ߞߐ߬ߓߊ߬ߟߏ߲߫ ߕߊ߬ߡߌ߲߬ߣߍ߲ ߠߋ߬ ߡߊ߬߸ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߂߆ ߡߊ߬߸ ߞߊ߬ߙߊ߲߬ߕߊ ߒߓߊߟߎ߫ ߘߛߎ ߞߊ߬ ߢߐ߲߯ߓߍ߲ߓߊ߫ ߟߋ߬ ߛߌ߲߬ߝߏ߲߬ߧߊ߬، ߣߌ߲߬ ߦߋ߫ ߒߞߏ ߓߟߐߟߐ߫ ߞߊߙߊ߲ߕߊ ߟߋ߬ ߘߌ߫߸ ߡߍ߲ ߦߋ߫ ߞߍ߫ ߟߴߊ߬ߟߎ߬ ߓߟߏ߫ ߥߛߊߔ ߞߊ߲߬߸ ߣߴߊ߬ ߛߌ߲߬ߝߏ߲ ߘߌ߫ ߡߐ߰ ߁ ߀߀߀ ߢߐ߲߰ ߓߐ߫ ߞߙߎ ߣߌ߲߬ ߞߊ߲߬.
ߒ߬ߓߊ߬߸ ߖߊ߲߬ߖߏ߲ ߣߌ߲߬ ߓߍ߲߬ߒ߬ߛߋ߲߬ߡߊ ߞߍ߫ ߘߊ߫ ߡߊ߬ߕߌ߰ߟߊ߬ߞߊ ߟߎ߬ ߟߊ߫ ߞߐߙߍ ߟߋ߬ ߤߊ߬ߙߌ߬ߖߍ߮ ߘߌ߫ ߛߌ߯ߙߌ߲߫ ߞߎߘߊ߫ ߂߲ ߞߌ߲߬ߘߊ ߟߊ߫߸ ߞߵߊ߬ ߛߐ߬ߘߐ߲߬ ߒߞߏ ߛߍ߬ߘߏ߲߬ߠߊ߬ ߛߌߦߊߡߊ߲߫ ߦߋ߫ ߞߣߍ ߞߊ߲߬߸ ߊ߬ ߣߌ߫ ߛߌ߯ߙߌ߲߫ ߢߍߓߊ߮ ߟߎ߬ ߟߊ߫ ߘߍ߭߸ ߞߎߡߊߕߍ߫ ߒߞߏ ߘߍߞߙߎ ߟߎ߫ ߡߊ߬߸ ߟߞߝ ߦߴߏ߬ ߘߏ߫ ߟߋ߬ ߘߌ߫.
ߞߊ߬ߙߊ߲߬ߡߐ߯ ߊ߬ߟߌ߫ ߞߙߊ߬ߞߐ߬ߞߊ ߞߊ߬ߟߐ ߞߊ߬ ߛߙߊ߬ߣߎ߲ ߕߊ߬߸ ߊ߬ߟߋ ߡߍ߲ ߦߋ߫ ߒߞߏ ߞߊߙߊ߲ߡߐ߯ ߣߌ߫ ߞߊ߬ߙߊ߲߬ߕߊ ߣߌ߲߬ ߛߌ߲ߘߌߓߊ߮ ߘߌ߫߸ ߞߊ߬ ߖߊ߲߬ߖߏ߲ ߣߌ߲߬ ߟߊ߬ߢߌߣߌ߲ ߠߎ߬ ߢߊߝߐ߫.
<<ߞߊ߬ߙߊ߲߬ߕߊ ߒߓߊߟߎ߫ ߘߛߎ ߣߌ߲߬ ߦߋ߫ ߓߟߐߟߐ߫ ߞߊ߲߫ ߞߊߙߊ߲ߕߊ ߟߋ߬ ߘߌ߫߸ ߒߞߏ ߟߊߥߙߎߞߌ߫ ߞߊ߲ߡߊ߬߸ ߊ߬ ߣߌ߫ ߝߘߊ߬ߝߌ߲߬ ߞߊ߲ ߠߎ߬ ߛߊ߲ߞߘߐߕߊ߬، ߓߌ߬ ߜߊ߬ߙߊ ߣߌ߲߬ ߞߎ߲߭ ߕߘߍ߬ ߡߍ߲ ߘߌ߫߸ ߞߊ߬ ߝߊ߲߬ߞߊ ߘߌ߫ ߞߊ߬ߙߊ߲߬ߕߊ ߒߓߊߟߎ߫ ߘߛߎ ߡߊ߬ ߒߞߏ ߟߊߥߙߎߞߌ ߘߐ߫، ߒ ߧߋ߫ ߒ ߞߊ߲ߠߊߘߌ߫ ߟߊ߫ ߓߍ߯ ߟߊߘߍ߬ߣߍ߲ ߡߊ߬߸ ߊ߲ ߧߋ߫ ߘߍ߬ ߞߊ߬ ߝߊ߲߬ߞߊ߬ ߘߌ߫ ߖߘߍ߬ ߞߏ ߟߋ߬ ߡߊ߬߸ ߊ߲ ߧߋ߫ ߝߊ߲߬ߞߊ߬ ߘߌ߫ ߊ߲ ߠߊ߫ ߞߊ߲ ߡߊ߬߸ ߊ߲ ߧߋ߫ ߝߊ߲߬ߞߊ߬ ߘߴߊ߲ ߖߍ߬ߘߍ߫ ߡߊ߬، ߞߊ߬ ߝߊ߲߬ߞߊ߬ ߘߴߊ߲ ߠߊ߫ ߟߐ߲ߠߌ߲ߦߊ ߡߊ߬߸ ߞߊ߬ ߟߐ߲ߞߏ ߣߌ߫ ߛߋߒߞߏߟߊߘߐ ߟߎ߬ ߟߊߥߙߎߞߌ߫ ߊ߲ ߠߊ߫ ߞߊ߲ ߘߐ߫، ߞߵߊ߬ ߢߊߢߌߣߌ߲߫ ߕߐ߭ ߟߎ߬ ߘߐ߫߸ ߞߵߊ߬ ߟߊߥߎ߬ߙߎ߲߬ߓߊ߬ ߊ߲ ߠߊ߫ ߞߊ߲ ߘߐ߫߸ ߏ߬ ߟߋ ߘߴߊ߲ ߝߣߊ߫ ߞߍ߫ ߟߐ߲ߞߏߕߌ߮ ߘߌ߫، ߒ ߧߴߊ߬ ߢߌߣߌ߲߫ ߠߊ߫ ߖߊ߬ߡߊ ߝߍ߬߸ ߊ߬ߟߎ߬ ߦߋ߫ ߝߊ߬ߙߵߊ߲ ߞߊ߲߬ ߞߊ߬ ߞߊ߬ߙߊ߲߬ߕߊ ߒߓߊߟߎ߫ ߘߛߎ ߟߊߥߙߎߞߌ߫، ߞߊ߬ߕߎ߲߯߸ ߢߍߥߟߊ߫ ߛߌߦߊߡߊ߲߫ ߠߋ߬ ߦߴߊ߲ ߓߟߏ߫߸ ߊ߬ ߕߏߣߍ߲߫߫ ߡߍ߲ ߡߊ߬ ߕߋ߲߬ ߘߐߙߐ߲߫߸ ߊ߲ ߧߋ߫ ߞߊ߬ߙߊ߲߬ߕߊ ߛߐ߬ߘߐ߲߬߸ ߞߊ߬ ߟߞߊ߬ߙߊ߲߬ߠߌ߲ ߞߍ߫، ߣߴߊ߲ ߞߊ߬ ߡߐ߰ ߛߐ߬ߘߐ߲߬ ߡߍ߲ ߘߌ߫ ߞߊ߬ߙߊ߲߬ߕߊ ߟߐ߬ ߘߎ߰ߞߟߏ ߞߊ߲߬ ߊ߲ ߧߋ߫߸ ߏ߬ ߘߌ߫ ߘߌߦߴ߲ ߧߋ߫ ߞߏߛߓߍ߫.>> ߊ߬ ߞߵߏ߬ ߟߋ ߝߐ߫.
ߞߊ߬ߙߊ߲߬ߕߊ ߒߓߊߟߎ߫ ߘߛߎ ߞߊ߬ߙߊ߲߬ߘߋ߲ ߘߏ߫ ߓߍ߫߸ ߞߏ߫ ߞߊߘߌߦߊߕߎ߬ ߞߏ߬ߦߌ߬ߕߊ߸ ߏ߬ ߞߊ߬ ߡߏ߬ߛߏ ߟߎ߬ ߞߟߌ߫ ߒߞߏ ߞߊߙߊ߲ ߡߊ߬.
<<ߒ ߛߍߥߊߣߍ߲ߓߊ ߟߋ߬ ߓߌ߬، ߞߟߌߟߌ߫ ߞߊ߲ߠߊ ߡߍ߲ ߒߠߋ ߓߟߏ߫ ߞߵߊ߬ ߟߊߛߋ߫߫ ߡߏ߬ߛߏ ߟߎ߫ ߡߊ߬߸ ߏ߬ ߟߋ ߒߞߏ ߞߊ߬ߙߊ߲ ߘߌ߫ ߞߊ߬ ߥߊ߫ ߢߍߝߍ߬، ߓߊߏ߬߸ ߣߌ߫ ߡߏ߬ߛߏ ߞߊ߬ ߒߞߏ ߞߊ߬ߙߊ߲߬߸ ߏ߬ ߦߴߊ߲ ߘߍ߬ߡߍ߲߬ ߠߊ߫ ߟߋ߬ ߘߋ߲ ߠߎ߬ ߖߏ߯ߘߏ߲߭ ߘߐ߫߸ ߝߊߘߌߦߊߓߐ ߘߐ߫߸ ߟߐ߲ߠߌ߲ߦߊ ߘߐ߫߸ ߊ߬ ߣߌ߫ ߘߐ߬ߝߐ ߘߐ߫.>> ߊ߬ ߞߵߏ߬ ߟߋ ߞߍ߫ ߟߊ߬ߟߌ߬ߒ߬ߞߊ߲߬ߠߊ ߘߌ߫.
ߢߍߓߊ߯ ߊߓߘߎ߫ ߞߊߙߌߡ ߞߏ߬ߣߊ߬ߕߍ߫ ߡߍ߲ ߦߋ߫ ߛߌ߯ߙߌ߲߫ ߢߍߓߊ߮ ߟߎ߬ ߟߊ߫ ߘߍ߭ ߞߊ߲ߕߌ߮ ߘߌ߫߸ ߏ߬ ߞߊ߬ ߞߟߌߟߌ ߟߊߛߋ߫ ߖߡߊ߬ߣߊ߬ߘߋ߲ ߠߎ߬ ߣߌ߫ ߞߎ߲߬ߠߊ߬ߛߌ߮ ߟߋ߬ ߡߊ߬.
<<ߒߞߏ ߞߊ߫ ߘߌ߫ ߒߠߋ ߦߋ߫ ߞߏߛߓߍ߫، ߒ ߞߊ߬ ߒߞߏ ߞߊߙߊ߲ ߣߌ߲߬ ߘߊߡߌ߬ߣߊ߫ ߟߋ߬ ߞߊ߬ ߞߐ߲߰ ߒ ߠߊ߫ ߡߞߊ߫ ߕߊ߯ߟߌ ߢߍ߫ ߞߊ߬ߙߊ߲ ߞߊ߲ߡߊ߬، ߟߊ߬ߘߌߦߊߢߍ ߏ߬ ߟߋ ߞߏߛߐ߲߬߸ ߒ ߓߐ ߡߍ߲ ߞߍ߫ ߘߊ߫ ߡߞߊ߫߸ ߒ ߣߊ߬ ߘߊ߫ ߒߞߏ ߞߝߊ߫ ߘߟߊߡߌ߬ߣߊ߬ߣߍ߲ ߘߏ߫ ߟߎ߫ ߘߴߊ߲ ߓߟߏ߫ ߦߊ߲߬، ߌ ߞߊ߬ ߞߊ߬ߙߊ߲߬ ߜߘߍ ߛߎ߯ ߺ ߎ ߺ ߛߎ߯ ߞߍ߫߸ ߣߴߊ߬ ߝߐ߫ ߘߊ߫ ߞߏ߫ ߌ ߡߊ߫ ߒߞߏ ߟߐ߲߫߸ ߏ߬ ߦߴߌ ߡߊ߬ ߟߊ߬ߜߊߛߌ ߟߋ߬ ߘߌ߫، ߊ߲ ߧߋ߫ ߕߌ߲ߞߌ߫ ߟߊ߫ ߞߊ߬ߙߊ߲߬ߡߐ߯ ߊ߬ߟߌ߫ ߞߙߊ߬ߞߐ߬ߞߊ ߞߊ߬ߟߏ ߦߋ߫، ߒߠߋ ߕߎ߲߬ ߕߍ߫ ߓߟߐߟߐ߫ ߟߊ߫ ߞߊߙߊ߲߫ ߞߏ ߣߌ߲߬ ߞߊ߬ߟߊߡߊ߬، ߣߌ߫ ߒ ߕߎ߲߬ ߞߵߊ߬ ߟߐ߲߫߸ ߛߊ߫ ߒ ߕߎ߲߬ ߓߘߊ߫ ߘߏ߲߬ ߊ߬ ߘߐ߫ ߞߊ߬ߦߌ߯ ߕߎ߬ߡߊ߬ ߖߊ߲߫، ߓߊ߬ߙߌ߬ ߓߌ߬߸ ߒ ߘߌ߫ ߞߍ߫ ߒߓߊߟߎ߫ ߘߛߎ ߞߊ߬ߙߊ߲߬ߘߋ߲߬ ߞߎߘߊ ߘߌ߫ ߓߌ߬، ߒ ߓߘߊ߫ ߡߐ߱ ߟߎ߬ߎ ߞߟߌ߫ ߒߞߏ ߞߊߙߊ߲ ߡߊ߬ ߒ ߠߊ߫ ߖߎߡߊ ߞߕߎ߬ߓߊ ߘߐ߫ ߛߋ߲߬ߢߊ߬ ߛߌߦߊߡߊ߲߫߸ ߊ߬ ߣߌ߫ ߖߡߊ߬ߣߊ ߞߎ߲߬ߠߊ߬ߛߌ߮ ߟߎ߬߸ ߛߴߊ߬ߟߎ߬ ߘߌ߫ ߒߞߏ ߞߍ߫ ߞߎ߲߬ߠߊ߬ߛߌ߰ ߞߊ߲ ߘߌ߫߸ ߊ߬ ߣߌ߫ ߡߊ߬ߡߙߊ߬ߟߌ߬ ߞߊ߲ ߘߌ߫.>> ߊ߬ ߞߵߏ߬ ߟߋ ߟߊߢߌߣߌ߲߫.
ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߊ߬ߓߊ߫ ߡߍ߲ ߦߋ߫ ߒߞߏ ߛߓߍߦߟߊ ߣߴߊ߬ ߥߎ߬ߦߊ߲߬ߞߟߌ߬ߟߊ߬ߓߊ ߘߏ߫ ߘߌ߫߸ ߏ߬ ߞߵߊ߬ ߟߊ߫ ߛߍߥߊ ߦߌ߬ߘߊ߫ ߣߌ߲߬ ߞߏ ߘߐ߫.
<<ߒߓߊߟߎ߫ ߘߛߎ ߞߊ߬ߙߊ߲߬ߕߊ ߣߌ߫ ߛߣߍ߫ ߛߌ߯ߙߌ߲߫ ߞߣߐ߫، ߞߊ߬ߙߊ߲߬ߕߊ ߡߍ߲ ߓߊ߯ ߘߐߞߍ߫ ߘߋ߲ߣߍ߲ ߠߎ߬ ߣߌ߫ ߘߋ߲ߡߌߛߍ߲ ߠߠߎ߬ ߟߊ߫߸ ߏ߬ ߘߌ߫ ߥߊ߫ ߢߍߝߍ߬، ߞߊ߬ߕߎ߲߯߸ ߒߞߏ ߞߊߙߊ߲ߕߊ ߛߌߦߊߡߊ߲߫ ߠߋ߬ ߦߋ߲߬߸ ߡߍ߲ ߠߎ߬ ߦߋ߫ ߡߐ߰ߓߊ߬ ߞߘߐ߬ ߞߊߙߊ߲ߕߊ ߟߎ߬ ߘߌ߫، ߓߊ߬ߙߌ߬߸ ߞߊ߬ ߘߋ߲ߡߌߛߍ߲ ߠߎ߬ ߦߋ߫ ߣߌ߲߬ ߢߊ߸ ߊ߬ߟߎ߬ ߦߋ߫ ߣߊ߬ ߟߊ߫ ߒߞߏ ߞߊ߬ߙߊ߲߬ ߠߊ߫߸ ߏ߬ ߦߋ߫ ߞߏ߫ ߓߘߍߓߊ߫ ߘߌ߫، ߊ߲ ߧߋ߫ ߓߍ߯ ߟߊߘߍ߬ߣߍ߲ ߝߏ߬ ߟߊ߫ ߖߊ߲߬ߖߏ߲ ߕߘߍ߬ߒ߬ߘߐ߬ߟߌ ߟߊ߫߸ ߊ߬ ߕߌ߯ߕߌ߯ ߢߍߓߊ߮ ߟߎ߬.>> ߊ߬ ߛߍߥߊߣߍ߲ ߞߵߏ߬ ߟߋ ߝߐ߫.
߂߀߂߆ ߖߊ߬ߕߋ߬ߘߐ߬ߛߌ߮ ߦߋ߫ ߡߍ߲ ߘߌ߫ ߞߊ߬ߙߊ߲߬ߕߊ ߒߓߊߟߎ߫ ߘߛߎ ߓߟߏ߫߸ ߏ߬ ߟߋ ߡߐ߰ ߁߀߀߀ ߞߊ߬ߙߊ߲ ߘߌ߫ ߒߞߏ ߟߊ߫ ߊ߬ߟߎ߬ ߦߴߊ߬ ߢߊߦߋ߫߸ ߞߊ߬ ߛߋ߫ ߕߐ߮ ߟߎ߬ ߛߓߍ߫ ߟߊ߫ ߊ߬ ߣߌ߫ ߦߙߐ߫ ߕߐ߮ ߟߎ߬ ߣߌ߫ ߦߙߌߞߊߟߌ، ߞߏ߬ߣߌ߲߬ ߏ߬ ߘߍ߲ߣߍ߲߫ ߊ߬ߟߎ߬ ߟߊ߫ ߖߊ߬ߕߋ߬ߘߐ߬ߛߌ߮ ߘߍ߬ߡߍ߲ ߠߋ߬ ߟߊ߫߸ <<ߣߌ߫ ߖߊ߬ߕߋ߬ߘߐ߬ߛߌ߮ ߏ߬ ߘߍ߬ߡߍ߲߬ ߘߊ߫ ߌߞߘߐߕߊ߲߬ ߊ߲ ߘߴߏ߬ ߞߏ ߘߊߡߌ߬ߣߊ߬ ߞߊߙߏ߫ ߓߕߐ ߣߌ߲߬ ߡߊ߬ ߛߌߞߊ߫ ߛߌ߫ ߕߴߏ߬ ߘߐ߫ ߞߏ߲ߞߏߜߍ߫ ߣߊ߬ߕߐ ߢߌ߲߬ ߡߊ߬ ߞߊ߬ߣߌ߲߫>> ߞߙߊ߬ߞߐ߬ߞߊ ߞߊ߬ߟߐ ߟߋ߬ ߞߊ߲߫ ߦߋ߫ ߕߋ߲߬.
ߌߓߙߊߤߌߡߊ߬ ߝߙߊ߬ߓߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫ ߛߌ߯ߙߌ߲߫.
