ߞߊ߲ߕߍ߫ ߞߐߙߍ߫ ߟߊ߫ ߟߊߛߋ߬ߟߌ
ߓߏ߲߬ߧߊ ߣߌ߫ ߓߊߞߋߟߋ߲ߧߊ ߝߏ߬ߟߌ ߞߐߝߍ߬߸ ߒߠߋ ߎߡߊߙߎ߬ ߞߊ߲ߕߍ߫ ߦߋ߫ ߣߊ߬ ߟߴߊߟߎ߫ ߡߊ߬ ߒߞߏ ߛߌ߲ߘߌߓߊ߮ ߞߐߙߍ ߡߎ߰ߡߍ ߕߐ߯ ߘߐ߫߸ ߞߵߊ߬ ߓߍ߲߬ ߊ߲ ߓߊߘߋ߲ߞߍ߫ ߊߡߊߘߎ߬ ߞߊ߲ߕߍ߫ ߘߟߊߛߎ߲ߓߎ ߡߊ߬ ߔߐߙߑߕߏ߫ ߕߊ߯ߕߏ߫ ߓߟߏ߫ ( ߕߊ߯ߕߏ߫ ߘߋ߬ ߔߏ߬ߙߑߕߏ߫)
ߊ߲ ߧߋ߫ ߛߐ߰ ߟߊ߫ ߦߝߊ߬ ߕߙߊ ߟߋ߬ ߝߟߐ߫ ߡߊ߬ ߒߞߏ ߘߏ߲߬ߞߏ ߟߎ߫ ߝߍ߬. ߒߞߏߡߐ߮ ߝߋ߲-ߋ-ߝߋ߲߫ ߣߴߊ߬ ߞߵߊ߬ ߢߋߦߌ߲߫ ߦߙߐ ߦߋ߫ ߊ߲ ߓߊߘߋ߲ߡߊ ߟߊ߫ ߞߎߡߊ߫ ߝߐߣߍ߲ ߠߎ߬ ߘߐ߫߸ ߊ߬ ߓߍ߯ ߦߋ߫ ߦߝߊ߬ ߊߟߊ߫ ߞߏߛߐ߲߬.
ߊߟߎ߫ ߦߴߊ߬ ߟߐ߲߫ ߞߴߊ߲ ߓߊߘߋ߲ߡߊ ߣߊ߬ ߘߋ߲ߣߍ߲ߦߊ߫ ߞߊ߲ ߠߎ߫ ߟߋ߬ ߝߐ߫ ߟߊ߫، ߘߋ߲ߣߍ߲ ߘߏ߲߬ ߞߏߘߐߓߍ߲ߕߐߟߊ ߟߋ߬ ߞߏ ߟߎ߬ ߕߌߢߍ߫ ߟߊ߫، ߏ߬ ߘߐ߫߸ ߊ߲ ߧߴߊ߬ ߢߌߣߌ߲߫ ߠߴߊߟߎ߫ ߝߍ߬߸ ߊ߲ ߓߍ߯ ߦߴߊ߬ ߞߏ ߡߌ߬ߘߊ߬ ߘߋ߲ߣߍ߲ߦߊ߫ ߝߊߘߌ ߏ߬ ߘߐ߫߸ ߞߵߊ߬ ߞߏ ߘߐߞߏߦߊߕߏ߫، ߡߊ߬ߘߋ߲߬ߞߊ ߟߎ߫ ߦߴߏ߬ ߟߋ ߝߐ߫ ߟߊ߫߸ ߞߴߌ ߓߊ߯ ߡߐ߱ ߞߟߍ߬ ߊ߬ ߤߊߞߟߌ߫ ߛߊ߲ߘߐ ߟߊ߫߸ ߞߴߌ ߓߘߴߊ߬ ߕߐ߬ߢߍ߫.
ߞߊ߲ߕߍ߫ ߞߐߙߍ ߦߋ߫ ߝߛߏ߬ߝߛߊ ߣߌ߲߬ ߕߣߐ߬ߓߐ߬ ߟߊ߫߸ ߞߊ߬ ߞߎߟߎ߲ߖߋߟߌ ߟߊߛߋ߫ ߞߌߢߍ ߒߞߏ ߘߏ߲߬ߞߏ ߓߍ߯ ߡߊ߬، ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊ߫ ߖߘߍ߬ߓߐ ߣߌ߫ ߖߘߍ߬ߘߌ ߘߌ߫ ߒߞߏ ߟߊߥߙߎߞߌ ߓߊ߯ߙߊ ߟߎ߬ ߘߐ߫، ߓߊߏ߬ ߒߞߏ ߓߊ߯ߙߟߊ߫ ߛߌ߫ ߕߍ߫ ߦߋ߲߬߸ ߒߞߏ ߣߊ߬ ߡߍ߲ ߓߐ߫ ߟߊ߫ ߣߐ߮ ߘߐ߫، ߏ߬ ߛߌ߬ߣߊ ߘߐ߫߸ ߒߞߏߡߐ߮ ߟߎ߫ ߟߊ߫ ߓߊ߯ߙߊ ߟߋ߬ ߒߞߏ ߞߊ߲߬ ߞߵߊ߬ ߛߊ߲ߞߘߐߕߊ߬.
ߟߊߒߡߊ߫ ߘߐ߫߸ ߒߞߏ ߛߌ߲ߘߌߓߊ߮ ߦߋ߫ ߛߏߡߊߦߟߍߡߊ߲߫ ߠߊ߫ ߕߎ߬ߡߊ ߡߍ߲ ߠߊ߫߸ ߏ߬ ߞߵߊ߬ ߕߘߍ߬ ߒߞߏ ߕߎ߲߬ ߡߊ߫ ߛߋ߲߬ߕߊ߰ ߛߌ߫ ߞߍ߫ ߢߎߡߍߙߋ߲ߦߊߟߌ ߞߊߡߊ߲ ߘߐ߫، ߞߊ߬ߝߊ ߟߎ߬ ߓߍ߯ ߕߘߍ߬ ߛߓߍ߫ ߟߊ߫ ߓߟߏ ߟߋ߬ ߟߊ߫ ߞߊ߬ ߞߐ߲߬ ߊ߬ߟߎ߫ ߜߌ߬ߙߌ߲߬ߘߌ ߢߍ߫، ߡߍ߲ ߠߎ߫ ߕߘߍ߬ ߞߝߊ߬ ߛߓߍ ߣߌ߫ ߜߌ߬ߙߌ߲߬ߘߌ߬ߟߌ ߞߍ߫ ߟߊ߫ ߕߎ߬ߡߊ ߏ߬ ߟߊ߫߸ ߏ߬ ߟߎ߫ ߛߍ߰ߣߍ߲߫ ߕߘߍ߬ ߞߏߛߓߍ߫، ߣߴߏ߬ ߕߐ߬ߣߐ ߕߎ߲߬ ߘߊ߲߬ ߘߊ߫ ߥߊߘߌ߫ ߞߏ ߡߊ߬߸ ߏ߬ ߟߎ߫ ߕߎ߲߬ ߘߌ߫ ߓߊ߯ߙߊ ߏ߬ ߟߎ߬ ߓߟߏߞߊ߬. ߒ߬ߞߊ߬ ߏ߬ ߟߎ߬ ߢߌߣߌ߲ߞߏ ߕߎ߲߬ ߕߍ߫ ߥߊߘߌ߫ ߛߐߘߐ߲ߞߏ߫ ߘߌ߫ ߡߎ߰ߡߍ߫، ߊ߬ߟߎ߬ ߢߌߣߌ߲ߞߏ ߕߘߍ߬ ߞߊ߬ߝߊ ߟߎ߬ ߟߊߖߍ߲ߛߍ߲ ߠߋ߬ ߘߌ߫ ߖߐ߲߰ߛߊ߫ ߏ߬ ߘߌ߫ ߞߍ߫ ߛߊߓߎ߫ ߘߌ߫ ߞߊ߬ ߒߞߏ ߟߊߘߏ߲߬ ߡߐ߱ ߟߎ߫ ߛߣߐ߬ߡߍ ߘߐ߫.
ߓߌ߬߸ ߒߞߏ ߏ߬ ߟߋ ߓߘߊ߫ ߛߋ߫ ߕߟߋ߬ߓߊ߮ ߣߌ߫ ߜߋߟߋ߲ߜߋߟߋ߲ ߠߎ߬ ߞߣߐ߫، ߞߊ߬ ߓߊ߲߫ ߞߊ߬ ߓߌ߬ߟߊ߬ ߜߎߜߐߟ ߟߊ߫ ߘߟߊߡߌߘߊߟߊ߲ ߞߙߎ ߘߐ߫. ߐ߬ߤߐ߲߫߹ ߒߞߏ ߣߊ߬ ߛߋ߲߬ߕߊ߮ ߡߍ߲ ߠߎ߬ ߞߍ߫ ߟߴߏ߬ ߘߌ߫߸ ߏ߬ ߕߐ߮ ߦߋ߫ ߖߐ߲߫ ߠߊ߫ ߓߌ߬ ؟ ߏ߬ ߟߋ ߒߞߏ ߛߌ߲ߘߌߓߊ߮ ߘߌ߫، ߞߵߏ߬ ߞߎ߲߬ߠߊ߬ߦߋ߬ߙߋ߲ ߘߴߊ߬ ߞߐߙߍ ߡߊ߬، ߞߴߊ߬ ߕߘߍ߬ ߜߎ߸ ߛߋ߲߬ߕߊ߮ ߏ߬ ߞߍߣߍ߲߫ ߊ߬ ߟߊ߫ ߛߊ߬ߦߊ ߟߋ߬ ߞߐߝߍ߬.
ߒߞߏ ߘߏ߲߬ߞߏ ߡߍ߲ ߠߎ߬ ߦߋ߫ ߛߍ߰ߘߏ߲ ߏ߬ ߟߎ߬ ߓߟߏߦߊߓߊ߮ ߘߌ߫߸ ߏ߬ ߟߎ߬ ߡߊ߫ ߓߐ߫ ߏ߬ ߣߎ߲߭ ߡߊ߬ ߛߐ߬ߘߐ߲ ߛߌߟߊ ߝߍ߬، ߊߟߎ߬ ߘߏ߲߬ ߣߊ߬ ߛߍ߰ ߛߎ߮ ߡߍ߲ ߘߏ߲߬ ߠߊ߫ ߒߞߏ ߞߏ ߘߐ߫ ߣߌ߲߬߸ ߣߴߊ߬ߟߎ߫ ߕߎ߲߬ ߞߵߏ߬ ߞߍ߫ ߓߊ߯ߙߊ߫ ߜߘߍ ߛߎ߯-ߎ-ߛߎ߯ ߘߐ߫ ߣߊ߲߬ߝߟߏ߬ ߢߌߣߌ߲ ߛߌߟߊ ߝߍ߬߸ ߊ߬ߟߎ߫ ߕߎ߲߬ ߘߴߏ߬ ߣߊ߬ߝߊ ߛߐ߬ߘߐ߲߬. ߡߊ߲߬ߘߋ߲߬ߞߊ ߟߎ߫ ߟߋ߬ ߞߊ߲߫߸ ߞߏ߫ ߥߊߟߌߢߌ߲ߡߊ ߡߊ߫ ߕߏ߫ ߕߊ߲߬ߘߏ߬ ߛߏ߫߸ ߊ߬ ߡߊ߫ ߕߏ߫ ߢߐ߲߯ ߛߏ߸ ߛߏ߲߭ ߓߘߊ߫ ߥߴߌ ߗߍ ߘߌ߫.
ߏ߬ ߓߟߏ߫ ߡߊ߬߸ ߞߊ߲ߕߍ߫ ߞߐߙߍ ߞߊ߫ ߞߊ߲߫ ߠߋ߬ ߞߊ߬ ߒߞߏߡߐ߮ ߟߎ߫ ߝߏ߬߸ ߞߵߊ߬ߟߎ߬ ߞߏߢߌߡߊߟߐ߲߫ ߞߊ߬ ߓߊ߲߫ ߞߵߊ߬ߟߎ߬ ߓߊߙߌߞߊ߫ ߟߊ߫ ߞߵߊ߬ ߓߍ߲߬ ߊ߬ߟߎ߬ ߟߊ߫ ߖߘߍ߬ߘߌ ߡߊ߬.
ߒ߬ ߠߊ߫ ߞߎߡߊ ߞߎ߲߬ߘߏ߲ ߘߐ߫߸ ߞߊ߲ߕߍ߫ ߞߐߙߍ ߓߟߏ ߝߌ߬ߟߊ ߦߴߊ߬ ߞߐ߫ ߞߵߊ߬ ߓߍ߲߬ ߝߎ߬ߕߎ߲߬ߕߌ߬ ߞߍߣߍ߲ ߠߎ߫ ߡߊ߬، ߏ߬ ߡߍ߲ ߡߴߊ߲ ߡߊߛߐ߬ߘߐ߲߬ ߘߏ߫ ߜߘߍ߫ ߝߍ߬ ߣߌ߫ ߘߋ߲ߣߍ߲ߦߊ ߕߍ߫، ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߊߟߎ߫ ߟߊ߫ ߞߴߏ߬ ߢߐ߲߰ ߜߘߍ߫ ߕߴߊ߲ ߛߐ߬ߘߐ߲߫ ߡߎ߬ߕߎ߲߬ ߊߟߊ߫ ߟߊ߫ ߘߌ߬ߢߍ ߟߊ߫.
ߖߐ ߦߴߊߟߎ߫ ߡߊ߬
ߒߞߏ ߛߌ߲ߘߌߓߊ߮ ߞߐߙߍ ߞߐߦߌߘߊߓߊ߮
ߎߡߊߙߎ߬ ߞߊ߲ߕߍ߫
