ߞߏ߲ߞߏߜߍ ߕߟߋ߬ ߁߄ ߡߊ߬߸ ߘߎߢߊ߫ ߝߌ߬ߟߊ߬ߓߊ ߞߋ߲߬ߥߟߎ ߟߋ߬ ߓߍ߫ ߦߋ߲߬߸ ߡߍ߲ ߠߎ߬ ߦߋ߫ ߗߋߛߓߍ ߟߎ߬ ߟߊߕߊ߯ ߟߊ߫ ߢߐ߲߮ ߡߊ߬߸ ߞߊ߬ ߖߙߊ߬ߓߌ ߝߙߋߕߟߏ ߟߎ߬ ߘߌ߫ ߢߐ߲߮ ߡߊ߬߸ ߛߍ߲߫ ߝ߭ߊߟߊ߲ߕߍ߲ ߓߍ߲߬ߒ߬ߛߋ߲߬ߡߊ ߞߏߛߐ߲߬، ߞߊ߲ߞߊ߲߫ ߞߣߐ߫߸ ߝߌ߬ߘߊ ߣߌ߲߬ ߘߐߞߏߕߏ߲߫ ߕߍ߫ ߕߏ߫ ߟߊ߫، ߢߌ߬ߣߊ߲߫ ߛߊ߲߭ ߢߌ߲߬ ߠߊ߫ ߌߞߐ߫߸ ߖߌ߬ߣߍ߬ ߜߍߞߊ߲ߠߊ ߞߎߓߋߘߊ ߞߊ߬ ߖߙߊ߬ߓߌ߬ ߞߊ߲߬ ߛߌߦߊߡߊ߲߫ ߠߋ߬ ߟߊߛߋ߫߸ ߥߎ߬ߘߊ߲ ߣߌ߫ ߖߙߊ߬ߓߌ ߦߌ߬ߘߊ߫ ߢߐ߲߰ ߠߊ ߘߐ߫߸ ߞߵߊ߬ ߓߍ߲߬ ߘߎߢߊ߫ ߥߊ߫ ߢߊ ߖߍ߬ߘߍ ߡߊ߬.
ߊߟߎ߫ ߦߴߊ߬ ߟߐ߲߫߸ ߝߌ߬ߘߊ ߡߍ߲ ߓߘߊ߫ ߞߍ߫ ߘߎߢߊ߫ ߓߍ߯ ߘߍ߭ ߘߌ߫ ߣߌ߲߬߸ ߘߐ߬ߝߐ߫ ߘߏ߲߰ߣߍ߲߬ ߛߌߦߊߡߊ߲߫ ߠߋ߬ ߦߴߊ߬ ߞߣߐ߫، ߛߍ߲߫ ߝ߭ߊߟߊ߲ߕߍ߲߫ ߞߏ ߘߊߡߌ߬ߣߊ߬ߣߍ߲߫ ߞߊ߬ߦߌ߯ ߝߊ߯ߘߐߞߍ߫ ߃߲ ߠߋ߬ ߝߍ߬߸ ߙߐߡߎ߲߬ ߝߊ߰ߡߊ߬ߟߊ ߕߎ߬ߡߊ ߟߊ߫، ߌߛߊߟߞߊ ߟߎ߬ ߟߊ߫ ߘߋ߬ߙߌ߬ߣߊ߲߬ߞߏ߫ ߞߘߐ߬ߡߊ߲ ߘߐ߫߸ ߊ߬ ߞߏ ߣߴߊ߬ߟߎ߬ ߟߊ߫ ߕߎ߰ߡߏߙߌ ߘߏ߫ ߟߋ߬ ߟߊ߫ ߞߏ ߣߙߊߣߍ߲߫ ߢߐ߲߮ ߠߊ߫߸ ߡߍ߲ ߕߐ߰ ߞߏ߫ ߝ߭ߊߟߊ߲ߕߍ߲߫߸ ߏ߬ ߟߋ ߝߊ߰ ߘߊ߫ ߞߏ߲ߞߏߜߍ ߕߟߋ߬ ߁߄ ߡߊ߬߸ ߛߊ߲߭ ߂߇߀ ߝߊ߲߭ ߝߍ߬، ߞߊ߬ߕߎ߲߯߸ ߝߊ߰ߡߊ߫ ߞߑߟߏߘ ߂߲ ߟߋ߬ ߜ߭ߏߕߌߞ ߞߊ߬ ߝߘߎ ߟߊߕߐ߲߫ ߡߍ߲ߞߍ߭߸ ߕߎ߰ߡߏߙߌ߫ ߝ߭ߊߟߊ߲ߕߌߣ ߠߋ߬ ߞߵߏ߬ ߟߊ߫ ߛߊ߬ߙߌ߬ߦߊ ߏ߬ ߞߊߓߊ߲ߓߐ߫߸ ߊ߬ߟߎ߫ ߞߵߊ߬ ߡߌ߬ߣߊ߫ ߏ߬ ߟߋ ߘߐ߫ ߞߵߊ߬ ߛߊ߲ߞߎ߲߫، ߊߟߎ߫ ߦߴߊ߬ ߟߐ߲߫߸ ߝߊ߰ߡߊ ߞߵߊ߬ ߖߊ߬ߕߋ߫ ߟߋ߬߸ ߞߏ߫ ߣߊ߲߬ߕߌ߮ ߡߍ߲ ߠߎ߬ ߦߋ߫ ߗߍ߬ߜߊ߬ߣߊ߲߬ߧߊ ߘߐ߫߸ ߏ߬ ߟߎ߬ ߝߊߘߌ߲ߡߌ߲߫ ߞߍ߬ߟߍ ߘߐ߫ ߞߊ߬ ߕߊ߬ߡߌ߲߫ ߊ߬ ߡߛߏ߬ ߕߌ߮ ߟߎ߫ ߞߊ߲߬، ߏ߬ ߟߋ ߘߐ߫߸ ߊ߬ߟߎ߫ ߞߊ߬ ߝߘߎ ߟߊߕߐ߲߫ ߣߊ߲߬ߕߌ߮ ߟߎ߫ ߡߊ߬߸ ߞߏ߫ ߛߴߊ߬ߟߎ߬ ߞߊߣߊ߬ ߖߊߝߏߦߊ߫ ߞߍ߬ߟߍ ߘߐ߫، ߒ߬ߓߊ߬߸ ߝ߭ߊߟߊ߲ߕߍ߲߫ ߞߵߊ߬ ߗߋ ߞߍ߫ ߝߘߎ ߛߌ߬ߘߌ ߟߋ߬ ߘߌ߫ ߣߊ߲߬ߕߌ߮ ߟߎ߬ ߕߍ߫ ߘߏ߲߰ ߓߟߏ ߡߊ߬، ߏ߬ ߟߋ ߞߵߊ߬ߟߋ ߟߊ߫ ߓߊ߯ߙߊ ߏ߬ ߖߊ߬ߕߋ߫ ߕߋߟߋ߲ ߣߌ߫ ߞߟߊߓߎ ߓߊ߯ߙߊ ߘߌ߫ ߥߊ߯ߕߌ ߟߊ߫ ߖߊ߲߰ߧߊ ߓߟߏ߫.
ߘߝߐ߬ߦߊ߬ߟߊ ߘߏ߫ ߟߎ߫ ߞߊ߲߫߸ ߞߏ߫ ߖߊ߲߬ߖߏ߲ ߏ߬ ߣߌ߫ ߙߐ߬ߡߎ߲߬ߞߊ߫ ߛߏߡߊ ߟߎ߬ ߟߊ߫ ߖߘߌ ߢߊ߰ߢߊ߮ ߘߏ߫ ߞߊ߬ ߢߐ߲߮ ߓߍ߲߬߸ ߊ߬ߟߎ߫ ߕߘߍ߬ ߡߍ߲ ߞߟߌ߫ ߟߊ߫ ߞߏ߫ ߟߎߔߍߙߑߞߊߟ، ߏ߬ ߢߊ߰ߢߊ߮ ߕߘߍ߬ ߞߍ߫ ߟߴߏ߬ ߟߎ߬ ߓߟߏ߫ ߞߏ߲ߞߏߜߍ ߕߍߡߊ߬ ߟߋ߬، ߙߐߡߎ߲߬ ߝߊ߰ߡߊ߬ߟߊ ߛߋ ߡߍ߲ ߞߍ߫ ߘߊ߫ ߌߛߊߟߞߊ ߟߎ߬ ߕߊ߫ ߓߟߏ߫ ߡߊ߬߸ ߊ߬ߟߎ߫ ߞߊ߬ ߛߏߡߊ ߟߎ߬ ߟߊ߫ ߢߊ߰ߢߊ߮ ߏ߬ ߣߐ߬ߘߐߓߌ߬ߟߊ߫ ߝ߭ߊߟߊ߲ߕߍ߲߫ ߢߊ߰ߢߊ߮ ߟߊ߫.
ߞߊ߲ߞߊ߲߫ ߞߣߐ߫߸ ߘߝߐ߬ ߞߘߐ ߏ߬ ߦߋ߫ ߞߍ߫ ߟߊ߫ ߢߊ߰ߢߊ߮ ߘߌ߫ ߦߊ߲߬ ߖߐ߫، ߕߋ߬ߟߋ ߘߐ߫߸ ߞߊ߲ߞߊ߲߫ ߘߓߌߘߊ ߝߊ߫ ߘߊ߫ ߟߋ߬، ߁߈ߙߋ߲ ߦߋ߫ ߛߋ߫ ߟߊ߫ ߕߎ߬ߡߊ ߡߍ߲߸ ߤߊߟߌ߬ ߖߌ߰ߣߌ߬ߦߟߍ ߓߍ߯ ߜߍ߬ߟߍ߲߬ߡߊ߲߫ ߕߘߍ߬߸ ߖߊ߬ߡߊ ߟߊ߫ ߛߌߦߊߦߊ ߞߏߛߐ߲߬، ߘߋ߲ߡߌߛߍ߲ ߠߎ߬ ߦߋ߫ ߓߐ߫ ߟߊ߫ ߝߊ߲߭ ߓߍ߯߸ ߞߊ߬ ߣߊ߬ ߝߙߋߕߟߏ ߟߎ߫ ߛߊ߲߬߸ ߛߎߡߊߘߌߦߊߟߊ߲ ߠߎ߬߸ ߞߵߏ߬ ߟߊ߫ ߝߊߘߌߦߊߓߐ ߟߎ߫ ߞߊ߲߬߸ ߊ߬ ߣߌ߫ ߕߎ߬ߡߊ߬ߟߊ߲ ߣߌ߫ ߖߙߊ߬ߓߌ ߝߋ߲߫ ߞߙߍߞߙߍߣߍ߲ ߛߌߦߊߡߊ߲߫߸ ߡߍ߲ ߘߌߕߐ߫ ߊ߬ߟߎ߬ ߘߌߦߊߣߊ߲߫ ߡߐ߮ ߟߎ߫ ߡߊ߬.
ߡߍ߲ ߠߎ߬ ߕߍ߬ߘߍ߫ ߞߟߐ߬ ߥߎߟߋ߲ ߣߌ߫ ߕߎ߬ߓߊ ߕߎ߲߬ ߦߋ߫ ߝߙߋ߬ ߟߊ߫ ߡߍ߲ ߠߎ߬ ߓߟߏ߫߸ ߞߵߏ߬ ߟߊ߫ ߡߊ߬ߖߐ߰ߙߊ߲߬ ߡߌ߬ߛߍ߲߬ߣߍ߲ ߠߎ߫ ߞߊ߲߬߸ ߏ߬ ߟߎ߫ ߞߊ߬ ߛߊ߲߬ߠߌ߲ ߞߍ߫ ߞߎߣߎ߲߬ ߞߏߛߓߍ߫، ߞߊ߲ߞߊ߲߫ ߛߏ ߞߣߐ߫߸ ߟߊ߬ߞߙߐ߬ߛߌ߬ߟߌ ߟߎ߬ ߘߐ߫߸ ߝߌ߬ߟߊ߬ߓߊ ߟߎ߬ ߓߟߏ ߦߋ߫ ߢߐ߲߮ ߓߟߏ߫ ߝߊ߲߭ ߠߎ߬ ߘߐ߫߸ ߔߏߔߏ߫ ߞߊ߲ߠߊ ߟߎ߬ ߝߊߣߍ߲߫ ߝߌߛߙߌ ߟߎ߬ ߟߊ߫߸ ߝߊ߲ߘߊߓߏ߲ ߠߎ߬ ߡߊߛߘߌ߬ߣߍ߲߬ ߞߏߢߊ߬߸ ߞߵߊ߬ ߦߌ߬ߘߊ߬ ߞߏ߫ ߞߏ߲ߞߏߜߍ ߕߟߋ߬ ߁߄ ߦߋ߫ ߟߏ߲ߓߊ߫ ߟߋ߬ ߘߌ߫ ߖߙߊ߬ߓߌ߬ ߢߐ߲߰ ߡߊ ߟߎ߬ ߓߟߏ߫.
ߞߊ߲ߡߋߙߋ߲ ߘߏ߫ ߞߵߊ߬ ߦߌ߬ߘߊ߬߸ ߞߵߊ߬ ߛߐ߬ߘߐ߲߬ ߊ߬ ߖߙߊ߬ߓߌ ߟߊ߫ ߝߌߛߙߌ ߦߴߊ߬ ߓߟߏ߫߸ ߞߏ߫: <<ߘߎߢߊ߫ ߜߟߍ߬ߦߊ߬ ߘߊ߫ ߢߊ ߺ ߊ ߺ ߢߊ߫߸ ߊ߲ ߧߴߊ߲ ߞߊߘߊ߲߫ ߠߊ߫ ߟߋ߬ ߞߊ߬ ߡߐ߰ ߟߊߛߍߥߊ߫߸ ߡߍ߲ ߘߌߡߊ߲ ߊ߲ ߧߋ߫.>>
ߢߌ߬ߣߊ߲߬ ߛߍ߲߫ ߝ߭ߊߟߊ߲ߕߍ߲ ߓߍ߲߬ ߘߊ߫ ߞߍ߲ߘߍߟߏ߲ ߠߋ߬ ߡߊ߬߸ ߝߊߦߌߘߊ߫ ߏ߬ ߟߋ ߦߋ߫ ߛߎ߲ߞߊߙߏߡߊߞߐߣߐ߲ ߞߍ߲ߘߍߟߏ߲߫ ߠߊߓߊ߲ ߘߌ߫ ߞߊ߬ ߘߏ߲߬ ߛߎ߲ߞߊߙߏ ߘߐ߫، ߊ߬ߟߋ ߦߋ߫ ߞߍ߲ߘߍߟߏ߲߫ ߠߋ߬ ߘߌ߫߸ ߡߍ߲ ߟߏ߲ ߦߋ߫ ߖߊ߲߰ߧߊ߬ ߟߊ߫، ߓߊߏ߬߸ ߊ߬ ߥߎ߬ߘߊ߲ ߣߴߊ߬ ߥߎ߬ߘߞߊ߬ߥߎߘߞߊ ߝߊ߲߬ߞߊ ߓߏ߲߬ߓߊ߫، ߒ߬ߓߊ߬߸ ߥߎ߬ߘߊ߲߫ ߝߌ߬ߟߊ߫ ߟߋ߬ ߞߊ߬ ߢߐ߲߯ߓߍ߲߬߸ ߛߍ߲߫ ߝ߭ߊߟߊ߲ߕߍ߲ ߥߎ߬ߘߊ߲߸ ߊ߬ ߣߌ߫ <<ߛߊߡߋߘߌ߫ ߟߊߓߊ߲>> ߥߎ߬ߘߊ߲، ߓߊߏ߬߸ ߞߍ߲ߘߍߟߏ߲߫ ߜߘߍ߫ ߕߍ߫ ߣߊ߬ ߟߊ߫ ߡߎ߬ߕߎ߲߬߸ ߛߎ߲ߞߊߙߏ ߘߌ߫ ߛߋ߫.
ߘߏ߫ ߟߎ߫ ߞߏ߬ߣߌ߲ ߦߋ߫ ߛߍ߲߫ ߝ߭ߊߟߊ߲ߕߍ߲ ߣߌ߲߬ ߦߋ߫ ߕߌߢߍߟߌ߫ ߝߎ߮ ߟߋ߬ ߘߌ߫߸ ߘߏ߫ ߟߎ߫ ߞߏ߬ߣߌ߲ ߦߴߊ߬ ߦߋ߫ ߟߊ߫ ߖߙߊ߬ߓߌ ߟߊߓߐ߫ ߟߏ߲ ߠߋ߬ ߘߌ߫ ߞߵߊ߬ߟߎ߫ ߛߣߐ߬ߡߍ ߞߣߐߞߏ ߦߌ߬ߘߴߊ߬ߟߎ߫ ߞߊ߬ߣߎ߲߬ߢߐ߲߮ ߠߊ߫.
ߞߊ߲ߞߊ߲߫ ߞߣߐ߫߸ ߞߏ߲ߞߏߜߍ ߕߟߋ߬ ߁߄ ߘߌߦߊ߫ ߘߊ߫ ߟߋ߬، ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߘߏ߫ ߟߎ߫ ߡߙߌ ߦߋ߫ ߥߊ߫ ߟߊ߫ ߙߐߡߎ߲߬ ߝߊ߰ߡߊ ߟߎ߬ ߟߊ߫ ߘߐ߬ߝߐ߫ ߕߊ߬ߡߌ߲߬ߣߍ߲ ߞߐ߫߸ ߒ߬ߞߊ߬ ߘߌ߯ߣߊ ߣߌ߫ ߟߐ߲ߠߌ߲ߧߊ ߟߊ߫ ߦߋߝߊߘߌ ߏ߬ ߣߴߊ߬ ߕߊ߫߸ ߖߙߊ߬ߓߌ ߓߘߊ߫ ߝߊ߲߬ߞߊ߫ ߛߐ߬ߘߐ߲߬߸ ߞߊ߬ ߞߏ߫ ߞߘߐ ߏ߬ ߟߎ߬ ߟߊߕߎߣߎ߲߫߸ ߞߵߊ߬ ߞߏ ߞߍ߫ ߝߘߏ߬ߓߊ ߘߌ߫ ߘߎߢߊ߫ ߞߣߐ߫ ߡߎ߬ߕߎ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
