ߞߊ߲ߞߊ߲߫ ߕߌ߲߬ߞߎߘߎ߲ ߘߊ߲ߘߊߛߏ ߘߏ߲߬ߞߏ ߟߎ߫ ߟߋ߬ ߓߐߣߍ߲߫ ߛߌߟߊ ߞߊ߲߬ ߓߌߟߏ߲ ߣߌ߲߬ ߡߊ߬ ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߂߃߸ ߞߊ߬ ߡߊ߬ߡߌ߬ߘߊ߬ߟߌ߬ ߞߏ ߘߏ߫ ߜߋ߲ߜߋ߲ߦߊ߫߸ ߏ߬ ߡߍ߲ ߦߋ߫ ߖߐ߬ߘߐ ߣߌ߫ ߕߌߢߍߟߌ ߘߌ߫ ߖߌ߬ߣߍ߬ ߞߊ߲ߓߍ߲ ߘߊ߲ߘߊߟߌ ߛߊ߬ߙߌ߬ߦߊ ߣߴߊ߬ ߓߍ߲߬ߡߊ߬ߞߊ߲ ߠߎ߬ ߡߊ߬.
ߊ߲ ߢߊ ߟߋ߬ ߛߙߋߦߊ߫ ߘߴߊ߬ ߡߊ߬ ߞߌ߬ߓߊ߬ߙߏ߬ߘߊ ߘߏ߫ ߟߎ߫ ߞߊ߲߬ ߓߟߐߟߐ߫ ߞߊ߲ߠߊ ߟߎ߬ ߘߐ߫ ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߂߃߸ ߞߏ߫ ߞߊ߲ߞߊ߲߫ ߘߊ߲ߘߊߛߏߓߊ ߘߊ߲ߘߊߟߌߟߊ ߟߎ߬ ߟߋ߬ ߓߐߣߍ߲߫ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫، ߞߏ߫ ߣߴߏ߬ ߘߏ߲߬ ߡߊ߫ ߓߐ߫ ߞߊ߲ߕߌ߯ߦߊ ߞߐ߫ ߝߋߎ߫߸ ߊ߬ߟߎ߬ ߘߌߣߵߊ߬ߟߎ߫ ߝߎ߬ߙߎ߲߬ߞߎ߫ ߞߊ߬ ߘߊ߲ߘߊߟߌ ߓߊ߯ߙߊ ߟߊߟߐ߬، ߌ ߘߏ߲߬ ߓߊ߯ ߓߘߍ߬ߓߘߍ߬ߟߌ߬ ߞߏ ߣߌ߲߬ ߓߐ߫ ߊ߬ ߘߐ߫ ߛߌߛߍ߲߬߸ ߌ ߘߴߊ߬ ߦߋ߫ ߞߏ߫ ߊ߬ߟߎ߫ ߣߐ߬ ߡߍ߲ ߞߍ߫ ߟߴߏ߬ ߘߌ߫߸ ߏ߬ ߞߏߖߎ߯ߓߊ߫ ߟߋ߬ ߘߌ߫߸ ߞߵߊ߬߬ ߓߍ߲߬ ߊ߬ߟߎ߬ ߟߊ߫ ߓߊ߯ߙߊ ߛߊ߬ߙߌ߬ߦߊ ߝߟߐ߫ ߛߐ߬ߛߐ ߡߵߊ߬ߟߎ߬ ߓߟߏ߫߸ ߛߊ߬ߙߌ߬ߦߊ߬ ߓߟߏ ߡߊ߬߸ ߊ߬ߟߎ߬ ߓߘߊ߫ ߕߌߢߍߟߌ ߞߍ߫߸ ߊߘߡߊߘߋ߲ߧߊ ߖߍ߬ߘߍ ߝߣߊ߫ ߓߟߏ ߡߊ߬߸ ߊ߬ߟߎ߬ ߓߘߊ߫ ߞߎߡߊ߫ ߖߎ߯ߓߊ߫ ߝߐ߫.
ߣߴߌ ߞߊ߬ ߖߌ߬ߣߍ߬ ߘߊ߲ߘߊߟߌ ߕߊ߯ߛߌߟߊ ߛߊ߬ߙߌ߬ߦߊ߬ߛߎ߲ ߕߐ߲ߛߋ߲ ߉߲ ߡߊߝߟߍ߫߸ ߊ߬ ߛߓߍߣߍ߲߫ ߏ߬ ߞߣߐ߫ ߞߏ߫: <<ߘߊ߲ߘߊߟߌߟߊ ߝߋ߲ ߺ ߋ ߺ ߝߋ߲߫߸ ߣߴߌߟߋ ߞߊ߬ ߖߊ߲߬ߞߊ߬ߙߏ߬ߕߐ ߦߋ߫߸ ߊ߬ ߡߊߘߌߡߌ߲ߣߍ߲߫ ߠߋ߬߸ ߥߟߴߊ߬ ߘߛߍߣߍ߲߫ ߠߋ߬، ߣߴߌ ߡߴߊ߬ ߦߋ߫ ߌ ߘߏ߲߬ ߠߊߟߐ߲ߠߌ߲߫ ߘߴߊ߬ ߟߊ߫߸ ߞߏ߫ ߖߊ߲߬ߞߊ߬ߙߏ߬ߕߐ ߥߟߊ߫ ߖߐߞߌߓߊ߯ߕߐ ߘߏ߫ ߦߋ߫ ߖߐ߬ߘߐ ߘߐ߫߸ ߌ ߞߊ߫ ߞߊ߲߫ ߞߵߏ߬ ߡߊߘߍ߬ߡߍ߲߬߸ ߞߊ߬ ߓߊ߲߫ ߞߵߊ߬ ߦߟߌߟߊߕߍ߰ ߞߊ߬ ߘߊ߲ߘߊߟߌ߫ ߞߍ߫ ߊ߬ ߟߊ߫߸ ߊ߬ ߣߌ߫ ߡߍ߲ ߞߊ߫ ߞߊ߲߫.>> ߏ߬ ߟߋ ߘߐ߫߸ ߊ߬ ߝߐ ߊ߬ߟߎ߬ ߓߟߏ߫ ߞߏ߫ ߊ߬ߟߎ߬ ߓߍߣߊ߬ ߘߊ߲ߘߊߟߌ ߟߊߟߐ߬߸ ߏ߬ ߞߍ߫ ߘߊ߫ ߞߎߡߊ߫ ߖߎ߯ߓߊ߫ ߘߌ߫߸ ߊ߬ߟߎ߬ ߓߘߴߊ߬ߟߎ߬ ߟߊ߫ ߛߊ߬ߙߌ߬ߦߊ ߕߐ߲ߛߋ߲ ߉߲ ߛߐ߬ߛߐ߬، ߞߎߡߊ ߏ߬ ߞߍ߫ ߘߊ߫ ߖߘߍ߬ߞߊ߬ߣߌ߲߬ ߡߙߌߦߊ߫ ߘߌ߫߸ ߊ߬ ߞߍ߫ ߘߊ߫ ߓߘߍ߬ߓߘߍ߬ߟߌ߬ ߡߙߌߦߊ߫ ߘߌ߫߸ ߥߟߊ߫ ߛߣߐ߬ߡߍ߬ߘߐ߬ߦߊ߬ ߘߌ߫߸ ߊ߬ ߦߋ߫ ߞߏ߫ ߟߋ߬ ߘߌ߫߸ ߡߍ߲ ߡߊ߲߫ ߞߊ߲߫.
ߊ߬ߟߋ߬ ߛߊ߬ߙߌ߬ߛߎ߲߬ ߞߋߟߋ߲ ߣߌ߲߬ ߞߣߐ߫߸ ߊ߬ ߝߐߣߴߊ߬ ߕߐ߲ߛߋ߲ ߄߆߲ ߘߐ߫ ߞߏ߫: <<ߞߏ ߟߎ߬ ߞߍ߫ ߘߊ߫ ߢߊ ߺ ߏ ߺ ߢߊ߫ ߡߊ߬߸ ߖߊ߲߬ߞߊ߬ߙߏ߬ߕߐ ߟߎ߬ ߘߊ߲ߘߊ ߕߍ߫ ߟߊߟߐ߬ ߟߊ߫ ߝߛߍߞߘߎ߫.>> ߤߊߟߌ߬ ߤߊߞߍ߫ ߡߞߊߣߌ߲ ߠߎ߬ ߘߐ߫߸ ߘߊ߲ߘߊߟߌߟߊ ߞߊ߫ ߞߊ߲߫ ߞߵߊ߬ ߞߎߡߊ߫ ߞߊ߲ ߠߊߕߊ߬ߡߌ߲߬ ߛߌߟߊ߫ ߜߘߍ߫ ߟߋ߬ ߝߍ߬߸ ߡߍ߲ ߣߌ߫ ߓߊ߯ߙߊ߫ ߟߊߟߐ ߕߍ߫ ߞߋߟߋ߲߫ ߘߌ߫، ߏ߬ ߟߋ ߘߐ߫߸ ߕߐ߲ߛߋ߲ ߄߇߲ ߞߵߊ߬ ߝߐ߫ ߞߏ߫: <<ߣߴߊ߬ ߓߍ߲߬ ߘߊ߫ ߖߐ߬ߘߐ߫ ߝߘߏ߬ߓߊ߬ߡߊ ߘߏ߫ ߡߊ߬߸ ߘߊ߲ߘߊߟߌߟߊ ߕߍ߫ ߛߴߊ߬ ߟߊ߫ ߖߊ߲߬ߞߊ߬ߙߏ߬ߕߐ ߟߊߓߌ߬ߟߊ߬ ߟߊ߫߸ ߝߏ߫ ߣߴߏ߬ ߖߊ߬ߡߊߙߌ ߘߌ߫ ߘߊ߫ ߞߊ߬ ߝߘߊ߫ ߞߏߟߊߕߍ߯ ߟߊ߫߸ ߡߍ߲ ߣߴߏ߬ ߘߟߌ ߞߊ߫ ߞߊ߲߫.>>
ߣߴߌ ߘߏ߲߬ ߞߊ߬ ߝߘߏ߬ߓߊ߬ ߞߍ߲ߘߍߦߊ ߕߊ߬ ߝߣߊ߫߸ ߏ߬ ߕߐ߲ߛߋ߲߫ ߝߟߐ ߞߵߊ߬ ߝߐ߫ ߟߋ߬ ߖߌ߬ߣߍ߫ ߝߘߏ߬ߓߊ߬ ߞߍ߲ߘߍߦߊ ߛߊ߬ߙߌ߬ߦߊ߬ߛߎ߲ ߞߣߐ߫ ߞߏ߫ ߞߎ߲߬ߠߊ߬ߛߌ߮ ߟߋ߬ ߟߐ߬ߣߍ߲߫ <<ߞߍ߲ߘߍߦߊ ߟߊߦߙߌߥߊ ߣߴߊ߬ ߟߊߕߊ߲߬ߞߊ ߟߊ߫߸ ߡߐ߰ ߞߎ߲߬ߞߋߟߋ߲ ߠߎ߬ ߤߊߞߍ ߣߴߊ߬ߟߎ߬ ߟߊ߫ ߞߍߕߊ ߟߎ߬ ߟߊ߫߸ ߊ߬ ߣߌ߫ ߘߋ߲ߓߦߊ ߣߌ߫ ߖߊ߬ߡߊ ߓߍ߯ ߟߊߘߍ߬ߣߍ߲ ߖߌ߬ߣߍ߬ ߞߊ߲ߓߍ߲ ߘߎ߰ߞߣߍ ߞߊ߲߬.>> ߏ߬ ߘߐ߫߸ ߘߊ߲ߘߊߟߌ ߟߊߟߐ߬ ߞߏ߬ ߞߎߡߊ ߦߋ߫ ߞߎ߲߬ߠߊ߬ߛߌ߮ ߟߊ߫ ߡߙߌߦߊ ߣߌ߲߬ ߖߊ߲߬ߝߊ ߟߋ߬ ߘߌ߫ ߞߵߊ߬ ߛߐ߬ߛߐ߬.
ߓߘߍ߬ߓߘߍ߬ߟߌ ߘߊߘߐߘߌߦߊ ߣߴߊ߬ ߝߋ߲ߞߏߒߕߋߦߊ ߓߌ߬ߟߊ ߢߍߝߍ߬߸ ߞߊ߬ ߢߌ߬ߣߊ߬ ߘߊ߲ߘߊߟߌ ߛߊ߬ߙߌ߬ߦߊ ߞߐ߫߸ ߞߊ߬ ߢߌ߬ߣߊ߬ ߛߍ߲ߞߊ߲ߠߊ ߟߎ߬ ߞߐ߫ ߞߵߊ߬ ߓߍ߲߬ ߖߡߊ߬ߣߊ߬ߘߋ߲ ߠߊ߫ ߞߍ߲ߘߍߦߊ ߟߊߕߊ߲߬ߞߊ ߡߊ߬، ߐ߲߬ߤߐ߲߫߸ ߣߌ߲߬ ߞߍ߫ ߘߊ߫ ߡߎ߬ߕߎ߲߫ ߓߊ߬߸ ߥߟߴߊ߬ ߡߊ߫ ߞߍ߫߸ ߓߊ߬ߙߵߊ߬ߟߎ߬ ߓߊ߲ ߞߐ ߊ߬ ߡߙߌߦߊ ߟߊ߲ߞߣߍߡߊ߫ ߟߊ߫߸ ߟߊߒߠߦߊ ߦߋ߫ ߡߌ߲߫ ߞߎ߲߬ߠߊ߬ߛߌ߮ ߢߌ߲߬ ߠߎ߬ ߘߐ߫؟ ߟߊߒߠߦߊ ߦߋ߫ ߡߌ߲߫ ߘߊ߲ߘߊߟߌߟߊ ߢߌ߲߬ ߠߎ߬ ߘߐ߫؟ ߊ߬ ߞߍߢߊ߫ ߕߍ߫ ߒ ߞߣߐ߸ ߊ߬ ߣߌ߫ ߛߋ߫ ߜߘߍ߫ ߕߍ߫ ߒ ߢߍ߸ ߏ߬ ߟߋ ߞߍߕߐ߫ ߡߐ߰ ߟߊ߫ ߟߊ߫ ߢߌ߲߬ ߠߎ߬ ߟߊ߫ ߜߍ ߘߐ߫ ߡߎ߬ߕߎ߲߬، ߣߴߏ߬ ߕߍ߫ ߟߊߒߠߦߊ ߞߏ߬ߣߌ߲ ߓߘߊ߫ ߓߊ߲߫ ߞߣߐ ߘߐ߫ ߝߋߎ߫.
ߣߴߏ߬ ߕߍ߫߸ ߊ߬ ߤߊߞߍ ߦߋ߫ ߓߍ߯ ߦߋ߫ ߞߵߌ ߡߙߌߌߦߊ ߦߌ߬ߘߊ߬߸ ߓߊ߬ߙߌ߬ ߡߙߌߌߦߊ߫ ߦߌߘߊ ߏ߬ ߞߊ߫ ߞߊ߲߫ ߞߊ߬ ߞߍ߫ ߌ ߟߊ߫ ߓߊ߯ߙߘߊ ߛߊ߬ߙߌ߬ߦߊ ߟߎ߬ ߡߊߓߏߏ߲߬ߧߊ ߟߋ߬ ߞߣߐ߫، ߡߙߌߦߊ߫ ߦߌߘߊ߫ ߝߏߦߌ߬߸ ߣߴߊ߬ ߘߴߌ ߟߊ߫ ߟߊߒߠߦߊ ߡߊߣߐ߯߸ ߞߊ߬ ߣߊ߬ ߕߍ߬ߒ߬ߛߏ߬ߦߊ ߘߌ߫߸ ߏ߬ ߡߙߌߦߊ߫ ߛߎ߮ ߣߌ߫ ߞߍߟߌ ߡߊ߲߫ ߞߊ߲߫. ߊߟߎ߫ ߦߋ߫ ߘߊ߲ߘߊߟߌߟߊ ߟߎ߬ ߕߊ߯ߛߌߟߊ ߕߐ߲ߛߋ߲߫ ߅߲ ߘߐߜߍ߫߸ ߊ߬ ߝߐ ߡߍ߲ ߞߍߣߍ߲߫ ߦߋ߲߬ ߞߏ߫ ߘߊ߲ߘߊߟߌߟߊ ߦߴߊ߬ ߖߍ߬ߘߍ߫ ߟߋ߬ ߓߟߏ߫ ߊ߬ ߟߊ߫ ߓߊ߯ߙߊ ߘߐ߫߸ ߡߐ߰ ߕߴߊ߬ ߘߌߦߊߜߏߦߊ߫ ߟߊ߫߸ ߏ߬ ߝߐߣߍ߲߫ ߊߘߡߊߘߋ߲ ߣߴߊ߬ߟߎ߬ ߣߌ ߟߋ߬ ߟߊߕߊ߲߬ߞߊ߬ ߞߊ߲ߡߊ߬ ߘߋ߬߸ ߓߊ߬ߙߌ߬ ߞߟߍ߬ ߡߎߙߊ߲߫ ߕߴߏ߬ ߘߌ߫ ߡߎ߰ߡߍ߫.
ߏ߬ ߘߐ߫߸ ߊߟߎ ߘߊ߲ߘߊߟߌߟߊ ߟߎ߬߸ ߊߟߎ߫ ߞߊ߫ ߞߊ߲߫ ߞߵߊ߬ ߟߐ߲߫ ߞߏ߫ ߝߊ߰ߣߌ߲߬ ߜߍ ߡߍ߲ ߦߴߊߟߎ߫ ߞߊ߲ߠߊ߫ ߏ߬ ߘߌ߫߸ ߏ߬ ߘߏ߲߬ߣߍ߲ ߖߡߊ߬ߣߊ߬ߘߋ߲ ߠߎ߬ ߟߋ߬ ߟߊߞߊ߲ߘߊ߫ ߞߊ߲ߡߊ߬߸ ߊ߬ ߡߊ߫ ߘߏ߲߬ ߓߘߍ߬ߓߘߍ߬ߟߌ ߛߊ߲ߞߊߥߟߌ߫ ߞߊ߲ߡߊ߬ ߘߋ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
