߬ߓߊ߮ ߟߊ߫ ߞߏ ߘߐ߫.
<<ߊ߬ ߞߏߢߊ ߞߍ߫ ߘߊ߫ ߓߌߟߏ߲߫ ߕߊ߬ߡߌ߲߬ߣߍ߲ ߛߎ ߟߋ߬ ߘߐ߫ ߞߵߊ߬ ߘߎ߰ߛߊ ߜߍ߫ ߖߎߡߊ ߟߊ߫، ߒ ߣߌ߫ ߡߏ߬ߛߏ ߘߏ߫ ߟߋ߬ ߕߍ߬ߘߍ߫ ߓߊ߬ߘߏ ߟߊ߫߸ ߊ߲ ߣߴߏ߬ ߓߍ߯ ߦߋ߫ ߓߏ߲߫ ߞߋߟߋ߲߫ ߠߋ߬ ߟߊ߫، ߊ߬ ߕߘߍ߬ ߞߎߡߊ ߞߊ߲߬ ߞߊ߬ߥߊ߲߬ߘߟߌ߬ ߞߊ߲ ߘߏ߫ ߟߋ߬ ߞߊ߲߬߸ ߞߵߊ߬ ߓߍ߲߬ ߛߋ߬ߦߌߘߌ߬ߣߊ߬ ߌߓߎ߬ߙߊ߬ߤߌߡߊ߫ ߟߊ߫ ߞߏߢߊ ߡߊ߬߸ ߞߏ߫ ߏ߬ ߦߴߊ߬ ߝߊ߬ ߡߞߊߘߊ߲߫ ߠߊ߫ ߞߏ߫ ߛߴߊ߬ ߘߌ߫ ߘߏ߲߬ ߊ߬ߙߌ߬ߖߣߍ߫߸ ߓߊ߬ߙߌ߬ ߞߏ߫ ߗߍ߭ ߕߍ߫ ߞߛߌ߫ ߟߊ߫، ߌߞߏߡߌ߲߬ ߒߠߋ ߣߊ߫ ߛߊ߬ ߛߊ߲ ߠߋ߬߸ ߒߠߋ ߞߊ߲߫ ߒ ߞߏ߫ ߊ߫߹ ߓߊ ߒߠߋ ߣߊ߫ ߛߊ߬ ߛߊ߲ ߠߋ߬߸ ߒ ߞߏ߫ ߘߋ߲ ߣߴߊ߬ ߛߐ߬ߘߐ߲߬ߓߊ߮ ߕߍ߸ ߊ߬ ߓߊ߯ ߓߐ߫ ߌ ߓߟߏ߫߸ ߊ߬ ߘߌ߫ ߞߍ߫ ߦߏ߫ ߌ ߦߋ߫ ߥߴߊ߬ ߕߊ߬ ߞߊ߬ ߣߵߊ߬ ߘߌ߫ ߝߣߊ߫߸ ߞߊ߬ ߞߏ߫ ߞߎߘߊ߫ ߟߎ߫ ߞߍ߫ ߊ߬ ߦߋ߫….>>
ߓߊ߬ߘߏ߬ߢߐ߲߰ߦߊ ߏ߬ ߟߋ ߕߎ߲߬ ߦߴߌߘߐ߫ ߡߏ߬ߛߏ ߣߌ߲߬ ߣߴߊ߬ ߛߌ߰ߢߐ߲߮ ߏ߬ ߓߟߏ߫ ߣߊߝߌߟߊ߫ ߛߊߟߌ߫ ߞߐ ߘߐ߫߸ ߞߵߊ߬ ߛߐ߬ߘߐ߲߬ ߝߊ߲ߕߊ߬ ߞߊ߬ߓߊ ߦߋ߫ ߖߌ߫ ߟߊߦߟߍ ߟߊ߫ ߞߐ߬ߟߐ߲ ߘߐ߫ ߊ߬ߟߎ߬ ߘߊߝߍ߬ ߦߋ߲߬، ߏ߬ ߞߵߊ߬ߟߎ߬ ߟߊ߫ ߞߎߡߊ ߏ߬ ߟߋ ߖߌ߰ ߊ߬ߟߋ ߞߘߐߡߊߕߍ߰ ߞߊ߲ ߘߌ߫ ߡߎ߬ߕߎ߲߬ ߛߊ߫، ߞߊ߬ ߝߊߕߎߡߊߕߊ߬ ߞߡߊ߬ߙߊ ߣߊ߬ߣߌ߲ ߣߴߊ߬ ߖߓߍ ߘߊߡߌ߬ߣߊ߬.
ߡߏ߬ߛߏ ߟߊ߫ ߢߊߝߐߟߌ߫ ߘߐ߫߸ ߊ߬ߟߎ߫ ߞߵߊ߬ ߦߌ߬ߘߴߊ߬ ߞߏ߫ ߊ߬ߟߎ߬ ߞߊ߲߫ ߕߴߊ߬ߟߋ ߡߊ߬߸ ߊ߬ߟߎ߬ ߦߋ߫ ߘߊ߯ߥߊ߫ ߞߊ߲ ߠߋ߬ ߓߊ߬ߘߏ ߟߊ߫، ߓߊ߬ߙߌ߬߸ ߣߊ߬ߣߌ߲߬ߠߌ߲ ߕߊ߬ߡߌ߲߬ ߘߊ߫ ߝߊ߲߬ߞߊ߫ ߛߐ߬ߘߐ߲߬ ߠߊ߫ ߕߎ߲߫.
ߝߊߕߎߡߊߕߊ߬ ߞߡߊ߬ߙߊ ߟߊ߫ ߝߐߟߌ߫ ߘߐ߫߸ ߊ߬ߟߋ ߘߋ߲ ߘߏ߫ ߟߎ߫ ߝߣߊ߫ ߣߊ߬ ߢߊ ߟߋ߬ ߞߍߣߴߏ߬ ߘߌ߫߸ ߞߵߊ߬ ߝߐ߫ ߞߏ߫ ߝߊ߲ߕߊ߬ ߞߊ߬ߓߊ ߦߋ߫ ߣߊ߬ߣߌ߲߬ߠߌ߲ ߓߟߏߞߊ߬، ߓߊ߬ߙߌ߬߸ ߞߎߡߊ ߡߊ߫ ߛߋ߫ ߣߐ߰ߦߊ߬ ߟߊ߫.
ߦߛߎߝߎ߫ ߞߡߊ߬ߙߊ߫ ߣߊ߬ ߘߊ߫ ߏ߬ ߕߎ߬ߡߊ ߟߋ߬ ߟߊ߫ ߞߊ߬ ߓߐ߫ ߛߏ ߞߣߐ߫߸ ߞߵߊ߬ ߛߋ߲߭ߓߌ߬ߟߊ߫ ߞߍ߬ߟߍ ߣߌ߲߬ ߘߐ߫߸ ߓߊ ߞߏ߫ ߊ߬ ߣߊ߫ ߓߘߊ߫ ߣߊ߬ߣߌ߲߬، ߟߊ߬ߛߙߋ߬ߦߊ߬ߟߌ߬ ߞߊ߲ ߠߎ߬ ߘߐ߫߸ ߝߊ߲ߕߊ߬ ߞߊ߬ߓߊ ߘߏ߲߬ ߢߊ ߟߋ߬ ߞߍߣߍ߲߫ ߓߏ߲ ߞߣߐ߫ ߏ߬ ߘߌ߫߸ ߞߊ߬ ߓߐ߫ ߡߎ߬ߙߎ ߘߴߊ߬ ߓߟߏ߫.
ߡߏ߬ߛߏ ߞߊ߲߫ ߞߏ߫߸ ߊ߬ ߘߐ߯ߡߛߏ߫ ߘߏ߫ ߣߊ߬ߣߍ߲߫ ߦߋ߲߬ ߕߋ߲߬߸ ߏ߬ ߞߊ߲߫ ߊ߬ ߡߊ߬ ߞߏ߫ <<ߕߊ߲߬ߕߌ߬ ߕߐ߸ ߡߎ߬ߙߎ ߦߋ߫ ߒ ߞߐ߬ ߝߊ߬ߕߌߡߎ߲߬ ߓߟߏ߫، ߊ߬ ߣߌ߫ ߦߛߎߝߎ߫ ߞߍ ߞߏ߫ ߊ߬ ߓߘߊ߫ ߒ ߛߐ߰߸ ߘߏ߫ ߡߊ߫ ߞߊߟߌߦߊ߫ ߞߊ߬ ߘߏ߫ ߓߐ߫، ߒ ߥߊ߫ ߘߊ߫ ߞߊ߬ ߒ ߘߋ߲ ߦߋ߫߸ ߊ߬ ߟߊߣߍ߲߫ ߘߎ߱ ߡߊ߬߸ ߊ߬ ߣߏ߱ ߦߋ߫ ߓߐ ߟߊ߫ ߞߊ߬ ߖߌ߰ ߕߍ߮ ߘߐ߫….>>
ߡߏ߬ߛߏ ߞߊ߬ ߢߌ߲߬ ߠߋ߬ ߝߐ߫߸ ߊ߬ ߞߍߢߊ ߟߵߏ߬ ߘߌ߫ ߞߵߊ߬ ߟߊ߫ ߘߙߌ߬ߞߌ ߓߐ߫ ߊ߬ ߞߊ߲ߠߊ߫ ߞߵߊ߬ ߛߘߌ߬ ߘߋ߲ ߕߍߡߊ߬߸ ߊ߬ ߣߴߊ߬ ߟߊ߫ ߓߕߌߙߊ߲߸ ߞߵߏ߬ ߟߎ߫ ߛߘߌ߬ ߘߋ߲ ߕߍߡߊ߬߸ ߞߵߊ߬ ߟߊߥߟߌ߬ ߊ߬ ߘߐߡߌ߬ߣߊ ߡߊ߬ ߦߊ߬ߣߴߊ߬ߟߎ߬ ߛߋߕߐ߫ ߘߊ߲ߘߊߛߏ ߟߊ߫.
ߛߙߋ ߘߏ߫ ߟߎ߫ ߟߊ߫ ߝߐߟߌ߫ ߘߐ߫߸ ߞߏ߫ ߡߊ߬ߝߌ߲߬ߓߊ߰ߕߐ ߟߊ߫ ߡߙߎ߬ ߝߟߐߡߊ ߓߐߣߍ߲ ߞߐ ߊ߬ ߓߟߏ߫߸ ߊ߬ ߘߏ߲߬ ߘߊ߫ ߓߏ߲ ߠߊ߫ ߝߌߟߊߣߊ߲ ߕߊ߬ ߞߊ߲ߡߊ߬، ߓߊ߬ߙߌ߬߸ ߛߌ߰ߢߐ߲߮ ߠߎ߬ ߛߋ߫ ߘߴߊ߬ ߡߊߣߐ߬ ߟߊ߫.
ߝߊߕߎߡߊߕߊ߬ ߞߡߊ߬ߙߊ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߦߋ߫ ߦߛߎߝߎ߬ ߛߐ߬ߘߐ߲߬ ߣߊ ߘߌ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߡߊ߬ߝߌ߲߬ߓߊ߰ߕߐ ߛߐ߬ߘߐ߲߬ ߣߊ ߣߊ߬ ߘߴߊ߬ߟߎ߫ ߛߐ߬ߘߐ߲߬ ߘߊ߲ߘߊߛߏ ߟߊ߫߸ ߞߊ߬ ߣߊ߬ ߞߎߡߊ߫ ߜߘߍ߫ ߟߎ߫ ߝߐ߫߸ ߡߍ߲ ߠߎ߬ ߡߊ߫ ߘߌߦߴߊ߬ ߦߋ߫.
<<ߊ߬ ߣߊ߬ ߘߴߊ߬ ߝߐ߫ ߞߏ߫ ߒ ߡߊ߫ ߒ ߡߙߌ߫ ߒ ߕߊ߯ ߘߴߊ߬ ߘߋ߲ ߘߌ߫ ߛߊ߬ߙߌ߬ߦߊ߬ ߟߊ߫߸ ߞߏ߫ ߊ߬ߟߎ߫ ߘߏ߲߬ ߜߎ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߌ߫ ߒ ߘߋ߲ ߘߊ߲ߘߊ߫، ߊ߬ ߘߏ߲߬߸ ߞߏ߫ ߊ߬ߟߎ߬ ߡߊ߫ ߡߐ߱ ߝߊ߰ ߘߋ߬߸ ߊ߬ ߞߵߊ߬ ߛߐ߰ ߟߋ߬ ߘߐߙߐ߲߫…>>
ߞߵߊ߬ ߓߍ߲߬ ߞߏ ߟߊ߫ ߖߎ߯ߦߊ ߡߊ߬ ߛߊ߫߸ ߞߏߕߐ ߞߐߙߍ ߞߊ߬ ߞߟߍ߬ߡߐ߰ߘߊ ߟߊߟߐ߲ߠߌ߲߫، ߏ߬ ߟߎ߫ ߞߵߊ߬ ߢߌߣߌ߲߫ ߝߊ߲߭ ߝߌ߬ߟߊ ߓߍ߯ ߝߍ߬߸ ߞߏ߫ ߊ߬ߟߎ߬ ߦߴߊ߬ߟߎ߬ ߛߓߊߙߌ߫߸ ߤߊ߲߯ ߊ߬ߟߎ߬ ߦߋ߫ ߓߊ߲߫ ߊ߬ߟߎ߬ ߟߊ߫ ߢߊߢߌߣߌ߲ߠߌ߲ ߠߎ߬ ߟߊ߫.
ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߝߊ߲ߕߊ߬ ߞߊ߬ߓߊ ߘߌ߫ ߞߍ߫ ߛߊ߬ߙߌ߬ߦߊ߬ ߓߟߏߞߘߐ߫ ߕߋ߲߬.
ߡߍ߲ ߓߍ߲߬ߣߍ߲߬ ߦߛߎߝߎ߬ ߞߡߊ߬ߙߊ ߟߊ߫ ߞߏ ߡߊ߬߸ ߊ߬ߟߋ ߡߍ߲ ߛߐ߰ߣߍ߲߫ ߡߎ߬ߙߎ ߟߊ߫߸ ߏ߬ ߦߋ߫ ߘߊ߲ߘߊߟߌ ߘߊߞߘߐ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫، ߊ߲ ߠߊ߫ ߟߊ߬ߞߙߐ߬ߛߌ߬ߟߌ ߟߎ߬ ߞߐߝߍ߬߸ ߊ߲ ߞߵߊ߬ ߦߋ߫ ߞߏ߫ ߊ߬ ߝߊ߬ߘߌ ߞߊ߫ ߝߌ߬ߛߊ߬ ߞߏߛߓߍ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
