ߖߌ߬ߣߍ߬ ߞߊ߲ߓߍ߲ ߛߌ߰ߓߊ߮ ߓߘߊ߫ ߛߋ߫ ߡߐ߰ ߁߇ ߅߂߁ ߁߆߇ ߘߐ߫ ߡߎ߬ߕߎ߲߬߸ ߡߏ߬ߛߏ ߦߙߌߞߊ ߦߋ߫ %߅߁،߈ ߠߋ߬ ߘߌ߫߸ ߗߍ߭ ߦߙߌߞߊ ߦߋ߫ %߄߈،߂ ߘߌ߫، ߏ߬ ߖߊ߬ߕߋ ߝߘߊߣߍ߲߫ ߡߊ߬ߞߍ߬ߦߙߐ ߟߎ߬ ߣߌ߫ ߡߌ߬ߙߌ߲߬ߘߌ ߝߘߏ߬ߓߊ߬ ߛߙߍߘߍߦߊߟߌ ߣߊ߯ߣߌ߲ߣߊ߲ ߖߋ߬ߓߌ߫ ߞߎ߲߬ߝߟߐ ߟߎ߫ ߟߋ߬ ߘߐ߫߸ ߡߍ߲ ߢߣߊߓߊ߯ߦߊ߫ ߘߊ߫ ߞߎߣߎ߲ߟߏ߲ ߣߌ߲߬ ߡߊ߬߸ ߞߏ߲ߞߏߜߍ ߕߋ߬ߟߋ߫ ߂߅ ߡߊ߬ ߞߐߣߊߞߙߌ߫، ߞߓߊߞߏ ߡߍ߲ ߦߴߊ߬ ߘߐ߫: ߞߊ߲ߞߊ߲߫ ߕߌ߲߬ߞߎߘߎ߲ ߓߘߊ߫ ߕߊ߬ߡߌ߲߬ ߞߐߣߊߞߙߌ߫ ߛߏߞߣߐߟߊ ߟߊ߫ ߛߌ߰ߓߊ߮ ߟߊ߫ ߛߌߦߊߦߊ ߘߐ߫، ߊ߬ ߖߍ߬ߘߍ߸ ߞߊ߲ߞߊ߲߫ ߠߋ߬ ߢߐ߲߰ ߕߌ߲߬ߞߎߘߎ߲߫ ߖߡߊ߬ߕߌ߯ ߕߍ߫ ߖߌ߬ߣߍ߫ ߖߡߊ߬ߣߊ ߞߣߐ߫ ߕߋ߲߬.
ߖߊ߬ߕߋ߬ߛߎ߬ߓߐ ߣߌ߲߬ ߘߐ߫߸ ߢߊ ߡߊߖߌ߰ ߘߊ߫ ߗߍ߭ ߟߎ߬ ߣߌ߫ ߡߏ߬ߛߏ ߟߎ߬ ߦߙߌߞߊ ߞߘߐ߫، ߊ߬ ߟߊߞߙߐ߬ߛߌ߬ ߘߊ߫߸ ߞߏ߫ ߞߊ߲ߞߊ߲߫ ߞߋߟߋ߲߫ ߠߋ߬ ߕߌ߲߬ߞߎߘߎ߲߫ ߘߌ߫߸ ߗߍ߭ ߞߊ߫ ߛߌߦߊ߫ ߦߙߐ ߡߍ߲ ߘߐ߫، ߓߊߏ߬߸ ߊ߬ߟߋ ߗߍ߭ ߦߋ߫ %߅߀،߂ ߟߋ߬ ߘߌ߫߸ ߡߏ߬ߛߏ ߦߋ߫ %߄߉،߈ ߘߌ߫، ߣߴߌ ߘߏ߲߬ ߞߊ߬ ߞߐߣߊߞߙߌ߫ ߕߊ߬߸ ߡߏ߬ߛߏ ߟߎ߬ ߞߊ߫ ߛߌߦߊ߫ ߗߍ߭ ߟߎ߬ ߘߌ߫، ߡߏ߬ߛߏ ߦߋ߫ %߅߁،߅ ߘߐ߫߸ ߗߍ߭ ߦߋ߫%߄߈،߅، ߏ߬ ߢߊ߫ ߞߋߟߋ߲ ߠߋ߬ ߡߊ߬߸ ߡߊ߯ߡߎ߲߫ ߡߏ߬ߛߏ ߞߊ߫ ߛߌߦߊ߫ ߟߋ߬ ߔߏ߲߫، ߓߊߏ߬߸ %߅߅،߇ ߟߋ߬ ߡߏ߬ߛߏ ߘߌ߫، ߣߴߌ ߘߏ߲߬ ߛߋ߫ ߘߊ߫ ߒߛߙߍߜߘߍ߬߸ ߗߍ߭ ߣߌ߫ ߡߏ߬ߛߏ ߛߎ߬ߘߎ߲߬ߧߊ߬ ߘߊ߫ ߦߋ߲߬ ߘߏߣߍ߲߫߸ ߒ߬ߞߊ߬ ߏ߬ ߓߍ߯ ߣߴߊ߬ ߕߊ߫߸ ߡߏ߬ߛߏ ߟߋ߬ ߞߊ߫ ߛߌߦߊ߫، ߓߊߏ߬߸ ߡߏ߬ߛߏ ߦߋ߫ %߅߁،߇߸ ߗߍ߭ ߦߋ߫ %߄߈،߃، ߏ߬ ߟߵߊ߬ ߦߌ߬ߘߊ߬ ߟߊ߫߸ ߞߏ߫ ߜߍߞߊ߲ߠߊ ߣߊ߲߬ߝߟߏ߬ ߞߏ ߓߘߊ߫ ߓߍ߯ ߟߊߦߌ߬ߙߌ߲߬ߘߌ߫ ߦߋ߲߬ ߞߊ߲߬.
ߊߟߎ߫ ߦߴߊ߬ ߟߐ߲߫߸ ߓߊ߯ߙߊ߫ ߓߟߋߓߟߋ߫ ߟߋ߬ ߘߏ߲߬ ߘߊ߫ ߝߊ߬ߛߏ ߖߊ߬ߕߋ߬ߛߎ߬ߓߐ ߘߋ߬ߙߌ߬ߘߊ ߓߟߏ߫߸ ߡߍ߲ ߞߍ߫ ߘߊ߫ ߖߡߊ߬ߣߊ ߝߊ߲߭ ߓߍ߯ ߟߊߘߍ߬ߣߍ߲ ߘߐ߫، ߞߐߞߊ߲߫ ߓߊ߯ߙߊߢߐ߲߯ߦߊ ߣߌ߫ ߝߊ߲߬ߝߘߊ߬ߦߊ߬ߟߌ ߞߏߕߌ߯ߘߊ ߟߊ߫ ߖߊ߬ߡߊߙߌ ߞߣߐߡߊ߬߸ ߊ߬ߟߎ߬ ߛߋ߫ ߘߴߊ߬ߟߎ߫ ߥߊ߬ߛߊߘߏ߲߬ ߠߊ߫ ߡߐ߰ ߂߂ ߀߀߀ ߘߐ߫ ߞߵߏ߬ ߟߎ߬ ߟߛߊߙߌ߫ ߝߊ߲߭ ߓߍ߯ ߟߊ߫߸ ߞߊ߬ ߛߋ߫ ߖߡߊ߬ߣߊ ߛߌ߰ߓߊ߮ ߟߎ߬ ߣߌ߫ ߡߊ߬ߞߍ߬ߦߙߐ ߟߎ߬ ߓߍ߬ߙߍ ߟߐ߲߫ ߠߊ߫، ߒ߬ߓߊ߬߸ ߊ߬ߟߎ߬ ߟߊ߫ ߟߊ߬ߞߙߐ߬ߛߌ߬ߟߌ ߏ߬ ߟߎ߬ ߓߍ߯ ߞߐߝߍ߬߸ ߝߊ߰ߡߊ ߟߎ߬ ߞߊ߲߫ ߞߏ߫ ߢߊ߫ ߓߘߊ߫ ߛߐ߬ߘߐ߲߫ ߖߌ߬ߣߍ߬ ߟߊ߫ ߛߐ߬ߘߐ߲ ߠߊߦߙߌߥߊ ߣߌ߫ ߝߊ߲߬ߝߘߊ߬ߦߊ߬ߟߌ ߡߊ߬ ߡߎ߬ߕߎ߲߬߸ ߞߎߡߊߕߍ߫ ߡߐ߰ߦߊ ߕߊ߫ ߝߊ߲߭ ߡߊ߬.
ߖߌ߬ߣߍ߬ ߞߣߐ߫ ߕߋ߲߬߸ ߊ߬ߟߎ߬ ߟߊ߫ ߖߊ߬ߕߋ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߞߏ߫ ߖߌ߬ߣߍ߫ ߛߌ߰ߓߊ߮ %߆߁،߃ ߓߍ߯ ߦߋ߫ ߞߏ߲ߞߏ ߟߋ߬ ߞߣߐ߫߸ ߊ߬ ߕߐ߬ %߃߈،߇ ߛߊ߫߸ ߏ߬ ߟߎ߫ ߟߋ߬ ߛߏߓߊ ߟߎ߬ ߞߣߐ߫، ߏ߬ ߓߘߴߊ߬ ߦߌ߬ߘߊ߬߸ ߞߏ߫ ߛߏߓߊ߫ ߞߣߐߟߊ ߛߌ߰ߓߊ߮ ߦߋ߫ ߕߊ߬ߡߌ߲ ߠߋ߬ ߞߊ߲߬ ߛߌߦߊߦߊ߫ ߟߊ߫، ߓߊߏ߬߸ ߖߊ߬ߕߋ߬ߛߎ߬ߓߐ ߡߍ߲ ߞߍ߫ ߘߊ߫ ߂߀߁߄ ߠߊ߫߸ ߊ߬ ߦߌ߬ߘߊ߬ ߘߴߏ߬ ߘߐ߫ ߞߏ߫ ߞߏ߲ߞߏ߫ ߞߣߐ߫ ߡߐ߮ ߟߎ߬ ߦߋ߫ %߆߅،߂ ߟߋ߬ ߘߐ߫.
ߖߊ߬ߕߋ߬ߛߎ߬ߓߐ߬ ߞߋߟߋ߲ ߣߌ߲߬ ߘߐ߫߸ ߊ߬ ߦߌ߬ߘߊ߬ ߘߊ߫ ߞߏ߫: ߖߌ߬ߣߍ߫ ߛߌ߰ߓߊ߮ %߇߉ ߓߍ߯ ߦߋ߫ ߛߊ߲߬ ߃߅ ߟߋ߬ ߘߎ߰ߟߊ߫߸ ߏ߬ ߡߍ߲ ߞߵߊ߬ ߦߌ߬ߘߊ߬ ߥߛߊߞߙߊ߫߸ ߞߏ߫ ߖߌ߬ߣߍ߬ ߝߊߣߍ߲߫ ߝߎߣߎ߲ߞߋ߫ ߜߊ߲߰ߛߊ߲߫ ߠߋ߬ ߟߊ߫.
ߞߊ߲ߞߊ߲߫ ߓߘߊ߫ ߦߟߍ߬ ߞߐߣߊߞߙߌ߫ ߛߊ߲ߘߐ߫߸ ߞߊ߬ ߦߟߍ߬ ߖߌ߬ߣߍ߫ ߕߌ߲߬ߞߎߘߎ߲ ߓߍ߯ ߛߊ߲ߘߐ߫ ߖߡߊ߬ ߞߏ ߘߐ߫، ߓߊߏ߬߸ ߞߊ߲ߞߊ߲߫ ߛߌ߰ߓߊ߮ ߦߋ߫ ߄ ߁߁߀ ߂߁߆ ߟߋ߬ ߘߌ߫߸ ߞߐߣߊߞߙߌ߫ ߟߋ߬ ߕߎ߲߰ߣߍ߲߫ ߊ߬ߟߋ߬ ߟߊ߫߸ ߏ߬ ߛߌ߰ߓߊ߮ ߦߋ߫ ߃ ߄߀߇ ߃߂߇ ߟߋ߬ ߘߌ߫، ߟߊߓߋ߬ ߕߌ߲߬ߞߎߘߎ߲ ߣߌ߫ ߡߊ߯ߡߎ߲߫ ߕߌ߲߬ߞߎߘߎ߲߸ ߏ߬ ߟߎ߫ ߟߋ߬ ߖߌ߰ߣߍ߲߬، ߓߊߏ߬߸ ߟߊߓߋ߬ ߦߋ߫ ߁ ߂߃߉ ߈߉߇ ߟߋ߬ ߘߌ߫߸ ߡߊ߯ߡߎ߲߫ ߡߊ߫ ߞߋ߲߬ߥߟߎ߬ ߞߋߟߋ߲ ߓߐ߫߸ ߏ߬ ߦߋ߫ ߉߁߆ ߅߃߅ ߟߋ߬ ߘߌ߫.
ߒ߬ߓߊ߬߸ ߖߌ߬ߣߍ߬ ߞߏߕߌ߯ ߝߟߐ ߊߡߊߘߎ߫ ߎ߯ߙߌ߬ ߓߊ ߟߊ߫ ߝߐߟߌ߫ ߘߐ߫߸ ߞߏ߫ ߢߊߝߐߟߌߣߍ߲߫ ߞߊ߫ ߞߊ߲߫ ߞߊ߬ ߞߍ߫ ߊ߬ ߞߏߢߊ ߞߊ߲߬ ߘߋ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߬ ߜߍߞߊ߲ߠߊ ߖߊ߬ߡߊ ߟߊ߫ ߛߌߦߊߦߊ ߣߌ߲߬ ߞߎ߲߭ ߦߋ߫ ߛߊߣߌ߲߫ ߘߊߡߊ߲ߘߊ߫ ߞߏ ߟߋ߬ ߘߌ߫، ߞߊ߬ߕߎ߲߯߸ ߌ ߓߊ߯ ߞߊ߲ߞߊ߲߫ ߕߊ߬߸ ߛߌ߯ߙߌ߲߫߸ ߊ߬ ߣߌ߫ ߡߊ߲߬ߖߊ߲߬ߠߊ߫߸ ߏ߬ ߟߎ߬ ߓߍ߯ ߦߋ߫ ߕߋ߲߬ ߠߋ߬، ߊ߬ ߞߊ߲߫ ߞߏ߫: <<ߣߍ߰ߛߎߓߊ߮ ߟߋ߬ ߕߌ߲߬ߞߎߘߎ߲ ߢߌ߲߬ ߠߊ߫߸ ߞߵߏ߬ ߞߎ߲߭ ߞߍ߫ ߛߊߣߌ߲߫ ߘߊߡߊ߲ߘߊ ߟߎ߬ ߘߌ߫.>> ߊ߬ ߞߵߏ߬ ߟߋ ߝߐ߫߸ ߞߊ߬ ߘߐ߬ߞߣߍ߬ߟߌ ߞߍ߫ ߞߵߊ߬ ߓߍ߲߬ ߖߊ߬ߡߊ ߟߊ߫ ߛߌߦߊߦߊ ߡߊ߬ ߦߋ߲߬ ߝߊ߲ ߠߎ߬ ߘߐ߫߸ ߡߐ߰ ߛߌߦߊߡߊ߲߫ ߠߋ߬ ߥߎ߲߬ߝߊ߲߬ ߠߊ߫ ߞߊ߬ ߥߊ߫ ߦߋ߲߬ ߣߊ߲߬ߝߟߏ߬ ߢߌߣߌ߲ ߞߏߛߐ߲߬.
ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߢߊߝߐߟߌ߫ ߞߍ߫ ߌߞߐ߫߸ ߞߵߊ߬ ߦߌ߬ߘߊ߬ ߞߏ߫ ߞߋ߲߬ߥߟߎ߬ ߁߇،߅ ߣߌ߲߬ ߦߋ߫ ߖߌ߬ߣߍ߫ ߛߌ߰ߓߊ߮ ߟߎ߫ ߟߋ߬ ߘߌ߫ ߘߋ߬߸ ߓߊ߬ߙߌ߬ ߖߌ߬ߣߍ߬ߞߊ ߟߎ߬ ߘߐߙߐ߲߫ ߕߍ߫، ߖߌ߬ߣߍ߬ߞߊ ߡߍ߲ ߠߎ߬ ߝߣߊ߫ ߦߋ߫ ߞߐߞߊ߲߬߸ ߏ߬ ߕߴߊ߬ ߘߐ߫، ߊ߬ ߘߏ߲߬߸ ߞߏ߫ ߖߌ߬ߣߍ߬ߞߊ ߡߍ߲ ߠߎ߬ ߦߋ߫ ߞߐߞߊ߲߬߸ ߣߴߌ ߞߵߏ߬ ߟߎ߬ ߓߌ߬ߟߊ߫ ߖߊ߬ߕߋ ߘߐ߫߸ ߕߊ߬ߡߌ߲߬ ߘߌ߫ ߛߋ߫ ߞߍ߫ ߟߊ߫ ߞߋ߲߬ߥߟߎ߫ ߂߀ ߢߐ߲߰ ߠߊ߫ ߘߎߢߊ߫ ߢߊߝߍ߬، ߓߊ ߎ߯ߙߌ߬ ߞߵߏ߬ ߟߋ ߕߐ߬ߝߍ߬ߦߊ߬ߟߌ ߞߍ߫.
ߌߛߑߡߊߦߍߟ ߣߊ߬ߓߋ ߡߍ߲ ߦߋ߫ ߝߊ߲߬ߝߘߊ߬ߦߊ߬ߟߌ ߞߏߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߖߊ߬ߕߋ ߡߍ߲ ߘߏ߲߬ ߝߐߣߍ߲߫ ߣߌ߲߬ ߓߊ߬߸ ߡߐ߰ ߘߌ߫ ߟߊ߫ ߏ߬ ߟߊ߫ ߝߋߝߋ߫، ߓߊߏ߬߸ ߊ߬ ߛߋ߲߬ߢߊ߬ ߝߟߐ ߟߋ߬ ߞߍߣߍ߲߫ ߕߋ߲߬߸ ߛߋߒߞߏߟߊߘߐߦߊ߫ ߢߎߡߍߙߋ߲ߡߊ ߟߎ߬ ߦߋ߫ ߟߊߓߊ߯ߙߊ߫ ߞߊ߬ ߖߊ߬ߕߋ߬ߛߎ߬ߓߐ ߣߌ߲߬ ߘߐ߫߸ ߞߊߟߌߦߊ ߘߐ߫߸ ߛߊߣߌ߲ߧߊ ߘߐ߫، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߞߵߊ߬ ߓߍ߲߬ ߘߎߢߊ߫ ߡߊ߲߬ߕߏ߲߬ߕߍ߬ߦߊ ߛߊ߬ߙߌ߬ߦߊ ߟߎ߫ ߡߊ߬߸ ߞߎ߲߬ߠߊ߬ߛߌ߮ ߓߊ߲߫ ߘߊ߫ ߞߊ߬ ߜߊ߲߬ߘߐ߬ߝߍߣߍ߲ ߞߍ߫ ߖߊ߬ߕߋ߬ߛߎ߬ߓߐ ߞߐ ߘߐ߫߸ ߞߊ߬ ߢߌ߬ߣߊ ߣߌ߫ ߝߎ߬ߕߎ߲߬ߕߌ ߟߎ߬ ߡߊߕߊ߲߬ߞߊ߬.
ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߟߊ߫ ߡߊߣߊ߲ߞߎ߲ߘߊ ߡߍ߲ ߘߐ߱ߘߏ߲߬ߣߍ߲߫ ߡߌ߬ߙߌ߲߬ߘߌ ߟߊ߫ ߞߏ ߟߊ߫߸ ߏ߬ ߟߎ߬ ߞߐߦߌߘߊߓߊ߯ ߘߍ߲߬ߞߍ߬ߕߎ߲߬ߣߍ߲ ߕߘߍ߬ ߞߣߍ ߞߊ߲߬߸ ߊ߬ߣߌߕߊ߬ ߊߞߎߡߌߦߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߕߍ߫ <<ߖߊ߬ߕߋ߬ߛߎ߬ߓߐ߬ ߜߊ߲ߛߊ߲߫ ߘߌ߫>> ߘߋ߬߸ ߊ߬ ߦߋ߫ <<ߖߌ߬ߣߍ߫ ߡߌ߬ߙߌ߲߬ߘߌ ߛߎ߮ ߟߋ߬ ߦߌ߬ߘߊ߬>> ߟߊ߫.
ߖߊ߬ߕߋ߬ߛߎ߬ߓߐ ߣߌ߲߬ ߓߘߴߊ߬ ߦߌ߬ߘߊ߬߸ ߞߏ߫ ߖߌ߬ߣߍ߬ ߦߋ߫ ߘߋ߲ߡߌߛߍ߲߫ ߖߡߊߣߊ ߟߋ߬ ߘߌ߫߸ ߡߍ߲ ߠߎ߬ ߝߊ߲߬ߓߊ ߦߋ߫ ߞߏ߲ߞߏ ߞߣߐ߫߸ ߓߊ߬ߙߵߊ߬ߟߎ߬ ߦߋ߫ ߘߏ߲߭ ߞߊ߲߬ ߛߏߓߊ ߞߣߐ߫، ߖߊ߬ߕߋ ߢߌ߲߬ ߠߋ߬ ߞߍߕߐ߫ ߖߡߊ߬ߣߊ ߟߊ߫ ߓߘߍ߬ߓߘߍ߬ߟߌ ߣߴߊ߬ ߟߊ߫ ߘߍ߬ߘߐ߬ߞߏ ߟߎ߬ ߡߊ߬ߞߏ߬ߢߊ߬ ߟߊ߫ ߛߊ߲߬ ߕߊ߲߫ ߣߊ߬ߕߐ ߣߌ߲߬ ߞߣߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߓߟߏ߫.
